Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Februari 2016

Digoari Jahowa do ibana ”Aleale”

Digoari Jahowa do ibana ”Aleale”

”Ho ale Israel, naposongki, ho ale Jakkob naung hupilliti, ale pinompar ni si Abraham hasudunganku!”JES. 41:8.

ENDE: 51, 22

1, 2. (a) Sian dia do taboto boi jolma maraleale dohot Debata? (b) Aha do na laho taulas di artikel on?

SIAN mulai tubu sahat tu na mate, holong ma na rumingkot di hita. Las do rohanta dihaholongi jala sude jolma mangkaporluhon holong. Lomo rohanta maraleale jala marsaor tu dongan na asing. Holong ni Jahowa ma na rumingkot di hita. Alai, adong mandok, ala ndang boi taida Debata ndang boi hita maraleale tu Ibana.

2 Dipaboa di Bibel, adong do jolma na boi maraleale dohot Debata. Sitiruon sian nasida boi mangurupi hita maraleale tu Debata. Umpamana, si Abraham maraleale do dohot Debata. (Jaha Jakobus 2:23.) Boasa boi si Abraham maraleale dohot Jahowa? Haporseaon ni si Abraham do mambahen ibana boi maraleale dohot Jahowa. Di Bibel, digoari do si Abraham ama ni ”saluhut angka na porsea”. (Rom 4:11) Taida ma boasa haporseaon ni si Abraham  mangkorhon tu paralealeonna dohot Debata. Alani i, tasungkun ma dirinta, ’Songon dia do ahu boi maniru haporseaon ni si Abraham jala patoguhon paralealeonku dohot Jahowa?’

BOASA SI ABRAHAM BOI GABE ALEALE NI JAHOWA?

3, 4. (a) Paboa ma ujian na masa tu haporseaon ni si Abraham. (b) Boasa olo si Abraham mamelehon si Isak?

3 Pingkirhon ma, si Abraham naung marumur 125 taon nangkok tu dolok diihuthon anakna si Isak na marumur hirahira 25 taon. Si Isak mamboan soban jala si Abraham mamboan piso. [1] On ma pardalanan na umborat dihilala si Abraham, ndang ala naung matua ibana. Alai, ala dipangido Debata pelehononna anakna!—1 Mus. 22:1-8.

4 On ma ujian na umbalga tu haporseaon ni si Abraham. Adong na mandok, pakejamhu do Debata manuru si Abraham mamelehon si Isak. Na asing muse mandok, ndang dihaholongi si Abraham anakna. Didok nasida pe songon i, ala ndang marhaporseaon jala ndang diantusi nasida lapatan ni haporseaon. (1 Kor. 2:14-16) Ndang na so marpangantusion si Abraham, alai sasintongna alani haporseaonna do diulahon i. Diboto si Abraham do, ndang hea dipangido Jahowa naposoNa mangulahon ulaon na mambahen nasida susa. Alai, diboto si Abraham molo dioloi Jahowa, pasupasuonNa do ibana dohot anakna si Isak. Aha do na mambahen si Abraham marhaporseaon? Parbinotoan dohot pengalaman.

5. Sian dia do si Abraham marsiajar taringot Jahowa jala aha do pangkorhonna tu ibana?

5 Parbinotoan. Nang pe magodang di Ur si Abraham, inganan ni halak na manomba ganaganaan, alai ditanda si Abraham do Jahowa. Boasa boi ditanda si Abraham Jahowa hape amangna, si Tera manomba ganaganaan? (Jos. 24:2) Dipaboa di Bibel, pinompar ni si Sem do si Abraham, anak ni si Noak. Dipaboa si Sem do taringot Jahowa tu keluargana. Mangolu dope si Sem tingki marumur 150 taon si Abraham. Olo do ra ibana na paboahon tu si Abraham taringot Jahowa. Dung ditanda si Abraham Jahowa, dihaporseai jala dihaholongi ibana ma Jahowa.

6, 7. Songon dia do pengalaman ni si Abraham patoguhon haporseaonna?

6 Pengalaman. Songon dia do pengalaman ni si Abraham boi patoguhon haporseaonna tu Jahowa? Pingkiran, mangkorhon do i tu roha jala roha mangkorhon do i tu parniulaon. Dirimangi si Abraham do angka na diparsiajari ibana taringot Debata. Dung i, taronjar ma rohana pasangaphon ”Debata na tumimbul, Sitompa na sa na adong”. (1 Mus. 14:22, Bibel siganup ari) Bibel mandok molo adong biar na sian roha, boi ma hita maraleale dohot Debata. (Heb. 5:7; Ps. 25:14) Biar ni roha sisongon i ma na mangonjar roha ni si Abraham maraleale dohot Debata.

