Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Mei 2016

Songon dia do Bahenonta Mamillit na Dumenggan?

Songon dia do Bahenonta Mamillit na Dumenggan?

”Antusi hamu ma, manang dia lomo ni roha ni Tuhan i.”—EPS. 5:17.

ENDE: 11, 22

1. Paboa ma pigapiga patik na disurat di Bibel, jala songon dia i marlaba tu hita molo taoloi?

MARHITE Bibel, dilehon Jahowa tu hita patikNa asa taboto lomo ni rohaNa. Umpamana, dipaboa di Bibel ndang boi hita manangko, mabuk, mangulahon parmainanon manang manomba ganaganaan. (1 Kor. 6:9, 10) Dung i, dilehon Jesus Kristus do parenta na tangkas tu siihuthon ibana, ”Podai hamu ma saluhut bangso, didi hamu ma nasida tu bagasan Goar ni Ama. Anak dohot Tondi Parbadia! Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!” (Mat. 28:19, 20) Sude na diajarhon ni Jahowa dohot Jesus tu hita, mangurupi hita asa denggan parngoluonta. Patik ni Jahowa mangajari hita manarihon keluarganta, dung i asa tongtong hita sehat jala marlas ni roha. Na rumingkot, molo taoloi parenta ni Jahowa, songon marbarita na uli, on palashon rohaNa jala parohon pasupasuNa tu hita.

2, 3. (a) Boasa ndang sude ditontuhon di Bibel na laho taulahon di parngoluonta? (b) Sungkunsungkun aha do na porlu tapingkirhon di artikel on? (Ida gombar di mula ni parsiajaran.)

 2 Alai, ndang sude na masa di parngoluonta diatur di Bibel. Umpamana, ndang ditontuhon di Bibel songon dia pangkean na ingkon tapangke. On patuduhon bisuk ni Jahowa. Nang pe mubauba model jala marragam pangkean na dipangke di liat portibi on, alai prinsip ni Bibel taringot pangkean ndang hea muba. Dung i, ndang ditontuhon di Bibel taringot karejo manang hiburan na laho tapillit. Jala, ndang diatur aha na ingkon taulahon asa tongtong hita sehat. Diloas Jahowa do ganup jolma dohot kepala keluarga laho mamillit siulahononna taringot sudena i. 

3 Alani i, molo adong na ringkot na ingkon tapillit na mangkorhon tu parngoluonta, jala ndang dipaboa di Bibel taringot i, tasungkun ma dirinta, ’Lomo do roha ni Jahowa tu na hupillit on? Dihalomohon Ibana do aha na hupillit saleleng i ndang maralo tu patikNa? Songon dia do boi huboto pangkilalaan ni Jahowa tu na hupillit?’

AHA NA TAPILLIT MANGKORHON DO I TU NA ASING

4, 5. Aha do pangkorhon ni na tapillit tu hita dohot tu donganta?

4 Adong halak marpingkir, sude do boi ulahonon ni nasida. Alai, lomo do rohanta mangulahon ulaon na mambahen las roha ni Jahowa. Alani i, andorang so tatontuhon aha na laho tapillit, porlu tapingkirhon aha na disurat di Bibel jala taulahon. Umpamana, dipaboa do di Bibel songon dia pangkilalaan ni Debata taringot mudar, alani i taihuthon ma i. (1 Mus. 9:4; Ul. 15:28, 29) Boi do hita mangido pangurupion sian Jahowa asa tapillit na dumenggan jala mambahen las rohaNa.

5 Aha na tapillit, mangkorhon do i tu hita. Molo tapillit na denggan, mambahen hita jonok tu Jahowa. Alai molo tapillit na so denggan, sega ma paralealeonta tu Ibana. Aha na tapillit, boi do muse mangkorhon tu na asing. Ndang lomo rohanta mangulahon aha pe na mambahen gale haporseaon ni donganta. Ndang lomo rohanta muse mambahen parsoalan tu donganta di huria. Alani i, ringkot do hita laho mamillit na dumenggan.Jaha Rom 14:19; Galatia 6:7.

