Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Februari 2016

 DIBUAT SIAN ARSIPTA

Mobil Berpengeras Suara na Tarbarita

Mobil Berpengeras Suara na Tarbarita

”Holan sada do mobil berpengeras suara na dipangke marbarita na uli di Brasil. Ditanda marjuta halak do on ’mobil berpengeras suara ”Watch Tower”’.”—Nathaniel A. Yuille, taon 1938.

DI MULA ni taon 1930, hurang do hamajuon marbarita na uli di Brasil. Alai taon 1935, ditongos si Nathaniel dohot tunggani boruna si Maud Yuille surat tu si Joseph F. Rutherford, na manguluhon ulaon marbarita di tingki i. Rade do nasida mangalehon diri marbarita jala ”rade disuru manang tudia pe”.

Si Nathaniel, pensiunan insinyur nunga marumur 62 taon. Ibana sahalak direktur na mangatur ulaon marbarita di sada huria Sitindangi Ni Jahowa di San Francisco, Kalifornia, AS. Disi, dipangke nasida do tata suara laho marbarita na uli. Marlaba do pengalamanna i tingki ibana gabe sahalak hamba cabang di Brasil, negara na mamangke marragam bahasa!

Sahat ma si Nathaniel dohot tunggani boruna di Brasil taon 1936 rap dohot si Antonio P. Andrade, perintis jala penerjemah. Diboan nasida angka barang na arga, i ma 35 masin na boi mamutar rekaman dohot sada mobil berpengeras suara. Tingki i, holan 60 do penyiar di Brasil, negara palimahon na umbidang di portibi on! Alat na baru on, mangurupi nasida marbarita tu marjuta halak di bagasan pigapiga taon.

Sabulan dung sahat nasida disi, diatur kantor cabang ma asa adong kebaktian dinas di Brasil, di kota São Paulo. Dipangke si Maud ma mobil berpengeras suara manjou jolma asa ro manangihon jamita tu loloan na diparade di kebaktian. Adong 110 halak na ro tu kebaktian i! Dung sae kebaktian i, tamba ma las ni roha ni  angka penyiar marbarita na uli. Dipangke nasida ma sijahaon, kartu kesaksian, rekaman ni jamita di bahasa Hungaria, Inggris, Jerman, Polandia, Spanyol dohot bahasa Portugis.

Mobil berpengeras suara na dipangke sian taon 1936 sahat tu taon 1941, mangurupi marjuta halak mamboto barita na uli di Brasil

Tamba ma las ni roha ni penyiar marbarita dung dibahen tolu kebaktian dinas di kota São Paulo, Rio de Janeiro dohot di Curitiba taon 1937. Dipangke nasida ma mobil berpengeras suara tingki marbarita sian jabu tu jabu. Si José Maglovsky, sahalak remaja manurat, ”Hubahen hami ma sijahaon taringot Bibel di rak. Dung diputar rekaman ni jamita di mobil, hupatorang hami ma tu halak na ruar sian jabu.”

Dibahen ma pandidion di sunge jala godang turis disi. On ma tingki na denggan pasahathon barita na uli mamangke mobil berpengeras suara! Jamita pandidion na dipasahat ni si Rutherford tarbege di humaliang ni inganan i. Godang do na ro jonok tu mobil i jala manangihon rekaman ni jamita na diterjemahon tu bahasa Portugis. Dung i, angka na laho tardidi mangendehon ende Harajaon mangihuthon rekaman di bahasa Polandia. Angka donganta na asing dohot do marende di marragam bahasa. Yearbook taon 1938 mandok, ”Gabe taringot do hita di ari Pentakosta, ganup halak boi mangantusi hasintongan di bagasan bahasana sandiri.”

Dung kebaktian i, ganup ari Minggu, diputar do rekaman ni jamita di taman, komplek parjabuan, di pabrik na adong di kota São Paulo dohot di kota na jonok tusi. Ganup bulan, dipangke do mobil i laho marbarita tu 3.000 halak na marsahit kusta, hirahira 97 kilometer di sabola barat ni laut São Paulo. Ujungna, adong ma sada huria di inganan i. Nang pe marsahit kusta angka penyiar di huria i, marhiras ni roha do nasida marbarita na uli. Diloas ma nasida muse marbarita tu angka na marsahit kusta na adong di inganan na asing.

Di ujung ni taon 1938, sahat ma rekaman ni barita na uli di bahasa Portugis. Tingki All Souls’ Day (Hari Arwah), dipangke do mobil i sian kuburan tu kuburan laho mamutar rekaman ni jamita na marjudul ”Didia do Halak na Mate?”, ”Jahowa” dohot ”Hamoraon” na ditangihon 40.000 halak na jiarah!

Ndang lomo roha ni angka pandita dipasahat hasintongan sian Bibel. Didok ma tu pamarenta asa dipaso mobil i. Didok si Maud, hea do sahalak pandita manjujui torop halak asa manggaori mobil i. Alai, ala ro walikota dohot polisi, gabe ditangihon nasida ma rekaman ni jamita sahat tu na sae. Diboan walikota i do sada sijahaon taringot Bibel. Nang pe adong na marsogo ni roha, Yearbook taon 1940 mandok, taon 1939 i ma ”tingki na dumenggan di Brasil laho pabadiahon Teokrat Agung dohot goarNa”.

Saleleng ”mobil berpengeras suara Watch Tower” dipangke, tarida ma hamajuon di Brasil. Marhite mobil on, godang na manangihon barita na uli. Nang pe digadis mobil on taon 1941, tongtong do marhiras ni roha Sitindangi Ni Jahowa marbarita di Brasil.Dibuat sian arsipta di Brasil.