Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Agustus 2015

Parrohahon ma Parsaoranmu di Tingki Parpudi

Parrohahon ma Parsaoranmu di Tingki Parpudi

”Ai segaan ni parsaoran na roa do hasomalan na denggan.”1 KORINT 15:33, Bibel Siganup ari.

ENDE: 73, 119

1. Di tingki sisongon dia do hita mangolu?

HITA mangolu di ”angka ari hasusaan.” Sian taon 1914 dung dipungka ”tingki parpudi,” lam tu jahatna ma na masa di tano on. (2 Timoteus 3:1-5) Porsea do hita tano on lam tu susana ala, nunga disurirangkon Bibel ”lam tu jahatna ma angka parjahat dohot panipu.”2 Timoteus 3:13, Bibel Siganup ari.

2. Hiburan sisongon dia do na dilului godang halak? (Ida gombar di mula ni parsiajaran.)

2 Godang halak saonari lomo rohana mangulahon manang manonton angka na jahat, parmainanon, ajiajian dohot hadatuon. Umpamana, di internet, di tv, di buku manang di majalah, jotjot do diida nasida hajahaton dohot parmainanon jala ndang dihasogohon nasida. Parange na jahat na mambahen tarsonggot roha ni halak pe, ndang sala be di pigapiga inganan. Alai, Jahowa ndang mangkalomohon sisongon i.Jaha Rom 1:28-32.

3. Aha do na diulahon halak tu angka na mangihuthon aturan ni Debata?

 3 Di abad parjolo, somal do halak manonton hajahaton dohot parmainanon gabe hiburan di nasida. Alai, siihuthon Jesus ndang mangulahon i, ala dioloi aturan ni Jahowa. On mambahen longang roha ni halak. Aha do pangkorhonna? Diinsahi jala dipapulik ma nasida. (1 Petrus 4:4) Saonari pe, adong mandok asing do halak na mangihuthon aturan ni Debata. Sasintongna, nunga dipaboa Bibel molo halak na mangihuthon Jesus ”ndang tarbahen so hona lele.”2 Timoteus 3:12.

SEGA DO HASOMALAN NA DENGGAN ALANI PARSAORAN NA ROA

4. Boasa ndang tahaholongi portibi on?

4 Molo taulahon lomo ni roha ni Debata, unang ma tahaholongi ”portibi on nang angka na dibagasanna!” (Jaha 1 Johannes 2:15, 16.) Sibolis, ”debata ni portibi on” mangarajai tano on. Dipalilu ibana do jolma marhite agama, pamarenta, iklan, dohot sitontonon. (2 Korint 4:4; 1 Johannes 5:19) Ala ndang sipardohot hita, ingkon tatundalhon do parsaoran na roa. Bibel mandok: ”Unang hamu maoto: ”Ai segaan ni parsaoran na roa do hasomalan na denggan.”1 Korint 15:33, Bibel Siganup ari.

5, 6. Tu ise do hita ndang marsaor, jala boasa?

5 Asa tongtong hita maraleale tu Jahowa, unang ma marsaor dohot na mangulahon na roa. Songon halak na mandok mangkaholongi Jahowa alai, ndang mangoloi Ibana. Molo adong na mangulahon dosa na balga jala ndang muba, unang ma marsaor tu ibana.Rom 16:17, 18.

6 Godang halak mangulahon lomo ni roha ni donganna asa unang dipapulik nasida. Alani i, molo marsaor hita dohot halak na so mangoloi Debata, gabe taihuthon ma nasida. Umpamana, molo maraleale hita tu halak na mangulahon parmainanon, gabe taulahon ma i. On ma na masa tu angka donganta. Na so olo muba gabe dipabali ma sian huria. (1 Korint 5:11-13) Jala dos ma nasida songon na didok ni si Petrus.Jaha 2 Petrus 2:20-22.

7. Ise do na boi gabe alealenta?

7 Nang pe ingkon burju hita tu sude jolma, unang ma maraleale hita tu na so mangoloi Debata. Ndang boi sahalak Sitindangi Ni Jahowa mardongandongan tu na so mangihuthon aturan ni Jahowa dohot tu na so tardidi dope. Rumingkotan do dihalomohon Jahowa sian dihalomohon halak na so mangkaholongi Debata. Holan tu na mangulahon lomo ni roha ni Debata ma hita maraleale. Jesus mandok: ”Ai na mangulahon lomo ni roha ni Debata, i do anggingku, i do ibotongku, i do dainang!”Markus 3:35.

