”Sai pinarbadia ma Goarmu!”MATEUS 6:9.

1. Tingki marbarita na uli, songon dia do hita mamangke tangiang na diajarhon Jesus di Mateus 6:9-13?

GODANG halak mangapil tangiang hatopan na disurat di Mateus 6:9-13. Tingki marbarita na uli, tapangke do isi ni tangiang on laho patorangkon tu angka jolma na sitoho do adong Harajaon ni Debata, laho mambahen portibi on gabe Paradeiso. Jala tapangke do hata, ”Sai pinarbadia ma Goarmu” laho patuduhon na adong do tutu goar ni Debata jala ingkon tapabadiahon goarNa i.Mateus 6:9.

2. Sian dia do taboto na so lomo roha ni Jesus molo sai taulahi mandok hata na sarupa ganup martangiang?

2 Lomo do roha ni Jesus molo hita mangulahi hata na taapil tingki martangiang jala manghatahon i marulaulak, songon na diulahon godangan halak? Daong. Jesus mandok: ”Asa uju martangiang hamu, unang marnoninoni bahen hamu.” (Mateus 6:7) Di sada tingki, diajari Jesus dope siseanna isara laho martangiang jala diulahi ibana mandok tangiang i, alai ndang apala sarupa angka hata na pinangkena.  (Lukas 11:1-4) Tangiang sitiruon na binahen ni Jesus mangajari hita taringot aha na ringkot tatangiangkon.

3. Sungkunsungkun aha do na porlu tasungkun tu dirinta sian tangiang na niajarhon ni Jesus?

3 Di parsiajaran on dohot di parsiajaran na mangihut, tangkas ma taulas tangiang na niajarhon ni Jesus. Huhut mamparsiajari i, tasungkun ma dirinta, ’Songon dia tangiang sitiruon on mangurupi ahu mambahen tangiang na dumenggan?’ jala na rumingkot, ’Hombar tu tangiang na niajarhon ni Jesus i do pangalaho dohot parngoluonhu?’

”ALE AMANAMI NA DI BANUA GINJANG”

4. Hata ”Ale Amanami” paingothon hita taringot aha, jala songon dia do Jahowa gabe Ama tu angka na marpanghirimon di tano on?

4 Dipungka Jesus tangiang i mandok, ”Ale Amanami.” Hata on paingothon hita molo Debata Jahowa ama ni sude donganta di liat portibi on. (1 Petrus 2:17) Nasida na tarpillit laho tu surgo dibahen do nasida gabe anak, jala on gabe hasurungan di nasida maramahon Jahowa. (Rom 8:15-17) Angka na manghirim maringanan saleleleng ni lelengna di tano on boi do nasida manjou ”Ama” tu Debata. Dilehon Jahowa do tu nasida hangoluan jala dibagasan holong digokhi Debata angka na dihaporluhon nasida. Digoari do nasida angka ”anak ni Debata” dung tipak nasida jala martahan ro di ujungna manomba Jahowa.Rom 8:21; Pangungkapon 20:7, 8.

5, 6. Aha do silehonlehon na dumenggan na boi lehonon ni natuatua tu angka ianakhonna, jala aha do na porlu bahenon ni ganup ianakhon taringot silehonlehon i? (Ida gombar di mula ni parsiajaran.)

5 Na mangalehon sada silehonlehon na denggan do natuatua tu ianakhonna, molo diurupi nasida angka ianakhonna mananda Jahowa do Debata Ama na di surgo, jala molo diajari nasida angka ianakhonna martangiang tu Jahowa. Sahalak sintua kaliling di Afrika Selatan mandok: ”Sian na tubu angka boru nami, sai rap martangiang do hami ganup borngin asing molo ndang di jabu ahu. Angka boru nami on mandok ndang apala diingot nasida hata na hupasahat di bagasan tangiang. Alai, na diingot nasida, gabe dame jala sonang ma panghilalaan nasida dung martangiang hami tu Jahowa. Dung boi nasida martangiang, hupangido ma nasida asa martangiang marsoara. Asa boi hutangihon songon dia nasida pasahathon na di roha dohot pingkiran nasida tu Jahowa. On ma tingki na dumenggan laho mamboto aha do na adong di roha ni nasida. Lambok do ahu laho mangajari nasida, dohot ma i taringot angka na ringkot sian tangiang sitiruon na diajarhon Jesus, asa boi diantusi nasida isara martangiang na denggan.”

6 Sai tongtong do maraleale angka boruna on tu Jahowa sahat tu na magodang. Saonari nasida nunga marhamulian jala tongtong merintis raphon tunggani doli ni nasida be. Silehonlehon na dumenggan na boi lehonon ni angka natuatua tu ianakhonna, i ma mangajari nasida taringot na tutu do adong Jahowa jala boi do nasida maraleale tu Ibana. Alai ganup marsadasada angka ianakhon i porlu manjaga paralealeonna tu Jahowa.Psalmen 5:11, 12; 91:14.

