Songon dia do mamangke panggilingan najolo?

Somal do najolo panggilingan dipangke manggiling boras laho mambahen roti. Angka borua manang hatoban do na somal mamangke panggilingan ganup ari. Soara ni angka panggilingan jotjot do dibege di parngoluon ni jolma di tingki i.2 Musa 11:5; Jeremia 25:10.

Boi ma taida songon dia nasida mamangke panggilingan on sian angka gombar ni halak Misir najolo. Boras na laho sigilingon dibahen ma tu panggilingan, sipata digoari ma on panutuan. Halak na manutu marsinggang di jolo ni panggilingan huhut maniop anak ni panggilingan i laos digiling ma boras i. Mangihuthon sada hatorangan, borat ni anak ni gilingan on 2 sahat tu 4 kilogram. Molo didanggurhon on tu jolma boi do mate ibana.Panguhum 9:50-54.

Panggilingan ni boras mansai ringkot tu parngoluon ni halak Israel najolo, alani i ma diorai do di Bibel mambuat batu gilingan ni halak laho gabe borot ni utang. ”Unang ma buat hamu panggilingan gandum ni sadasada halak alani utangna bahen borokna, ai dos do i dohot na mambuat ngoluna bahen borokna,” songon na nidok ni 5 Musa 24:6, Bibel Siganup ari.

Aha do lapatan ni hata ”di ampuan”?

Bibel mandok, Jesus ”di ampuan ni Ama i.” (Johannes 1:18) Hata on manggombarhon na solhot do Jesus dohot Jahowa, jala ibana anak haholongan ni Jahowa. Hata on pe patuduhon hasomalan ni halak Jahudi tingki rap mangan.

Di tingki ngolu ni Jesus, halak Jahudi tingki rap mangan mangunsande do huhut mangkaliangi meja. Dompak meja do simanjujung nasida alai pat ni nasida dao sian meja i huhut tangan hambirangna mangunsande di bantal. Parhundul nasida on mambahen tangan siamunna mura humusor dohot mambuat sipanganon. Sada hatorangan mandok, hira na dais ma ulu ni na rap mangan i tu andora [ampuan] ni dongan na di pudina.

Sada hasangapon do molo boi mangunsande di ampuan ni nampunasa jabu manang nampunasa ulaon. Alani i ma, tingki Paska na parpudi na diulahon Jesus, ”sisean haholongan ni roha ni Jesus” si Johannes mangunsande di ampuanna. Gabe mura ma si Johannes mangkusiphon sungkunsungkunna tingki i tu Jesus.Johannes 13:23-25; 21:20.