Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Desember 2015

Pangke ma Pangkataionmu tu na Denggan

Pangke ma Pangkataionmu tu na Denggan

”Sai lomo ma roham di angka hata ni pamanganki dohot di pangkataion ni rohangki . . . ale Jahowa.”PSALMEN 19:15.

ENDE: 21, 35

1, 2. Boasa dipatudos Bibel pangkataionta songon api?

TAON 1871, matutung ma tombak di Wisconsin, Amerika Serikat. Hatop do rarat api i jala manutung hirahira dua milliar hau. Lobi sian 1.200 halak na mate. On ma bilangan na gumodang halak mate alani tartutung na hea masa di Amerika Serikat. Mula ni api i, mamistik sian kareta api na mamolus tombak i. Songon na dipatorang di Bibel, ”metmet pe api i, digalahi do tombak na sai balga!” (Jak. 3:5) Boasa panurat ni Jakobus mandok songon i?

2 Ibana paboahon, ”Api do nang dila i.” (Jak. 3:6) Hata ”dila” dipatudos do tu pangkataionta. Songon api, aha na tahatahon boi do mambahen godang harugian. Balga do pangkorhon ni pangkataionta tu dongan. Di Bibel, dipaboa do molo na tahatahon boi parohon hangoluan dohot hamatean tu nasida. (Poda 18:21) Antong ala mabiar hita mambahen sala, ingkon sai hohom do hita? Ndang songon i. Songon api, nang pe boi manutung sada harangan, alai ndang na gabe ndang tapangke api. Ingkon manat do hita mamangke api, umpamana tapangke do api laho mangalompa, masisulu, dohot mambahen asa tiur. Songon ni ma nang pangkataionta.  Molo manat do hita mangkatai boi ma parohon sangap tu Jahowa jala marlaba tu angka dongan.Ps. 19:15.

3. Aha do na porlu taboto asa pangkataionta mangkorhon na denggan tu dongan?

3 Dilehon Jahowa do tu hita haboion laho paboahon tu na asing, aha na tapingkiri dohot na tahilala, marhite mangkatai manang mambahen isyarat ni tangan. Antong, songon dia do pangkataionta mangkorhon na denggan tu dongan? (Jaha Jakobus 3:9, 10.) Porlu ma taboto andigan tingki na denggan laho mangkatai, aha na tahatahon, jala songon dia isara na denggan laho mangkatai.

TINGKI NA DENGGAN LAHO MANGKATAI

4. Andigan do tingki na denggan laho hohom?

4 Sipata denggan do hita hohom. Dipaboa do di Bibel adong do tingkina ”hohom”. (Pjm. 3:7, Bibel siganup ari) Umpamana, porlu do hita hohom tingki donganta mangkatai, on patuduhon na taargai do nasida. (Job 6:24) Porlu do hita hohom molo sada barita ndang porlu botoon ni halak. (Poda 20:19) Jala, tingki sasahalak mambahen hita muruk, unang ma pintor muruk manang taalusi, alai tapahusorhusor ma di rohanta.Ps. 4:5.

5. Songon dia do hita patuduhon pangargaion tu silehonlehon ni Jahowa?

5 Adong do tingki na denggan laho mangkatai. (Pjm. 3:7) Umpamana laho mamuji Jahowa, manjujui angka dongan, paboahon pangkilalaanta, dohot paboahon tu na asing aha na tahaporluhon. (Ps. 51:17) Molo denggan tapangke haboionta mangkatai, on patuduhon na taargai do silehonlehon ni Jahowa. Songon hadiah na dilehon tu hita, las do rohanta mamangke on dohot denggan.

6. Boasa ringkot mamillit tingki na denggan laho mangkatai?

6 Boasa ringkot mamillit tingki na denggan laho mangkatai? Poda 25:11 mandok, ”Antajau sere di bagasan pinggan perak do sada hata na nidok di hahonaanna.” Mansai denggan do antajau sian sere, alai dumengganan do muse molo dipeakhon di pinggan perak. Dos songon i ma, ra adong do hata na denggan laho tapasahat tu sasahalak. Alai, lam denggan ma pangkorhonna tu nasida, molo tapillit tingki na denggan laho mangkatai. Songon dia do hita mangulahon on?

7, 8. Songon dia do angka donganta di Jepang maniru Jesus?

7 Molo mangkatai hita di tingki na so pas, olo do gabe ndang diantusi manang parohon hansit ni roha tu na asing. (Jaha Poda 15:23.) Di bulan Maret 2011, masa ma lalo dohot tsunami na manegai godang huta di bagian timur ni Jepang. Lobi sian 15.000 halak na mate. Nang pe godang sian Sitindangi Ni Jahowa na agoan keluarga dohot aleale, alai lomo do roha ni nasida mangapul roha ni na asing marhite Hata ni Debata. Alai diantusi nasida do, godang halak di inganan i maragama Budha jala ndang mangantusi isi ni Bibel. Alani i, ndang pintor dipaboa nasida taringot haheheon, alai dipatorang nasida do boasa masa hasusaon tu angka jolma na burju.

