Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Februari 2016

Patuduhon ma Roha na Marsihohot tu Jahowa

Patuduhon ma Roha na Marsihohot tu Jahowa

”Jahowa do di tongatonganta, dohot di tongatonga ni pinomparhu tu pinomparmu ro di saleleng ni lelengna.”1 SAM. 20:42.

ENDE: 43, 31

1, 2. Boasa paralealeon ni si Jonatan dohot si Daud gabe sitiruon laho patuduhon roha na marsihohot?

TINGKI dialo si Daud si Goliat, longang do roha ni si Jonatan mangida i. Dung i, ro ma si Daud tu jolo ni si Saul, Raja ni Israel, huhut ditiop ”ulu ni halak Palistim i di bagasan tanganna”. (1 Sam. 17:57) Diboto si Jonatan ma na didongani Debata si Daud. Marpadan ma nasida ”ala ni holong ni rohana [si Jonatan] di si Daud”. (1 Sam. 18:1-3, Bibel siganup ari) Dipatuduhon si Jonatan do roha na marsihohot tu si Daud sahat tu na mate ibana.

2 Tongtong do marsihohot si Jonatan tu si Daud, nang pe si Daud dipillit Debata gabe raja. Lungun do roha ni si Jonatan tingki marsangkap amana, si Saul laho mambunu si Daud. Tingki si Daud di padang pasir Hores, ro ma si Jonatan tusi patoguhon roha ni si Daud jala ”dipapir tondina di bagasan Debata”. Didok si Jonatan ma, ”Unang ho  mabiar . . . ; ingkon bangkit raja do ho gumomgom Israel” jala ahu gabe donganmu paidua.1 Sam. 23:16, 17.

3. Aha do na rumingkot di roha ni si Jonatan jala boasa? (Ida gombar di mula ni parsiajaran.)

3 Las do rohanta mangida halak na marsihohot songon si Jonatan. Dipatudu si Jonatan do roha na marsihohot tu si Daud, alai na rumingkot di ibana i ma patuduhon roha na marsihohot tu Jahowa. Alani i do, ndang mangiburu ibana nang pe si Daud na gabe raja. Dipapos si Jonatan do roha ni si Daud di pangaramotion ni Jahowa. Rap marsihohot do nasida tu Jahowa dohot tu padan na binahen ni nasida, ”Jahowa do di tongatonganta, dohot di tongatonga ni pinomparhu tu pinomparmu ro di saleleng ni lelengna”.1 Sam. 20:42.

4. (a) Songon dia do roha na marsihohot mambahen hita dame? (b) Aha do na laho taparsiajari di artikel on?

4 Hita halak Kristen, ingkon tapatuduhon do roha na marsihohot tu keluarga, dongan dohot tu dongan sahaporseaon. (1 Tes. 2:10, 11) Alai na rumingkot, marsihohot ma hita tu Jahowa silehon hangoluan! (Pgk. 4:11) Molo tapatuduhon roha na marsihohot, boi ma dame rohanta. Ingkon marsihohot do hita tu Debata nang pe adong pangunjunan na borat. Di artikel on, taparsiajari ma sitiruon sian si Jonatan na boi mangurupi hita marsihohot tu Jahowa mangadopi opat situasi na maol: (1) molo sahalak na berwenang ndang tama dipasangap, (2) tingki mamillit tu ise hita marsihohot, (3) tingki manaon hasusaan alani pandapot na sala sian dongan, dohot (4) tingki maol manggohi janji naung tabahen.

MOLO SAHALAK NA BERWENANG NDANG TAMA DIPASANGAP

5. Songon dia do pamarentaon ni si Saul parohon ujian tu rakyatna laho marsihohot tu Debata?

5 Nang pe dimiahi Debata si Saul gabe raja, alai ujungna ditulak Jahowa do ibana ala ndang dioloi Jahowa. (1 Sam. 15:17-23) Saleleng mangarajai dope si Saul, gabe sada ujian do on di rakyatna dohot di halak na solhot tu ibana. Maol do dihilala nasida marsihohot tu Debata, ala raja Saul na dipillit mamarenta ”di atas habangsa ni Jahowa”, mangulahon na jahat.—1 Kron. 29:23.