7 Nang pe nunga matua si Abraham dohot si Sarah, disuru Debata do nasida pinda sian Ur tu huta na asing jala di tenda do nasida tinggal. Ala dioloi si Abraham do Jahowa, dipasupasu jala diondingi ma ibana. Umpamana, mabiar do si Abraham dibunu jala mabiar do ibana dibuat halak si Sarah ala uli ni  rupana. Ndang sala biar ni rohana i. Alai, i ndang mambahen si Abraham gabe ndang mangoloi Jahowa. Alani i, ndang holan sahali diramoti Debata si Abraham dohot si Sarah marhite tanda halongangan. (1 Mus. 12:10-20; 20:2-7, 10-12, 17, 18) Pengalaman on ma na lam patoguhon haporseaon ni si Abraham.

8. Songon dia do parbinotoan dohot pengalaman boi patoguhon paralealeonta dohot Jahowa?

8 Boi do hita maraleale tu Jahowa? Boi! Alai, tahaporluhon do parbinotoan dohot pengalaman songon si Abraham. Godang do parbinotoan dohot pengalaman disurat di Bibel. (Dan. 12:4; Rom 11:33) Bibel marisi parbinotoan taringot ”Sitompa na sa na adong”. Aha na taparsiajari sian Bibel, mambahen hita mangargai jala mangkaholongi Jahowa. On mangonjar rohanta mangoloi Debata. Molo taoloi Debata, tajalo ma pasupasu dohot parlinggomanNa jala on boi lam patoguhon haporseaonta. Boi ma taboto molo sian nasa roha hita marhobas tu Debata, dame jala las ma rohanta. (Ps. 34:9; Poda 10:22) Molo lam godang parbinotoan dohot pengalamanta, lam togu ma haporseaon dohot paralealeonta tu Jahowa.

DIJAGA SI ABRAHAM DO PARALEALEONNA DOHOT DEBATA

9, 10. (a) Songon dia do asa lam togu paralealeon? (b) Sian dia do taboto molo si Abraham manjaga jala patoguhon paralealeonna dohot Jahowa?

9 Mansai arga do paralealeon. (Jaha Poda 17:17.) Paralealeon i, ndang songon barang na boi dituhor jala disimpan. Alai, dos songon suansuanan do i. Ingkon tasiram jala tapupuk asa lam denggan tubu. Dijaga si Abraham do paralealeonna dohot Jahowa. Songon dia do ibana mangulahon on?

10 Ndang hea ro tu roha ni si Abraham nunga sae be pangoloionna di tingki naung salpu. Di tingki di pardalanan ibana dohot keluargana, tongtong do diihuthon ibana tudutudu sian Jahowa laho mamillit na dumenggan di ngoluna. Tingki marumur 99 taon si Abraham, sataon andorang so tubu si Isak, dipangido Jahowa do asa disunat sude baoa di keluargana. Dialo si Abraham do parenta i? Ndang dialo, porsea do ibana tu Debata jala dioloi do parenta i di ari i.—1 Mus. 17:10-14, 23.

11. Boasa holsoan si Abraham tingki naeng diripashon Sodom dohot Gomorra jala songon dia do Jahowa paposhon rohana?

11 Ala sai dioloi si Abraham do Jahowa, boi ma lam togu paralealeon  ni nasida. Boi do ibana paboahon sude na di rohana tu Jahowa. Ndang mabiar ibana mangido pangurupion sian Jahowa tingki susa. Umpamana, tingki diboto si Abraham na laho ripashonon ni Debata huta Sodom dohot Gomorra, ninna rohana ma, dohot do diripashon halak na burju? Ra, holsoan do si Abraham tu si Lot dohot keluargana na tading di Sodom. Mardongan serep ni roha do si Abraham manungkun tu Debata, ”Siuhumi liat portibi on”. Dipapos Jahowa do roha ni si Abraham molo Ibana Debata parasi roha. PaluaonNa do halak na burju andorang so dipamasa dope panguhuman.—1 Mus. 18:22-33.

12, 13. (a) Songon dia do parbinotoan dohot pengalaman mangurupi si Abraham? (b) Sian dia do taboto molo si Abraham marpos ni roha tu Jahowa?

12 Alani parbinotoan dohot pengalamanna, boi ma tongtong si Abraham maraleale dohot Jahowa. Alani i, tingki dipangido Jahowa asa dipelehon anakna si Isak, dioloi ibana do Debata. Taingot ma jo muse tingki nangkok si Abraham tu dolok Moria. Adong do ro tu roha ni si Abraham molo Debata kejam jala jahat? Ndang! Sian dia taboto?

