1 Raja-Raja 12:1-33
12 Lao ma si Rehabeam tu Sikem. Ai nungnga pungu sude halak Israel di Sikem+ lao mambahen ibana gabe raja.+
2 Dibege si Jerobeam anak ni si Nebat ma na masa i. Tikki i, di Mesir dope ibana.+ Ai lari do ibana tusi alani Raja Salomo.
3 Disuru halak Israel ma halak mangalap si Jerobeam sian i. Ro ma si Jerobeam rap dohot sude halak Israel mandapotton si Rehabeam. Didok nasida ma,
4 “Massai borat do tanggung jawabnami* dohot ulaonnami dibahen bapakmu.+ Alani i, mangido ma hami tu ho ale tuan, orui ma i asa huoloi hami ho.”
5 Didok ibana ma, “Mulak ma jolo hamu, tolu ari nai ma hamu ro muse.” Gabe mulak ma nasida.+
6 Disukkun Raja Rehabeam ma akka natua-tua,* i ma akka parkarejo ni si Salomo hian. Didok ibana ma, “Menurut hamu, aha ma alussu tu nasida?”
7 Dialusi nasida ma, “Molo dioloi ho hata ni nasida, dioloi ho pangidoan ni nasida, jala denggan dibahen ho mangalusi nasida, toktong ma oloan ni nasida ho.”
8 Alai dang ditangihon si Rehabeam poda ni akka natua-tua i. Disukkun ibana ma muse akka donganna na poso, i ma akka donganna magodang na gabe parkarejona.+
9 Didok ibana ma tu nasida, “Ro do akka halak mandok tu au, ‘Orui ma poang tanggung jawab* na nilehon ni bapakmu tu hami.’ Menurut hamu, aha ma alussu tu nasida?”
10 Didok akka donganna magodang i ma, “Tu halak na mandok, ‘Orui ma poang tanggung jawab* na nilehon ni bapakmu tu hami’, songon on ma dokkon, ‘Unggodang dope pangidoakku sian pangidoan ni bapakku.*
11 Nungnga borat dibahen bapakku tanggung jawabmuna* kan, tambaakku dope i. Lissing-lissing do dibahen bapakku tu hamu, alai molo au lissing-lissing na marsuga do bahenokku.’”
12 Ro ma si Jerobeam rap dohot halak Israel mandapotton raja i di ari na patoluhon. Ai nungnga didok raja i, “Tolu ari nai ma hamu ro muse.”+
13 Alai kasar do alus ni raja i tu nasida. Ai dang ditangihon ibana poda ni akka natua-tua i.
14 Diihutton si Rehabeam do hata ni akka donganna na poso i. Didok ibana ma, “Nungnga borat dibahen bapakku tanggung jawabmuna* kan, tambaakku dope i. Lissing-lissing do dibahen bapakku tu hamu, alai molo au lissing-lissing na marsuga do bahenokku.”
15 Dang ditangihon raja i pangidoan ni bangso i. Alai dalan ni Jahowa do i,+ asa saut hata ni Jahowa tu si Jerobeam anak ni si Nebat, na dipasahat Panurirang* Ahia+ halak Silo i.
16 Dung diida halak Israel na so dilehon raja i pangidoan ni nasida, didok nasida ma, “Dang adong urusannami tu si Daud. Dang adong hujalo hami parbagianan sian anak ni si Isai i. Mulak ma hamu ale halak Israel tu debatamuna be. Saonari, lok ma dibahen pinoppar ni si Daud i lomona!” Dung i, mulak ma halak Israel tu jabuna* be.+
17 Holan halak Israel na maringanan di kota ni halak Juda nama na dirajai si Rehabeam.+
18 Adong do parkarejo ni raja na margoar si Adoram,+ na dipillit lao mangatur akka halak na disuru karejo tu raja. Disuru Raja Rehabeam ma ibana manjuppangi halak Israel. Alai, didangguri halak Israel do si Adoram sappe mate. Jala lari do Raja Rehabeam tu Jerusalem mamakke kareta hoda.+