8 Angka donganta on maniru Jesus. Diboto Jesus do tingki laho hohom, alai diboto do andigan tingkina mangkatai. (Joh. 18:33-37; 19:8-11) Jala dipaima ibana do tingki na pas laho mangajarhon na ringkot tu angka siseanna. (Joh. 16:12) Angka donganta di Jepang,  paimahon tingki na pas laho paboahon tu angka jolma taringot haheheon. Dua satonga taon dung tsunami i, disarhon nasida ma risalah Boi do na Mate Mulak Mangolu? Godang do na manjalo jala tarapul rohana tingki manjaha risalah on. Ingkon tapingkirhon do hasomalan dohot haporseaon ni halak na adong di ingananta, asa boi taboto andigan tingki na pas laho mangkatai tu nasida.

9. Di tingki sisongon dia do hita porlu paimahon tingki na denggan laho mangkatai?

9 Di tingki sisongon dia do hita porlu paimahon tingki na denggan laho mangkatai? Olo do ra, hata ni sasahalak mambahen hansit rohanta. Alai, unang ma pintor tabalos manang tadok hata na oto. Hohom ma hita jala tasungkun ma dirinta, ’Tutu do sogo rohana tu ahu? Porlu do patangkasonku hatana i?’ Ra, dumenggan do molo tapahohom. Alai, molo adong do na mambahen hita ingkon mangkatai tu ibana, tapaima ma jolo dame rohanta. (Jaha Poda 15:28.) Boi do taulahon on muse tingki manjujui keluarganta na so sitindangi asa mananda Jahowa. Ingkon sabar jala manat ma hita mamingkiri aha na laho tahatahon, jala ingkon taboto do andigan nasida rade laho manangihon.

AHA NA TAHATAHON

10. (a) Boasa hita ingkon manat mamillit aha na laho tahatahon? (b) Hata na songon dia do ingkon tapasiding?

10 Aha na tahatahon, boi marpangkorhon na denggan manang na roa tu na asing. (Jaha Poda 12:18.) Godang do halak di portibi on, ”dilanasida songon podang”. Hata ni nasida songon anak panah, ala lomo roha ni nasida manusai jala mambahen hansit roha ni dongan. (Ps. 64:4) Nasida maniru pangkataion na adong di film dohot di TV. Alai, halak Kristen ndang boi kasar mangkatai manang parohon hansit ni roha nang pe tingki margait. Denggan do margait ala on boi mambahen lomo roha ni halak manangihon hita. Alai, unang ma margait laho mangalesengi, pailahon manang mangarehei sasahalak. Dipasingot Bibel do halak Kristen asa unang mamangke hata ”insahinsak”. Didok do muse, ”Unang ma ruar hata na busuk sian pamanganmuna; naeng ma na denggan na tau padengganhon na humurang, asa dapotan uli na umbegesa.”Eps. 4:29, 31.

11. Aha do na mangurupi hita mamillit aha na tahatahon?

11 Jesus mandok, ”Ai ia i na manggohi roha, matua i do hatahonon ni pamangan.” (Mat. 12:34) Lapatan ni hata on, aha na tahaton patuduhon songon dia pangkilalaanta. Alani i, molo tahaholongi angka dongan, tapillit ma aha na laho tahatahon. Tahatahon ma angka na manjujui nasida tu na denggan.

12. Aha do muse na mangurupi hita mamilit aha na laho tahatahon?

12 Porlu do hita marsitutu asa denggan pangkataionta. Nang pe raja Salomo halak na marbisuk, alai ”disulingkit, jala maraturan” do dibahen sude na disuratna marhite hata na tangkas dohot mura antusan. (Pjm. 12:9, 10) Aha do na boi mangurupi hita asa taboto aha na laho tahatahon? Taida ma sian Bibel dohot angka publikasi, isara na denggan paboahon na di rohanta. Taparsiajari ma hata na denggan, nang pe ndang somal didok di ingananta. Taparsiajari ma sian Jesus songon dia ibana mangkatai laho mangurupi na asing. Diboto Jesus do aha na laho hatahononna ala diajari Jahowa do ibana ”pasabam  roha ni na loja marhite sian hata”. (Jes. 50:4) Alani on ma, ringkot do hita laho mamingkirhon songon dia pangkataionta marpangkorhon tu na asing. (Jak. 1:19) Tasungkun ma dirinta, ’Molo huhatahon songon on, diantusi nasida do aha na di rohangkon? Songon dia do pangkilalaanna?’

13. Boasa ringkot mangkatai mamangke isara na mura antusan?

13 Soara ni tarompet do dipangke halak Israel gabe tanda di nasida. Adong do soara ni tarompet na patuduhon asa marpungu halak Israel. Soara ni tarompet na asing patuduhon porlu angka tentara marporang. Pingkiri ma aha na masa tu angka tentara molo soara ni tarompet i ndang tangkas! Di Bibel, dipatudos do soara ni tarompet na tangkas tu hata na mura antusan. Molo ndang tangkas tapatorang sada barita, boi do halak ndang mangantusi manang ndang porsea tu barita i. Nang pe lomo rohanta paboahon dohot tangkas, alai porlu do manat asa unang kasar manang ndang pantun pangkataionta.Jaha 1 Korint 14:8, 9.