”SAI PINARBADIA MA GOARMU!”

7. Aha do hak na sumurung na adong di hita, jala aha do na ingkon taulahon?

7 Hak na sumurung do mamboto  goar ni Debata jala ”gabe bangsoNa.” (Ul. 15:14, Bibel Siganup Ari; Jesaya 43:10) Tatangiangkon do asa, ”Sai pinarbadia ma Goarmu.” Tapangido tu Jahowa asa diurupi hita unang mangulahon manang manghatahon aha na paleahon Ibana. Sasintongna, unang ma hita songon halak Kristen na parjolo na so mangulahon aha na diajarhon nasida tu halak na asing. Disurat si Paulus do tu nasida: ”Ala ni hamu do umbahen na marlea Goar ni Debata diida angka sipelebegu.”Rom 2:21-24.

8, 9. Paboa ma pengalaman na patuduhon songon dia Jahowa mangurupi halak na pabadiahon goarNa.

8 Taulahon ma angka na boi taulahon laho pabadiahon goar ni Debata i ma Jahowa. Sahalak donganta borua na mabalu di Norwegia na mangurus sada ianakhonna mandok: ”On ma tingki na umborat di ahu. Martangiang ma ahu ganup ari, olo do sipata ganup jom, mangido tu Jahowa asa tongtong ahu martahan jala asa ndang dipalea Sibolis Jahowa, alani pangalahonghu dohot alani na so marsihohot ahu tu Jahowa. Marsitutu do ahu pabadiahon goar ni Debata i ma Jahowa, manghirim do ahu asa boi ianakhonhu pajumpang dohot bapana na hinan di Paradeiso.”Poda 27:11.

9 Dialusi Jahowa do tangiang na i? I do. Ala sai marsaor dohot dongan sahaporseaon gabe togu jala martahan ibana. Lima taon dungkon i, marhamulian ma ibana muse dohot sahalak sintua. Anakna i saonari, nunga marumur 20 taon, tardidi gabe Sitindangi Ni Jahowa. Didok ibana: ”Las situtu rohangku, tunggani dolinghu saonari mangurupi ahu pagodanggodangkon anakhi.”

10. Songon dia do ujungna pabadiahonon ni Jahowa goarNa?

10 Dung diripashon sude angka na so pasangaphon Ibana, jala na so manjangkon pangarajaionNa, disi lam patar ma habadiaon ni goarNa. (Jaha Hesekiel 38:22, 23.) Disi, tipak ma sude jolma, saluhut angka na di surgo dohot na di tano on marsada laho manomba Debata Jahowa. Sude na di roha nasida, dohot na diulahon nasida pasangaphon goar ni Debata na badia. Ujung na, Ama na tasomba gabe ”saluhut di bagasan saluhut.”1 Korint 15:28.

”SAI RO MA HARAJAONMU”

11, 12. Di taon 1876, laho mangantusi aha do Jahowa mangurupi angka naposoNa?

11 Andorang so naek Jesus tu surgo, disungkun angka siseanna ma ibana: ”Pajongjongonmu ma saonari, ale Tuhan, Harajaon i di Israel?” Dialusi Jesus ma nasida, didok ndang tingkina dope di nasida mamboto andigan Harajaon ni Debata mamarenta. Dipaboa ibana tu angka siseanna asa marsitutu mangalehon rohana tu ulaon na ringkot marbarita na uli. (Jaha Ulaon ni Apostel 1:6-8.) Alai diajari do nasida manangiangkon asa ro harajaon i jala manatap ari haroro ni harajaon i. Alani i ma, tatangiangkon dope asa ro harajaon i.

12 Dung jonok tingkina Jesus gabe raja di surgo, diurupi Jahowa do angka naposoNa mamboto aha na laho masa di tingki i. Di taon 1876, Charles Taze Russell manurathon artikel na marjudul ”Masa ni sipelebegu: Andigan do marujung?” Disi dipatorang ibana surirang ni si Daniel taringot ”pitu taon” na sarupa tu ”tingki ni parbegu” songon na disurirangkon Jesus. Artikel i pe, patorangkon molo tingki i marujung di  taon 1914. * (Ida surat na di toru.)Daniel 4:13; Lukas 21:24.

13. Aha do na masa di taon 1914, jala aha do na pinatudu ni na masa i?

13 Di taon 1914, masa ma porang di Eropa jala rarat ma tu liat portibi on. Alana ni porang i, masa haraparon na tung mansai borat adopan. Jala di ujung ni porang i, taon 1918, masa ma sahit flu na pamatehon angka jolma lobi sian na mate alani porang i. Sude angka na masa on sada sian ”tanda” na pinaboa ni Jesus. Angka tanda on patuduhon naung jongjong do Jesus gabe raja di surgo di taon 1914. (Mateus 24:3-8; Lukas 21:10, 11) Di taon i, ”laos borhat do ibana marhamonangan, asa monang.” (Pangungkapon 6:2) Didabu Jesus ma Sibolis dohot angka begu sian surgo tu tano on. Dungkon i, digohi ma surirang na mandok: ”Marjea ma tano i dohot laut, ai nunga tuat sibolis i tu hamu, marrimas situtu; ai diboto, otik nama tingkina.”Pangungkapon 12:7-12.