19 Sahat tu sadari on, toktong do mangalo+ halak Israel tu pinoppar ni si Daud.
20 Dung dibege halak Israel naung mulak si Jerobeam, marpungu ma nasida sude. Dipillit nasida ma si Jerobeam gabe raja ni Israel.+ Alani i, holan marga Juda nama na setia mangihutton pinoppar ni si Daud.+
21 Dung sahat si Rehabeam di Jerusalem, pittor dipapungu ibana ma sude marga Juda dohot marga Benjamin. Adong ma 180.000 tentara na jago* na dipapungu ibana. Dipapungu do nasida lao mangalo sude halak Israel, asa si Rehabeam anak ni si Salomo i muse na marhuaso tu sude halak Israel.+
22 Alai didok Debata ma tu si Semaya+ panurirang ni Debata na sittong i,
23 “Paboa ma tu si Rehabeam anak ni si Salomo raja ni halak Juda i, tu sude pinoppar ni marga Juda, marga Benjamin, dohot tu rakyatna na asing,
24 ‘Songon on do hata ni Jahowa, “Unang ma lao hamu mangalo halak Israel. Ai na marhaha maranggi do hamu. Mulak ma hamu tu jabumuna be, ai Au do na mambahen on masa.”’”+ Jadi dioloi nasida do hata ni Jahowa i. Mulak ma nasida tu jabuna be songon na nidok ni Jahowa.
25 Dibangun si Jerobeam ma benteng ni kota Sikem+ na di Dolok Epraim. Jala tinggal ma ibana disi. Dung i, lao ma muse ibana, jala dibangun ibana ma muse benteng ni kota Penuel.+
26 Didok si Jerobeam ma di bagasan rohana, “Mulak do muse harajaon i tu pinoppar ni si Daud,+
27 molo toktong nasida lao mangalehon pelean tu jabu ni Jahowa di Jerusalem.+ Mulak ma annon roha ni nasida tu si Rehabeam raja ni halak Juda, tuan ni nasida i. Bunuon ni nasida ma au. Jala gabe si Rehabeam raja ni halak Juda i ma na gabe raja ni nasida.”
28 Alani i, makkatai ma si Jerobeam dohot akka penasehatna. Dung i, dibahen ibana ma dua patung anak ni lombu na sian mas.+ Jala didok ibana ma tu rakyatna, “Susa nai hamu sai lao tu Jerusalem. On do Debatamuna, na mamboan hamu kaluar sian Mesir.”+
29 Dibahen si Jerobeam ma patung i sada di Betel+ jala na sada nai di Dan.+
30 Gabe mardosa+ ma halak Israel ala mangulahon i. Lao do nasida dao tu Dan lao manomba patung i.
31 Dipajongjong si Jerobeam ma akka inganan panombaon.* Dipillit ibana do muse akka malim sian bangso i, alai dang sian marga Lepi.+
32 Dibahen si Jerobeam do sada perayaan na songon perayaan na di Juda.+ Dibahen ibana ma i di ari na pasappulu limahon di bulan na paualuhon. Dilehon ibana do pelean tu patung anak ni lombu i di langgatan na binahenna di Betel.+ Jala dipillit ibana do akka malim lao martugas di langgatan i.
33 Di ari pasappulu limahon di bulan na paualuhon, i ma bulan na pinillitna i, mulai ma dilehon si Jerobeam pelean di langgatan na di Betel i. Laos ditottuhon ibana ma i gabe perayaan na ikkon ulahonon ni halak Israel, jala ibana sandiri do na manutung pelean di langgatan i asa nakkok timusna.
Surat na di toru
^ As. “auga”.
^ As. “auga”.
^ As. “Umbalga do anak ni jari-jarikku sian gotting ni bapakku”.
^ As. “augamuna”.
^ As. “augamuna”.
^ As. “tu kemahna”.
^ As. “na tarpillit”.
