Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Juli 2015

Sai Marsihohot ma Hita tu Harajaon ni Debata

Sai Marsihohot ma Hita tu Harajaon ni Debata

”Ndang na sian portibi on nasida.”JOHANNES 17:16.

ENDE: 63, 129

1, 2. (a) Songon dia do hita patuduhon na marsihohot hita tu Jahowa? (Ida gombar di mula ni parsiajaran.) (b) Tu dia do godangan jolma marsihohot, jala aha do pangkorhonna?

Ndang parsidohot naposo ni Jahowa tu hasomalan na paimbarimbarhon bangso, marga, manang adat ni jolma. Boasa? Ala tahaholongi do Jahowa, marsihohot jala taoloi Ibana. (1 Johannes 5:3) Didia pe hita maringanan jala sian dia pe huta haroroanta, ingkon taihuthon do aturan ni Debata. Rumingkot do marsihohot tu Jahowa dohot tu HarajaonNa sian angka aha pe. (Mateus 6:33) Alani i do boi tadok, ”ndang na sian portibi on” hita.Jaha Johannes 17:11, 15, 16; Jesaya 2:4.

2 Saonari, godang do halak marsihohot tu bangso, marga, adat dohot tim olahraga hasoloman ni nasida. Ujungna, gabe parohon parbadaan, hosom ni roha tu na asing, jala olo mambunu ise pe na so mangihuthon nasida. Nang pe ndang taihuthon i, alai boi do on mangkorhon jala mambahen susa hita dohot tu keluarganta. Ala ditompa Debata hita mardongan bisuk laho mamboto dia na tigor manang ndang, boi do  gabe marpihak hita molo dibahen pamarenta haputusan na so tigor. (1 Musa 1:27; 5 Musa 32:4) Songon dia do pangkilalaanta tingki masa na so tigor? Gabe taihuthon do nasida manang na ndang?

3, 4. (a) Boasa ndang parsidohot hita molo adong parbadaan? (b) Aha do na laho taulas di parsiajaran on?

3 Torop halak gabe mangihuthon pamarenta molo tubu parbadaan, ala on do tanda ni rakyat na burju didok nasida. Alai Jesus do na taihuthon. Alani i ma, ndang taihuthon politik manang parsidohot marporang. (Mateus 26:52) Ndang hea tubu di bagasan roha ni halak Kristen na sintong adong pamarentaon na denggan di portibi on. (2 Korint 2:11) Alani i, ndang parsidohot hita tu parbadaan na adong di portibi on.Jaha Johannes 15:18, 19.

4 Ala na so tipak, olo do ra sipata marpingkiran negatif hita tu halak na asing. (Jeremia 17:9; Epesus 4:22-24) Di parsiajaran on, taulas ma angka prinsip na boi mangurupi hita manundalhon hasomalan na paimbarimbarhon jolma. Taulas ma muse songon dia hita boi marsiajar sian parniulaon ni Jahowa dohot Jesus asa boi hita marsihohot tu HarajaonNa.

BOASA NDANG PARSIDOHOT HITA TU PORTIBI ON

5, 6. Tingki Jesus di tano on, songon dia do ibana maradophon halak na asing, jala boasa?

5 Molo maol tahilala asa unang parsidohot tu portibi on, tasungkun ma dirinta, ’Aha do naung hea diulahon Jesus?’ Tingki di tano on Jesus adong do parbadaan di halak Judea, Galilea dohot Samaria. Ndang marsiantoan halak Jahudi dohot halak Samaria. (Johannes 4:9) Jotjot do ndang sai satolop halak Parise dohot halak Saduse. (Ulaon ni Apostel 23:6-9) Umsangapan do dihilala halak Jahudi na mamparsiajari uhum sian na so mamparsiajari uhum. (Johannes 7:49) Jala godang do na mangkosomi sijalobeo dohot halak Rom. (Mateus 9:11) Alai ndang hea parsidohot Jesus disi. Nang pe diboto ibana halak Israel do bangso na pinilit ni Jahowa, ndang hea diajarhon ibana tu siseanna molo nasida dumenggan sian na asing. (Johannes 4:22) Gariada, diajari ibana do siseanna mangkaholongi sude jolma.Lukas 10:27.

6 Boasa ndang marimbar angka bangso di adopan ni Jesus? Ala holong rohana dohot roha ni Amana tu jolma. Jahowa manompa jolma asa marpinompari jala manggohi tano on. (1 Musa 1:27, 28) Alani i ndang tubu di roha ni Jahowa dohot Jesus laho paimbarhon halak sian marga, bangso, manang hata nasida. (Ulaon ni Apostel 10:34, 35; Pangungkapon 7:9, 13, 14) Tatiru ma pingkiran ni nasida na tipak on.Mateus 5:43-48.

7, 8. (a) Tu ise do hita marsihohot, jala boasa? (b) Holan ise do na boi pasohothon parungkilon ni jolma?

