”Gabe jolma na . . . matoras situtu, mangihuthon hagogok ni rimpas ni Kristus.”EPESUS 4:13.

ENDE: 11, 42

1, 2. Aha do na tinuju ni ganup halak Kristen? Bahen ma sada tudosan.

TINGKI manuhor jeruk sahalak borua di onan, aha do na porlu idaonna? Ingkon luluanna do na tonggi, jala ndang gilokon. Alai na rumingkot ingkon na malamun do.

2 Dung marsiajar jala tardidi sahalak Kristen, lam togu ma paralealeonna dohot Jahowa. Na tinujuna, i ma asa matoras di partondion. Ndang saguru tu umur halak na matoras di partondion. Alai matoras di partondion, i ma paralealeon na solhot dohot Jahowa. Dihalomohon si Paulus do asa matoras partondion ni halak Kristen di Epesus. Dijujui do nasida asa marsada di bagasan haporseaon jala tongtong marsiajar taringot Jesus, asa ”gabe jolma na tang jala matoras situtu, mangihuthon hagogok ni rimpas ni Kristus.”Epesus 4:13.

3. Songon dia do huria di Epesus dipatudos tu naposo ni Jahowa saonari?

 3 Nunga martaon jongjong huria Kristen di Epesus, tingki ditongos si Paulus surat tu nasida. Godang di huria i naung marpengalaman jala matoras di partondion. Alai, adong dope sian nasida na so matoras di partondion. Saonari, godang do donganta naung leleng manomba Jahowa jala matoras di partondion. Alai, adong dope na so matoras di partondion. Umpamana, marribu halak tardidi ganup taon. On patuduhon porlu dope nasida lam matoras di partondion. Molo hamu, songon dia?Kolosse 2:6, 7

SONGON DIA DO ASA MATORAS PARTONDION NI HALAK KRISTEN?

4, 5. Songon dia do halak Kristen na matoras marimbar sian na asing, alai aha do parange na pinatudu ni nasida? (Ida gombar di mula ni parsiajaran.)

4 Tingki manuhor jeruk hamu di onan, idaonmu ma ndang sai sarupa parbalga ni jeruk i. Alai, botoonmu do dia na malamun. Songon i ma nang halak Kristen na matoras. Ndang sai sarupa nasida. Marimbar do negara, hasomalan, umur dohot hasoloman ni nasida. Alai, adong do parange na tongtong tarida sian halak Kristen na matoras di partondion. Aha ma i?

5 Sahalak Kristen na matoras, maniru Jesus jala mangihuthon ”bogas ni patna.” (1 Petrus 2:21) Jesus mandok ingkon tahaholongi do Jahowa sian nasa ateate, hosa dohot rohanta. Hita porlu mangkaholongi dongan doshon dirinta. (Mateus 22:37-39) Halak Kristen na matoras marsitutu mangoloi poda i. Aha na taulahon patuduhon sadia solhot paralealeonta tu Jahowa dohot holong tu dongan.

Halak Kristen na matoras maniru serep ni roha ni Jesus molo diurupi nasida dongan na poso mangulahon ulaon na sumurung di huria (Ida paragraf 6)

6, 7. (a) Aha do parange na pinatudu ni halak Kristen na matoras di partondion? (b) Aha do na ingkon tasungkun tu dirinta?

6 Ndang holan holong na pinatudu ni halak Kristen na matoras di partondion. (Galatia 5:22, 23) Ibana ingkon lambok, boi mangorom diri jala sabar. Parange on, mangurupi ibana tongtong marpangkirimon tingki mangadopi sitaonon. Tingki marsiajar Bibel sahalakna, dilului do prinsip ni Bibel asa mangantusi na sintong dohot na sala. Dipangke do panggora ni roha na tarlatik tingki mambahen haputusan. Na matoras di partondion patuduhon serep ni roha. Pos do rohana mangihuthon tudutudu dohot aturan ni Jahowa. * Hiras rohana marbarita na uli jala mangurupi huria asa sai marsada.

7 Sadia leleng pe hita manomba Jahowa, porlu do tasungkun dirinta, ”Marsitutu do ahu maniru Jesus? Adong dope na porlu hupadenggan di parngoluonku?”

