Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon  |  April 2015

Sai Marhaposan ma tu Jahowa!

Sai Marhaposan ma tu Jahowa!

“Sai marhaposan tu Ibana ma tongtong nang hamu, ale dongan jolma.”PSALMEN 62:9.

1-3. Boasa boi marpos ni roha si Paulus tu Jahowa? (Ida gombar di mula ni parsiajaran.)

BOHA do molo hamu sahalak Karisten na mangolu di Rom di abad parjolo, taboto ma na mangolu do hita di tingki na gok pangunjunan. Hansit do sitaonon ni halak Karisten tingki i dibahen halak Rom. Didok do nasida na manutung huta Rom jala ndang manghaholongi jolma. Godang do halak Karisten di tingki i ditangkup. Deba dilehon asa diroro binatang. Deba nai dilabang tu hau jala ditutung tingki borngin. Mabiar ma hita, andigan ma hita manaon i.

2 Saleleng masa hasusaon on, apostel Paulus di bagasan hurungan do. Sungkunsungkun do rohana urupan ni angka donganna do ibana manang na ndang, ala diingot ibana hea do ndang adong na mangurupi. Alai dijalo si Paulus do pangurupion ni Jahowa marhite Jesus. Didok ibana: ”Alai Tuhan i do mandongani jala margogoihon ahu.” Dilehon Jesus do gogo na dihaporluhon tu si Paulus. Disurat si Paulus  muse ”Laos malua do ahu sian baba ni babiat i.”2 Timoteus 4:16, 17. *

3 Diingot si Paulus do songon dia Jahowa mangurupi ibana di tingki naung salpu. Jadi pos do rohana molo lehonon ni Jahowa do gogo, na dihaporluhon manaon pangunjunan saonari dohot di ari na naeng ro. Pos do rohana disi jala disurathon: ”Roroon ni Tuhan i do ahu sian nasa ulaon hajahaton.” (2 Timoteus 4:18) Diboto ibana do tung pe ndang adong donganna na boi mangurupi, boi do pos rohana tu pangurupion ni Jahowa dohot Jesus. Pos situtu do rohana disi.

TINGKI LAHO PATUDUHON POS NI ROHANTA TU JAHOWA

4, 5. (a) Ise do na rade mangalehon pangurupion tu hita? (b) Boha do bahenonta asa lam togu paralealeonta tu Jahowa?

4 Hea do hamu marsitaonon jala ndang adong na mangurupi? Olo do ra ala maol mangalului karejo manang mangadopi parsoalan di singkola. Marsahit hamu manang adong sitaonon na asing. Olo do ra metmet rohamu ala ndang adong pangurupion sian dongan. Sipata, adong do parsoalan na so boi taadopi. Aha ma sibahenonta? Bibel paboahon tu hita ”Marhaposan tu Jahowa ma.” (Poda 3:5, 6) Alai boi do pos rohanta na urupanNa hita? Boi! Boi tajaha taringot pigapiga tudosan di Bibel na paposhon rohanta molo Jahowa mangurupi naposoNa.

5 Dibahen si Paulus do sitaonon i gabe dalan laho patuduhon na marhaposan do ibana tu Jahowa. Molo adong sitaonon, tabahen ma i gabe dalan laho mangida pangurupion ni Jahowa. Alani i, unang ma metmet rohanta molo so adong na mangalehon pangurupion. Molo pos rohanta tu Jahowa lam togu ma paralealeonta tu Ibana.

PORLU HITA MARHAPOSAN TU JAHOWA

6. Boasa ndang mura marpos ni roha tu Jahowa tingki hita marsitaonon?

6 Olo do ro sitaonon na so sian panagaman. Nunga tabahen nasa na tolap laho mangadopi i jala martangiang tu Jahowa mangido pangurupion. Boi do dame tahilala molo pos rohanta na urupanNa hita? Boi! (Jaha Psalmen 62:9; 1 Petrus 5:7.) Molo tongtong marhaposan tu Jahowa lam denggan ma paralealeonta tu Ibana. Alai ndang sai mura mangulahon i. Boasa? Ala sipata ndang pintor dialusi Jahowa tangiangta.Psalmen 13:2, 3; 74:10; 89:47; 90:13; Habakkuk 1:2.

