Pintor tu konten

Sitindangi Ni Jahowa

Pillit Hata Batak (Toba)

Tutu do si Maria I Ina ni Debata?

Tutu do si Maria I Ina ni Debata?

Na didok Bibel

Ndang. Ndang hea didok di Bibel molo si Maria i ina ni Debata. Jala ndang hea halak Kristen disuru asa manomba si Maria. * On ma buktina:

  • Ndang hea didok si Maria molo ibana ina ni Debata. Jala didok di Bibel, manubuhon “Anak ni Debata” do ibana, ndang manubuhon Debata.​—Markus 1:1; Lukas 1:​32.

  • Ndang hea didok Jesus molo si Maria i ina ni Debata jala ingkon dipasangap. Hea do sahalak borua mandok, marlas ni roha do si Maria ala manubuhon Jesus. Alai dipasingot Jesus do borua i. Didok Jesus, “Ndang songon i. Halak na manangihon hata ni Debata jala na mangulahon i do na marlas ni roha!”​—Lukas 11:27, 28.

  • Ndang adong disurat di Bibel hata “Ina ni Debata” dohot “Theotokos” (na manubuhon Debata).

  • Ndang si Maria na didok “Ratu na sian Surgo”. Alai dewi do i, na disomba angka halak Israel na murtad. (Jeremia 44:15-​19) Ra, “Ratu na sian Surgo” i maksudna si Istar, dewi ni halak Babel.

  • Halak Kristen di abad na parjolo pe ndang manomba si Maria, jala ndang pasangaphu si Maria dibahen nasida. Sahalak sejarawan mandok molo halak Kristen di abad na parjolo “ndang olo manomba jolma, jala mabiar do nasida, molo disomba si Maria, olo ma annon gabe dirimpu angka halak dos do i songon na manomba dewi”.​—In Quest of the Jewish Mary.

  • Didok do di Bibel, nunga adong Debata sian najolo. (Psalmen 90:​1, 2; Jesaya 40:28) Ndang marmula Debata. Jadi ndang adong na manubuhon Ibana. Jala, ndang mungkin Debata adong di bortian ni si Maria. Alana tangkas do dipaboa di Bibel, gari langit pe ndang siat gabe inganan ni Debata.​—1 Rajaraja 8:​27.

Ina ni Jesus do si Maria, ndang “Ina ni Debata”

Halak Jahudi do si Maria jala keturunan ni Raja Daud do ibana. (Lukas 3:​23-​31) Las do roha ni Debata mangida si Maria ala burju jala togu haporseaonna. (Lukas 1:​28) I do umbahen dipillit Debata ibana gabe ina ni Jesus. (Lukas 1:​31, 35) Asing ni Jesus, adong do muse anak ni si Maria sian si Josep.​—Markus 6:3.

Didok di Bibel, sisean ni Jesus do si Maria. Alai ndang godang hatorangan na dipaboa di Bibel taringot si Maria.​—Ulaon ni Apostel 1:​14.

^ par. 3 Godang agama mangajarhon molo si Maria i ina ni Debata. Didok do muse, si Maria i do “Ratu na sian Surgo”. Molo di hata Junani, didok do i Theotokos. Lapatanna, “na manubuhon Debata”.