13 Andorang so marsirang sian angka naposona, didok si Abraham ma, ”Dison ma hamu mangulon rap dohot halode i, alai anggo ahu dohot dakdanak i, laho ma hami tu sadu i, jala ia dung martangiang hami, mulak hami tu hamu on.” (1 Mus. 22:5) Aha do lapatan ni hata ni si Abraham on? Boasa didok si Abraham tu naposona na laho mulak ibana rap dohot si Isak hape laho pelehononna do si Isak? Na margabus do ibana? Ndang songon i. Dipaboa Bibel do tu hita boasa didok si Abraham songon i. (Jaha Heber 11:19.) Porsea do si Abraham na boi do Debata pahehehon si Isak sian hamatean. Diingot ibana do songon dia Jahowa mambahen ibana dohot si Sarah boi marianakhon nang pe nasida nunga matua. (Heb. 11:11, 12, 18) Tangkas do diboto si Abraham, ndang adong na so boi bahenon ni Jahowa. Jala pos do rohana aha pe na masa di tingki i, paheheon ni Debata do muse si Isak asa saut sude janji ni Jahowa. Ndang ganggu rohanta molo si Abraham didok ama ni ”saluhut angka na porsea”.

14. Aha do parenta ni Debata na sipata maol taulahon jala songon dia do sitiruon sian si Abraham mangurupi hita?

14 Songon dia do molo hita? Tutu, ndang dipangido Debata sian hita songon na pinangidoNa sian si Abraham.  Alai, dipangido Debata do asa sai taoloi Ibana nang pe maol ninna rohanta. Boi do taingot aha parenta ni Debata na maol taulahon? Olo do ra tahilala songon i tingki marbarita na uli. Na asing, maila paboahon haporseaonna tu halak na so ditanda, di singkola manang di inganan parkarejoan. (2 Mus. 23:2; 1 Tes. 2:2) Hea do tahilala songon na dihilala ni si Abraham na nangkok tu dolok Moria tingki adong parenta ni Debata na maol taulahon? Molo hea, tatiru ma haporseaon ni si Abraham! Molo tarimangi sitiruon sian angka baoa dohot borua na marsihohot, taronjar ma rohanta maniru nasida jala lam jonok ma hita tu Jahowa.Heb. 12:1, 2..

PARALEALEON PAROHON PASUPASU

15. Boasa pos rohanta na so manolsoli si Abraham mangoloi Jahowa?

15 Ninna rohamu, manolsoli do si Abraham ala mangoloi Jahowa? Bibel mandok, ”Dung i tos ma hosana, jala mate sarimatua si Abraham, dung mahap rohana di hangoluan on.” (1 Mus. 25:8) Dung marumur 175 taon, moru ma gogona. Alai, las do rohana ala mangolu hombar tu lomo ni roha ni Debata. Tongtong do si Abraham maraleale dohot Jahowa saleleng ngoluna. Alai, nang pe ”mahap rohana di hangoluan on”, unang ma tarimpu na so lomo roha ni si Abraham mangolu di ari na naeng ro.

16. Aha do las ni roha na laho dihilala si Abraham di Paradeiso?

16 Bibel mandok taringot si Abraham, ”Ai dipaimaima do huta na marojahan na hot, na pinandean jala na pinauli ni Debata.” (Heb. 11:10) Pos do roha ni si Abraham, na idaonna do Harajaon ni Debata mamarenta di liat portibi on jala parsidohot do ibana tusi! Pingkiri ma las ni roha ni si Abraham mangolu di Paradeiso jala tongtong maraleale dohot Jahowa. Jala, rimangi ma muse las ni rohana tingki diboto torop naposo ni Debata maniru haporseaonna! Di Paradeiso, botoon ni si Abraham ma molo na niulahonna i, ”tudosan” do i tu na diulahon ni Debata di pudian ni ari. (Heb. 11:19) Jala, lungun ni rohana tingki paradehon si Isak gabe pelean, mangurupi marjuta halak mangantusi lungun ni roha ni Jahowa mangalehon Jesus gabe tobusan. (Joh. 3:16) Sitiruon sian si Abraham mangurupi hita mangargai tobusan, tanda ni holong ni Debata na umbalga!

17. Hita sude marsitutu mangulahon aha, jala aha do na laho taulas di artikel na mangihut?

17 Anggiat ma hita sude marsitutu maniru haporseaon ni si Abraham. Molo lam tatanda Jahowa, boi ma hita marsihohot jala lam taargai ma hak na sumurung manomba Jahowa. (Jaha Heber 6:10-12.) Anggiat ma hita tongtong maraleale dohot Jahowa! Di artikel na mangihut, taulas ma sitiruon sian tolu halak na maraleale dohot Jahowa.

^ [1] (paragraf 3) Sasintongna, goar ni nasida, i ma si Abram dohot si Sarai. Alai, di artikel on tadok ma goar ni nasida songon naung binahen ni Jahowa, i ma si Abraham dohot si Sarah.