Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SIULASON NI MAJALAH ON | MULAK MANGOLU HALAK NAUNG MATE—TUTU DO I?

Aha do Pangkirimon tu Halak na Mate?

Aha do Pangkirimon tu Halak na Mate?

Boi do na mate mulak mangolu?

ALUS NI BIBEL: ”Ai di na ro tingkina, begeon ni saluhut halak na di angka tanoman i ma soarana [Jesus]. Dung i ruar be ma.”Johannes 5:28, 29.

Dung mamarenta Jesus di Harajaonna, paheheonna ma saluhut halak na di tanoman. Si Fernando na dipaboa di artikel na parjolo mandok: ”Songgot do rohangku tingki manjaha Johannes 5:28, 29, gabe marpangkirimon ma ahu jala gabe pos ma rohangku laho mandalani ngolu tu ari na naeng ro.”

Mangkirim do si Job, mulak mangolu do muse halak naung mate. Didok ma: ”Ia dung mate baoa i, tung tagamon ma ulahanna mangolu? Tung di saluhut ariari ni parporangonku nian ahu mangkirim, paima ro ari haluaonku. Disi Ho joujou di ahu, pintor alusanku do Ho.”Job 14:14, 15.

Haheheon ni si Lasarus mangalehon pangkirimon tu ari na naeng ro

Tangkas do diantusi iboto ni si Lasarus, i ma si Marta pangantusion taringot haheheon. Dung mate si Lasarus didok Jesus ma tu ibana: ”Na hehe ma ibotom!” Dung i dialusi si Marta ma: ”Olo, huboto do, na hehe do ibana di haheheon i, na di ari parpudi.” Jala didok Jesus ma tu ibana: ”Ahu do haheheon dohot hangoluan; na mangolu do na porsea di Ahu, nang pe mate ibana!” (Johannes 11:23-25) Dungkon i, dipahehe Jesus ma si Lasarus! Ulaon ni Jesus na palongang roha on, patuduhon aha na laho masa sogot. Paheheonna ma sogot sude halak na mate di liat portibi on!

Ise do na laho dipahehe tu surgo?

ALUS NI BIBEL: Dipatudu Bibel do marimbar haheheon ni Jesus sian haheheon ni ualu halak na disurat di Bibel. Si ualu halak i, mulak mangolu muse di tano on. Alai molo Jesus, didok do: ”Jesus Kristus . . di siamun ni Debata do Ibana, dung laho tu banua ginjang.” (1 Petrus 3:21, 22) Holan Jesus do na dipahehe tu surgo? Didok Jesus do tu angka apostelna: ”Jala laho pe Ahu mangarade inganan di hamu, sai mulak do Ahu mangalap hamu, asa rap hamu dohot Ahu!”Johannes 14:3.

Diparade Jesus do inganan di surgo tu angka siseanna. Adong ma 144.000 halak na dipahehe tu surgo. (Pangungkapon 14:1, 3) Alai, aha do na laho ulahonon ni nasida di surgo?

 Godang na laho ulahonon ni si 144.000 halak i disi! Bibel mandok: ”Na martua jala na badia do halak na martohap di haheheon na parjolo i; ndang marhuaso hamatean paduahon mangago nasida; na gabe malim ni Debata dohot Kristus do nasida, jala mangarajai rap dohot Ibana leleng ni na saribu taon i.” (Pangungkapon 20:6) Nasida rap dohot Jesus mamarenta gabe raja dohot malim tu tano on.

Ise do na laho dipahehe di tano on?

ALUS NI BIBEL: Apostel Paulus manurat: ”Na mangkirim do rohangku tu Debata, mulak mangolu sogot angka na tigor dohot angka na geduk, songon na hinirim ni rohanasida pe.”Ulaon ni Apostel 24:15.

Bibel paposhon rohanta molo marmiliar halak naung mate boi mulak mangolu muse

Ise do na digoari halak ”na tigor?” Parrohahon ma na masa tu si Daniel. Dung matua si Daniel didok Debata ma tu ibana: ”Laho ma ho, marroha pangkirimon di ujung, jala maradian ma ho, asa hehe ho muse manjalo partohapanmu di ujung ni angka ari!” (Daniel 12:13) Didia do paheheonna si Daniel? ”Teanon ni angka partigor i do sogot tano i, jala tongtong do nasida maringanan disi.” (Psalmen 37:29) Jala didok Jesus do: ”Martua ma na lambok roha, ai teanonnasida do tano on!” (Mateus 5:5) Si Daniel rap dohot halak na marsihohot paheheonna di tano on jala mangolu salelenglelengna.

Ise do na digoari halak ”na geduk?” Marmiliar halak naung mate na so mananda hasintongan sian Bibel. Dung dipahehe, diurupi ma nasida asa mananda jala pasangaphon Jahowa * dohot Jesus. (Johannes 17:3) Sude na mamillit laho manomba Debata boi mangolu—salelenglelengna.

Sude na mamillit laho manomba Debata boi mangolu salelenglelengna jala martua ala ndang manaon sahit

Aha do na masa di tano on sogot?

ALUS NI BIBEL: ”Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha.” (Pangungkapon 21:4) ”Jala paulionnasida ma angka bagas, laos inganannasida, suanonnasida ma hau anggur jala panganonnasida parbuena.”Jesaya 65:21.

Paheheon ni Debata ma halak na tahaholongi naung mate! Alai, aha do na paposhon rohanta na laho masa haheheon?

^ par. 15 Jahowa, i ma goar ni Debata na disurat di Bibel.