Ulaon ni Apostel 2:1-47

  • Di ari Pentaskosta songgop tondi parbadia tu angka sisean (1-13)

  • Jamita ni si Petrus (14-36)

  • Mangkorhon do jamita ni si Petrus tu natorop i (37-41)

    • 3.000 halak tardidi (41)

  • Halak Kristen na marsada ni roha (42-47)

2  Tingki Perayaan Pentakosta, marpungu ma sude sisean i di sada inganan.  Tompu ma tarbege soara sian langit, songon soara ni alogo na gogo jala digohi ma jabu inganan hundulan ni nasida i.  Dung i, diida nasida ma na suman songon dila ni api na marserak jala songgop ma i tu ganup nasida.  Digohi tondi parbadia ma nasida sude jala mulai ma nasida mangkatai di bahasa na asing, hombar tu na nilehon ni tondi parbadia i tu nasida.  Di tingki i, di Jerusalem do halak Jahudi na ro sian saluhut bangso na marsitutu manomba Debata.  Alai tingki tarbege soara i, marpungu ma natorop i jala longang ma nasida, ala dibege nasida angka sisean i mangkatai di bagasan bahasa ni nasida.  Longang ma nasida sude, ninna ma, “Ai nda halak Galilea do sude na mangkatai i?  Songon dia do i boi masa? Ai ganup hita mambege bahasa di luatta be.*  Halak Partia do hita, halak Media, halak Elamit, sian Mesopotamia, sian Judea dohot sian Kappadosia, sian Pontus dohot sian Provinsi Asia, 10  sian Prigia, dohot sian Pampilia, sian Mesir dohot sian angka luat ni Libia na jonok tu Kirene, halak Rom na maringanan dison, halak Jahudi dohot angka halak na mangihuthon agama Jahudi,* 11  halak Kreta dohot halak Arab, alai tabege do nasida mangkatai di bahasanta be taringot tu ulaon ni Debata na balga.” 12  Gabe longang ma nasida sude, jala ninna ma sama nasida, “Aha do lapatan ni on?” 13  Alai adong do deba na mangarehei nasida ninna ma, “Ai na mabuk do nasida.” 14  Alai jongjong ma si Petrus rap dohot angka apostel na 11 i, gogo ma didok tu nasida, ninna ma, “Hamu halak Judea dohot sude halak na maringanan di Jerusalem, manat ma parrohahon hamu hatangkon. 15  Ndang na mabuk angka halak on songon na nidokmuna i, ai jam sia manogot dope nuaeng.* 16  Alai on ma na nidok ni panurirang Joel, 17  ‘“Di angka ari parpudi,” didok Debata, “Usehononku ma tondi parbadia tu ganup halak. Manurirangi ma angka anak dohot borumuna, mandapot parnidaan ma angka na posomuna jala marnipi ma angka natua-tuamuna. 18  Gari tu angka hatobanku baoa dohot borua, usehononku ma tondi parbadia di ari i jala manurirangi ma nasida. 19  Bahenonku ma angka tanda halongangan* di ginjang di langit i dohot di toru di tano on, mudar dohot api dohot timus na hapal. 20  Gabe holom ma mata ni ari jala marrara ma bulan songon mudar andorang so ro ari ni Jahowa na balga dohot na marmulia i. 21  Jala malua do ganup halak na manjou goar ni Debata, i ma Jahowa.”’ 22  “Hamu halak Israel, tangihon hamu ma hata on: Dipatuduhon Debata do Jesus halak Nasaret i tu hamu di jolo ni natorop marhite angka tanda halongangan* na binahen ni Debata marhite-hite ibana di tonga-tongamuna, songon naung binotomuna i. 23  Dipasahat do ibana hombar tu naung ditontuhon* dohot naung diboto Debata hian, nunga dipakkuhon hamu ibana tu sada tiang marhite tangan ni angka pardosa jala dibunu hamu do ibana. 24  Alai dipahehe Debata do ibana, dipalua do ibana sian hamatean,* ai ndang tartiop ni hamatean i ibana. 25  Ai didok si Daud do taringot tu ibana, ‘Sai di jolongku* do tongtong Jahowa. Ai di siamunku do Ibana asa unang ganggu rohangku. 26  Alani i, sonang ma rohangku jala marlas ni roha* ma dilangku. Jala maringanan ma ahu* di bagasan pangkirimon. 