PARBINOTOAN NA BAGAS MAMBAHEN MATORAS PARTONDION

8. Sadia denggan do pangantusion ni Jesus taringot Bibel?

8 Diantusi Jesus do tangkas isi ni Bibel. Tingki marumur 12 taon,  mangkatai do Jesus rap dohot guru di bagas joro. ”Tarhalomong be do nasida umbege hatana, dibahen torus ni rohana dohot angka alusna.” (Lukas 2:46, 47) Tingki marbarita, dipangke ibana do Hata ni Debata laos longang ma roha ni musuna.Mateus 22:41-46.

9. (a) Aha do na ingkon diulahon halak Kristen na matoras di partondion? (b) Boasa ingkon marsiajar Bibel hita?

9 Halak na matoras di partondion, maniru Jesus jala marsitutu mangantusi Bibel. Dilului do hasintongan sian Bibel ala on mambahen matoras partondionna. (Heber 5:14) Halak Kristen na matoras ingkon marparbinotoan na bagas sian Bibel. (Epesus 4:13) Alani i, tasungkun ma dirinta, ”Hujaha do Bibel ganup ari? Marsiajar Bibel do ahu sahalakku? Adong do panombaon na sasaripe di keluargangku ganup minggu?” Molo marsiajar Bibel hita, taboto ma songon dia pingkiran dohot pangkilalaan ni Jahowa. Tapangke ma prinsip ni Bibel tingki mambahen haputusan. On mambahen solhot paralealeonta tu Jahowa.

10. Songon dia do pangkilalaan ni halak na matoras di partondion tu poda dohot prinsip ni Debata?

10 Ndang holan mamboto isi ni Bibel halak Kristen na matoras di partondion. Alai dihaholongi do poda dohot prinsip ni Debata. Paubaonna ma parange dohot pingkiranna. Tiruonna ma Jesus, jala dipatudu ma pangalaho na denggan, ”na tinompa suman tu Debata, di  bagasan hatigoran dohot hapolinon na marhasintongan!” (Jaha Epesus 4:22-24.) Taingot ma dipangke Jahowa do tondi parbadia manogunogu panurat ni Bibel. Alani i, molo marsiajar Bibel halak Kristen, diurupi tondi parbadia ma nasida asa marparbinotoan, lam mangkaholongi Jahowa, jala solhot tu Ibana.

MARSADA NI ROHA DI HURIA

11. Halak sisongon dia do di humaliang ni Jesus?

11 Halak na so mardosa do Jesus. Alai halak na adong di humaliangna sude do mardosa. Natuatuana, anggina dohot ibotona pe mardosa. Sisean ni Jesus pe patuduhon parange na mangkaringkothon diri sandiri. Umpamana, di borngin andorang so mate Jesus, marsalisi do siseanna taringot ”ise nasida rajumon na sumangap.” (Lukas 22:24) Alai, pos do roha ni Jesus boi do nasida matoras di partondion jala pajongjongkon huria na marsada. Di borngin i, martangiang ma Jesus asa marsada ni roha nasida. Didok ma tu Jahowa, ”Songon Ho, ale Amang, di bagasan Ahu jala Ahu di bagasan Ho.” Didok ibana muse, ”Asa sada nasida songon Hita na sada roha i.”Johannes 17:21, 22.

12, 13. (a) Aha do na tinuju ni halak Kristen? (b) Aha do na diulahon ni sahalak donganta baoa asa marsada di huria?

12 Halak Kristen na matoras di partondion marsada ni roha di huria. (Jaha Epesus 4:1-6, 15, 16.) Na tinuju ni halak Kristen i ma ”dipadomu jala martomu”, mangula ulaon di huria. Alani i, ingkon serep do roha ni halak Kristen. Nang pe, halak na mardosa di humaliangna, marsitutu do halak Kristen na matoras di partondion asa tongtong marsada ni roha di huria. Tasungkun ma dirinta, ”Aha do na huulahon tingki adong dongan mambahen sala? Songon dia do tingki adong mambahen hansit rohangku? Gabe sip do ahu tu ibana? Manang pintor hatop do hupadenggan paralealeonnami?” Halak na matoras di partondion hatop do padengganhon paralealeonna, asa sai marsada ni roha di huria.

