Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Desember 2015

 SIULASON NI MAJALAH ON | HAMU BOI MANGANTUSI ISI NI BIBEL

Na Mangurupi Hita Mangantusi Isi ni Bibel

Na Mangurupi Hita Mangantusi Isi ni Bibel

Pingkiri ma molo hamu laho parjolo sahali tu luar negeri. Jumpangmu ma halak, hasomalan, sipanganon dohot hepeng na so somal diida hamu. Ra, olo do marsak hamu alani i.

Songon i ma pangkilalaanta tingki parjolo sahali manjaha Bibel. Tajaha ma angka na masa najolo na so somal taida saonari. Di Bibel, adong do didok halak Pilistin, hasomalan na asing songon parabiton, sipanganon na digoari manna dohot hepeng na digoari talenta. (2 Musa 16:31; Josua 13:2; 2 Samuel 3:31; Mateus 18:24) On sude boi mambahen hita maol mangantusi isi ni Bibel. Tingki hamu parjolo sahali laho tu luar negeri, las do rohamuna molo adong na rade mangurupi hamu?

NAJOLO

Sian mulai disurat parjolo sahali Surat na Badia on di abad 16 A.S.M., nunga adong na rade mangurupi halak mangantusi isi ni Surat na Badia. Umpamana, si Musa na manguluhon bangso Israel ”pajojorhon” sude patik na tarsurat.5 Musa 1:5.

Sampulu abad dungkon i, adong dope na rade mangurupi halak mangantusi Surat na Badia. Taon 455 A.S.M., dipapungu ma torop halak Jahudi dohot ma i angka dakdanak di huta Jerusalem. Angka guru na mangantusi Surat na Badia, ”torang do manjaha di bagasan buku patik ni Debata”. Dung i, dipajojor ma lapatanna ”asa dapot nasida antusanna na jinahana i”.Nehemia 8:1-8.

Lima abad dungkon i, dohot do Jesus mangulahon sisongon i. Tarbarita do Jesus sahalak guru di tingki i. (Johannes 13:13) Jesus mangajar di adopan ni torop halak. Di sada tingki, mangkatai ma Jesus tu torop halak pasahathon Jamita di Dolok, jala ”tarhatotong ma natorop i” manangihon jamita ni Jesus. (Mateus 5:1, 2; 7:28) Taon 33 D.M., mangkatahatai ma Jesus dohot dua halak siseanna tingki mardalan tu huta na jonok di Jerusalem laho ”patorangkon” na tarsurat i tu nasida.Lukas 24:13-15, 27, 32.

Sisean ni Jesus pe boi do mangantusi Hata ni Debata. Di sada tingki, sahalak parpangkat na timbo sian Etiopia manjaha sada sian Surat na Badia. Sahalak sisean na margoar si Pilippus ro mandapothon jala manungkun ibana, ”Diantusi ho do na jinahami?” Dung i dialusi halak Etiopia i ma, ”Songon dia ma haantusan ahu i, anggo so adong na mamodai ahu?” Laos dipatorang si Pilippus ma na tarsurat i tu ibana.Ulaon ni Apostel 8:27-35.

SAONARI

Songon halak na mangantusi Surat na Badia najolo, saonari on angka Sitindangi Ni Jahowa marsitutu laho mangurupi halak marsiajar Bibel di 239 negeri. (Mateus 28:19, 20) Ganup minggu, nasida mangurupi lobi sian sia juta halak laho mangantusi isi ni Bibel. Godang sian nasida ndang halak Kristen. Parsiajaran on ndang manggarar jala dipatupa di jabu ni nasida manang di inganan na asing. Na deba, las do rohana marsiajar Bibel marhite handphone manang video, mamangke komputer manang alat elektronik na asing.

Sungkun hamu ma sahalak sian Sitindangi Ni Jahowa asa boi hamu mandapot hatorangan taringot on. Botoonmuna ma molo Bibel ndang buku na maol antusan, alai ”hasea mamodai, maminsang, pauliulihon, manogunogu di bagasan hatigoran” asa rimpas tu ”nasa ulaon na denggan”.2 Timoteus 3:16, 17.