Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  November 2015

 SIULASON NI MAJALAH ON

Lomo do Roha ni Debata Mangida Porang?

Lomo do Roha ni Debata Mangida Porang?

Songon dia do alusmuna? Godang halak mandok molo Debata marlomo ni roha mangida porang. Songon na disurat di Bibel, najolo Debata manuru naposoNa marporang. Alai, Jesus mangajarhon tu siseanna asa mangkaholongi musu ni nasida. (Mateus 5:43, 44) Alani i didok godang halak ma, molo saonari ndang be lomo roha ni Debata mangida porang.

Songon dia do pandapotmu? Lomo do roha ni Debata mangida porang? Negara dia do monang bahenon ni Debata tingki marporang? Alus ni sungkunsungkun on, marpangkorhon do tu pandapotmuna taringot porang. Umpamana, molo taboto Debata marlomo ni roha mangida porang jala bahenonNa monang negaranta, las ma rohanta. Alai songon dia do pangkilalaanta molo bahenon ni Debata talu negaranta? Mabiar situtu ma hita.

Alai adong dope na rumingkot. Molo taboto songon dia roha ni Debata mangida porang, marpangkorhon do on tu paralealeonta dohot Ibana. Molo hea do hamu susa alani porang, porlu do botoonmuna alus ni sungkusungkun on: Tutu do Debata paloashon jala manjujui asa masa porang? Tutu do ndang diparrohahon Debata halak na susa alani porang?

Ra, songgot do rohamuna mamboto alus ni Bibel, na imbar sian sude pandapot na dipaboa nangkin. Sasintongna, sian najolo sahat tu sadarion ndang muba roha ni Debata mangida porang. Taparrohahon ma aha na didok Bibel taringot songon dia do roha ni Debata mangida porang najolo dohot di abad na parjolo. On mangurupi hita mangantusi songon dia do roha ni Debata mangida porang saonari. Jala boi mangurupi hita mangantusi na tongtong do adong porang manang ndang di tongatonga ni jolma.