Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Agustus 2015

Mangarimangi Holong ni Jahowa

Mangarimangi Holong ni Jahowa

”Jala sai marhusari [mangarimangi] do ahu taringot tu angka pambahenanmu sudena.”PSALMEN 77:13.

ENDE: 18, 61

1, 2. (a) Boasa pos rohanta Jahowa mangkaholongi naposoNa? (b) Tingki Debata manompa jolma, aha do naung disuanhon hian tu nasida?

BOASA pos rohanta na dihaholongi Jahowa do naposoNa? Andorang so dapotta alus ni sungkunsungkun on, parrohahon ma angka pengalaman on: Angka donganta paposhon roha ni si Taylene, didok nasida tu donganta i asa unang marmetmet ni roha ibana ala ndang boi be mangalean godang tingkina laho marbarita. Didok ibana ma: ”Molo ndang alani holong ni roha ni Jahowa, ndang boi ahu martahan sahat tu sadarion.” Dung mate tunggani doli ni si Brigitte, holan sahalakna do mangurus dua ianakhonna. Didok ibana: ”Ndang na mura mangurus dakdanak di portibi na dirajai ni Sibolis on, tarlumobi ala holan sahalak ahu. Alai, pos do rohangku holong do roha ni Jahowa, alana ditogutogu do ahu mangadopi i, jala ndang tagamon paloasonNa ahu mangadopi sitaonon na so tolap gogongku.” (1 Korint 10:13, Bibel Siganup ari) Posi do sahit ni si Sandra jala ndang boi be diubati. Di parpunguan  bolon, sahalak donganta borua patuduhon holongna tu si Sandra. Alani i, didok tunggani dolina ma: ”Nang pe ndang tangkas hutanda hami ibana alai, holong na dipatuduna i mambahen las rohanami. On paposhon rohanami na dihaholongi Jahowa do hami.”

2 Tingki Jahowa manompa jolma, nunga disuanhon Ibana asa masihaholongan nasida. Alai, olo do mura hita holsoan alani sahit, manang parsoalan di parhepengon jala ndang sai dijangkon halak hita tingki marbarita. Molo tahilala na so dihaholongi Jahowa be hita, taingot ma arga do hita di Ibana. Didongani jala diurupi do hita. Ndang lupahononNa hita saleleng marsihohot tu Ibana.Jesaya 41:13; 49:15.

3. Aha do paposhon rohanta na dihaholongi Jahowa hita?

3 Songon angka donganta i, posma rohanta na urupan ni Jahowa do hita tingki adong sitaonon. (Psalmen 118:6, 7) Di artikel on, taulas ma opat silehonlehon na patuduhon holong ni Jahowa tu hita. (1) na tinompaNa, (2) Bibel, (3) tangiang, dohot (4) tobusan. Molo tarimangi na binahen ni Jahowa tu hita gabe lam taargai ma holongNa.Jaha Psalmen 77:12, 13.

MANGARIMANGI NA TINOMPA NI JAHOWA

4. Aha do na taparsiajari sian na tinompa ni Jahowa?

4 Molo tarimangi na tinompa ni Jahowa, taboto ma holong situtu do rohaNa tu hita. (Rom 1:20) Dipatupa Jahowa tano on, dang holan ingananta sambing. Alai, godang do na boi taulahon asa tongtong hita mangolu. Marragam do sipanganon na tabo dipatupa Debata tu hita! (Parjamita 9:7) Longang do roha ni donganta borua na margoar si Catherine mangida uli ni angka na tinompa ni Debata, tingki musim semi di Kanada. Didok ibana ma: ”Longang rohangku mangida sude na mangolu di tano on—angka bunga dohot pidong na boi mulak tu asarna, dung i muse pidong kolibri na gelleng pe boi mangalului sipanganonna dompak jandela ni dapurhu. Huhilala, ala ni holong ni Jahowa do umbahen na dipatupa on.” Tutu ma, lomo do roha ni Debata asa marlas ni roha hita tu angka na tinompaNa.—Ulaon 14:16, 17.

5. Songon dia do Jahowa patuduhon holongNa tingki ditompa jolma?

5 Nunga disuanhon Jahowa hian asa boi taradoti angka ulaonta. (Parjamita 2:24) Didok Debata do tu jolma asa digohi jala diradoti tano on, dung i, dirajai ma angka ragam ni binatang. (1 Musa 1:26-28) Ditompa Debata do hita asa boi maniru Ibana!Epesus 5:1.