7 Boasa ndang satolop jala ndang parsidohot hita tu pamarentaon ni jolma? Ala tu Jahowa do hita marsihohot jala Ibana do Rajanta. Tingki di porlak Eden, didok Sibolis do ndang parhuaso na denggan Jahowa. Sibolis mangkalomohon asa porsea jolma na dumenggan do parniulaonna sian Debata. Dipaloas Jahowa do hita mamillit tu ise hita marsihohot. Alai tu ise do hita ingkon marsihohot? Taoloi do Jahowa jala porsea do hita na dumengan dalanNa sian dalanta? Porsea do hita holan HarajaonNa  na boi pasohothon angka parungkilon? Manang, boi do hita manontuhon sandiri na denggan tu ngolunta?1 Musa 3:4, 5.

8 Molo adong na manungkun tu hamu taringot sadasada partai politik manang organisasi na asing, songon dia do alusmuna? Olo do adong sian organisasi on na ias rohana laho mangurupi angka jolma. Alai taboto do holan Harajaon ni Jahowa do na boi pasohothon nasa parungkilon ni jolma jala mangaripashon angka parjahat. Unang ma taihuthon rohanta sandiri alai taihuthon ma tudutudu ni Jahowa sian huria. I do mambahen marsada sude na adong di huria.

9. Parsoalan aha do na adong di halak Kristen di abad parjolo, jala aha na ringkot ulahonon ni nasida?

9 Di abad parjolo, adong do parsoalan di tongatonga ni halak Kristen di Korint, na mandok, ”’Sisean ni si Paulus do ahu; na deba: Sisean ni si Apollos do ahu; na deba: Sisean ni si Kepas do ahu; na deba: Sisean ni Kristus do anggo ahu.’” Tarsonggot do roha ni si Paulus tingki diboto ibana i. Parsoalan na balga do on, ala boi manegai hadameon di huria. Alani i disungkun ma tu nasida: ”Na binagi do Kristus i?” Dipodai si Paulus ma nasida: ”Alai huapoi ma hamu, ale angka dongan, mangasahon Goar ni Tuhanta Jesus Kristus, asa sahata hamu saluhutna, unang ma adong parbolatan di hamu; hot ma hamu binahen ni sada ni roha dohot sada ni pingkiran!” Boi do masa sisongon on saonari. Unang ma nian adong hasomalan paimbarimbarhon di hurianta.1 Korint 1:10-13; jaha Rom 16:17, 18.

10. Sipasingot aha do na dilehon si Paulus tu halak Kristen, jala aha na taparsiajari sian on?

10 Dipaingot si Paulus do halak Kristen na nimiahan, na laho pardisurgo do nasida jala unang ma ”angka na di tano on diparrohahon”. (Pilippi 3:17-20) * (Ida surat na di toru.) Suruan [duta] ni Debata dohot Kristus do angka halak na nimiahan. Tingki mian di negara na asing sahalak suruan, ndang parsidohot ibana tu parsoalan manang tu politik di negara i. Suang songon i ma, ndang parsidohot angka na nimiahan tu politik dohot parsoalan ni portibi on. (2 Korint 5:20) Songon i do muse tu halak na mangkirim laho mangolu salelenglelengna di tano on, ingkon marsihohot do tu Harajaon jala ndang parsidohot nasida tu parsoalan ni portibi on.

TAPASOMAL MA ASA SAI MARSIHOHOT TU HARAJAON NI DEBATA

11, 12. (a) Molo naeng marsihohot hita tu Harajaon ni Debata, parange sisongon dia do na ingkon tatundalhon? (b) Songon dia do pangkilalaan ni sahalak donganta borua tu halak na asing, jala aha do na boi mangurupi ibana asa muba?

11 Lomo do roha ni godangan halak mardongan tu dongan sahutana dohot dongan samargana. Jotjot do nasida pasangaphon huta hatubuanna. Alai unang ma songon i hita. Gariada, ingkon tapauba do pingkiranta jala tapasomal ma panggora ni rohanta asa unang paimbarimbarhon halak. Songon dia do hita boi mangulahon on?

12 Si Mirjeta * (Ida surat na di toru) tubu di Yugoslavia. Alai magodang di inganan na mangkasogohon halak Serbia do ibana. Tingki marsiajar ibana taringot Jahowa, diantusi ma ndang marimbar halak di adopan ni Debata,  jala diboto ma Sibolis do na mangkalomohon i. Alani i, marsitutu do ibana pauba pingkiranna. Alai tingki masa porang di ingananna, gabe sogo muse rohana tu halak Serbia. Ndang olo be ibana marbarita na uli tu nasida. Diboto ibana do on sala, alani i dipangido ibana ma pangurupion sian Jahowa asa muba pingkiranna jala asa boi gabe perintis. si Mirjeta mandok: ”Godang do pangurupion na huhilala ala jotjot marbarita na uli. Tingki marbarita, marsitutu do ahu maniru holong ni Jahowa, ujungna boi ma moru pingkiranku na sala i.”

13. (a) Aha do na masa tu si Zoila, jala songon dia do ibana mangadopi i? (b) Aha do na boi taparsiajari sian pengalaman ni si Zoila?

