1 Tessalonik 2:1-20

  • Pangkobasion ni si Paulus di Tessalonik (1-12)

  • Dijalo halak Tessalonik do hata ni Debata (13-16)

  • Masihol si Paulus naeng pajumpang dohot angka dongan di Tessalonik (17-20)

2  Hamu ale angka dongan, tangkas do diboto hamu na so marisuang haroronami mandapothon hamu.  Diboto hamu do, nunga marsitaonon hami jala nunga dileai di Pilippi. Alai dilehon Debata do tu hami habaranion, asa boi hubaritahon hami tu hamu barita na uli taringot tu Debata nang pe godang hasusaan.  Ai ndang mangihuthon pingkiran na sala, manang sangkap na jahat, manang laho mangoto-otoi umbahen na hupasahat hami sipaingot on tu hamu.  Alai ala pos do roha ni Debata tu hami, disuru ma hami pasahathon barita na uli i. Alani i, sude na huhatahon hami ndang laho palashon roha ni jolma, alai laho palashon roha ni Debata na mamareso rohanta do.  Ai diboto hamu do, ndang hea hami mamuji-muji manang mangulahon na denggan tu hamu holan naeng mandapot untung tu dirinami. Ai diboto Debata do i sude!  Jala ndang hulului hami hasangapon sian jolma, manang sian hamu, manang sian na asing, nang pe sasintongna boi do hubahen hami songon i, ala apostel ni Kristus do hami.  Alai lambok do hami tu hamu sude, songon sahalak ina na patarushon* jala na burju manarihon poso-posona.  Alani holong ni rohanami tu hamu, ndang holan barita na uli na sian Debata na hulehon hami tu hamu, alai dohot do ngolunami sandiri. Ai mansai holong do rohanami tu hamu.  Hamu ale angka dongan, tontu diingot hamu dope songon dia ulaonnami dohot halojaonnami. Karejo do hami arian nang borngin, asa unang susa hamu manarihon hami tingki hubaritahon hami barita na uli na sian Debata tu hamu. 10  Marsihohot do hami, huulahon hami do na sintong, jala ndang hubahen hami na sala tu hamu angka na porsea i. Hamu sandiri ma na gabe saksi di hami, songon i nang Debata. 11  Tangkas do diboto hamu, hubahen hami do hamu songon ianakhonnami. Hupodai hami do hamu, hujujui hami, jala hupatogu hami do rohamuna. 12  Asa hombar pangalahomuna tu lomo ni roha ni Debata, na manjou hamu masuk tu Harajaonna dohot tu hasangaponna i. 13  Alani i do umbahen na tongtong hami mandok mauliate tu Debata. Ai tingki dibege hamu hata ni Debata na hupasahat hami, dijalo hamu do i songon na manjalo hata ni Debata, ndang songon hata ni jolma. Jala sintong do i, ai i do na mangurupi hamu angka na porsea i. 14  Hamu angka dongan, diihuthon hamu do sitiruon sian angka huria ni Debata na di Judea na marsada dohot Kristus Jesus. Ai marsitaonon do nasida dibahen halak Jahudi. Jala hamu pe marsitaonon do alani dongan sabangsomuna. 15  Ai dibunu halak Jahudi do Tuan Jesus dohot angka panurirang, jala manaon na hansit do hami dibahen nasida. Ndang gabe las roha ni Debata alani i, jala ndang marguna ulaon ni nasida tu sude jolma. 16  Diambati nasida do hami tingki hubaritahon hami barita na uli tu bangso na asing, hape parohon haluaon do i tu angka bangso i. Songon i ma nasida sai manambai dosa ni nasida. Alai ujungna, ro nama ari rimas ni Debata tu nasida. 17  Hamu angka dongan, nang pe dao hami sian hamu satongkin on, alai holan di pardagingon do i, ndang dohot di roha. Alani i, marsitutu do hami naeng pajumpang dohot hamu, ai masihol do rohanami tu hamu. 18  Naeng ro do hami mandapothon hamu. Jala ahu sandiri, si Paulus, nunga dua hali naeng ro, alai diambati Sibolis* do pardalanannami. 19  Ai ise ma pangkirimonnami, las ni rohanami, manang mahkota hasangaponnami* di jolo ni Tuan Jesus di harorona i, molo so hamu? 20  Tutu, hamu do hasangaponnami dohot las ni rohanami.

Surat na di toru

Manang “manusui”.
As. “Setan”. Ida di Kamus.
Manang “manang upa”.