Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SIULASON NI MAJALAH ON | NA TUMINGKOS DO SAINS SIAN BIBEL?

Laba ni Sains tu Hita

Laba ni Sains tu Hita

Mangihuthon sada kamus, hata sains, lapatanna ”panulingkitan na martujuan laho mangantusi mula ni sada ugasan marhite manulingkit, manangkasi, jala mangungkur. Ulaon na maol do on di angka ilmuwan gariada jotjot mambahen marsak. Angka panulingkit sains on marsitutu manulingkiti marmingguminggu, marbulan sahat tu na martaontaon. Sipata ndang adong hasil ni panulingkitan i, alai godang do laba ni panulingkitan nasida tu jolma. Parrohahon ma pigapiga labana.

Sada perusahaan di Eropa mambahen alat sian palastik na jago, na boi denggan manaring aek. Alani i, aek na litok pe boi dibahen ias. Na binahen nasida on nunga dipangke tingki masa lalo na balga di Haiti taon 2010.

Dao di langit an, adong satelit na boi patuduhon dompak na tinuju. Digoari ma on Na boi Patuduhon Inganan (GPS). Laho pangkeon ni militer hian do umbahen adong on. Alai saonari GPS pe mangurupi supir, pilot kapal terbang, kapal laut, angka pamburu binatang asa mamboto dalan. Mandok mauliate do hita tu angka na patupahon GPS on na mangurupi gabe ummura mangalului inganan.

Adong do handphone, komputer dohot Internet muna? Hea do dihilala hamu dipamalum sahit mu manang lam hiras alani pangubatan na lam denggan? Hea do hamu markapal terbang? Molo hea, nunga dihilala hamu laba ni sains na boi mangurupi parngoluon ni jolma. Godang do laba ni sains on di parngoluonta.

HAHURANGAN NI SAINS

Laho manambai parbinotoan nasida, tangkas do angka panulingkit manulingkiti angka na manggulmit ro di angka bintang. Ahli fisika nuklir manulingkiti songon dia do isara ni atom karejo. Asing ni i, ahli Astrofisika manulingkiti aha do na masa marmiliar taon naung salpu asa boi mangantusi songon dia do mula ni nasa na tinompaNa. Mansai bagas do panulingkitan na diulahon nasida, gariada angka na so boi diida jala na so boi dijama pe disulingkiti nasida. Alani i, didok nasida ma molo tutu do adong Debata na disurat di Bibel i, nunga boi diboto nasida.

Gariada, pigapiga angka panulingkit sains dohot angka filsuf na tarbarita satolop tu hata panulingkit na margoar si Amir D. Aczel na mandok ”Boi do patuduon ni sains na so adong Debata.” Umpamana, sahalak panulingkit fisika na tarbarita mandok ”Ndang adong tanda taringot huaso ni Debata di nasa na tinompaNa na patuduhon ndang adong Debata.” Godang sian nasida mandok, sude ulaon ni Debata na disurat di Bibel i holan ”parsibalik mata” jala ”pangotootoi do i.” *

 Alai, sungkunsungkun na porlu dialusi: Naung boi do diantusi sains sude taringot nasa na tinompaNa on, umbahen na boi mambahen sada hasimpulan sisongon i? Ndang boi. Toho nunga godang hamajuon naung binahen ni sains. Alai godang do ilmuwan na manghilala molo ndang sude dope diantusi nasida jala mandok, ndang hea boi antusan nasa na adong di portibi on. Sahalak ahli fisika na mandapot Nobel na margoar Steven Weinberg mandok, ”Ndang na hea boi antusanta sude taringot nasa na tinompaNa.” Professor Martin Rees, sahalak ahli Astronomi sian Inggris manurat: ”Godang do na so boi diantusi jolma.” Sasintongna, godang dope na so diantusi angka panulingkit sains, sian sel na mansai gelleng sahat tu angka bintang:

  • Ndang sude dope diantusi angka ahli Biologi taringot aha do na masa di bagasan sel ni angka na manggulmit. Umpamana, songon dia do sel mamangke energi, mambahen protein, jala mambagi dirina. Sudena i, ndang tangkas dope diantusi angka ahli biologi.

  • Ganup detik gravitasi manghorhon tu parngoluonta. Alai, hahomion do on di angka ahli fisika. Ndang tarantusan nasida boasa sai tu toru madabu sasahalak na mangangkat tu ginjang. Manang, songon dia do gravitasi boi mambahen bulan sai hot di ingananna manghaliangi portibi on.

  • Angka ahli kosmologi mandok adong hirahira 95 persen na mambahen nasa na tinompaNa, ndang boi diida manang diboto marhite alat na jago. Adong dua na mambahen nasa na tinompaNa, i ma ugasan na holom dohot gogo na holom. Jala, ndang ditanda dope angka ugasan on.

Godang dope na mambahen sungkunsungkun roha ni angka ilmuwan. Boasa ringkot botoonta i? Sahalak panurat sains na tarbarita mandok: ”Umgodang do na so taantusi sian na taantusi. Longang do rohangku mangida na binahen ni sains, alani i gabe lomo rohangku mamboto gumodangan. Gabe tarbungka do pingkiranku dibahen on.”

Molo dihilala hamu tumingkos do sains sian Bibel, jala gabe ndang porsea hamu na adong Debata, pingkirhon ma on: Angka ilmuwan na pistar na adong alat nasida na jago, ndang boi diantusi nasida sude taringot nasa na tinompaNa. Alani i, pintor tajua do angka na so boi diantusi sains? Di bagian parpudi sian sada artikel taringot sejarah dohot hamajuan ni astronomi, Encyclopedia Britannica mandok: ”Nang pe nunga adong parbinotoan ni astronomi lobi sian 4.000 taon naung salpu, alai hahomion dope nasa na tinompaNa di hita songon na dihilala angka halak Babilonia na uju i.”

Sitindangi Ni Jahowa mangargai hak ni ganup halak laho mambahen haputusan taringot on. Alai molo boi, ihuthon hamu ma prinsip ni Bibel on: ”Patuduhon hamu ma parrohaon muna na denggan.” (Pilippi 4:5, Bibel Siganup Ari) Alani i, molo marbisuk hita, boi do taantusi na satolop do Bibel tu sains.

^ par. 9 Pigapiga halak ndang porsea tu hata na disurat di Bibel alani pangajarion ni gareja sian na jolo sahat tu sadari on. Didok nasida, tano on do pamusatan ni hasiangan on, manang nasida mandok tingki ditompa Debata portibi on onom ari do lelengna, sadari dibagasan 24 jom.—Ida kotak ” Bibel dohot Sains.”