6. Aha do na boi mangurupi hita laho manontuhon sipillitonta?

6 Molo ndang ditontuhon di Bibel aha na ingkon taulahon, songon dia do hita mamillit na dumenggan? Unang ma mangihuthon aha na tahalomohon, alai manat ma tapingkiri aha na laho taulahon, jala tapillit ma na mambahen las roha ni Jahowa. Dung i, pos ma rohanta, na urupanNa do hita mamillit na dumenggan.Jaha Psalmen 37:5.

AHA DO NA PINANGIDO NI JAHOWA ULAHONONKU?

7. Molo ndang adong tarsurat di Bibel, songon dia do hita manontuhon lomo ni roha ni Jahowa taringot tu aha na laho taulahon?

7 Alai, songon dia do hita mamboto aha na dihalomohon ni Jahowa? Epesus 5:17 mandok, ”Antusi hamu ma, manang dia lomo ni roha ni Tuhan i.”  Molo ndang tarsurat di Bibel, porlu taantusi manang taboto lomo ni roha ni Jahowa taringot aha na laho taulahon. Songon dia do hita mangulahon i? Martangiang ma hita tu Ibana jala tapaloas ma tondi parbadiaNa manogunogu hita.

8. Songon dia do Jesus mangantusi aha na dihalomohon ni Jahowa ulahononna? Bahen ma tudosan.

8 Diantusi Jesus do aha na dihalomohon Jahowa siulahononna. Umpamana, marhite tanda halongangan, dua hali dilehon Jesus mangan torop halak. (Mat. 14:17-20; 15:34-37) Nang pe male Jesus tingki diunjuni di padang pasir, ndang olo ibana mambahen batu gabe roti. (Jaha Mateus 4:2-4.) Diboto Jesus do, ndang lomo roha ni Jahowa pangkeonna tondi parbadia holan manarihon dirina sandiri. Pos do roha ni Jesus tu pangurupion ni Jahowa, jala na lehononNa do sipanganon na porlu di ibana.

9, 10. Aha do na boi mangurupi hita asa marbisuk manontuhon sipilliton? Bahen tudosan.

9 Hita pe, boi do mamillit na dumenggan molo taloas Jahowa manogunogu hita. Bibel mandok, ”Marhaposan tu Jahowa ma ho sian nasa roham, jala unang marpangunsandean ho tu pingkiranmu sandiri. Sai Ibana ma tanda di nasa dalanmu asa Ibana patigor angka dalanmu. Unang tung na bisuk ho diparbaga roham, habiari ma Jahowa, jala paholang dirim sian hajahaton.” (Poda 3:5-7) Molo taparsiajari Bibel jala taboto songon dia pingkiran ni Jahowa, boi ma taantusi aha na laho taulahon hombar tu lomo ni rohaNa. Lam godang taboto taringot pingkiran ni Jahowa, lam mura ma hita manontuhon sipillitonta na palashon rohaNa. Jala, lam mura ma hita patuduhon roha na mangoloi tu panogunoguon ni Debata.Hes. 11:19.

10 Pingkirhon ma sahalak borua naung marhasohotan, lomo rohana naeng manuhor sipatu. Alai sipatu na niidana i, mansai arga. Nang pe ndang diida tungganedolina, diboto ibana do songon dia pangkilalaan ni tungganedolina molo dituhor sipatu i. Boasa diboto ibana? Ala nunga leleng nasida marhasohotan, alani i diboto ibana do songon dia tungganedolina mamangke hepeng. Songon i ma, molo taboto pingkiran dohot na diulahon ni Jahowa di tingki naung salpu, boi ma taantusi lomo ni roha ni Jahowa ganup tingki.

SONGON DIA DO MAMBOTO PINGKIRAN NI JAHOWA

11. Sungkunsungkun aha do na porlu tarimangi tingki manjaha manang marsiajar Bibel? (Ida kotak ” Tingki Marsiajar Bibel, Rimangi ma.”)