14. (a) Boasa tatangiangkon dope asa ro Harajaon ni Debata? (b) Ulaon na ringkot aha do na ingkon taulahon saonari on?

14 Surirang di Pangungkapon bindu 12 mangurupi hita mangantusi boasa masa angka hasusaan di portibi on tingki gabe raja Jesus di Harajaon ni Debata. Nang pe nunga mamarenta Jesus di surgo, mangarajai dope Sibolis di  tano on. Alai satongkin nari laho ”marhamonangan” ma Jesus, ripashononna ma sude angka parjahat sian tano on. Sahat tu na masa i, sai tongtong do tatangiangkon asa ro Harajaon ni Debata, jala sai girgir ma hita mambaritahon taringot harajaon i. Ulaon marbarita na taulahon on manggohi surirang ni Jesus: ”Laos baritahononhon do barita na uli on na taringot tu Harajaon i di liat portibi on, laho mangkatindangkonsa tu saluhutna bangso; dung pe i, asa ro ujungna.”Mateus 24:14.

”SAI SAUT MA LOMO NI ROHAM DI BANUA TONGA ON”

15, 16. Sae do holan na manangiangkon asa saut lomo ni roha ni Debata di tano on? Patorang ma.

15 Hirahira 6.000 taon naung salpu, nunga saut lomo ni roha ni Debata di tano on. Alani i ma Jahowa mandok ”denggan situtu” nasa na tinompaNa i. (1 Musa 1:31) Dung i mangalo ma Sibolis tu Debata, mulai sian i, godang angka jolma ndang mangulahon lomo ni roha ni Debata. Alai saonari adong hirahira ualu juta halak na manomba Jahowa. Nasida manangiangkon asa saut lomo ni roha ni Debata di tano on, jala nasida pe mangulahon hombar tu lomo ni roha ni Debata. Jala marhiras ni roha mangajarhon taringot harajaon tu angka halak.

Diajari hamu do ianakhon muna mangulahon lomo ni roha ni Debata? (Ida paragraf 16)

16 Songon, sahalak donganta Misionaris di Afrika na marumur 80 taon tardidi taon 1948, mandok: ”Jotjot do hutangiangkon angka halak na olo manjangkon asa boi dijumpangi jala diurupi laho mananda Jahowa andorang so tarlambat dope. Jala, tingki marbarita ahu tu sasahalak, hupangido bisuk asa boi hudodo rohana. Jala jumpang ma ahu tu halak na manjangkon Hata ni Debata, hutangiangkon tu Jahowa asa dipasupasu gogo dohot tingki na hulehon tu nasida.” Nunga godang halak na diurupi donganta borua naung matua on asa mananda Jahowa. Boi do diingot hamu angka donganta naung matua na marhiras ni roha mangulahon lomo ni roha ni Jahowa?Jaha Pilippi 2:17.

17. Songon dia do panghilalaanta taringot lomo ni roha ni Debata tu jolma dohot tu saluhut na di tano on di ari na naeng ro?

17 Sahat tu na ropuhonon ni Debata angka musuNa sian tano on, tongtong dope tatangiangkon asa saut lomo ni rohaNa. Ujungna, gabe Paradeiso ma tano on. Marmiliar halak laho paheheonNa. Didok Jesus: ”Di na ro tingkina, begeon ni saluhut halak na di angka tanoman i ma soarana. Dung i ruar be ma.” (Johannes 5:28, 29) Rimangi ma tingki sasahalak na tahaholongi dipahehe! ”Apusan ni Debata ma nasa iluilu” sian matanta. (Pangungkapon 21:4) Godang sian angka na laho dipahehe i ”angka na geduk” na so hea dope marsiajar taringot Jahowa dohot Jesus. Las situtu rohanta mangurupi nasida mangantusi lomo ni roha ni Debata asa ”hangoluan na salelenglelengna” di nasida.—Ulaon 24:15; Johannes 17:3.

18. Angka aha do na rumingkot na dihaporluhon angka jolma?

18 Tingki saut Harajaon ni Debata di tano on, diparbadia harajaon i ma goar ni Debata. Saluhut na adong di tano on, mardame jala manomba Debata. Gokhan ni Debata ma saluhut na dihaporluhon angka jolma tingki dialusi Ibana tolu pangidoan na adong di tangiang i. Di parsiajaran na mangihut, taulas ma aha dope na ringkot tatangiangkon.

^ par. 12 Laho mamparsiajari songon dia surirang on digohi di taon 1914, ida ma buku Apa yang Sebenarnya Alkitab Ajarkan? halaman 215-218.