8. Aha do pangkorhon ni parsaoran na roa tu bangso Israel?

8 Parsaoran na roa parohon jea. Songon na masa tu bangso Israel najolo. Andorang so sahat nasida tu tano Kanaan, dipasingot Jahowa do nasida taringot angka halak na di humaliangna. Didok Ibana ma tu nasida: ”Ndang jadi ho marsomba tu debatanasida, jala ndang jadi oloanmu nasida, jala ndang jadi bahenonmu, songon na binahennasida i, ingkon rendephononmu situtu nasida, jala ropuhanmu  situtu ganaganaan angka na pinajoknasida. Alai ingkon oloanmuna do Jahowa Debatamuna i.” (2 Musa 23:24, 25) Alai, godang halak Israel ndang mangoloi Debata jala ndang marsihohot tu Ibana. (Psalmen 106:35-39) Aha do pangkorhon ni i? Ndang dijangkon Jahowa be bangso Israel gabe bangsoNa jala dipillit ma huria Kristen gabe naposoNa.Mateus 23:38; Ulaon 2:1-4.

MANAT MA MAMILLIT SIJAHAON DOHOT SITONTONON

9. Boasa boi parohon jea angka sitontonon manang sijahaon?

9 Godang acara di tv, situs web, dohot angka buku na manegai paralealeonta dohot Jahowa. Jala ndang mangurupi halak Kristen asa porsea tu Jahowa dohot janjiNa. Alai, sudena i mambahen jolma asa porsea tu portibi na dirajai Sibolis. Alani i, ingkon manat do hita mamillit sijahaon, dohot sitontonon na mambahen hita mangkalomohon ”hisaphisap” ni portibi on.Titus 2:12.

10. Aha do na laho masa tu angka sitontonon na adong di portibi on?

10 Satongkin nari, ripashonon ni Debata ma portibi ni Sibolis dohot angka sitontonon na parohon jea. Bibel mandok: ”Jala na laho salpu do portibi on rap dohot na pinarhagiotna; alai na mian ro di salelenglelengna do na mangulahon lomo ni roha ni Debata.” (1 Johannes 2:17) Di Psalmen didok: ”Ai sai na siap do sogot angka parjahat i.” Dung i didok muse: ”Alai sai na teanon ni angka parlambohi do sogot tano i, jala hahilashononna hinadeak ni hadameon.” Sadia leleng? ”Teanon ni angka partigor i do sogot tano i, jala tongtong do nasida maringanan disi.”Psalmen 37:9, 11, 29.

11. Songon dia do Jahowa mangurupi hita asa sai marsihohot?

11 Imbar sian portibi na dirajai ni Sibolis, organisasi ni Jahowa mangurupi hita mandapot hangoluan na salelenglelengna. Songon tangiang ni Jesus tu Jahowa: ”Alai na mananda Ho, Debata na sasada i, na sintong i, dohot Jesus Kristus na sinurum, i do hangoluan na salelenglelengna.” (Johannes 17:3) Dipangke Jahowa do organisasiNa paradehon sude na tahaporluhon asa mananda Ibana. Umpamana, godang majalah, brosur, buku, video, dohot situs web na mangurupi hita marsihohot manomba Debata. Dibahen do parpunguan di liat portibi on, godangna lobi sian 110.000 huria. Na taparsiajari sian Bibel di parpunguan ganup minggu manang parpunguan bolon, patoguhon haporseaonta tu Jahowa dohot tu janjiNa.Heber 10:24, 25.

MARHASOHOTAN HOLAN DOHOT DONGAN SAHAPORSEAON

12. Aha do didok Bibel taringot na marhasohotan?

12 Halak Kristen na laho marhasohotan ingkon manat mamillit, ise na laho dongan saripena. Bibel mandok: ”Unang saauga hamu dohot angka na so porsea! Ai aha ma pardomuan ni hatigoran dohot na so uhum; jala aha do hasaoran ni hatiuron dohot haholomon?” (2 Korint 6:14) Bibel paingothon angka naposo ni Debata asa marhasohotan holan ”marhitehite Tuhan [Sahaporseaon]” i ma angka halak naung tardidi jala mangolu hombar tu aturan  ni Jahowa. (1 Korint 7:39) Molo marhasohotan hamu dohot halak na mangkaholongi Jahowa, dapotmuna ma dongan na mangurupi hamu marsihohot tu Jahowa.

13. Aha do sipaingot na dilehon Debata tu bangso Israel?

13 Diboto Jahowa do na dumenggan tu hita, jala nunga leleng dipaboa taringot marhasohotan holan tu dongan sahaporseaon. Umpamana, parrohahon ma aha na didok ni Jahowa tu bangso Israel taringot halak na so olo manomba Ibana. Marhite si Musa, didok do: ”Jala ndang jadi ho martondong tu nasida, borum ndang jadi lehononmu tu anakna, jala boruna ndang jadi buatonmu di anakmu. Ai marbalik sian Ahu do anakmu elaonna, asa oloanna angka debata sileban, jadi marsigorgor ma rimas ni Jahowa mida hamu, jala gira hamu agoonna.”5 Musa 7:3, 4.

14, 15. Aha do na masa tu si Salomo ala ndang be dioloi Jahowa?

