Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  Juni 2015

Mangolu Hombar tu Tangiang Sitiruon na Binahen ni Jesus—Bagian II

Mangolu Hombar tu Tangiang Sitiruon na Binahen ni Jesus—Bagian II

”Ai diboto Ama muna do na ringkot di hamu.”MATEUS 6:8.

1-3. Boasa boi pos roha ni donganta borua, na diboto Jahowa do aha na dihaporluhon ibana?

NDANG hea dihalupahon si Lana, sahalak perintis sipitupulu jom, tingki mardalani ibana tu Jerman di taon 2012. Dihilala ibana na ditangihon Jahowa do dua tangiangna. Tingki markareta api ibana tu bandara, martangiang ibana tu Jahowa asa boi pajumpang dohot marbarita tu sasahalak. Dung sahat ibana di bandara, diboto ibana ma na sundat borhat kapal terbangna sadari on sahat tu na marsogot. Martangiang ma si Lana asa diurupi Jahowa ala otik na ma hepengna jala porlu di ibana adong ingananna laho marborngin.

2 Dung sae si Lana martangiang, adong na manggora ibana mandok, ”Horas, Lana, na marhua ho dison?” Hape sahalak dolidoli dongan sasingkolana hian. Dolidoli on raphon inong dohot ompungna ro tu bandara laho paborhathon ibana tu Afrika Selatan. Tingki dipaboa si Lana situasina, ditogihon inong dohot ompung ni dolidoli i ma ibana marborngin di jabu nasida. Disungkuni nasida ma taringot haporseaon dohot ulaon merintis na diulahon ibana.

 3 Marsogot nai dung sarapan, dialusi si Lana ma sungkunsungkun nasida taringot Bibel. Dipangido si Lana ma nomor telepon dohot alamat nasida, asa boi sahalak donganta manguduti mangalusi sungkunsungkun nasida. Dung i, sahat ma si Lana tu jabuna, jala merintis dope ibana. Dihilala ibana do Jahowa manangihon tangiangna, mamboto aha na dihaporluhon ibana, jala mangurupi ibana.Psalmen 65:3.

4. Angka pangidoan aha ma na ringkot na laho siulasonta di parsiajaran on?

4 Tingki tompu ro sitaonon tu hita, mura do hita martangiang tu Jahowa mangido pangurupion, jala las do rohaNa manangihon tangiangnta. (Psalmen 34:16; Poda 15:8) Alai, sian tangiang sitiruon na binahen ni Jesus, taboto ma adong do na rumingkot na ingkon tatangiangkon. Di parsiajaran on, taulas ma opat pangidoan parpudi sian tangiang sitiruon i, na mangurupi hita asa marsihohot tu Jahowa.Jaha Mateus 6:11-13.

”LEHON MA DI HAMI SADARI ON HANGOLUAN SIAP ARI”

5, 6. Boasa diajari Jesus hita asa mangido ”lehon ma di hami” nang pe rade sipanganonta?

5 Jesus mangajarhon tu hita asa mangido lehon ma di hami,” ndang lehon ma di ahu.” Si Victor, sahalak sintua kaliling di Afrika, mandok: ”Jotjot do ahu martangiang mandok mauliate tu Jahowa ala ndang pola ingkon holsoan ahu dohot ripengku taringot sipanganon nami marsogot manang ise na laho manggarar sewa ni inganan nami. Diparrohahon angka donganta do hami ganup ari. Alai, hutangiangkon do nasida na mangurupi hami asa boi nasida mangadopi porsuk ni parhepengon.”

6 Rade do ra sipanganonta ganup ari, alai godang do angka donganta na pogos manang na hona mara. Ndang holan tangiang na boi talehon, alai boi do taurupi nasida. Songon, boi do talehon deba na adong di hita tu nasida. Hita pe boi tongtong mangalehon silehonlehon laho mangurupi angka donganta di liat portibi on. Ala taboto do silehonlehonta on boi mangurupi angka donganta na manghaporluhon pangurupion.1 Johannes 3:17.

7. Songon dia do Jesus mangajarhon taringot ”unang ma holsohon hamu ari marsogot”?

7 Dung diajarhon Jesus tangiang sitiruon i, diajarhon do muse asa unang holan tu hepeng rohanta. Ibana mandok, disarihon Jahowa do angka bunga di ladang, ”lam hamu ma, lam so parulosanna! Oe hamu siotik haporseaon! Antong unang ma holsoan roha muna, mandok. . . . ’Aha ma parabiton nami?’” Dung i, diulahi ibana ma muse: ”Unang ma holsohon hamu ari marsogot.” (Mateus 6:30-34) Unang ma taholsohon taringot haporluonta tu ari sogot. Ingkon tahasabamhon ma aha na tupa na ringkot di hita ganup ari. Songon, tatangiangkon ma taringot ingananta, parkarejonta na gabe ngolu ni keluarganta, jala bisuk laho mambahen haputusan na denggan taringot kesehatanta. Alai adong dope na rumingkot na ingkon tatangiangkon.

