Na mambahen hami marimbar, i ma ulaon marbarita na uli— sian jabu tu jabu dohot di inganan na ribur. Boasa diulahon hami on?

Sitindangi Ni Jahowa marbarita laho pabadiahon goar ni Debata asa diboto halak ise goarNa. (Heber 13:15) Dioloi hami do parenta ni Jesus na mandok, ”Laho ma hamu, podai hamu ma saluhut bangso, . . . ajari hamu ma nasida mangaradoti nasa hata naung hupatikkon tu hamu.”Mateus 28:19, 20.

Na rumingkot, dihaholongi hami do angka jolma. (Mateus 22:39) Tangkas do diantusi hami nunga adong agama ni godang halak. Jala diboto hami do ndang sude na olo manjangkon barita na uli. Alai, diboto hami do ajaran ni Bibel paluahon ngolu ni jolma. Alani i, tongtong do hami marbarita songon halak Kristen di abad na parjolo, ”ndang mansohot nasida ariari di bagas joro nang jojor jabu pe, mangajarhon dohot mamaritahon Kristus Jesus i.”Ulaon ni Apostel 5:41, 42.

Sosiolog Antonio Cova Maduro manurat ”marsitutu do Sitindangi Ni Jahowa marbarita nang pe adong hasusaan. Rade do nasida . . . , marbarita di liat portibi on.”—Koran El Universal, Venezuela

Godang na manjaha bukunami, ndang Sitindangi Ni Jahowa. Jala marjuta halak na marsiajar Bibel dohot hami nunga maragama. Las do roha ni nasida dijumpangi Sitindangi Ni Jahowa.

Ra, adong do sungkunsungkun taringot Sitindangi Ni Jahowa na so dialusi di majalah on. Hutogihon hami do hamu asa mangalului alusna marhite.

  • Sungkun ma sahalak Sitindangi Ni Jahowa.

  • Ida ma situs webnami, di www.jw.org/bbc.

  • Ro ma hamu tu parpunguannami. Ndang adong durungdurung disi.