Mateus 20:1-34

  • Dos do upa ni pangula ni porlak anggur (1-16)

  • Disurirangkon muse taringot tu hamamate ni Jesus (17-19)

  • Mangido huaso di Harajaon (20-28)

    • Jesus ma tobusan humongkop torop jolma (28)

  • Dipamalum dua halak na mapitung (29-34)

20  “Tudos do Harajaon banua ginjang i tu sahalak nampuna porlak anggur. Sogot dope ari, borhat ma ibana mangalului halak laho mangula tu porlak anggurna.  Dung dos pangkataionna dohot angka pangula i taringot tu upa sadari i ma sadinar,* disuru ma nasida tu porlak anggurna.  Hira-hira jam sia manogot,* laho ma ibana muse tu pasar. Diida ma disi halak na asing, na so karejo jala na sai jongjong.  Didok ma tu nasida, ‘Dohot ma hamu karejo tu porlak anggurhu, hulehon pe gaji na patut tu hamu.’  Jadi, borhat ma nasida. Dung i, songon i ma muse dibahen hira-hira jam 12 arian* dohot jam tolu botari.*  Jala laho ma ibana muse hira-hira jam lima botari,* jumpangna ma halak na asing na jongjong sambing. Gabe didok ibana ma tu nasida, ‘Boasa sai jongjong hamu dison jala ndang karejo sadari on?’  Dialusi nasida ma, ‘Ndang adong na manjou hami.’ Didok ibana ma tu nasida, ‘Molo songon i, dohot ma hamu laho tu porlak anggurhu.’  “Dung holom ari, didok nampuna porlak anggur i ma tu mandurna, ‘Jou ma angka pangula i jala garar ma gaji ni nasida, mulai sian na masuk parpudi sahat tu na masuk parjolo.’  Dung i ro ma halak na masuk jam lima botari, ganup ma nasida manjalo sadinar. 10  Jadi tingki ro angka halak na parjolo masuk i, dirimpu ma gumodang jaloon ni nasida, alai tu nasida pe sadinar do dilehon. 11  Tingki dijalo i, marungut-ungut ma nasida tu nampuna porlak i. 12  Ninna ma, ‘Halak na parpudi masuk i holan sajom do karejo, hape hami karejo sadari didadang las ni ari, alai dos dilehon ho upanami!’ 13  Alai ninna ma tu sahalak sian nasida, ‘Dongan, ndang adong na sala hubahen tu ho. Nda naung dos hian pangkataionta taringot tu na sadinar i? 14  Jalo ma na di ho jala laho ma. Ai naeng lehononku do tu na parpudi i upa songon na tu ho. 15  Ai nda lomongku do mamangke hepengku? Manang na gabe mangiburu do roham* ala burju* ahu?’ 16  Songon i ma dalanna, na parpudi hian gabe parjolo jala na parjolo gabe parpudi.” 17  Tingki di pardalanan laho tu Jerusalem, pulik ma ditogihon Jesus na 12 sisean i jala ninna ma tu nasida, 18  “Borhat do hita tu Jerusalem jala pasahatonna ma Anak ni jolma i tu malim kepala* dohot tu siboto surat. Bahenon ni nasida ma tu ibana uhuman mate. 19  Jala pasahaton ni nasida ma ibana tu angka bangso asa direhei, dilinsingi, diuhum di sada hau, jala hehe ma ibana di ari patoluhon.” 20  Dung i, ro ma tunggane boru ni si Sebedeus rap dohot angka anakna mandapothon Jesus, jala marsinggang ma ibana laho mandok pangidoanna. 21  Didok Jesus ma tu ibana, “Aha do na pinangidom?” Didok ibana ma tu Jesus, “Bahen ma hundul anakku na dua on, sada di siamunmu jala sada di hambirangmu di Harajaonmi.” 22  Ninna Jesus ma, “Ndang diboto hamu manang aha na pinangidomuna. Tarinum hamu ma siinumon sian mangkuk panginumanki?” Dialusi nasida ma ibana, “Tarinum hami.” 23  Didok ibana ma tu nasida, “Tutu do nian, inumonmuna do sian mangkuk panginumanki, alai ndang ahu na manontuhon ise na hundul di siamun manang di hambirangku. Damang i do na mangalehon i tu halak naung pinaradena.” 24  Tingki dibege sisean na sampulu i taringot i, muruk ma nasida tu dua halak na marhaha maranggi i. 25  Dijou Jesus ma nasida jala ninna ma, “Diboto hamu do, ia pamarenta ni angka bangso mamarenta do tu rayatna jala angka na sangapna marhuaso do tu nasida. 26  Alai unang ma songon i hamu, manang ise na naeng umsangap ingkon gabe parhobas ma tu hamu. 27  Jala manang ise sian hamu na naeng parjolo, ingkon gabe hatobanmuna ma ibana. 28  Songon Anak ni jolma i, ndang na sihobasan ibana umbahen na ro, alai na laho marhobas do jala mangalehon ngoluna bahen tobus ni torop jolma.” 29  Tingki kaluar nasida sian Jeriko, torop ma halak mangihuthon ibana. 30  Adong ma dua halak na mapitung na hundul di pinggir ni dalan mambege Jesus mamolus, gabe joujou ma nasida, ninna ma, “Tuan, Anak ni si Daud, asi ma roham tu hami!” 31  Gabe dimuruki natorop i ma nasida jala disuru ma nasida sip. Alai lam gogo do dijouhon nasida, ninna ma, “Tuan, Anak ni si Daud, asi ma roham tu hami!” 32  Alani i, so ma Jesus jala dijou ma nasida, ninna ma, “Aha dipangido hamu sibahenonku tu hamu?” 33  Didok nasida ma, “Tuan, bahen ma asa marnida hami.” 34  Gabe asi ma roha ni Jesus, dung i dijama ibana ma mata ni nasida laos di na satongkin i boi ma nasida marnida jala diihuthon ma ibana.

Surat na di toru

Hepeng logam perak ni halak Rom. Ida di Kamus.
Di tingki ni Jesus tudos ma on tu jam patoluhon. On dietong sian parbinsar ni mata ni ari.
Di tingki ni Jesus tudos ma on tu jam paonomhon. On dietong sian parbinsar ni mata ni ari.
Di tingki ni Jesus tudos ma on tu jam pasiahon. On dietong sian parbinsar ni mata ni ari.
Di tingki ni Jesus tudos ma on tu jam pasampulu sadahon. On dietong sian parbinsar ni mata ni ari.
As. “roa; jahat”.
Manang “basa”.
Ida di Kamus.