6. Aha do na patuduhon na marsihohot si Jonatan tu Jahowa?

6 Marsihohot do si Jonatan tu Jahowa nang pe si Saul amana ndang mangoloi Jahowa. (1 Sam. 13:13, 14) Sada tingki, ro ma halak Palistim dohot 30.000 kareta porang ni nasida laho mamorangi halak Israel. Holan 600 halak do dongan ni si Saul jala holan ibana dohot si Jonatan do na mamangke podang! Alai, ndang mabiar si Jonatan. Pos do rohana tu hata ni panurirang Samuel na mandok, ”Ai ndang tagamon tadingkonon ni Jahowa bangsona ala ni Goarna na timbul i.” (1 Sam. 12:22) Dung i, laho ma si Jonatan dohot sahalak naposona mandapothon halak Palistim. Didok si Jonatan ma, ”Ai ndang maol anggo di Jahowa manumpak marhite sian na torop, manang sian na otik.” Ditaluhon si Jonatan ma 20 tentara ni halak Palistim. Dung i, ”angka hitir be do isi ni tano i, laos gabe hagodoron sian Debata do i”. Gabe maoto ma halak Palistim i jala gabe masibunuan nasida. Dilehon Debata do hamonangan tu halak Israel alani haporseaon ni si Jonatan.1 Sam. 13:5, 15, 22; 14:1, 2, 6, 14, 15, 20.

7. Songon dia do dibahen si Jonatan tu si Saul amana?

 7 Nang pe ndang togu be paralealeon ni si Saul tu Debata, tongtong do diurupi si Jonatan amana, si Saul. Umpamana, rap marporang do nasida laho mangondingi bangso ni Debata.1 Sam. 31:1, 2.

8, 9. Boasa molo unduk tu na manguluhon hita, patuduhon na marsihohot do hita tu Debata?

8 Na marsihohot do hita tu Jahowa songon si Jonatan molo unduk hita tu pamarenta. Umpamana, nang pe pamarenta korupsi, alai ingkon tongtong do unduk hita ala ”panggomgomi na marsahala” do nasida. (Jaha Rom 13:1, 2.) Sasintongna, na patuduhon na marsihohot do hita tu Jahowa molo taoloi halak na manguluhon hita.1 Kor. 11:3; Heb. 13:17.

Na marsihohot do hita tu Jahowa molo taargai dongan saripe na so sahaporseaon (Ida paragraf 9)

9 Si Olga, na tading di Amerika Selatan [1] tongtong do marsihohot tu Debata marhite pangoloionna tu tunggani dolina. Saleleng martaontaon, susa do ibana dibahen tunggani dolina alani haporseaonna. Jotjot do jut rohana dibahen, direhei, ndang dipangkulingi, didok sirangkononna jala boanonna ianakhonna. Alai, ndang dibalos si Olga pambahenan ni tunggani dolina. Denggan do diulahon karejona di jabu, diparade sipanganon ni tunggani dolina, paheanna, dohot na ringkot di keluargana. (Rom 12:17) Didongani si Olga do tunggani dolina molo laho ibana tu jabu ni dongan manang keluargana. Tingki laho nasida tu acara penguburan ni simatuana, diparade do na ringkot tu keluargana. Dipaima do tunggani dolina di jolo ni gareja sahat tu na sidung ulaon i. Dung martaontaon, ala tongtong lambok jala unduk do si Olga, ndang diorai be ibana marpungu. Gariada, olo do tunggani dolina manaruhon si Olga tu Bale Harajaon jala sipata dohot marpungu.1 Ptr. 3:1.

TINGKI MANAON HASUSAAN HITA ALA MARSIHOHOT TU DEBATA

10. Tingki maol laho marsihohot, songon dia do si Jonatan mamboto aha sibahenonna?

10 Ala didok si Saul bunuonna si Daud,  gabe marsak ma si Jonatan. Nang pe nunga marpadan ibana tu si Daud, alai ingkon unduk do ibana tu amana, si Saul. Diboto si Jonatan do si Daud didongani Debata, ndang si Saul. Alani i, dipillit si Jonatan do jumolo marsihohot tu si Daud sian na mangoloi si Saul. Diurupi si Jonatan do si Daud jala dihatahon na denggan taringot si Daud tu amana.Jaha 1 Samuel 19:1-6.

11, 12. Songon dia do holongta tu Debata mangurupi hita mamillit asa marsihohot tu Ibana?

11 Ala marsihohot tu Debata, mangurupi donganta si Alice sian Australia laho manontuhon ise do na rumingkot oloanna. Dung marsiajar Bibel ibana, las rohana naeng paboahon aha naung diparsiajari tu keluargana. Dung i, didok ma tu keluargana na so dohot be ibana mangarayahon ari Natal. Dipatorang ibana boasa ndang dirayahon ari Natal, alai muruk do keluarga ni si Alice ala ninna rohanasida ndang disarihon si Alice be keluargana. Didok omakna muse, ndang lomo rohana mangida si Alice. Didok si Alice, ”Songgot ma rohangku jala lungun ala sasintongna huhaholongi do nasida. Alai, rumingkot do di ahu mangoloi Jahowa dohot AnakNa jala ndang sadia leleng, hulehon ma diringku jala tardidi.”Mat. 10:37.

