1 Raja-Raja 14:1-31
14 Di sada tikki marsahit ma anak ni si Jerobeam na margoar si Abia.
2 Didok si Jerobeam ma tu istrina, “Lao ma ho tu Silo. Ai disi do Panurirang* Ahia. Ibana do na paboahon tu au na lao gabe raja do au di Israel.+ Alai unang ma patudu na istrikku ho, asa unang ditanda halak ho.
3 Boan ma sappulu roti, akka kue, dohot sabotol madu. Dung i lao ma ho. Paboaonna do annon aha na lao masa tu anakta on.”
4 Lao ma istri ni Jerobeam tu Silo+ jala diulahon ibana do songon na nidok ni suamina i. Dung i sahat ma ibana di jabu ni si Ahia. Nungnga matua si Ahia jala dang boi be marnida.
5 Alai nungnga didok Jahowa hian tu si Ahia, “Naeng ro do istri ni si Jerobeam mandapotton ho lao manukkun taringot anakna. Ai marsahit do nuaeng anakna. Alai dang na lao patuduhononna na istri ni si Jerobeam ibana. Nang pe songon i, hupaboa pe tu ho aha na lao dohononmu tu ibana.”*
6 Tikki masuk istri ni si Jerobeam tu jabu i, dibege si Ahia ma soara ni patna. Dung i didok si Ahia ma, “Masuk ma ho istri ni si Jerobeam. Boasa ma pola tabunihononmu na istri ni si Jerobeam ho? Nungnga disuru Debata au pasahatton hatana tu ho. Alai unang ma dirippu ho barita na denggan na lao paboaokku tu ho.
7 Mulak ma ho. Dokkon ma tu si Jerobeam, ‘Songon on do hata ni Jahowa Debata ni halak Israel, “Nungnga hupillit ho sian tonga-tonga ni bangsom lao mamaretta bangsokku Israel.+
8 Hubuat do harajaon i sian pinoppar ni si Daud jala hulehon do i tu ho.+ Alai dang ditiru ho si Daud naposokki. Toktong do diulahon si Daud parettakku, diihutton ibana do akka dalanku sian nasa rohana, jala toktong do diulahon ibana lomo ni rohakku.+
9 Alai unjahat do ho sian akka halak na mamaretta andorang so ho. Dibahen ho do debata na asing, i ma akka patung sisombaon i na mambahen haccit rohakku.+ Jala ditinggalhon ho do au.+
10 Alani i, parookku ma hasusaan tu pinoppar ni si Jerobeam. Pamateonku ma sude bawa* sian pinopparna, dohot ma i akka na undangol di Israel. Jala bolokkonokku ma sude pinoppar ni si Jerobeam+ songon halak na mambolokkon kotoran!
11 Ganup pinopparmu na mate di kota, allangon ni biang ma. Jala na mate di luar ni kota, allangon ni pidong ma. Ai Jahowa do na mandok i.”’
12 “Saonari mulak ma ho. Disi sahat ho di kota, mate do anakmi.
13 Sude ma annon halak Israel mangandungi jala mananom ibana. Jala holan ibana do sian pinoppar ni si Jerobeam na dikubur. Ai adong do na denggan sian ibana diida Jahowa Debata ni Israel.
14 Dung i, pilliton ni Jahowa ma sada raja lao mamaretta Israel. Pamateonna ma sude pinoppar ni si Jerobeam+ di tikkina, jala saonari ma i.
15 Pamateon ni Jahowa ma halak Israel, jala gabe songon hau tolong na meol-eol di aek ma nasida. Uppatonna ma nasida sian tano na denggan on, i ma tano na nilehonna tu akka ompu ni nasida.+ Jala paserakonna ma nasida sahat tu bariba ni Sunge Euprat.+ Ai dibahen nasida do akka tiang sisombaon*+ na mambahen haccit roha ni Jahowa.
16 Tinggalhonon ni Debata ma halak Israel alani dosa ni si Jerobeam, jala ala dohot halak Israel mardosa dibahen ibana.”+
17 Dung i, mulak ma istri ni si Jerobeam tu hutana di Tirza. Tikki sahat ibana di pintu ni jabuna, mate ma anakna i.
18 Dikubur nasida ma ibana, jala sude ma halak Israel mangandungi ibana, songon na nidok ni Jahowa marhite Panurirang Ahia.
19 Sude na niulahon ni si Jerobeam tarsurat do i di bukku sejarah taringot tu akka raja di Israel. Disurat do disi songon dia ibana marporang+ jala mamaretta.
20 Saleleng 22 taon ma si Jerobeam mamaretta gabe raja. Mate ma ibana jala dikubur di kuburan ni akka ompuna.+ Dung i anakna si Nadab ma na manggattihon ibana gabe raja.+
21 Tikki i, nungnga mamaretta si Rehabeam anak ni si Salomo di Juda. Si Naama do goar ni omakna, i ma halak Ammon i.+ Marumur 41 taon ma si Rehabeam tikki gabe raja. Jala saleleng 17 taon ma ibana mamaretta di Jerusalem, i ma kota na dipillit Jahowa+ sian sude kota ni marga ni Israel lao pasangappon goarna.+
22 Diulahon halak Juda do na jahat di jolo ni Jahowa.+ Jala umbalga do dosa ni nasida sian dosa ni akka ompu ni nasida, na mambahen muruk situtu Debata.+
23 Di akka dolok dohot di toru ni hau na balga,+ dibahen nasida do akka inganan panombaon,*+ tugu sisombaon,* dohot akka tiang sisombaon.*+
24 Adong do muse di luat i akka bawa na mangulahon seks dohot bawa.*+ Diulahon nasida do sude ulaon na dihagigihon Debata, songon na diulahon akka bangso na dipalao Jahowa sian jolo ni bangso Israel.
25 Di taon na palimahon Raja Rehabeam mamaretta, ro ma Raja Sisak+ na sian Mesir marporang mangalo kota Jerusalem.+
26 Dibuat Raja Sisak do akka arta na adong di jabu ni Jahowa dohot na adong di istana ni raja.+ Dibuat ibana do muse akka na binahen ni si Salomo, dohot ma i sude perisai na sian mas.+
27 Alani i, dibahen Raja Rehabeam ma akka perisai na sian tombaga lao manggattihon akka perisai na sian mas i. Dipasahat ibana ma akka perisai i tu kepala ni akka pengawal na manjaga pintu masuk ni istana ni raja.
28 Molo ro raja i tu jabu ni Jahowa, boanon ni akka pengawal i ma akka perisai i. Dung i paulakon ni nasida ma i tu inganan ni akka pengawal.
29 Sude na niulahon ni Raja Rehabeam dohot akka na binahenna, tarsurat do i di bukku sejarah taringot tu akka raja di Juda.+
30 Sai toktong do marporang si Rehabeam dohot si Jerobeam.+
31 Mate ma si Rehabeam jala dikuburhon ma ibana rap dohot akka ompuna di Kota ni si Daud.+ Dung i, anakna si Abiam*+ ma na manggattihon ibana gabe raja. Si Naama halak Ammon i+ do omak ni si Rehabeam.
Surat na di toru
^ Manang “paboa ma tu ibana songon on”.
^ As. “sude na kossing di tembok”. Di bahasa Heber songon on ma didok lao mangaleai bawa.
^ Na nidokna dison, i ma halak na manjual dirina manang na mangulahon seks ala manomba debata na so sittong.
^ Digoari do ibana muse si Abia.
