Hupaboa ma tu petugas i, nunga hea ahu dipenjarahon ala ndang olo dohot marporang. Husungkun ibana, ”Ingkon dipenjara do ahu muse?” On ma paduahalihon ahu dijou asa gabe tentara ni Amerika Serikat.

AHU tubu taon 1926 di Crooksville, Ohio, Amerika Serikat. Natuatuangku ndang paragama, alai ualu hami ianakhonna disuru do asa laho tu gareja. Laho ma ahu tu gareja Metodis. Tingki marumur 14 taon, dilehon pandita ma tu ahu hadiah ala torus do ahu marminggu di bagasan sataon.

Si Margaret Walker (donganta borua na paduahon sian hambirang) na mangurupi ahu mamboto hasintongan

Tingki i, hombar jabunami na margoar si Margaret Walker, sahalak Sitindangi Ni Jahowa, jotjot ro tu jabunami manaringoti Bibel tu omakku. Sada tingki, hundul ma ahu rap dohot nasida. Didok omakku ma laho ahu sian jabu asa unang hugugai nasida marsiajar. Alai, sai hutangitangi do nasida tingki marsiajar. Sada tingki, disungkun si Margaret ma ahu, ”Diboto ho do ise goar ni Debata?” Hudok ma, ”Sude do halak mamboto, goarNa Debata.” Didok ibana ma, ”Bungka ma Bibelmu jala jaha ma di Psalmen 83:19.” Hujaha ma goar ni Debata, i ma Jahowa. Laho ma ahu paboahon tu donganku, hudok ma tu nasida, ”Molo mulak hamu tu jabu, jaha ma Bibel di Psalmen 83:19, ida ma disi adong goar ni Debata.” Mulai sian i, nunga marbarita ahu.

 Marsiajar Bibel ma ahu jala tardidi di taon 1941. Dungkon i, dipillit ma ahu asa manguluhon parsiajaran buku di huria. Hutogihon ma omakku dohot keluargangku asa ro tu parpunguan i jala ro do nasida. Alai, bapakku ndang lomo rohana.

MANGADOPI PARSALISIAN DI JABU

Tamba ma tanggung jawabhu di huria jala hubahen ma perpustakaan di jabu. Didok bapakku ma tu ahu, ”Diida ho do sude buku on? Ndang lomo rohangku mangida i. Boan i sude jala laho ho sian jabu on.” Laho ma ahu sian jabu jala tinggal di Zanesville, Ohio, ndang dao sian jabu. Alai, jotjot do ahu mulak laho patoguhon keluargangku.

Sai diorai bapakku do omakku marpungu. Sipata sian tonga dalan, dipaksa ma omakku asa mulak tu jabu. Alai dung sahat di jabu, laho ma omakku sian pintu na asing. Hudok ma tu ibana, ”Unang mabiar ho omak. Loja do annon bapak i mangorai omak marpungu.” Ndang taroraan ni bapak be omak molo laho marpungu. Ujungna, marsitutu ma torus omakku marpungu.

Di taon 1943, dibahen ma Singkola Pangkobasion Teokratis di hurianami jala ahu dapot singkola latihan. Pangajarajarion di singkola i, mangurupi ahu asa lam denggan marbarita dohot pasahathon jamita.

NDANG PARSIDOHOT TU PORANG

Masa ma muse Porang Dunia II di taon 1944. Dijou ma ahu asa dohot tu Dinas Militer. Mangalapor ma ahu tu kantor Dinas Militer di Columbus, Ohio. Dohot ma ahu test kesehatan jala disuru mangisi dokumen. Alai, hudok ma tu petugas militer ndang olo ahu gabe tentara. Dipaloas ma ahu laho. Ndang sadia leleng, ro ma petugas tu jabungku jala didok, ”Corwin Robison, adong surat parenta laho manangkup ho.”

Dua minggu dungkon i, didok hakim ma tu ahu di pengadilan, ”Autsugari ahu manontuhon, penjarahononku do ho seumur hidup. Adong sidokkononmu?” Hualusi ma, ”Hakim, ahu sahalak parbarita na uli do. Jala, barita na uli taringot Harajaon ni Debata do na hupaboa tu sude jolma.” Didok hakim i ma tu dewan juri, ”Hamu ro tuson ndang na laho paboahon ibana sahalak parbarita. Alai, manontuhon na sala do ibana ala ndang olo tentara.” Ndang pola satonga jom, ditontuhon dewan juri ma ahu marsala. Didok hakim i ma dipenjara ahu saleleng lima taon di Ashland, Kentucky.