14. Aha do tiruan na patuduhon molo Jesus mangkatai mamangke isara na mura antusan?

14 Di Mateus bindu 5 sahat tu 7 dipaboa ma isara na denggan songon dia Jesus mamillit hata na mura antusan. Di jamita on, ndang dipangke ibana hata na maol manang hatorangan na ganjang. Jala ndang dibahen ibana hansit roha ni angka dongan. Nang pe bagas lapatan ni jamita ni Jesus, alai dipangke ibana do hata na mura antusan. Umpamana, diajarhon Jesus do tu angka siseanna asa unang holsoan taringot sipanganon ni nasida ganup ari. Dipatorang Jesus do, molo Jahowa paradehon sipanganon ni angka pidong. Dung i, didok Jesus ma tu nasida, ”Nda godang dope hasurunganmuna sian i!” (Mat. 6:26) Marhite hata na mura antusan, diurupi Jesus do nasida mangantusi parsiajaran na ringkot na manjujui nasida mangulahon na denggan.

SONGON DIA MANGKATAI TU DONGAN

15. Boasa hita ingkon mangkatai mamangke isara na denggan?

15 Mansai ringkot do tapingkiri songon dia isaranta mangkatai tu dongan. Las do roha ni halak manangihon Jesus, ala ibana mangkatai mamangke ”hata na tabo”, denggan, jala lambok. (Luk. 4:22) Molo denggan isaranta mangkatai, lomo ma roha ni halak manangihon hita. (Poda 25:15) Molo tahaholongi jala taargai pangkilalaan ni donganta, denggan ma hita mangkatai tu nasida. On ma na diulahon ni Jesus. Umpamana, tingki diida ibana angka natorop ro marsitutu manangihon ibana, las ma rohana mangalehon tingki laho mangajari nasida. (Mrk. 6:34) Tingki adong halak mangarehei, ndang dibalos ibana.1 Ptr. 2:23.

16, 17. (a) Tingki mangkatai tu keluarga dohot dongan, songon dia do hita maniru Jesus? (Ida gombar di mula ni parsiajaran.) (b) Songon dia do sahalak ina na mabalu mangkatai mamangke isara na denggan?

16 Nang pe tahaholongi keluarga dohot alealenta, olo do ra ndang denggan hita mangkatai tu nasida ala ninna rohanta tangkas do tatanda nasida. Ra, didok rohanta ndang porlu manat mamingkiri isara songon dia mangkatai tu nasida. Jesus ndang hea mangkatahon na so denggan tu angka alealena. Tingki marsalisi angka siseanna taringot ise na sumurung, dipasingot do nasida dohot isara na denggan. Dipangke ma tiruan  na denggan sian parange ni sahalak dakdanak laho mangurupi nasida mambahen hamubaon. (Mrk. 9:33-37) Angka sintua porlu maniru Jesus tingki mangalehon sipasingot tu na asing mamangke isara na lambok.Gal. 6:1.

17 Nang pe pangkataion ni sasahalak mambahen hansit rohanta, boi do hita mangkatai dohot denggan ala on mangkorhon tu na asing. (Poda 15:1) Umpamana, sahalak dolidoli anak ni ina na mabalu mangulahon na sala jala ndang marsitutu manomba Jahowa. Sahalak donganta borua di huria mandok hatana tu ina na mabalu i songon on, ”Ndang denggan ho mangajari ianakhonmu.” Ndang pintor dialusi ina na mabalu on hata ni donganta i. Alai, didok ma, ”Tutu do na diulahonna i sala, alai saonari dison ma ibana porlu marsiajar asa lam denggan. Molo dung Armagedon, boi ma dohononmu songon i tu ahu.” Ala dame do pingkiran ni ina na mabalu on, boi ma denggan dialusi ibana hata ni donganta borua i, gabe tongtong ma nasida maraleale. Ditangihon anakna i do hata ni omakna i, gabe diboto ibana ma, na pos do roha ni omakna boi ibana marhamubaon. Alani i, ndang marsaor be ibana dohot angka alealena na so sisomba Jahowa, tardidi, jala karejo ma ibana di Betel. Tongtong ma ”lambok hatamuna, songon na siniraan” tingki mangkatai tu dongan sahaporseaon, tu keluarga, manang tu halak na so tatanda.Kol. 4:6.

18. Songon dia do hita boi mangihuthon tiruan ni Jesus di pangkataionta?

18 Haboionta laho paboahon aha na tapingkiri dohot na tahilala tu dongan, sada silehonlehon na arga sian Jahowa. Molo taihuthon tiruan ni Jesus, tapillit ma tingki na denggan laho mangkatai, manat ma tapingkiri aha na laho tahatahon jala tongtong ma denggan pangkataionta. Tapangke ma pangkataionta laho manjujui na asing asa mambahen las roha ni Jahowa.