12 Molo ndang manat hita, olo do gabe rumingkot di hita marsihohot tu negara, singkola, manang tim olahraga sian tu Debata. Umpamana, si Henry na malo marcatur. Somal do dibahen tanding marcatur di singkolana jala lomo rohana asa boi monang. Alai didok ibana ma, ”Lam leleng, gabe rumingkot ma ulaon di singkola sian na mangoloi Jahowa. Pertandingan catur di ujung ni minggu mambahen ahu ndang boi marbarita na uli. Ujungna, kaluar ma ahu sian tim catur di singkolangku.”Mat. 6:33.

13. Songon dia do marsihohot tu Debata mangurupi hita laho pasaehon parsalisian di keluarga?

13 Olo do maol tahilala laho mamillit tu ise do hita marsihohot. Umpamana, didok si Ken, ”Boi nian jotjot huida omakku ala ibana nunga matua jala sipata boi nian rap dohot hami. Alai, ndang boi dos roha ni omakku dohot tunggani borungku. Ndang boi rap huoloi nasida na dua. Alai, ala huparsiajari Bibel, jumolo ma hupasonang tunggani borungku.” Ala dirimangi si Ken hata ni Bibel, boi ma dipatorang tu tunggani boruna asa burju marsimatua jala dipatorang tu omakna asa ditangihon hata ni parumaenna.Jaha 1 Musa 2:24; 1 Korint 13:4, 5.

TINGKI MANAON HASUSAAN ALANI PANDAPOT NA SALA SIAN DONGAN

14. Songon dia do dibahen si Saul tu si Jonatan?

14 Boi do hita marsihohot tu Jahowa, nang pe adong pandapot na sala sian halak na mandapot hak na sumurung di huria. Muruk do Raja Saul tu si Jonatan asa unang maraleale dohot si Daud. Alai, ndang diboto alani aha umbahen na solhot paralealeon ni nasida. Dipaila si Saul do si Jonatan alani murukna. Alai, ndang olo si Jonatan mambalos. Tongtong do dipasangap si Jonatan amana jala marsihohot tu Jahowa dohot tu si Daud.1 Sam. 20:30-41.

15. Molo adong pandapot na sala taringot hita, songon dia do bahenonta?

15 Di huria ni Sitindangi Ni Jahowa saonari, boi do masa hasusaan alani pandapot na sala sian dongan. Sude hita mardosa, angka donganta na mandapot  hak na sumurung pe boi do sala. (1 Sam. 1:13-17) Molo hea hita manaon hasusaan alani pandapot na sala, tongtong ma marsihohot hita tu Jahowa.

TINGKI MAOL MANGGOHI JANJI NAUNG TABAHEN

16. Di tingki na songon dia ma hita tongtong marsihohot tu Jahowa, ndang mamingkirhon diri sandiri?

16 Si Saul, lomo rohana asa si Jonatan manggantihon ibana gabe raja. (1 Sam. 20:31) Alai, ala si Jonatan marsihohot tu Debata, i do alana umbahen na marsihohot ibana tu si Daud. Ndang olo ibana muba sian ”naung sinumpahonna, nang tung marharugian ibana”. (Ps. 15:4) Hita pe ala marsihohot tu Jahowa, ndang boi mangose janji naung tabahen. Umpamana, molo marsihohot do hita tu Jahowa jala taargai hataNa, ndang ubaonta parjanjian bisnis na tabahen nang pe ndang parohon laba. Jala, songon dia do molo masa hasusaan na so panagaman di parumatanggaon? Holongta tu Debata patoguhon rohanta asa marsihohot tu dongan saripe.Jaha Maleaki 2:13-16.

Ala marsihohot tu Debata, tagohi ma parjanjian bisnis na tabahen nang pe ndang parohon laba (Ida paragraf 16)

17. Songon dia do parsiajaran on boi mangurupi hita?

17 Songon si Jonatan, tongtong ma marsihohot hita tu Debata nang pe manaon hasusaan. Alani i, tapatuduhon ma roha na marsihohot tu angka dongan sahaporseaon nang pe adong na mambahen hansit rohanta. Molo taulahon songon i, on mambahen las roha ni Jahowa jala hita pe boi mangkilala las ni roha. (Poda 27:11) Pos ma rohanta, bahenon ni Jahowa do na dumenggan tu hita. Di parsiajaran na mangihut, taparsiajari ma tudosan sian halak na marsihohot dohot na so marsihohot di tingki ni si Daud.

^ [1] (paragraf 9) Pigapiga goar nunga diganti.