DIRAMOTI JAHOWA TINGKI DI PENJARA

Dung dua minggu di penjara di Columbus, Ohio. Martangiang ma ahu tu Jahowa, ”Ndang tolap ahu dison saleleng lima taon. Alai, ndang adong na boi hubahen.”

Marsogotna i, diboan ma ahu tu luar. Rap jongjong ma ahu dohot sahalak tahanan na timbo jala na bolon di jolo ni jendela. Didok ibana ma tu ahu, ”Oi cebol, boasa dison ho?” Hudok ma, ”Ahu Sitindangi Ni Jahowa.” Ninna ma muse, ”Jadi, boasa dison ho?” Hudok ma, ”Sitindangi Ni Jahowa ndang olo  marporang jala ndang mambunu jolma.” Didok ibana ma muse, ”Dipenjarahon ho ala ndang mambunu jolma? Hape na asing dipenjara alani na mambunu. Ndang masuk akkal.”

Dung i didok ibana ma, ”Nunga 15 taon dipenjarahon jala nunga hujaha angka bukumuna.” Dung didok songon i, martangiang ma ahu, ”Jahowa, anggiat ma ahu diurupi.” Si Paul do goarna. Didok ibana ma tu ahu, ”Molo adong na mangganggu ho, paboa tu ahu.” Alani i, 50 halak na adong di penjara i ndang adong na hea mangganggu ahu.

Rap do ahu dohot angka Sitindangi na dipenjarahon ala ndang dohot marporang di Ashland, Kentucky

Dung dipindahon ahu tu penjara di Ashland, jumpang ma ahu dohot dongan sahaporseaon disi. Dipatogu nasida do partondionku. Dilehon ma tu hami jadwal manjaha Bibel ganup minggu, dibahen hami ma sungkunsungkun dohot alus tu parpunguan na didok Bibel Bees. Adong do na dipillit mangatur marbarita. Bidang do sel inganannami i jala godang podoman marjojor. Didok ma tu ahu, ”Robison, ho ma na martanggung jawab marbarita dison. Ise pe na modom disi, tusi ma ho marbarita. Ingkon marbarita ma ho andorang so ditinggalhon podoman i.” Songon i ma dibahen hami asa boi marbarita.

DUNG KALUAR SIAN PENJARA

Sae ma Porang Dunia II di taon 1945, alai tongtong dope ahu di penjara. Huingot ma keluargangku, ala hea didok bapakku tu ahu, ”Boi do huorai halak on sude gabe ndang Sitindangi Ni Jahowa molo ndang dison be ho.” Alai, dung kaluar ahu sian penjara, huboto ma pitu keluargangku laho do marpungu jala ibotongku nunga tardidi nang pe sai diorai bapak.

Rap marbarita dohot si Demetrius Papageorge, sahalak donganta baoa na miniahan na manomba Jahowa sian taon 1913

Masa ma porang di Korea taon 1950. Disuru ma ahu ro tu Fort Hayes paduahalihon asa dohot dinas militer. Dung i, dohot ma ahu ujian, didok sahalak petugas militer i ma tu ahu, ”Umdenggan do nilaim sian na di kelompokmu.” Alai hudok ma, ”Denggan ma i, alai ndang olo ahu gabe tentara.” Huenet ma 2 Timoteus 2:3 jala hudok, ”Nunga gabe tentara ni Kristus ahu.” Gabe sip ma nasida, didok ma, ”Laho ma ne ho.”

Dungkon i, dohot ma ahu tu pertemuan Betel tingki adong kebaktian di Cincinnati, Ohio. Didok donganta si Milton Henschel  ma tu hami, dihaporluhon do di Betel halak na marsitutu di ulaon partondion. Ujungna, dijou ma ahu tu Betel jala ditugashon ma ahu tu Brooklyn bulan Agustus taon 1954. Mulai sian i, torus ma ahu karejo di Betel.

Godang do na boi huulahon di Betel. Umpamana, di bagasan pigapiga taon, karejo ma ahu padalanhon mesin ketel uap di percetakan dohot di kompleks perkantoran, ahli mesin jala tungkang kunci. Karejo ma ahu muse di Balai Kebaktian di kota New York City.