TAARGAI MA BIBEL

6. Boasa ingkon tarimangi Hata ni Debata?

6 Dilehon Jahowa do Bibel tu hita ala holong rohaNa. Marhite Bibel, tatanda ma Ibana jala taboto ma songon dia pangkilalaanNa tu jolma. Dipatorang Bibel do tu hita songon dia pangkilalaan ni Debata tu bangso Israel na jotjot mangalo. Psalmen 78:38 mandok: ”Alai anggo Ibana, asi do rohana disesa do dosa, jala ndang disiaphon, jala jotjot do mulak rimasna i dibahen, jala ndang disunggul rimasna apala  saluhut.” Molo tarimangi ayat on, boi ma taboto holong ni roha ni Jahowa tu hita. Lam pos ma rohanta na diparrohahon do hita.Jaha 1 Petrus 5:6, 7.

7. Boasa ingkon taargai Bibel?

7 Ingkon taargai do Bibel. Boasa? Alana marhite Bibel, boi ma tatanda Jahowa. Molo jotjot natuatua mangkatai dohot ianakhonna, lam masihaholongan ma nasida. Ama parholong do Jahowa. Nang pe ndang hea taida jala tabege soaraNa, boi do lam holong rohanta tu Ibana marhite Bibel. Alani i, sai taparrohahon ma HataNa! (Jesaya 30:20, 21) Molo tajaha Bibel, lam tatanda jala lam porsea ma hita tu Jahowa, Debata na manogunogu jala mangalinggomi hita.Jaha Psalmen 19:8-12; Poda 1:33.

Nang pe dilehon si Jehu sipasingot tu raja Josapat, alai, adong do ”ruhut na denggan” di dirina na diida Jahowa (Ida ma paragraf 8, 9)

8, 9. Aha do na ingkon taboto taringot Jahowa? Lehon ma sada tudosan sian Bibel.

8 Lomo roha ni Debata asa taboto na holong rohaNa tu hita. Ndang holan hahuranganta sambing na diidaNa alai, diida do na denggan di dirinta. (2 Kronika 16:9) Taparrohahon ma songon dia Jahowa mangida na denggan di diri ni Raja Josapat sian Juda. Mangulahon na sala do si Josapat tingki satolop tu Raja Ahab laho mangalo halak Siria, di Ramot di Gilead. Adong 400 panurirang pargapgap mandok na monang do nasida di parporangan i,  alai si Mika, panurirang ni Jahowa mandok ndang na laho monang nasida. Jala tutu ma masa i. Mate ma si Ahab di parporangan i, alai malua do anggo si Josapat. Dung i, disuru Jahowa ma si Jehu mamodai si Josapat di hasalaanna i. Didok si Jehu ma tu ibana: ”Adong dope tahe jumpang ruhut na denggan sian ho.”2 Kronika 18:4, 5, 18-22, 33, 34; 19:1-3.

9 Andorang so masa i, disuru si Josapat do halak Lepi dohot angka malim laho tu sude luat ni Juda mangajarhon uhum ni Jahowa. Pangkorhon ni on, angka halak sian bangso na asing pe gabe mananda Jahowa. (2 Kronika 17:3-10) Nang pe mangulahon na sala si Josapat, alai ndang dihalupahon Jahowa na denggan naung diulahonna i. On paposhon rohanta, ala sipata taulahon na sala. Molo tabahen na denggan laho manomba Jahowa, sai dihaholongi ma hita. Jala ndang lupahononNa angka na denggan naung tabahen tu Ibana.

TAARGAI MA TANGIANG

10, 11. (a) Boasa silehonlehon na arga tangiang? (b) Songon dia do Debata mangalusi tangiangta? (Ida gombar di mula ni parsiajaran.)

10 Ama na parholong, manangihon ianakhonna tingki mangkatai tu ibana. Alani holongna tu nasida, naeng do diboto songon dia pangkilalaan ni ianakhonna. Songon i ma nang Debata Jahowa tu hita. Ditangihon Ibana do tangiangta. Jala hak na sumurung do boi mangkatai tu Ibana!

11 Boi do hita martangiang tu Jahowa manang andigan pe. Ala alealenta do ibana, jala rade do Ibana manangihon tangiangta. Si Taylene, na dipaboa di paragraf na parjolo mandok: ”Boi do tapaboa manang aha pe tu Debata.” Dialusi Jahowa do tangiangta marhite Bibel, angka buku, manang dongan sahaporseaon. Ditangihon Jahowa do tangiangta molo marsitutu hita mangido tu Ibana. Jala diantusi Ibana do sude na porlu di hita. Alus ni tangiangta patuduhon holong ni Ibana tu hita.