8. Hata ni Jesus taringot hangoluan siap ari paingothon hita taringot aha? (Ida gombar di mula ni parsiajaran.)

8 Hata ni Jesus taringot hangoluan siap ari, paingothon hita tu hatana na mandok: ”Ndada holan sipanganon hangoluan ni jolma, alai hata ni Debata do.” (Mateus 4:4, Bibel Siganup Ari) Alani i ingkon tatangiangkon ma asa diajari jala diurupi Jahowa hita, asa jonok tu Ibana.

”SESA MA DOSA NAMI”

9. Boasa dipatudos dosa songon utang?

9 Boasa boi dipatudos dosanta tu utang? (Mateus 6:12; Lukas 11:4) The  Watchtower taon 1951 patorangkon, tingki mardosa hita sarupa ma on songon na marutang tu Jahowa. Na marutang holong dohot marutang pangoloion do hita tu Jahowa. Alani i, tingki mardosa hita ndang mangoloi Jahowa, tudos songon ndang tagarar utangnta tu Ibana. Majalah i patoranghon, molo lomo rohaNa, boi do gotapan ni Jahowa paralealeonta tu Ibana. The Watchtower mandok muse: ”Molo mardosa hita na so manghaholongi Debata do hita.”1 Johannes 5:3.

10. Boasa boi disesa Jahowa dosanta, jala songon dia panghilalaanta mamboto i?

10 Mandok mauliate do hita tu Jahowa ala dilehon pelean tobusan ni Jesus laho manesa dosanta! Ganup ari tahaporluhon do asa disesa Jahowa dosanta. Lobi sian 2.000 taon naung salpu do mate Jesus humongkop hita, alai tahilala dope labana sahat tu sadari on. Ingkon tahamuliatehon do silehonlehon na mansai arga on. Ndang adong sahalak pe na boi manggarar tobusan na tahaporluhon i asa malua hita sian dosa dohot hamatean. (Jaha Psalmen 49:8-10; 1 Petrus 1:18, 19.) Hata na adong di tangiang sitiruon na mandok ”sesa ma dosa nami” paingothon hita angka donganta pe manghaporluhon tobusan songon hita. Dipangido Jahowa do asa tapingkiri nasida dohot paralealeon ni nasida tu Jahowa. Dohot ma i gira manesa dosa ni angka donganta tu hita. Somalna angka dosa na memet do i, alai molo tahalupahon pangalaosion ni donganta, patuduhon na holong do rohanta tu nasida. Jala on pe patuduhon hamuliateonta tu dosanta na disesa Jahowa.Kolosse 3:13.

Molo tasesa pangalaosion ni donganta, sesaon ni Jahowa ma dosanta (Ida paragraf 11)

11. Boasa ingkon tasesa dosa ni donganta?

11 Ala so tipak hita, sipata maol do hita manesa dosa ni angka dongan na mambahen hansit rohanta. (3 Musa 19:18) Molo tahatahatahon pambahenan ni nasida, manghorhon do on tu angka dongan na asing na adong di huria, jala manegai hadameon di huria. Molo sai tongtong do tahatahon on, on patuduhon na so taargai do pelean tobusan na sian Jahowa jala ndang be dapotan laba hita sian i. (Mateus 18:35) Molo ndang tasesa pangalaosion ni donganta, Jahowa pe ndang olo manesa dosanta. (Jaha Mateus 6:14, 15.) Molo lomo rohanta disesa Jahowa dosanta, unang  ma sai taulahon na dihasogohon rohaNa.1 Johannes 3:4, 6.

”UNANG HAMI TOGIHON TU PANGUNJUNAN”

12, 13. (a) Aha do na masa dung tardidi Jesus? (b) Boasa ndang boi tasalahon halak na asing molo madabu hita tu pangunjunan? (c) Aha na pinatudu ni Jesus na marsihohot sahat tu na mate?

12 Hata na adong di tangiang sitiruon na mandok ”unang hami togihon tu pangunjunan” paingothon hita taringot aha na masa ndang leleng dung tardidi Jesus. Ditogihon ”Tondi i ma Jesus tu halongonan, asa diunjuni Sibolis i ibana.” (Mateus 4:1; 6:13) Boasa dipaloas Jahowa masa on? Dialo si Adam dohot si Hawa do pamarentaon ni Jahowa. Sibolis mambahen sungkunsungkun na mamorluhon godang tingki laho mangalusi. Songon, na adong do na sala tingki ditompa Jahowa jolma? Boi do jolma na tipak marsihohot tu Jahowa nang pe diunjuni ”na jahat”? Jala na dumenggan do parngoluon ni jolma molo nasida mamarenta dirina sandiri? (1 Musa 3:4, 5) Pangoloion ni Jesus tu Debata patuduhon na pargabus do Sibolis. Di ari na naeng ro, tingki taralusi sude sungkunsungkun i jala dipabadia Jahowa, botoon ni ganup na adong di surgo dohot di tano on ma holan pamarentaon ni Jahowa do na umdenggan.

