Ulaon ni Apostel 20:1-38

  • Si Paulus di Makedonia dohot di Junani (1-6)

  • Si Eutikus na di Troas dipahehe (7-12)

  • Sian Troas tu Miletus (13-16)

  • Si Paulus pajumpang dohot angka sintua na di Epesus (17-38)

    • Mangajari sian jabu tu jabu (20)

    • “Umlas do roha ni halak na mangalehon” (35)

20  Dung salpu na gaor i, dijou si Paulus ma angka sisean i. Dipatogu ibana ma nasida jala dipaboa ma na naeng laho nama ibana. Dung i, borhat ma ibana tu Makedonia.  Didalani ibana ma angka luat na disi jala dilehon ibana ma angka poda laho patoguhon angka sisean. Dung i sahat ma ibana di Junani.  Saleleng tolu bulan ma ibana disi. Alai tingki naeng markapal ibana tu Siria, dibege ibana ma sangkap ni halak Jahudi laho mambunu ibana. Alani i diputushon ma asa mamolus sian Makedonia ibana laho mulak.  Didongani si Sopater anak ni si Pirus na sian Berea do ibana, si Aristarkus dohot si Sekundus na sian Tessalonik, si Gayus na sian Derbe, si Timoteus, jala si Tikikus dohot si Tropimus na sian Provinsi Asia.  Parjolo ma nasida borhat jala dipaima ma hami di Troas.  Alai dung salpu Perayaan Roti na So Marragi, markapal ma hami sian Pilippi. Dung lima ari di pardalanan, pajumpang ma hami dohot nasida di Troas jala pitu ari ma hami disi.  Di ari parjolo di minggu i, tingki marpungu hami laho mangan, mulai ma si Paulus mangkatai tu nasida. Jala torus do ibana mangkatai sahat tu tonga borngin, ala naeng borhat nama ibana marsogotna i.  Godang do lampu dipagalak di kamar parginjang inganannami marpungu i.  Adong ma sahalak doli-doli na margoar si Eutikus na hundul di jandela. Tingki mangkatai dope si Paulus, mondok-ondok ma ibana laos tarpodom. Gabe madabu ma ibana sian tingkat tolu jala nunga mate ibana tingki diangkat. 10  Dung i turun ma si Paulus. Manungkap ma ibana di atas ni doli-doli i jala dihaol, didok ma, “Unang pola marsak hamu, nunga mangolu ibana muse.” 11  Dung i nangkok ma si Paulus muse tu ginjang jala mulai ma nasida mangan.* Ditorushon ibana ma muse mangkatai sahat tu manogotna. Dung i borhat ma ibana. 12  Mangolu do doli-doli i diboan nasida mulak jala mansai las do roha ni nasida. 13  Parjolo ma hami nangkok tu kapal jala borhat tu Asos. Alai mardalan pat do si Paulus tusi. Sian i ma boanonnami si Paulus markapal songon tudu-tudu na pinaboana tu hami. 14  Dung didapothon ibana hami di Asos, rap ma hami markapal jala borhat tu Metilene. 15  Marsogotna i, torus ma hami markapal jala sahat di bariba ni Pulo Kios. Marsogotna i so ma hami satongkin di Samos jala marsogotna i muse sahat ma hami di Miletus. 16  Nunga ditontuhon si Paulus asa torus hami markapal so pola maradian di Epesus, asa unang pola habis tingki di Provinsi Asia. Ai naeng hatop ibana sahat tu Jerusalem, molo boi andorang so Perayaan Pentakosta. 17  Alai sian Miletus, disuru si Paulus ma halak tu Epesus manjou angka sintua na di huria i. 18  Dung sahat nasida, didok si Paulus ma, “Tangkas do diboto hamu songon dia ngolungku di tonga-tongamuna mulai sian na sahat ahu di Provinsi Asia on. 19  Marhobas do ahu tu Tuhan* i songon hatoban, mardongan serep ni roha dohot ilu-ilu jala manaon hasusaan alani sangkap ni halak Jahudi na jahat. 20  Nang pe songon i, ndang hea hutahan diringku laho paboahon angka na denggan tu hamu, manang laho mangajari hamu di jolo ni natorop dohot sian jabu tu jabu. 21  Alai tangkas do hupaboa tu halak Jahudi dohot tu halak Junani na ingkon marhamubaon nasida, manomba Debata jala porsea tu Tuanta Jesus. 22  Alani panogu-noguon ni tondi parbadia, borhat nama ahu saonari tu Jerusalem, nang pe ndang huboto manang aha na laho masa tu ahu disi. 23  Sian kota tu kota, nunga mulak-ulak dipaboa tu ahu marhite tondi parbadia naung dipaima hurungan dohot hasusaan i ahu. 24  Nang pe songon i ndang huetong ringkot ngolungku, asal ma boi hupaujung langkangki dohot ulaon na hujalo sian Tuan Jesus, i ma paboahon barita na uli taringot tu asi ni roha ni Debata na mansai balga i. 25  “Huboto do, sude hamu naung mambege barita Harajaon i sian ahu, ndang na laho idaonmuna be bohingku. 26  Alani i, hujou do hamu sadari on asa gabe saksi, patuduhon naung ias ahu sian mudar ni sude jolma. 27  Ai ndang hea hutahan diringku laho paboahon tu hamu sude sangkap ni Debata. 28  Parrohahon hamu ma dirimuna dohot sude punguan i. Ai nunga dipillit hamu marhite tondi parbadia gabe pangaradoti di nasida. Parmahani hamu ma huria ni Debata naung ditobus marhite mudar ni Anakna. 29  Huboto do, dung laho ahu ro ma angka serigala na jahat sian tonga-tongamuna. Jala kejam do nasida tu punguan i. 30  Jala sian tonga-tongamuna adong ma na mangajarhon ajaran na so sintong, asa gabe mandao angka sisean i sian punguan i jala mangihuthon nasida. 31  “Alani i jaga ma hamu. Jala ingot hamu ma, saleleng tolu taon ahu mangajari hamu ganup marsada-sada arian nang borngin mardongan ilu-ilu. 32  Saonari pe, hupasahat ma hamu tu Debata dohot tu barita asi ni rohana na mansai balga i, i ma barita na mambahen hamu togu jala na mambahen hamu mandapot pasu-pasu rap dohot sude halak na badia. 33  Ndang hea dipangido rohangku perak manang mas, manang pangkean sian manang ise pe. 34  Diboto hamu do, marhite tanganku sandiri do huulahon ulaonku laho paradehon na porlu di ahu dohot na porlu di angka halak na rap dohot ahu. 35  Hupatuduhon do sitiruon tu hamu marhite ringgas karejo songon naung hubahen on, ingkon urupanmuna do na gale. Ingot hamu ma hata ni Tuan Jesus na mandok, ‘Umlas* do roha ni halak na mangalehon sian na manjalo.’” 36  Dung sae didok si Paulus sudena i, marsinggang ma ibana rap dohot nasida sude jala martangiang. 37  Tumatangis ma nasida sude, dihaol jala diumma nasida ma si Paulus. 38  Mansai lungun ma roha ni nasida tarlumobi ala didok si Paulus na so idaon ni nasida be ibana. Dung i ditaruhon nasida ma ibana tu kapal.

Surat na di toru

As. “diponggoli ma roti i”.
Manang boi do “Tuan”. Di bahasa Junani Kyrios. Ida di Kamus.
Manang “Martuaan”.