14 Dung raja si Salomo, dipangido ibana ma bisuk tu Jahowa jala dilehon Debata ma pangidoanna. Alani i, tarbarita ma si Salomo raja na bisuk. Longang do roha ni Ratu Seba mangida bisuk ni si Salomo, didok ma: ”Dao do umbisuk jala ummora ho sian kabar na hubege i.” (1 Rajaraja 10:7, Bibel Siganup ari) Alai, sian pengalaman ni si Salomo, taparsiajari do muse pangkorhonna molo ndang mangoloi aturan ni Debata, jala marhasohotan tu halak na so manomba Ibana.Parjamita 4:13.

15 Nang pe dilehon Jahowa pasupasu tu si Salomo, ndang tongtong dioloi ibana aturan ni Jahowa. Dihaholongi si Salomo do ”torop parompuan sian bangso sileban” na so manomba Jahowa. Adong ma 700 tunggani boruna jala 300 radingna (gundik). Aha do pangkorhon ni i? Dung matua si Salomo ”dielaela angka jolmana i ma rohana mangihuthon tu debata sileban . . . jadi diulahon raja Salomo ma sogo ni roha ni Jahowa.” (1 Rajaraja 11:1-6) Parsaoran na roa mambahen hita ndang marsihohot tu Jahowa. On ma na masa tu si Salomo, jala boi do on masa tu hita. Alani i, unang ma ro tu pingkiranta laho marhasohotan tu halak na so mangkaholongi Jahowa!

16. Aha do poda ni Bibel tu halak na dongan saripena ndang manomba Jahowa?

16 Songon dia do molo dongan saripenta ndang manomba Jahowa? Bibel mandok: ”Suang songon i ma hamu angka tungganeboru, tunduk ma hamu tu tungganedolimuna be, asa molo adong sian nasida na so porsea di hata ni Debata, pangalahomuna i ma patundukhon nasida gabe porsea.” (1 Petrus 3:1, Bibel Siganup ari) Marlapatan do on tu tunggani doli molo ndang manomba Jahowa tunggani boruna. Tangkas do sipaingot ni Bibel taringot on: Gabe tunggani doli manang tunggani boru na burju ma hita, taihuthon ma aturan ni Jahowa taringot parsaripeon. Alani i, molo diida dongan saripemuna adong hamubaon di hamu ra, olo do ibana manomba Jahowa. On ma naung dihilala angka donganta.

MARSAOR MA DOHOT HALAK NA MANGKAHOLONGI JAHOWA

17, 18. Aha do na mangurupi si Noak dohot halak Kristen di abad na parjolo malua sian rimas ni Jahowa?

17 Parsaoran na roa mambahen hita ndang mangoloi Jahowa, alai parsaoran  na denggan mambahen hita marsihohot tu Ibana. Si Noak mangalehon sitiruon na denggan tu hita. Ibana mangolu tingki ”lam deak hajahaton ni jolma di tano on jala sai na jat na ma sude tubutubu dohot pingkiran” ni angka jolma ganup ari. (1 Musa 6:5) Ala jahat angka jolma tingki i, marsangkap ma Jahowa mangaripashon nasida. Bibel mandok si Noak halak ”na bonar” jala ”sai marparange mardonganhon Debata.”1 Musa 6:7-9.

18 Ndang marsaor si Noak dohot halak na so mangkaholongi Jahowa. Si Noak, tunggani boruna, tolu ianakhonna dohot parumaenna, holan nasida do masipajujuan tu na denggan. Si Noak dohot keluargana, marhiras ni roha mambahen parau jala digoari do ibana ”parjamita hatigoran.” (2 Petrus 2:5) Ala marsitutu nasida mambahen las roha ni Jahowa, dipalua ma nasida sian aek na sumar. Ala pinompar ni nasida do hita, mandok mauliate ma hita tu si Noak dohot tu keluargana ala tongtong nasida mangoloi Debata jala ndang manjangkon parsaoran na roa. Suang songon i ma, halak Kristen di abad na parjolo, ndang olo nasida marsaor tu halak na so mangkaholongi Jahowa. Dioloi do Debata jala dipalua ma nasida tingki diripashon Jerusalem taon 70 D.M.Lukas 21:20-22.

Marsaor dohot halak na mangkaholongi Jahowa boi mangurupi hita mangkilala hangoluan di tano na imbaru (Ida paragraf 19)

19. Aha do na mangurupi hita asa marsihohot tu Jahowa?

19 Songon si Noak, keluargana, dohot halak Kristen di abad na parjolo, unang ma marsaor hita dohot halak na so mangkaholongi Jahowa. Adong marjuta dongan sahaporseaon na boi tapillit gabe alealenta. Nasida mangurupi hita asa ”marsihohot marhaporseaon” tingki masa hasusaan. (1 Korint 16:13; Poda 13:20) Molo taulahon on, malua ma hita tingki diripashon Jahowa portibi na jahat on. Dung i, mangolu ma hita salelengna di tano na imbaru! Alani i, unang ma tajangkon parsaoran na roa saonari on!