13 Parrohahon ma tudosan on. Jotjot do jut roha ni si Uwe mangida hahurangan ni angka donganta. Alani i, marsiajar ma ibana taringot si Daud, sian Bibel dohot buku Pemahaman. Boasa si Daud na diparsiajari ibana? Ala hea do masa na dihilalana i tu si Daud. Umpamana, Raja Saul marsitutu laho mambunu si Daud, pigapiga halak naeng mandangguri ibana, tunggani boruna pe manginsahi ibana. (1 Samuel 19:9-11; 30:1-6; 2 Samuel 6:14-22) Alai, tongtong do si Daud mangkaholongi jala marpos ni roha tu Jahowa. On mambahen si Daud boi manalpuhon hahurangan ni si Saul. Diboto si Uwe ma porlu do tiruonna si Daud. Marhite parsiajaran Bibel, diantusi ma na porlu do paubaonna pingkiranna maradophon hahurangan ni angka dongan. Marsitutu ma ibana manalpuhon hasalaan ni nasida asa marsada ni roha di huria. Diulahon hamu do songon i?

 MARALEALE MA TU NA MANGULAHON LOMO NI ROHA NI DEBATA

14. Songon dia do Jesus mamillit alealena?

14 Burju do Jesus maradophon jolma. Las do roha ni baoa dohot borua, na poso dohot na matua, nang angka dakdanak jonok tu Jesus. Alai, manat do Jesus mamillit alealena. Didok ibana do tu siseanna, ”Alealengku ma hamuna, molo diula hamu na hupatikkon i tu hamu.” (Johannes 15:14) Dipillit Jesus ma halak na marsihohot mangihuthon ibana, na mangkaholongi jala na manomba Jahowa gabe alealena. Dipillit hamu do halak na mangkaholongi Jahowa gabe alealemuna? Boasa ringkot on?

15. Aha do labana molo maraleale na poso dohot halak na matoras di partondion?

15 Ingkon hona mata ni ari do parbue ni hau, asa denggan parlamunna. Suang songon i ma, holong ni angka dongan mangurupi hita asa matoras di partondion. Molo hamu sahalak na poso, nunga dibahen hamu haputusan di ngolumu? Denggan ma, molo maraleale hamu dohot naung leleng manomba Jahowa jala marsada ni roha di huria. Nasida nunga mangadopi sitaonon jala marsihohot manomba Jahowa. Urupan ni nasida ma hamu mamillit na dumenggan di ngolumuna. Molo jotjot hamu mangkatahatai dohot nasida, urupanna ma hamu mambahen haputusan na denggan asa matoras di partondion.Jaha Heber 5:14.

16. Songon dia do angka dongan na matoras di partondion mangurupi donganta na poso?

16 Sidung nama singkola ni si Helga. Godang do donganna na patorushon tu universitas, asa boi nasida mandapot karejo na denggan di ari na naeng ro. Alai, jotjot do si Helga mangkatahatai dohot dongan na matoras partondionna di huria. Didok ibana ma, ”Godang sian nasida umtua sian ahu. Diurupi nasida ma ahu asa mangalehon gumodang tingki marbarita. Alani i, nunga lima taon ahu gabe perintis. Saonari, las situtu ma rohangku ala manomba Jahowa di haposoonku. Ndang adong na husolsoli.”

17, 18. Aha do isara na dumenggan manomba Jahowa?

17 Molo tatiru Jesus, matoras ma hita di partondion. Solhot ma paralealeon jala sai taulahon ma lomo ni roha ni Jahowa. Isara na dumenggan manomba Jahowa, i ma molo matoras hita di partondion. Dijujui Jesus do siihuthon ibana, ”Naeng songon i ma marsinondang palitomuna di jolo ni halak, asa diida angka pambahenanmuna na denggan i, asa dipuji nasida Amamuna na di banua ginjang i.”Mateus 5:16.

18 Nunga taparsiajari songon dia halak Kristen na matoras di partondion, mangurupi huria asa tongtong marsada. Matoras do partondion ni sasahalak, molo denggan dipangke panggora ni rohana. Songon dia do panggora ni roha mangurupi hita mambahen haputusan na denggan? Songon dia do hita mangargai panggora ni roha ni donganta? Sungkunsungkun on dialusi di artikel na mangihut.

^ par. 6 Umpamana, donganta baoa naung matua mangalehon jala mangurupi donganta na poso mangulahon ulaon na sumurung.