13 Si Zoila pinda sian Meksiko tu Eropa. Di huria i, marragam do haroroan ni angka dongan. Si Zoila paboahon, jotjot do bangso, parabiton, dohot musik sian negarana gabe siparengkelon ni donganna. Gabe hurang tabo do pangkilalaanna, dibahen i dipangido ibana do tu Jahowa asa unang mura hansit rohana. Molo hita di situasi ni si Zoila, songon dia do hita mangadopi i? Pigapiga sian angka donganta marsitutu do mangorom diri asa unang muruk tingki dibege nasida diparoaroa halak huta hatubuanna. Alani i, unang ma tadok jala taulahon agia aha pe na patuduhon na dumenggan hita sian na asing, na boi mamolamola angka donganta.Rom 14:19; 2 Korint 6:3.

14. Songon dia do asa boi tapahombar pingkiranta tu lomo ni roha ni Jahowa?

14 Angka halak na marharoroan sian nasa bangso do naposo ni Debata, alani i unang ma tubu di bagasan rohanta na dumenggan do sadasada bangso sian bangso na asing. Olo do ra keluarganta manang dongan sahutanta manjujui hita asa humolongan tu huta hatubuanta. Alani i, olo do ra gabe negatif pingkiranta saleleng on tu halak na marasing adatna, bangsona, hatana, dohot margana. Aha do na boi mangurupi hita asa muba? Rimangi ma songon dia Jahowa mangida angka halak na sai pasangaphon hutana dohot tu dirina sandiri. Sulingkiti ma on tingki marsiajar Bibel sahalakmuna manang tingki panombaon na sasaripe. Dung i pangido ma pangurupion sian Jahowa asa boi tapahombar pingkiranta tu lomo ni rohaNa.Jaha Rom 12:2.

Aha pe na didok manang na diulahon halak tu hita, ingkon taoloi jala marsihohot do hita tu Jahowa (Ida paragraf 15, 16)

15, 16. (a) Songon dia do pandapot ni pigapiga halak ala marimbar hita sian nasida? (b) Songon dia do angka natuatua boi mangurupi ianakhonna asa sai marsihohot tu Jahowa?

15 Ias ma nian panggora ni rohanta laho manomba Jahowa, alani i ingkon imbar do hita sian dongan sakarejonta, sasingkolanta, manang keluarganta. (1 Petrus 2:19) Dipaingot Jesus do, hosoman ni angka halak ma hita ala marimbar sian nasida. Taingot ma, godang sian na mangkosomi hita ndang mamboto Harajaon ni Debata. Alani i, ndang diantusi nasida boasa hita marsihohot tu Harajaon ni Debata ndang tu pamarentaon ni jolma.

16 Aha pe na didok manang na diulahon halak tu hita, ingkon taoloi jala marsihohot do hita tu Jahowa. (Daniel 3:16-18) Tarlumobi tu angka na poso, maol do ra dihilala nasida marimbar sian angka donganna. Hamu angka natuatua, urupi ma ianakhonmuna asa barani di singkola. Ra mabiar nasida molo ndang manghormat [salut] bendera manang mabiar nasida molo ndang parsidohot di upacara nasional. Di tingki panombaon na sasaripe, parsiajari hamu  ma songon dia pangkilalaan ni Jahowa taringot i. Ajari ma ianakhonmuna songon dia asa tangkas jala lambok tingki paboahon haporseaonna. (Rom 1:16) Molo porlu, mangkatai ma hamu tu guru ni nasida taringot haporseaonmuna.

ARGAI MA SALUHUT JOLMA

17. Pingkiran na songon dia do na ingkon tatundalhon, jala boasa?

17 Somal do molo tahalomohon sipanganon, hata, hasomalan, dohot huta hatubuanta. Alai hea do tubu di rohanta na dumenggan do hasolomanta sian hasoloman ni halak? Dihalomohon Jahowa do asa taargai sude ragam ni tinompaNa. (Psalmen 104:24; Pangungkapon 4:11) Alani i, boasa sai mian di bagasan rohanta na dumenggan do hasomalan ni sasahalak sian na asing?

18. Boasa denggan molo tatiru Jahowa maradophon halak na asing?

18 Dihalomohon Jahowa do sude jolma marsiajar jala manomba Ibana asa mandapot hangoluan salelengna. (Johannes 3:16; 1 Timoteus 2:3, 4) Rade ma hita manangihon jala manjalo pandapot ni halak nang pe ndang sapingkiran hita tu nasida. Molo taulahon on, marlas ni roha ma hita jala dame ma huria. Songon naung taparsiajari ala marsihohot hita tu Jahowa dohot tu HarajaonNa, ndang parsidohot be hita di ulaon ni portibi on. Tahagigihon ma ginjang ni roha dohot holongan tu diri sandiri na somal di portibi on. Mandok mauliate ma hita ala diajari Jahowa hita mardame jala marserep ni roha! Tahilala ma songon na dihilala ni panurat Psalmen na mandok: ”Dengganna i dohot sonangnai, molo tung pungu sahundulan angka na marhahamaranggi!”Psalmen 133:1.

^ par. 10 Adong do ra halak Rom di huria Pilippi, alani i gumodang do hak ni nasida sian angka na so halak Rom di huria i.

^ par. 12 Pigapiga goar nunga diganti.