Susa do roha ni halak Jahudi. Nasida marsitutu mangido pangurupion sian Debata asa dipalua sian kaisar Rom. Laos di tingki i, nunga tarbarita Jesus na gabe Messias. Alani i, sai mangkirim do nasida ”naeng Ibana paluahon Israel” sian kaisar Rom. (Lukas 24:21) Alai, ndang saut na dihirimna i. Di taon 70 D.M. ro ma tentara Rom mangaripashon Jerusalem dohot joro ni Debata.

Aha do na masa? Boasa ndang diurupi Debata halak Jahudi songon najolo? Boasa ndang disuru nasida marporang? Naung muba do roha ni Debata mangida porang? Ndang muba dope. Alai, nunga muba roha ni Debata mangida halak Jahudi ala ndang dijangkon nasida Jesus gabe Messias. (Ulaon ni Apostel 2:36) Alani i, ndang bangso na sumurung be bangso Israel di adopan ni Debata.Mateus 23:37, 38.

Ndang diondingi Debata be halak Jahudi dohot Tano Kanaan sian hajahaton, jala ndang disuru be nasida marporang. Songon na disurirangkon Jesus, ndang dihalomohon Debata be bangso Israel. Dipillit Debata ma sada bangso Israel na imbaru na digoari, ”Israel ni Debata!” (Galatia 6:16; Mateus 21:43) Halak Kristen na dimiahi tondi parbadia digoari ma Israel ni Debata. Sian abad na parjolo digoari ma nasida ”bangso ni Debata”.1 Petrus 2:9, 10.

Marporang do Debata laho paluahon bangsoNa sian tentara Rom di abad na parjolo? Disuru Debata do nasida marporang? Ndang dibahen Debata songon i. Boasa? Songon na dipaboa di artikel na parjolo, molo Debata do na manuru nasida marporang, ingkon Debata do na manontuhon andigan tingkina marporang. Alai, di abad na parjolo Debata ndang marporang laho mangondingi naposoNa. Jala nasida pe ndang disuru laho marporang. Tangkas ma, ndang di abad na parjolo tingki ni Debata laho mangaripashon halak parjahat.

Dos songon naposo ni Debata najolo, nasida pe paimahon Debata mangaripashon parjahat. Jala Debata ndang manuru nasida marporang mangalo angka musuNa. Tangkas do on sian ajaran ni Jesus. Umpamana, Jesus ndang manuru siseanna marporang, alai didok do tu nasida, ”Holong ma rohamu di musumuna; tangiangkon hamu ma angka na paburuburu hamu.” (Mateus 5:44) Tingki mangkatai taringot Jerusalem na laho diripashon tentara Rom, Jesus mamarentahon angka siseanna asa unang marporang, alai maporus ma nasida manadingkon huta i tu dolok.Lukas 21:20, 21

Si Paulus manurat, ”Unang hamu marlulu; pasahat hamu ma rimas i (tu Debata), ai tarsurat do: ”Di Ahu do pamaloson, Ahu pe mamaloshon, ninna Tuhan i.” (Rom 12:19) Si Paulus mangenet hata on sian 3 Musa 19:18 dohot 5 Musa 32:35. Songon di artikel na parjolo, sada isara ni Debata mangondingi naposoNa najolo, i ma mangurupi nasida marporang. Alani i, hata ni si Paulus patuduhon ndang muba roha ni Debata mangida porang. Di abad na parjolo pe, boi do Debata marporang mangondingi naposoNa sian ragam ni hajahaton. Alai, ingkon Debata do na manontuhon andigan jala ise na parsidohot marporang.

Tangkas ma, Debata ndang manuru halak Kristen di abad na parjolo marporang. Alai songon dia do saonari? Adong do organisasi na disuru Debata marporang? Saonari do tingki ni Debata marporang laho mangondingi naposoNa? Songon dia do roha ni Debata mangida porang saonari? Di artikel na mangihut diulas ma alus ni sungkunsungkun on.