Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SIULASON NI MAJALAH ON | SONGON DIA DO ROHA NI DEBATA MANGIDA PORANG?

Songon dia do Roha ni Debata Mangida Porang Najolo

Songon dia do Roha ni Debata Mangida Porang Najolo

Halak Israel marsingkor do dibahen halak Mesir. Nunga marulakulak nasida martangiang tu Debata alai, sahali pe ndang ditangihon. (2 Musa 1:13, 14) Martaon lelengna halak Israel paimahon Debata paluahon nasida sian tangan ni halak Mesir. Alai jumpang nama tingkina paluaonNa nasida. (2 Musa 3:7-10) Dipaboa do di Bibel molo Debata sandiri do na marporang tu halak Mesir. Ibana mandabu sampulu uhum tu halak Mesir jala diripashon ma raja dohot tentara ni Mesir di Laut Mera. (Psalmen 136:15) Debata Jahowa gabe ”Ulubalang bolon” tu naposoNa.2 Musa 15:3, 4.

Ndang sude porang dihasogohon Debata, ala Ibana sandiri pe marporang do mangalo halak Mesir. Di sada tingki, disuru Debata do halak Israel marporang. Umpamana, disuru do nasida marporang mangalo halak Kanaan na jahat. (5 Musa 9:5; 20:17, 18) Disuru Ibana do Raja Daud marporang mangalo halak Pilistim. Jala Debata mangalehon tudutudu tu si Daud asa boi monang.2 Samuel 5:17-25.

Bibel paboahon, marporang do Debata mangalo halak parjahat laho mangondingi naposoNa dohot panombaon na sintong. Alai, taulas ma tolu na ringkot sian porang na dibahen ni Jahowa:

  1. DEBATA DO NA MANONTUHON ISE NA LAHO MARPORANG. Didok Debata ma tu halak Israel, ”Ndada hamu marporang sahalion.” Boasa? Ala Debata sandiri do na laho marporang mangalo musu ni halak Israel. (2 Kronika 20:17; 32:7, 8) Jala jotjot do dibahen Debata songon on tu nasida. Di tingki na asing, disuru Debata do halak Israel marporang mangalo parjahat asa boi nasida tongtong maringanan di Tano Kanaan.5 Musa 7:1, 2; Josua 10:40.

  2. DEBATA DO NA MANONTUHON ANDIGAN MARPORANG. Sai marpaima do naposo ni Debata asa dipalua nasida sian hajahaton na adong di humaliangna. Jala ndang boi nasida mambahen haputusan sandiri taringot andigan marporang, asa unang ditadingkon Debata nasida. Sasintongna, dipatudu do di Bibel boi do parohon jea molo ndang diihuthon halak Israel tudutudu sian Debata. *

  3. Nang pe marporang Debata mangalo halak Kanaan, alai dipalua Ibana do si Rahab dohot keluargana

    NDANG LOMO ROHA NI DEBATA MATE JOLMA, SONGON I NANG HAMATEAN NI PARJAHAT. Debata Jahowa do Panompa dohot mual ni hangoluan. (Psalmen 36:10) Ndang lomo rohaNa mate jolma, alai godang jolma mangulahon hajahaton jala mambunu angka donganna. (Psalmen 37:12, 14) Alani i, laho pasohothon hajahaton do Debata umbahen marporang Ibana mangalo parjahat. Nang pe Debata parsidohot tu porang ni halak Israel najolo, alai tongtong do dipatudu na ”parasi roha” dohot ”lambat tarrimas” Ibana tu halak parjahat. (Psalmen 86:15) Umpamana, andorang so marporang halak Israel tu sada huta, ingkon parjolo do paboaon ni nasida tu saluhut huta i asa dipauba roha ni nasida jala boi malua. (5 Musa 20:10-13) Alai didok Debata do, ”Tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana.”Hesekiel 33:11, 14-16. *

Tangkas ma, sian najolo marporang do Debata ala naeng pasohothon hajahaton. Alai, porang na dibahen Debata, ndang dos songon na binahen ni jolma. Molo Debata, ditontuhon Ibana do andigan jala ise na laho marporang. Antong, las do roha ni Debata mambunu jolma marhite porang? Tontu ndang songon i. Dipaboa do di Bibel molo Debata mansai sogo do rohaNa mangida hajahaton. (Psalmen 11:5) Tutu do muba roha ni Debata mangida porang dung ro Jesus tu tano on?

^ par. 7 Umpamana, di sada tingki Debata nunga mangorai halak Israel marporang tu halak Amalek dohot halak Kanaan, alai dijugulhon nasida do marporang gabe talu ma nasida. (4 Musa 14:41-45) Pigapiga taon dungkon i, Raja Josia na marsihohot marporang alai ndang mangido tudutudu sian Debata, gabe mate ma ibana di parporangan i.2 Kronika 35:20-24.

^ par. 8 Ndang dipaboa halak Israel tu halak Kanaan na laho ro nasida marporang. Boasa? Ala nunga dilehon tingki lelengna 400 taon tu halak Kanaan asa muba roha ni nasida. Tingki ro halak Israel mangalo halak Kanaan ndang adong hamubaon ni roha di nasida. (1 Musa 15:13-16) Alani i, diripashon ma halak Kanaan. Alai, molo adong halak Kanaan na muba boi do malua.Josua 6:25; 9:3-27.