Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 SIULASON NI MAJALAH ON

Naung Jonok do Ajal ni Portibi On?

Naung Jonok do Ajal ni Portibi On?

Pasombuon ni Debata do jolma tongtong mangarajai jolma na asing, jala manegai parngoluon nasida tu ari na naeng ro? Daong. Songon naung dipaboa, na laho salpuhononNa do sude nasa sitaonon dohot parungkilon. Panompa langit dohot tano on paboahon tu hita, ndang sadia leleng nai laho salpuhononNa ma i sude. Songon dia Ibana paboahon na ringkot do i botoonta?

Taparrohahon ma tudosan on: Molo naeng laho hita mardalani tu sada inganan mamangke motor, parjolo sahali taida ma peta laos tasurat ma angka aha na laho sibolusonta. Dung tabolus angka na tasurat dohot na adong di peta i, porsea ma hita na laho sahat ma hita tu inganan i. Suang songon i ma angka tudutudu na disurat di Bibel. Dung taida aha na masa mangihuthon hata ni Bibel, porsea ma hita nunga jonok be ajal ni portibi on.

Dipatorang Bibel do nunga mansai jonok ajal ni portibi on. Di ujung ni ajal ni portibi on, masa ma sude sitaonon na so hea masa saleleng on di parngoluon ni jolma. Dungi i, ro ma ajal ni portibi on. Parrohahon ma pigapiga tanda na dipatorang Bibel.

1. PORTIBI ON NUNGA SURSAR Surirang na disurat di Mateus 24 paboahon angka aha na laho masa di portibi on. Angka na masa on patuduhon nunga jonok be ”ajal ni hasiangan on” sahat tu na ”ro ujungna.” (Ayat 3, 14) Masa ma angka porang na balga, haleon, lalo marluatluat, rarat na so uhum, lam ngali ma holong, jala torop ma panurirang pargapgap na paliluhon angka jolma. (Ayat 6-26) Tontu, nunga masa be pigapiga sian tanda on na saleleng on. Alai, di ujung ni ajal ni portibi on, rap masa ma angka tanda i di pigapiga inganan. Adong dope tolu nai tanda na asing sian angka tanda i.

2. PARANGE NI ANGKA JOLMA Bibel mandok ”di tingki parpudi”—i ma ujung ni ajal ni portibi on—tarida ma angka parange ni jolma na roa. Molo tajaha: ”Ai mangkaholongi dirina ma jolma disi, impolan di perak, parhata manggang, parroha haginjangon, angka panginsahi, na so mangoloi natorasna, na so marningot lagu, angka na tois; angka na so marroha holong, pangoseose, panihasnihasi, na so umboto mangorom, parmurukmuruk, na so marholong ni roha di na denggan; angka parjehe, parroha na neang, sipaburnang diri, holongan di hisap ni daging asa di Debata.” (2 Timoteus 3:1-4) Toho do nian nunga adong hian parange sisongon i. Alai, lam patar ma tarida angka parange i ”di tingki parpudi”, na patuduhon molo hita nunga mangolu ”di ari hasusaan.” Diparrohahon hamu do nunga somal be angka parange sisongon i saonari?

3. NUNGA SEGA BE TANO ON Bibel mandok Debata laho ”mangago angka na mangago tano i.” (Pangungkapon 11:18) Songon dia do angka jolma manegai tano on? Dipatudos do songon tingki ni si Noak: ”Alai nunga marjea ianggo tano i maradophon Debata, jala nunga gok hajahaton tano i. Dung i ditingkir Debata ma tano i, jala ida ma, nunga marjea.” Alani i didok Debata ma: ”Ripashononku ma nasida rap dohot tano on.” (1 Musa 6:11-13) Diparrohahon hamu do portibi on saonari nunga gok hajahaton? Dung i muse, saonari hita mangolu di tingki masa na susa. Disegai nasida tano on suang songon i sude pangisina, songon: manegai udara, harangan, manang mamburu binatang.

 Tasungkun ma dirinta, ’Hea do taboto jolma manegai tano on saratus taon naung salpu?’ Alai saonari dibahen jala dipapungu jolma angka ugasan na boi manegai tano on. Nang pe adong dibahen nasida teknologi laho mangorui panghorhonna, alai sasintongna ndang na boi jolma padengganhon tano naung sega on. Andorang so sega hian dope tano on dibahen jolma, na laho ripashonon ni Debata do halak na manegai portibi on. On ma janji ni Debata.

4. ULAON MARBARITA DI LIAT PORTIBI ON Tanda na asing na patuduhon naung jonok ajal ni portibi on, i ma ulaon marbarita; ”Laos baritahononhon do barita na uli on na taringot tu harajaon i di liat portibi on, laho manghatindanghonsa tu saluhutna bangso; dung pe i, asa ro ujungna.” (Mateus 24:14) Ulaon parbaritaon on tung marimbar do sian ulaon ni angka ugamo na asing na diulahon nasida saleleng on. Saleleng di tingki parpudi, ulaon marbarita na diulahon on, paboahon, ”barita na uli on na taringot tu harajaon i.” Adong do diboto hamu ugamo na paboahon barita sisongon i? Nang pe adong na mangulahon sisongon i, holan na adong di luat i do manang adong do nasida di liat portibi on marbarita ”tu saluhutna bangso”?

Barita taringot Harajaon ni Debata nunga dibaritahon di liat portibi on di bagasan marratus hata

Situs web www.jw.org paboahon ”barita na uli on na taringot tu harajaon.” Situs on paradehon sijahaon lobi sian 700 hata. Adong do diboto hamu ugamo na asing na mangulahon parbaritaon sisongon on? Andorang so adong dope Internet, holan Sitindangi Ni Jahowa dope na diboto halak na marsitutu paboahon barita na uli taringot Harajaon ni Debata. Mulai taon 1939, nunga disurathon di alaman parjolo majalah Joujou Paboahon ”Barita Harajaon Ni Jahowa.” Taringot ulaon on, sada buku partondion sian ugamo na asing mandok ”Ndang adong dope na songon ulaon parbaritaon na diulahon Sitindangi Ni Jahowa, denggan jala sahat tu ujung ni portibi on.” Ulaon on paboahon na laho ”ro ujungna” marhite Harajaon ni Debata.

TINGKI NA RUMINGKOT DI PARNGOLUON NI JOLMA

Diparohahon hamu do nunga masa be opat tanda naung diulas di parsiajaran on? Lobi sian saratus taon, majalah on nunga paboahon  angka na masa na ringkot na mangurupi angka panjaha mamboto naung jonok do ajal ni portibi on. Tutu, adong do jolma na so—mangalehon rohana—jala mandok ndang boi dihaporseai barita na adong di majalah on, alai nasida mandok, gabe lam susa do portibi on ala nunga hatop saonari angka barita didapot sian liat portibi on. Godang do jolma na manghaporseai molo angka na masa on patuduhon hita nunga mangolu di tingki na rumingkot di parngoluon ni jolma.

Sude angka na masa on patuduhon nunga jonok be ajal ni portibi on. Songon, di taon 2014, angka ilmuwan pasingothon dewan keamanan PBB, molo hamajuon teknologi na adong saonari on molo tongtong dipartahanhon boi mambahen jolma marsahit jala mate. Ndang ganggu roha ni na pabinsarhon majalah on dohot na manjaha, molo on ma ari parpudi jala nunga jonok be ujungna. Unang pola mabiar hita, alai marlas ni roha ma. Boasa? Alana boi do hita malua sian ajal ni portibi on.