11 Songon dia do hita mamboto pingkiran ni Jahowa? Asa taboto pingkiran ni Jahowa, ingkon tajaha do Bibel ganup ari. Tingki tajaha Bibel, tasungkun ma dirinta, ’Aha do na dipaboa ayat on taringot Jahowa? Boasa dibahen Ibana  songon i?’ Songon si Daud, tapangido ma pangurupion sian Jahowa asa boi lam tatanda Ibana. Si Daud mandok, ”Ale Jahowa, sai pabotohon ma tu ahu angka dalanmu, jala ajarhon tu ahu angka bogasmu. Sai togutogu ma ahu tu bagasan hasintonganmu, jala ajari ahu, ai Ho do Debata ni hatuaonku, Ho do na huhaposi ganup ari.” (Ps. 25:4, 5) Molo adong na taboto taringot Jahowa, boi ma tapingkirhon di tingki na dia do i boi pangkeonta. Boi do i tapangke di keluarga, di parkarejoan, di singkola, manang tingki marbarita? Molo manat do on tapingkirhon, mura ma hita mangantusi lomo ni roha ni Jahowa jala taboto ma tingki sadihari hatorangan i boi tapangke.

Asa taboto pingkiran ni Jahowa, ingkon tajaha do Bibel ganup ari

12. Songon dia do publikasi dohot parpunguanta mangurupi hita lam mangantusi pingkiran ni Jahowa?

12 Cara na asing laho mamboto pingkiran ni Jahowa, i ma mamparrohahon aha na diajarhon ni organisasi tu hita. Umpamana, tingki laho manontuhon sipilliton asa taboto pingkiran ni Jahowa, boi do tapangke Indeks Publikasi Menara Pengawal manang Panduan Riset  untuk Saksi-Saksi Yehuwa laho mangurupi hita. Marhite parpunguan, diurupi do hita mamboto pingkiran ni Jahowa molo denggan tatangihon alus ni angka donganta, jala molo taparrohahon aha na diajarhon di parpunguan i. Alani i, boi ma hita manontuhon siulahononta na mambahen las roha ni Jahowa.

RIMANGI MA NA DIHALOMOHON NI JAHOWA TINGKI MANONTUHON SIPILLITON

13. Bahen ma tudosan songon dia hita boi marbisuk manontuhon sipillitonta molo tarimangi pingkiran ni Jahowa.

13 Taida ma sada tudosan, molo tarimangi na dihalomohon ni Jahowa, mangurupi hita marbisuk laho manontuhon sipillitonta. Olo do ra lomo rohamu gabe perintis. Ra, nunga dibahen hamu hamubaon di ngolumuna asa boi pangkeonmu godang tingki laho marbarita. Alai, olo do ra ganggu rohamuna molo hurang parhepengon gabe moru las ni rohamuna. Ndang adong dipaboa di Bibel ingkon merintis do hita laho manomba Jahowa. Nang pe hita penyiar, tongtong do hita boi manomba Jahowa. Alai Jesus paboahon, pasupasuon ni Jahowa do halak na mangalehon godang tingkina humongkop Harajaon. (Jaha Lukas 18:29, 30.) Dipaboa di Bibel, las do roha ni Jahowa molo marsitutu hita manomba Ibana, jala lomo rohaNa hita marlas ni roha. (Ps. 119:108; 2 Kor. 9:7) Molo tatangiangkon jala tarimangi sudena on, boi ma hita manontuhon na laho sipillitonta jala mangkirim tu pasupasu ni Jahowa.