Mangaradoti ketel uap di komplek kantor ni Betel Brooklyn

Tamba ma las ni rohangku karejo di Betel, ala diparade disi panjahaion ayat harian ganup manogot jala adong do panombaon na sasaripe laho mangulas Joujou Paboahon. Rap marbarita na uli do hami muse dohot dongan di huria. Ingkon sude ma nian keluarga ni Sitindangi Ni Jahowa mangulahon sisongon on. Molo rap natuatua dohot ianakhonna manjaha ayat harian ganup ari, mambahen panombaon na sasaripe, mangalehon alus di parpunguan jala dohot marbarita na uli, togu ma partondion ni keluarga i.

Godang ma alealengku di Betel dohot di huria. Adong do sian nasida na miniahan jala deba nunga dipahehe tu surgo. Alai, sude naposo ni Jahowa ndang sempurna nang pe tinggal di Betel. Molo ndang sapandapot ahu dohot na asing, marsitutu do ahu laho mardame ala huingot do Mateus 5:23, 24. Ndang mura manalpuhon hasalaan ni dongan. Alai, tongtong do togu paralealeonku tu na asing ala hatop do huangkui salangku.

LABA NA HUDAPOT DI ULAON PARTONDION

Ala naung matua ahu, susa do huhilala marbarita sian jabu tu jabu, alai i ndang mangambati ahu marbarita. Huparsiajari ma bahasa Mandarin jala las rohangku marbarita tu halak Cina na lewat di dalan. Hea do hulehon 30 manang 40 majalah tu halak na olo manjangkon.

Marbarita tu halak Cina di Brooklyn, New York

Hea do adong kunjungan kembaliku di Cina! Di sada tingki, pajumpang ma ahu dohot sahalak borua na poso na mambagihon  iklan buah. Hulehon ma tu ibana majalah Menara Pengawal dohot Sadarlah! di bahasa Cina. Dijalo ibana ma majalah i jala dipaboa si Katie do goarna. Dung i, molo pajumpang, jotjot do hami mangkatahatai. Hupaboa ma tu ibana goar ni buah dohot sayur di bahasa Inggris. Jala jotjot do hupatorang isi ni Bibel, hulehon ma muse buku Alkitab Ajarkan. Dung pigapiga minggu, ndang hea be hami pajumpang.

Pigapiga bulan dungkon i, hulehon ma majalah tu borua na asing na mangalehon iklan buah tu ahu. Dung saminggu, dilehon ibana ma tu ahu handphonena jala didok, ”Adong telepon sian Cina tu ho.” Ningku ma, ”Ndang adong na hutanda di Cina.” Alai, dipaksa ma ingkon hualusi telepon i, hudok ma, ”Halo, si Robison do ahu.” Didok na manelepon i ma, ”Robby, si Katie do ahu. Nunga mulak ahu tu Cina.” Hudok ma, ”Tu Cina?” Didok si Katie ma, ”I do. Robby, diboto ho do na mangalehon handphone i tu ho? Anggingku do i. Denggan do na diajarhonmi tu ahu. Ajari ma ibana.” Hudok ma muse, ”Huajari pe. Mauliate ma ala dipaboa ho tu ahu ingananmu saonari.” Ujungna, leleng ma ahu mangkatai dohot anggi ni si Katie. Didia pe nasida na dua saonari, hirim do rohangku marsiajar nasida taringot Jahowa.

Nunga 73 taon ahu manomba Jahowa. Las situtu rohangku ala ndang parsidohot ahu tu porang jala marsihohot saleleng di penjara. Gabe pos ma roha ni anggingku dohot ibotongku ala denggan ahu mangadopi bapakku. Omakku, tolu ibotongku dohot tolu anggingku nunga tardidi gabe Sitindangi Ni Jahowa. Ndang diorai bapakku be hami jala nunga dohot ibana marpungu andorang so marujung ngolu.

Harap do rohangku paheheon ni Debata sude keluarga dohot alealengku naung marujung ngolu di tano na imbaru. Las situtu ma rohanta molo rap hita manomba Jahowa dohot angka na tahaholongi salelenglelengna! *

^ par. 32 Tingki dibahen artikel on, donganta si Corwin Robison nunga marujung ngolu jala marsihohot do tu Jahowa.