Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Oktober 2015

 SIULASON NI MAJALAH ON | ADONG DO LABANA MARTANGIANG?

Tangiang—Aha do Labana di Hita

Tangiang—Aha do Labana di Hita

Andorang so taulahon sada karejo, ra jolo tasungkun do dirinta, ”Aha do labana molo huulahon on?” Molo tasungkun songon i taringot tangiangta, na mangkaringkothon diri sandiri do hita? Ndang. Denggan do molo taboto aha laba ni tangiang. Jala hea do sungkunsungkun roha ni si Job ditangihon Debata manang ndang tangiangna.Job 9:16.

Sian artikel na parjolo, dipatudu do molo tangiang lobi sian hasomalan ni agama dohot ubat terapi. Sasintongna, ditangihon Debata do tangiangta. Molo martangiang hita laho mangulahon na denggan, alusan ni Debata ma tangiangta. Dijujui Debata do asa lam tapajonok dirinta tu Ibana. (Jakobus 4:8) Antong, aha do labana molo martangiang hita? Taida ma pigapiga laba na tadapot.

Pingkiran na Dame.

Tingki masa sitaonon na borat di hamu, songon dia do hamu mangadopi i? Disurat do di Bibel, ”Pabotohon hamu ma tu Debata pangidoanmuna”. (1 Tessalonik 5:17; Pilippi 4:6) Disurat do di Bibel, molo martangiang hamu tu Jahowa hilala ma ”dame ni Debata na sumurung sian saluhut roha, i ma mangaramoti angka ateate dohot pingkiranmuna”. (Pilippi 4:7) Boi ma tadapot hadameon ni pingkiran molo tapasahat sude holso ni rohanta tu Debata. Songon na disurat di Psalmen 55:23, ”Sai tu Jahowa ma pasahat parsorionmi, jadi Ibana ma pangoluhon ho.”

”Sai tu Jahowa ma pasahat parsorionmi, jadi Ibana ma pangoluhon ho.”Psalmen 55:23

Godang do halak mangkilala dame pingkiranna dung martangiang. Si Hee Ran, sian Korea Selatan, mandok, ”Tingki masa sitaonon na borat, martangiang ma ahu, gabe dame ma pingkiranku  jala margogo ma ahu mangadopi sitaonon i.” Si Cecilia di Filipina mandok, ”Gabe sahalak ina, marsak situtu do ahu mangida borungku dohot omakku na so mananda ahu be. Alai dung martangiang ahu tu Jahowa margogo ma ahu mangadopi sitaonon i ganup ari. Pos do rohangku, na urupan ni Jahowa do ahu.”

Tarapul jala margogo tingki mangadopi sitaonon.

Hea do hamu marsak situtu alani sitaonon na borat? Martangiang ma hamu tu ”Debata, Sipangapul na sumurung”. Bibel patorangkon, “Diapul do hami di bagasan saluhut haporsuhonnami.” (2 Korint 1:3, 4) Umpamana, tingki Jesus mangadopi sitaonon na borat, ”marsinggang ma Ibana martangiang”. Aha do labana? ”Diida Ibana ma  surusuruan sian banua ginjang i, na margogoihon Ibana.” (Lukas 22:41, 43) Na asing muse, martangiang ma si Nehemia tingki diorai ibana marbarita. Didok ibana ma, ”Sai lam pargogoi ma tanganku.” Diurupi Debata do ibana asa unang mabiar, jala tongtong do ibana marsitutu laho marbarita na uli. (Nehemia 6:9-16) Si Reginald, di Ghana, paboahon pengalamanna, ”Martangiang do ahu tingki mangadopi sitaonon na borat. Tarapul do rohangku dung hupaboa tu dongan na boi mangurupi ahu, jala dipapos do rohangku asa unang mabiar.” Tutu ma molo martangiang hita tu Debata, tarapul ma rohanta.

Bisuk na sian Debata.

Haputusan na tabahen marpangkorhon do tu ngolunta dohot tu na asing. Songon dia do hita mambahen haputusan na denggan? Bibel mangalehon hatorangan, ”Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononna ma tu ibana.” (Jakobus 1:5) Molo martangiang hita mangido bisuk sian Debata, lehononNa do tondi parbadia manogunogu hita asa marbisuk mambahen haputusan. Sasintongna, boi do hita mangido tondi parbadia, ala didok Jesus do, ”Lehonon ni Ama i sian banua ginjang Tondi Parbadia tu angka na mangido I sian Ibana.”Lukas 11:13.

”Tongtong do ahu martangiang tu Jahowa, asa ditogutogu laho mambahen haputusan na denggan.”—Si Kwabena, Ghana

Tingki Jesus mambahen haputusan, dipangido ibana do pangurupion sian Debata. Tingki mamillit sampulu dua siseanna, dipaboa do di Bibel, ”manipat na saborngin i ma didatdati martangiang tu Debata”.Lukas 6:12.

Songon Jesus, nunga godang halak mangkilala molo Jahowa mangurupi nasida mambahen haputusan na denggan. Si Regina sian Filipina paboahon dung mate tunggani dolina, marragam do sitaonon diadopi ibana. Mamingkirhon dirina dohot keluargana, kaluar sian parkarejoan, jala susa mangadopi dua boruna. Aha do na mangurupi ibana mambahen haputusan na denggan? Ibana mandok, ”Pangurupion sian Jahowa do hupangasahon.” Si Kwabena, sian Ghana manjalo pangurupion sian Jahowa. Ibana mandok, “Ndang karejo be ahu di konstruksi.” Tingki mambahen haputusan, didok ibana ma, “Tongtong do ahu martangiang tu Jahowa, asa ditogutogu laho mambahen haputusan na denggan.” Didok muse, ”Dipargogoi Jahowa do ahu, tingki mamillit karejo na mambahen ahu lam denggan di partondion.” Hita sude boi mangkilala panogunoguon ni Debata, tingki mambahen haputusan na marpangkorhon tu paralealeon dohot Ibana.

Nunga taulas pigapiga laba ni tangiang. (Ida ma di kotak ” Laba ni Tangiang”.) Alai, asa boi tahilala sude laba ni tangiang on, ringkot do asa tatanda Debata dohot lomo ni rohaNa. Molo lomo do rohamuna, boi do diurupi sahalak Sitindangi Ni Jahowa hamu marsiajar Bibel. * On mambahen hamu lam solhot tu “sitangihon tangiang”.Psalmen 65:3.

^ par. 14 Laho mandapot godang hatorangan, jumpangi hamu ma Sitindangi Ni Jahowa na jonok tu ingananmu. Manang ida ma situs webnami, www.jw.org/bbc.