Tondi parbadia, i ma huaso ni Debata manang gogo ni Debata. (Mika 3:8; Lukas 1:​35) Dilehon Debata do tondi parbadiana marhite mangalehon gogona manang tu aha pe lao mangulahon sakkapna.​—Psalmen 104:30; 139:7.

 Di Bibel, hata “tondi” diterjemahon sian bahasa Ibrani ruach jala bahasa Junani pneuma. Hata on boi lapatanna gogo ni Debata manang tondi parbadia. (1 Musa 1:2) Alai, di Bibel dipakke do muse lapatan ni hata on i ma:

•   Hosa.​—Habakuk 2:​19; Pangungkapon 13:15.

•   Alogo.​—1 Musa 8:1; Johannes 3:8.

•   Ngolu manang na boi mambahen akka na mangolu marhosa.​—Job 34:14, 15.

•   Sikap manang pangalaho ni sasahalak.​—4 Musa 14:24.

•   Debata dohot akka suru-suruan.​—1 Raja-Raja 22:21; Johannes 4:​24.

 Sude na didok nakkin sarupa do, i ma akka na so boi taida. Alai, hasilna boi do taida. Suang songon i ma nang tondi parbadia “songon alogo dang boi taida, alai margogo do i”.​—An Expository Dictionary of New Testament Words, dibahen si W. E. Vine.

 Didok Bibel do muse molo tondi parbadia i songon “tangan” ni Debata. (Epesus 2:10; 5 Musa 26:8; Psalmen 102:25) Dos songon sahalak tukkang na mamakke tanganna tikki karejo, songon i ma Debata mamakke tondi parbadiana lao mambahen akka on:

•   Akka na di langit dohot na di tano on.​—Psalmen 33:6; Jesaya 66:​1, 2.

•   Bibel.​—2 Petrus 1:​20, 21.

•   Mukjizat dohot ulaon marbarita na diulahon akka naposo ni Debata najolo.​—Lukas 4:​18; Ulaon ni Apostel 1:8; 1 Korint 12:​4-​11.

•   Akka parange na denggan na dipatudu akka halak na mangoloi Debata.​—Galatia 5:​22, 23.

Tondi parbadia i dang sada pribadi

 Tikki didok di Bibel gogo ni Debata i songon “tangan” manang “hosa” ni Debata, on patuduhon molo tondi parbadia i dang sada pribadi. (2 Musa 15:​8, 10) Dang boi tangan ni sahalak tukkang karejo molo dang dikendalihon pikkiran dohot dagingna. Suang songon i ma dang boi tondi parbadia i karejo, molo dang dikendalihon Debata. (Lukas 11:13) Di Bibel dipatudos do muse tondi parbadia ni Debata songon aek jala dihubungkon do i tu haporseaon dohot parbinotoan. Sude naung didok nakkin patuduhon molo tondi parbadia i dang sada pribadi.​—Jesaya 44:3; Ulaon ni Apostel 6:5; 2 Korint 6:6.

 Di Bibel dipaboa do molo goar ni Debata i ma Jahowa jala goar ni anakna i ma Jesus Kristus. Alai molo goar ni tondi parbadia dang adong dipaboa. (Jesaya 42:8; Lukas 1:​31) Andorang so mate si Stepanus mandapot parnidaan ma ibana taringot surgo. Di parnidaan i, holan dua pribadi do diida ibana na adong di surgo dang tolu. Didok Bibel, “Ditatap si Stepanus na digohi tondi parbadia i ma doppak langit. Diida ibana ma hasangapon ni Debata jala diida ma jongjong Jesus di sabola kanan ni Debata.” (Ulaon ni Apostel 7:​55) Dilehon Debata do tondi parbadiana tu si Stepanus asa boi mandapot parnidaan i.

 Pandapot na sala: “Tondi parbadia,” i ma sada pribadi jala bagian sian debata si tolu sada songon na didok di 1 Johannes 5:​7, 8 di Bibel LAI.

 Na sasittongna: Di 1 Johannes 5:​7, 8 di Bibel LAI adong hata na dipamasuk, “na mangkatindangkon. I ma Tondi i, aek i dohot mudar i; jala sada do na tolu i”. Alai tikki diselidiki, diboto akka peneliti ma molo hata i dang adong disurat apostel Johannes jala sasittongna dang adong hata i disurat di Bibel. Professor Bruce M. Metzger manurat, “Palsu do hata na disurat di ayat i jala sasittongna dang patut adong i di Padan na Imbaru.”​—A Textual Commentary on the Greek New Testament.

 Pandapot na sala: Didok di Bibel molo tondi parbadia i hira sada pribadi, on patuduhon molo tondi parbadia i sada pribadi.

 Na sasittongna: Sipata didok do di Bibel molo tondi parbadia i hira sada pribadi, alai dang na patuduhon molo tondi parbadia i sada pribadi. Contohna digombarhon Jesus do tondi parbadia songon “pangurupi” na boi mangalehon bukti, manogu-nogu, makkatai, mambege, paboahon, pasangappon dohot manjalo. (Johannes 16:​7-​15) Digambarhon do muse di Bibel molo bisuk, hamatean dohot dosa i hira sada pribadi. (Poda 1:​20; Rom 5:​17, 21) Contohna, di Bibel didok do adong ‘parniulaon’ ni bisuk. Jala dosa i digombarhon do boi manggoda, pamatehon, jala adong di rohana lao mambuat appuna ni halak na asing.​—Mateus 11:19; Rom 7:​8, 11.

 Pandapot na sala: Tardidi di bagasan tondi parbadia, patuduhon molo tondi parbadia i sada pribadi.

 Na sasittongna: Sipata dipakke Bibel do hata “goar” lao patuduhon huaso manang wewenang. (5 Musa 18:​5, 19-​22; Ester 8:​10) Sarupa do on tikki didok, “marsumpa ma au di bagasan goar ni patik”. Didok pe songon i, dang na lapatanna patik i gabe sada pribadi. Sasahalak na tardidi “di bagasan” tondi parbadia patuduhon molo ibana nungnga mangakkui huaso dohot pengaruh ni tondi parbadia i lao mangulahon sakkap ni Debata.​—Mateus 28:19.

 Pandapot na sala: Akka apostel dohot sisean ni Jesus di abad na parjolo porsea do molo tondi parbadia i sada pribadi.

 Na sasittongna: Dang hea didok Bibel songon i jala sejarah pe dang hea didok songon i. Encyclopædia Britannica mandok, “Tikki Konsili Konstantinopel taon 381 Masehi ma adong ajaran na mandok molo tondi parbadia i sada pribadi na sarupa songon Debata.” Ajaran i adong nungnga lobi sian 250 taon dung mate akka apostel.