7. Boasa sipata ndang pintor dialusi Jahowa tangiangta?

7 Boasa sipata ndang pintor dialusi Jahowa tangiangta? Bibel mandok Jahowa i Ama di hita jala hita ianakhonNa. (Psalmen 103:13) Sada ama, ndang pintor sude dilehon pangidoan ni anakna. Ala diboto ama i do aha na dihaporluhon ianakhonna. Diboto ama i do andigan tingki na dumenggan laho mangalehon pangidoan ni anakna i. Molo pintor dilehon sude na pinangidona i, olo do pintor ndang dihalomohon be. Dung i muse, molo dilehon do sude pangidoan ni anakna doshon hatoban ma ama i idaon. Dihaholongi Debata Jahowa do hita. Ala ibana do sitompa hita, diboto Ibana do aha na tahaporluhon jala andigan tingki na dumenggan laho mangalehon aha na tapangido. Denggan ma molo tapaima Jahowa  jala taida songon dia Ibana mangalusi tangiangta.—Bandinghon dohot Jesaya 29:16; 45:9.

8. Aha do janji ni Jahowa tingki ro pangunjunan tu hita?

8 Taingot ma muse, diboto Jahowa do aha na boi manang na so boi ditaon sasahalak. (Psalmen 103: 14) Jadi sai lehononNa do gogo tu hita laho manaon i. Tutu do sipata olo do ndang taboto be aha sibahenon. Alai Jahowa marjanji molo ro pangunjunan na so boi tataon, ”Ibana balik mangalehon gogo tu na loja.” (Jaha Jesaya 40:29.) Dame ma tahilala dung taboto on, jala boi hita marpos ni roha tu Jahowa. Ibana mamboto sadia godang na tahaporluhon laho martahan.

9. Aha do sibahenonta molo ndang pintor dialusi Jahowa tangiangta?

9 Molo nunga martangiang hita tu Jahowa, alai songon na so pintor dialusi tangiangta, sabar ma hita paimahon. Porsea ma hita na olo do Jahowa laho mangurupi hita jala mangalehon pangidoanta di tingki na pas di hita. Bibel mandok tu hita: ”Dibahen i sai maimaima Jahowa, naeng marpangulahi rohana tu hamu; laos alani borhat Ibana asa asianna hamu, ai Jahowa do Debata ni uhum. Martua sude na manghaposi Ibana.”Jesaya 30:18.

”BABA NI BABIAT”

10-12. (a) Aha do na boi mambahen maol laho mangurus sisolhot na marsahit? (b) Molo marpos ni roha tu Jahowa di masa na susa, aha do panghorhon ni i tu paralealeonta tu Ibana? Bahen ma tudosan.

10 Molo ro tu hita sitaonon na borat songon na tu si Paulus, arop do rohanta asa boi malua sian ”baba ni babiat”. (2 Timoteus 4:17) Umpamana, tingki mangurus sisolhot na tahaholongi marsahit. Marpos ni roha ma tu Jahowa, jala tatangianghon ma asa dilehon tu hita gogo dohot pangurupion laho mambahen haputusan. Boi ma tahilala hadameon tingki taingot Jahowa mangantusi jala mamereng aha na taadopi. * UrupanNa do hita asa martahan jala marsihohot tu Ibana.Psalmen 32:8.

11 Sipata songon na so diurupi Jahowa do tahilala. Tingki dokter ndang mangoloi haputusan na tabahen, taparbaga sisolhot mangurupi hita hape balik do na ro. Tapasahat ma tu Jahowa tingki masa sisongon i. (Jaha 1 Samuel 30:3, 6.) Molo dung tahilala jala taida na disarihon Jahowa do hita lam togu ma paralealeonta tu Ibana.

12 On ma na masa tu si Linda. * Leleng do ibana mangurus natuatuana na marsahit tagan so mate. Ninna ibana: ”Di tingki sisongon on, tunggani dolingku, itongku, nunga loja mangalului aha do sibahenon. Songon na so adong pangurupion dihilala hami. Alai molo nirimangrimangan muse, dipargogoi jala dilehon Jahowa do aha na dihaporluhon hami nang pe songon na so adong na tarbahen.”

13. Songon dia do marpos ni roha tu Jahowa mambahen si Rhonda margogo laho mangadopi godang parungkilon?

13 Pos ni rohanta tu Jahowa mangurupi hita mangadopi parungkilon. Songon na diadopi ni si Rhonda, disiranghon tunggani dolina na so Sitindangi Ni Jahowa ibana. Laos di tingki i posi sahit ni ibotona, i ma sahit Lupus. Piga  bulan na i mate muse ma edana na nialap ni itona na marsahit i. Laho pasuanghon gogona sian parungkilon i gabe parintis sipitu pulu jom ma ibana. Ndang sadia leleng na i mate omakna. Songon dia do si Rhonda boi martahan mangadopi parungkilon on? Ninna ibana: ”Martangiang ahu tu Jahowa ganup tingki mambahen haputusan na dia pe. Dibahen i lam tangkas ma Jahowa di ahu. On mangajari ahu asa sai mangasahon Jahowa ndang mangasahon diringku manang na asing. Huhilala ma pangurupion ni Jahowa, disarihon do sude na huhaporluhon. Jala huhilala panogunoguon ni Jahowa.”