27  Ai ndang pasombuonmu ahu di Kuburan* jala ndang loasonmu busuk naposom na marsihohot. 28  Nunga dibahen ho ahu mamboto dalan tu hangoluan; jala nunga digohi ho ahu dohot las ni roha situtu di adopanmu.’ 29  “Hamu angka dongan, loas hamu ma jolo ahu mangkatai tu hamu taringot tu ompunta si Daud ndang mardongan biar ni roha. Naung mate do ibana jala dikubur, jala dison do kuburanna sahat tu sadari on. 30  Ai panurirang do ibana, jala diboto ibana do naung marsumpa Debata na laho pahundulonna sahalak sian pinomparna di habangsana* i. 31  Nunga diida jala nunga didok ibana taringot tu haheheon ni Kristus, ndang pasombuon ni Debata ibana di Kuburan* jala ndang loasonna busuk ibana. 32  I ma Jesus naung pinahehe ni Debata jala sude do hami mangida i. 33  Ala nunga dipatimbo Debata ibana tu siamunna jala nunga dijalo ibana tondi parbadia na jinanjihon ni Ama i, diusehon ibana ma i tu hami songon na niidamuna dohot na binegemuna. 34  Ai ndang nangkok si Daud tu banua ginjang alai didok ibana do, ‘Didok Jahowa do tu tuanku, “Hundul ma ho di siamunhon 35  paima hubahen angka musum gabe sidege-degean ni patmu.”’ 36  Alani i naeng ma tangkas botoon ni sude halak Israel, ia Jesus naung dipakkuhon hamu tu hau, nunga dibahen Debata ibana gabe Tuan dohot Kristus.” 37  Dung dibege nasida hatorangan i, hona ma i tu roha ni nasida. Gabe didok nasida ma tu si Petrus dohot tu angka apostel na asing, “Hamu angka dongan, aha ma na ingkon sibahenonnami?” 38  Dialusi si Petrus ma nasida, “Muba ma hamu, ganup ma hamu tardidi di bagasan goar ni Jesus Kristus asa disesa dosamuna, dung i jaloonmuna ma silehon-lehon, i ma tondi parbadia. 39  Ai tu hamu dohot tu ianakhonmuna do janji i dohot tu sude halak na di inganan na dao, i ma angka halak na jinou ni Jahowa Debatanta asa ro tu Ibana.” 40  Jala godang dope hata didok si Petrus laho paboahon barita na uli jala sai dijujui do nasida, ninna ma, “Palua ma dirimuna sian sundut* na lilu on.” 41  Alani i, tardidi ma angka na manjalo hata i di bagasan las ni roha jala adong ma hira-hira 3.000 halak na tamba gabe sisean di na sadari i. 42  Jala tongtong ma nasida marsiajar tu angka apostel, rap marsaor,* rap mangan jala rap martangiang. 43  Godang do angka tanda halongangan* dibahen angka apostel. Alani i, ganup halak na mangida i pasangaphon Debata. 44  Sude ma angka na porsea i rap marpungu jala rap nampunasa do nasida di saluhut arta nasida. 45  Digadis nasida ma angka arta ni nasida, dung i dibagihon ma tuhorna i tu sude hombar tu na porlu di ganup halak. 46  Di bagasan sada ni roha, ro do nasida tu bagas joro ganup ari. Rap mangan do nasida di jabu ni nasida jala marbagi sipanganon do nasida di bagasan las ni roha dohot ias ni roha. 47  Dipuji nasida do Debata jala lomo do roha ni sude halak mangida nasida. Ganup ari ma ditambai Jahowa tu nasida angka halak na laho dipalua.

Surat na di toru

Manang “bahasa di huta hatubuanta be”.
As. “proselit”.
Di tingki ni Jesus tudos ma on tu jam patoluhon. On dietong sian parbinsar ni mata ni ari.
Manang “mukjizat”.
Manang “mukjizat”.
Manang “tu sangkap”.
As. “sian bernit ni hamatean”; Manang boi do “sian tali ni hamatean”.
Manang “di jolo ni matangku”.
Manang “marolop-olop”.
As. “dagingku”.
Manang “di Hades”, kuburan. Ida di Kamus.
Manang “di harajaonna”.
Manang “di Hades”, kuburan. Ida di Kamus.
Manang “generasi”.
Manang “marbagi”.
Manang “mukjizat”.