1 Raja-Raja 15:1-34
15 Di taon na pasappulu ualuhon Raja Jerobeam+ anak ni si Nebat mamaretta, gabe raja ma si Abiam di Juda.+
2 Tolu taon ma ibana mamaretta di Jerusalem. Si Maaka+ ma goar ni omak ni si Abiam, i ma pahoppu ni si Abisalom.
3 Diulahon si Abiam do sude hajahaton na niulahon ni bapakna. Jala dang sian nasa rohana ibana mangoloi Jahowa Debatana. Dang diihutton ibana ompuna si Daud na mangoloi Debata sian nasa rohana.
4 Alai alani si Daud,+ diloas Jahowa do mamaretta* pinopparna di Jerusalem.+ Jala dibahen Debata do aman kota Jerusalem.
5 Ai diulahon si Daud do lomo ni roha ni Jahowa. Jala dang hea dialo ibana paretta ni Debata saleleng ni ngoluna, asing ni na masa tu si Uria halak Het i.+
6 Sai toktong do marporang si Rehabeam dohot si Jerobeam saleleng mangolu si Rehabeam.+
7 Sude na niulahon ni si Abiam dohot akka na binahenna, tarsurat do i di bukku sejarah taringot tu akka raja di Juda.+ Sai toktong do marporang si Abiam dohot si Jerobeam.+
8 Dung i mate ma si Abiam jala dikubur ma ibana rap dohot akka ompuna di Kota ni si Daud. Jala anakna si Asa+ ma na gabe raja manggattihon ibana.+
9 Di taon na paduapuluhon Raja Jerobeam mamaretta di Israel, mulai ma mamaretta si Asa di Juda.
10 Saleleng 41 taon ma si Asa mamaretta di Jerusalem. Si Maaka+ ma goar ni oppung boruna, i ma pahoppu ni si Abisalom.
11 Diulahon si Asa do lomo ni roha ni Jahowa+ songon na niulahon ni si Daud ompuna i.
12 Dipalao ibana ma sian luat i akka bawa na mangulahon seks dohot bawa.*+ Jala dibolokkon ibana ma sude patung sisombaon na dihagigihon* Debata, i ma na binahen ni akka ompuna.+
13 Dipaturun si Asa ma si Maaka+ oppung boruna i sian pangkatna na timbo.* Ai dibahen si Maaka do akka patung na dihagigihon Debata+ lao manomba debata na so sittong.* Dung i diruppakkon si Asa ma patung i jala ditutung di Rura Kidron.+
14 Alai, toktong dope adong disi akka inganan panombaon.*+ Nang pe songon i, dioloi ibana do Jahowa sian nasa rohana saleleng ni ngoluna.
15 Diboan si Asa ma tu jabu ni Jahowa akka barang naung dipabadia ibana dohot bapakna, i ma akka perak, mas, dohot akka barang na asing.+
16 Sai toktong do marporang si Asa dohot si Baesa+ raja ni Israel.
17 Dung i ro ma Raja Baesa na sian Israel mangalo halak Juda. Dipajongjong ibana ma benteng di kota Rama+ asa unang adong na boi kaluar sian i lao mandapotton* Raja Asa na di Juda.+
18 Dibuat si Asa ma sude perak dohot mas na adong di panimpanan ni arta na di jabu ni Jahowa dohot na di istana ni raja. Dipasahat ibana ma i sude tu akka parkarejona. Dung i, disuru Raja Asa ma akka parkarejona i mandapotton si Benhadad anak ni si Tabrimon pahoppu ni si Hesion. Raja ni Siria+ do si Benhadad na tinggal di Damaskus. Jala disuru Raja Asa ma akka parkarejona i mandok,
19 “Adong do parjanjiakku dohot ho, jala adong do parjanjian ni bapakku dohot bapakmu. Saonari, sundati ma parjanjianmu dohot si Baesa raja ni Israel, asa disuru ibana mulak akka tentarana sian hutakku. Hulehon pe perak dohot mas on tu ho.”
20 Ditangihon si Benhadad do hata ni Raja Asa i. Disuru ibana ma akka pamimpin ni tentarana marporang mangalo akka kota na di Israel. Ditaluhon nasida do kota Iyon,+ kota Dan,+ kota Abel-bet-maaka, sude luat na di Kineret, dohot sude huta ni halak Naptali.
21 Dung dibege si Baesa na masa i, pittor dipaso ibana ma pajongjokkon benteng di Rama. Jala toktong ma ibana tinggal di Tirza.+
22 Disuru Raja Asa ma sude halak Juda lao tu Rama. Disuru do nasida mamboan akka batu dohot hau na dipakke Raja Baesa lao pajongjokkon benteng i. Dung i dipakke Raja Asa ma i lao pajongjokkon benteng ni kota Geba+ na di Benjamin dohot kota Mispa.+
23 Sude na niulahon ni si Asa dohot akka na binahenna, tarsurat do i di bukku sejarah taringot tu akka raja di Juda. Disurat do disi taringot tu huasona dohot akka kota naung dipajongjong ibana. Alai dung matua, susa do ibana ala haccit patna.+
24 Dung i, mate ma si Asa jala dikubur ma ibana rap dohot akka ompuna di Kota ni si Daud. Anakna si Jehosapat+ ma na gabe raja manggattihon ibana.
25 Di taon na paduahon si Asa mamaretta di Juda, gabe raja ma si Nadab+ anak ni si Jerobeam di Israel. Saleleng dua taon ma ibana mamaretta di Israel.
26 Sai diulahon si Nadab do akka na jahat di jolo ni Jahowa. Jala diihutton ibana do hajahaton ni bapakna+ na mambahen mardosa halak Israel.+
27 Dung i, ro ma si Baesa anak ni si Ahia pinoppar ni si Isasar mangalo si Nadab. Dipamate ibana ma si Nadab di Gibeton+ kota ni halak Palistim. Tikki i, dihaliangi si Nadab dohot sude halak Israel do kota Gibeton lao manaluhon kota i.
28 Mate ma si Nadab dibahen si Baesa di taon na patoluhon Raja Asa mamaretta di Juda. Dukkon i, gabe raja ma si Baesa manggattihon si Nadab.
29 Dukkon gabe raja, dipamate si Baesa ma sude pinoppar ni si Jerobeam. Dang adong nanggo sada pe pinoppar ni si Jerobeam na so dipamate. Dipamate ibana do nasida sude songon hata ni Jahowa na dipaboa Panurirang Ahia halak Silo i.+
30 Masa pe i, alani dosa ni si Jerobeam do. Ai dibahen ibana do halak Israel mardosa. Jala on ma na mambahen haccit roha ni Jahowa Debata ni halak Israel.
31 Sude na niulahon ni si Nadab dohot akka na binahenna, tarsurat do i di bukku sejarah taringot tu akka raja di Israel.
32 Sai toktong do marporang si Asa dohot Raja Baesa raja ni Israel.+
33 Di taon na patoluhon Raja Asa mamaretta di Juda, mamaretta ma si Baesa anak ni si Ahia di Tirza. Saleleng 24 taon ma si Baesa mamaretta di Israel.+
34 Sai diulahon si Baesa do na jahat di jolo ni Jahowa.+ Diihutton ibana do hajahaton ni si Jerobeam na mambahen mardosa halak Israel.+
Surat na di toru
^ As. “dilehon Jahowa lampu tu”.
^ Na nidokna dison, i ma halak na manjual dirina manang na mangulahon seks ala manomba debata na so sittong.
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
^ As. “pangkatna gabe ratu”.
^ Manang “na boi manadikkon kota i jala lao tu huta ni”.