Tingki adong sian sisolhot na manggugai paralealeonta tu Jahowa (Ida ma paragraf 14-16)

14. Songon dia do Jahowa boi mangurupi hita tingki adong sisolhotta na dipabali sian huria?

14 Pingkirhon ma molo masa parungkilon na asing. Molo adong sisolhotta dipabali sian huria. Ala tahaholongi nasida, olo do ra tadokhon ndang tarbahen laho mangoloi hata ni Bibel taringot halak naung dipabali. (1 Korint 5:11; 2 Johannes 10) Boi do pos rohanta tu Jahowa lehononNa gogo tu hita asa boi taulahon parentaNa? Boi do bahenonta tingki masa sisongon on laho pajonokhon diri tu Ibana?

15. Boasa ndang dioloi si Adam parenta ni Jahowa?

15 Boi do on patudosonta songon na masa tu si Adam? Na porsea do ibana tu hata ni Sibolis molo dipangan parbue ni hau i boi tongtong ibana mangolu? Daong, ”ndada si Adam dipaotooto”. (1 Timoteus 2:14) Antong boasa ndang dioloi si Adam parenta ni Jahowa? Dipangan ibana parbue ni hau na dilehon si Hawa ala humolongan ibana  di si Hawa asa di Jahowa. Tumangi ibana tu tunggani boruna sian mangoloi parenta ni Jahowa.1 Musa 3:6, 17.

16. Tu ise do hita ingkon humolongan, jala boasa?

16 Haputusan na binahen ni si Adam mangajari hita, asa humolongan tu Jahowa unang tu na asing. (Jaha Mateus 22:37, 38.) Molo togu haporseaonta tu Jahowa, boi hita mambahen dalan na dumenggan laho mangurupi sisolhotta, aut sura pe nasida manomba Jahowa manang na ndang. Tapagomos ma holongta tu Jahowa jala marpos ni roha na togu tu Ibana. Molo holsoan hita alani sisolhotta na dipabali sian huria, tangianghon ma tu Jahowa jala pasahat ma aha na solot di roha. * (Rom 12:12; Pilippi 4:6, 7) Olo do gabe susa tahilala alani sisongon i, alai boha molo tabahen i gabe tingki laho pajonokhon diri tu Jahowa. Marlaba do hita molo marpos ni roha tu Jahowa jala mangoloi Ibana.

HUHUT PAIMAHON

Patudu ma tu Jahowa na pos do rohanta tu Ibana marhite ringgas marbarita na uli (Ida ma paragraf 17)

17. Molo ringgas marbarita na uli, aha do na laho lehonon ni Jahowa tu hita?

17 Boasa dipalua si Paulus sian ”baba ni babiat?” ninna si Paulus ”asa tulus parjamitaon i marhite sian ahu.” (2 Timoteus 4:17) Adong sada ulaon na nilehon ni Jahowa tu hita i ma pasahathon ”barita na uli”, jala nunga dijou hita gabe ”dongan pangula ni Debata”. (1 Tessalonik 2:4; 1 Korint 3:9) Molo ringgas do hita dohot tu ulaon on, pos ma rohanta na lehonon ni Jahowa sude na tahaporluhon. (Mateus 6:33) Dung i sai marbenget ni roha ma paimahon Jahowa mangalusi tangiangta.

18. Songon dia do asa pos rohanta tu Jahowa jala mambahen lam togu paralealeonta tu Ibana?

18 Tapatogu ma paralealeonta ganup ari tu Jahowa. Molo adong parungkilon na so ra marujung tataon mambahen hita busisaon, tabahen ma on dalan asa boi lam jonok tu Jahowa, marhite manjaha, marsiajar, jala mangarimangi hata ni Debata i ma Bibel. Jotjot ma hita martangiang jala sai taoloi ma Jahowa. Molo taulahon on sude, pos ma rohanta tu Jahowa urupanNa do hita asa sabar manaon pangunjunan saonari manang tu ari na naeng ro.

^ par. 2 Olo do ra si Paulus dipalua sian baba ni babiat situtu manang sian angka mara.

^ par. 10 Adong do parsiajaran naung dipabinsar laho mangurupi halak Karisten na marsahit dohot tu sisolhotna na mangurus. Sedarlah! 8 Februari 1994; 8 Februari 1997; 22 Mei 2000; dohot 22 Januari 2001.

^ par. 12 Goar nunga diganti.

^ par. 16 Adong do parsiajaran naung dipabinsar na boi mangurupi hita tingki adong sisolhotta dipabali sian huria. Ida ma Menara Pengawal 1 September 2006 alaman 17-21 dohot 15 Januari 2007 alaman 17-20.