12. Boasa ingkon taparsiajari tangiang na disurat di Bibel?

12 Adong parsiajaran na denggan tadapot sian tangiang na disurat di Bibel. Boi ma taparsiajari on, di panombaon na sasaripe. Molo tarimangi tangiang ni angka naposo ni Debata, gabe lam denggan ma tangiangta. Umpamana, tangiang ni si Jona sian butuha ni dengke na patuduhon serep ni roha. (Jona 1:17–2:10) Dung i, taida ma muse, tangiang ni si Salomo tingki manabalhon bagas joro, na patuduhon ias ni rohana tu Debata. (1 Rajaraja 8:22-53) Jala tarimangi ma tangiang sitiruon na dibahen ni Jesus. (Mateus 6:9-13) Na rumingkot, ”pabotohon hamu ma tu Debata pangidoanmuna marhitehite tangiang dohot elehelek mardongan mauliate! Jala dame ni Debata na sumurung sian saluhut roha, i ma mangaramoti angka ateate dohot pingkiranmuna.” Molo taulahon on, lam taargai ma holong ni Jahowa.Pilippi 4:6, 7.

TAARGAI MA TOBUSAN

13. Aha do laba na tadapot sian tobusan?

13 Jahowa mangalehon tobusan ”asa mangolu hita.” (1 Johannes 4:9)  Taringot holong ni Debata on, apostel Paulus manurat: ”Disi ma tongon mate Kristus humongkop angka parjahat. Ai maol mate halak humongkop partigor; adong do deba na barani mate humongkop na ulibasa. Alai ia Debata, dipapatar do holong ni rohana i di hita, uju pardosa dope hita, ai disi do mate Kristus humongkop hita.” (Rom 5:6-8) Holong ni Debata na umbalga, i ma tobusan jala marhite tobusan boi hita maraleale tu Ibana.

14, 15. Aha do laba ni tobusan tu (a) angka na nimiahan? (b) angka na mangkirim di tano on?

14 Mandapot hak na sumurung ma sisaratus opat pulu opat ribu na nimiahan i. (Johannes 1:12, 13; 3:5-7) Dimiahi Jahowa do nasida marhite tondi parbadia, jala digoari ma nasida anak ni Debata. (Rom 8:15, 16) Ala adong dope sian nasida na tading di tano on, boasa didok si Paulus ”rap dipabangkit hita tu gomgoman banua ginjang, di bagasan Kristus Jesus”? (Epesus 2:6) Alana, nunga dilehon Jahowa tu nasida pangkirimon laho mangolu salelenglelengna di surgo.Epesus 1:13, 14; Kolosse 1:5.

15 Halak na so dimiahi, digoari do alelale ni Debata ala dipatudu haporseaonna tu tobusan. Boi do nasida gabe anak ni Debata jala mangolu salelengna di paradeiso. Marhite tobusan dipatudu Jahowa ma holong na tu sude jolma. (Johannes 3:16) Molo marsihohot hita tu Debata, mangolu ma hita di tano na imbaru! Alani i, taargai ma tobusan na diparade ni Debata tu hita.

TAPATUDU MA HOLONG TU JAHOWA

16. Molo tarimangi holong ni Debata, taronjar ma rohanta mangulahon aha?

16 Ndang tarbilangan sude na binahen ni Jahowa laho patuduhon holongNa tu hita. Songon ende ni Raja Daud: ”Dibahen i mansai arga situtu do angka pingkiranmu di ahu, ale Debata, jala mansai torop do bilanganna. Tung sura naeng rajumanku, tumorop do nasida sian horsik; molo ngot ahu, tong dope ahu di lambungmi.” (Psalmen 139:17, 18) Molo tarimangi sude na binahen ni Jahowa, taronjar ma rohanta mangkaholongi Ibana. Dung i, talehon ma sude na dumenggan tu Ibana.

17, 18. Songon dia do hita patuduhon holong tu Debata?

17 Godang dalan laho patuduhon holong tu Jahowa. Umpamana, hiras ma rohanta marbarita na uli. (Mateus 24:14; 28:19, 20) Jala marsihohot ma hita tu Ibana tingki adong hasusaan. (Jaha Psalmen 84:12; Jakobus 1:2-5.) Nang pe borat hasusaan na taadopi, pos ma rohanta diparrohahon jala diurupi Jahowa do hita.Psalmen 56:9.

18 Holong tu Jahowa mangonjar rohanta mangarimangi sude na tinompaNa. Molo taparsiajari Bibel, on patuduhon holongta tu Jahowa. Tongtong ma martangiang tu Jahowa asa togu paralealeonta tu Ibana. Tarimangi ma pangkorhon ni tobusan asa lam balga holongta tu Ibana. (1 Johannes 2:1, 2) On ma pigapiga dalan laho patuduhon na taargai do holong ni Jahowa.