14. Songon dia do hita boi manontuhon pangkean na dihalomohon ni Jahowa?

14 Adong muse tudosan na asing, lomo rohanta mangida model ni sada pangkean, alai molo tapangke pangkean i, boi mambahen gale haporseaon ni dongan di huria. Ndang ditontuhon di Bibel model ni pangkean na laho sipangkeonta. Alani i, songon dia do hita mamboto pingkiran ni Jahowa taringot on? Bibel paboahon tu hita, ”Angka parompuan pe, songon i do: Pantun marabit, marpangkean hahormaton dohot toruk ni roha; unang ma marhitehite obuk na mardandan dohot sanggul mas dohot mutiha manang abit na arga. Alai naeng ma songon na tama di parompuan, angka na marhatopothon hadaulaton marhitehite angka ulaon na denggan.” (1 Tim. 2:9, 10) Sipaingot on, marlangku do tu sude Sitindangi Ni Jahowa. Molo taihuthon do poda on, ingkon tapingkirhon do pangkilalaan ni dongan taringot pangkeanta. Ala tahaholongi do dongan na asing, ndang olo hita mambahen gale haporseaon ni nasida. (1 Kor. 10:23, 24; Plp. 3:17) Molo tarimangi do pingkiran ni Jahowa dohot na nidok ni Bibel, boi ma hita mamillit na dumenggan na mambahen las roha ni Jahowa.

15, 16. (a) Songon dia do pangkilalaan ni Jahowa molo tapingkirhon parmainanon? (b) Songon dia do hita mamboto na dihalomohon ni Jahowa tingki mamillit hiburan? (c) Aha do na boi taulahon tingki laho manontuhon sipilliton?

15 Bibel paboahon tu hita, sogo do roha ni Jahowa mangida halak na mangulahon manang na mamingkirhon  hajahaton. (Jaha 1 Musa 6:5, 6.) On patuduhon, ndang lomo roha ni Jahowa hita mamingkirhon ulaon parmainanon. Molo sai tapingkirhon do songon i, boi do on gabe taulahon. Alai, lomo roha ni Jahowa hita mamingkirhon angka na badia dohot angka na denggan. Si Jakobus manurat habisuhon sian Jahowa, ”parjolo sahali na badia do i, dung i mardame, na saor, pangoloi, gok asi ni roha dohot angka parbue na denggan; ndang marnida bohi jala ndang manipu”. (Jak. 3:17, Bibel siganup ari) Songon na dipaboa di Bibel, ingkon tapadao do hiburan na mambahen hita mamingkirhon na roa manang na so badia. Alai molo taboto do na dihalomohon manang dihasogohon ni Jahowa, taboto ma mamillit buku, film manang game na denggan di hita. Ndang pola sungkunonta halak na asing laho manontuhon sipillitonta.

16 Tingki manontuhon sipilliton, godang do na boi tapillit hombar tu lomo ni roha ni Jahowa. Alai, tingki mamillit na ringkot di parngoluonta, boi do tasungkun sintua manang donganta na matoras di partondion. (Tit. 2:3-5; Jak. 5:13-15) Alai, ndang nasida na manontuhon sipillitonta. Ingkon hita sandiri do mamillit na ringkot di parngoluonta mamangke pangantusion na sian Bibel. (Heb. 5:14) Songon na nidok ni apostel Paulus, ai ganup do halak masiboan bobanna be.Gal. 6:5.

17. Aha do labana di hita molo tapillit na mambahen las roha ni Jahowa?

17 Molo tatontuhon na tapillit hombar tu lomo ni roha ni Jahowa, on mambahen hita jonok tu Ibana. (Jak. 4:8) Haporseaonta tu Jahowa pe lam togu. Alani i, tarimangi ma aha na tajaha sian Bibel asa taboto pingkiran ni Jahowa. Godang do na boi taparsiajari taringot Jahowa. (Job 26:14) Molo marsitutu do hita mananda Ibana, marbisuk ma hita laho mamillit na dumenggan di ngolunta. (Poda 2:1-5) Nang pe mubauba pamingkirion dohot sangkap ni jolma, alai Jahowa ndang hea muba. Buku Psalmen mandok, ”Sangkap ni Jahowa sai na hot do salelenglelengna, pingkiran ni rohana pe marsundutsundut do.” (Ps. 33:11) Nunga tangkas taida, boi do hita mamillit na dumenggan molo taboto pingkiran ni Jahowa jala taulahon hombar tu lomo ni rohaNa.