13 Na badia do Jahowa, alani i ndang hea diunjuni Ibana manang ise marhite angka na jahat. Sibolis do ”sipangunjuni.” (Mateus 4:3) Marragam do isara dibahen Sibolis laho mangunjuni hita. Alai boi do hita mamillit. Ganup hita marsadasada boi mamillit laho mangoloi elaela manang na ndang. (Jaha Jakobus 1:13-15.) Tingki Jesus diunjuni Sibolis, dipangke ibana do Hata ni Debata laho manundalhon i. Sai marsihohot do Jesus tu Debata. Alai, ndang marna so Sibolis. Dipaimaima ibana do ”paima ro tingkina muse” laho mangunjuni Jesus. (Lukas 4:13) Alai aha pe na dibahen Sibolis, sai dioloi Jesus do pamarentaon ni Debata. Dipatudu ibana na boi do jolma na tipak mangoloi Jahowa nang pe adong sitaonon na mansai borat. Saonari pe, diunjuni Sibolis do angka siihuthon Jesus, asa ndang mangoloi Jahowa.

14. Aha do na ingkon taulahon asa boi manundalhon pangunjunan?

14 Dihaporluhon dope alus ni sungkunsungkun taringot pamarentaon ni Jahowa. Alani i, dipaloas Jahowa dope Sibolis mangunjuni hita sahat tu sadari on. Ndang hea ditogihon Jahowa hita tu pangunjunan. Sasintongna, pos do roha ni Jahowa na boi do hita marsihohot tu Ibana, jala sai na urupanNa do hita. Alai ndang hea dipaksa Jahowa hita mangulahon na sintong. Dipaloas Ibana do hita mamillit mangoloi manang na ndang. Asa boi tatundalhon pangunjunan, adong dua na tahaporluhon: Sai tongtong jonok tu Jahowa jala sai martangiang mangido pangurupionNa. Songon dia do Jahowa mangalusi tangiangnta asa boi manundalhon pangunjunan?

Sai jonok ma tu Jahowa jala marhiras ni roha ma tu ulaon parbaritaon (Ida paragraf 15)

15, 16. (a) Aha do pigapiga pangunjunan na porlu tatundalhon? (b) Ise do na sala molo madabu hita tu pangunjunan?

15 Dilehon Jahowa do tondi parbadia na boi mangurupi hita manundalhon pangunjunan ni Sibolis. Jala dilehon Jahowa do Bibel dohot huria na boi paingothon hita asa pasidingkon jea. Umpamana, dipaingot Ibana do hita asa ndang mamangke tingkinta, hepengnta, dohot gogonta laho mangulahon ulaon na hurang ringkot. Si Espen dohot si Janne tading di luat Eropa na maju. Gabe perintis sipitupulu jom do nasida  martaontaon di negara na manghaporluhon parbarita na uli. Dung marianakhon, ndang merintis be nasida, jala saonari nunga dua ianakhonna. Si Espen mandok: ”Sai martangiang do hami tu Jahowa mangido pangurupion asa unang madabu hami tu pangunjunan ala ndang godang be tingki dipangke hami saonari mangulahon ulaon di partondion. Dipangido hami do pangurupion sian Jahowa asa tongtong girgir jala marhiras ni roha tu ulaon parbaritaon.”

16 Pangunjunan na asing na ringkot tatundalhon, i ma mangida pornografi. Molo tarunjun do hita disi, ndang boi tasalahon Sibolis. Boasa? Ala ndang boi Sibolis dohot portibi na jahat on mamaksa hita mangulahon na so tahalomohon. Ala na adong do giotgiot na roa di pingkiran ni sasahalak umbahen na diida ibana pornografi. Godang angka donganta naung madabu di pangunjunan on jala hita pe boi do madabu.1 Korint 10:12, 13.

”PALUA MA HAMI SIAN NA JAHAT”

17. (a) Songon dia do hita patuduhon na lomo do rohanta asa Jahowa paluahon hita sian na jahat? (b) Haluaon sian dia do sipaimaonta?

17 Songon dia do hita patuduhon na lomo do rohanta asa Jahowa paluahon hita sian na jahat? Ingkon ”ndang sian portibi on hamu” jala ”unang ma haholongi hamu portibi on.” (Johannes 15:19; 1 Johannes 2:15-17) Dame situtu ma panghilalaan tingki diropukhon Sibolis jala diripashon angka halak parjahat sian tano on! Alai andorang so masa dope i, porlu taingot molo Sibolis i ”marrimas situtu; ai diboto, otik nama tingkina.” Marsitutu do ibana mangulahon aha pe na boi pasohon hita asa unang manomba Jahowa. Alani i, sai tatangiangkon ma asa dipadao Jahowa hita sian Sibolis.—Pangungkapon 12:12, 17.

18. Aha do na ingkon taulahon asa boi hita malua sian ajal ni portibi na dirajai Sibolis?

18 Lomo do rohamu mangolu di portibi na so adong be Sibolis? Alani i sai tatangiangkon ma asa ro Harajaon ni Debata, asa diparbadiai goar ni Debata, jala asa saut lomo ni rohaNa di tano on. Sai tongtong ma marpos ni roha na ramotan ni Jahowa do hamu jala sai na lehononNa do na tahaporluhon asa marsihohot tu Ibana. Taulahon ma aha pe na boi mambahen hita mangolu hombar tu tangiang na diajarhon ni Jesus.