Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Pasaehon Parsalisian Marhite Holong

Pasaehon Parsalisian Marhite Holong

”Mardame sama hamu.”MRK. 9:50.

ENDE: 39, 35

1, 2. Parsalisian aha do na dipaboa di buku sada Musa, jala boasa on disurat?

HEA do dijaha hamu di Bibel taringot parsalisian? Di buku sada Musa dipaboa do taringot si Kain na mambunu anggina si Abel (1 Mus. 4:3-8); si Lamek mambunu sahalak dolidoli (1 Mus. 4:23); naposo ni si Abraham marbadai dohot naposo ni si Lot (1 Mus. 13:5-7); si Hagar marginjang ni roha tu si Sarah, jala si Sarah marungutungut tu si Abraham (1 Mus. 16:3-6); si Ismael mangalo sude halak, jala sude halak mangalo ibana.—1 Mus. 16:12.

2 Boasa disurat taringot parsalisian di Bibel? Sian tudosan na disurat di Bibel, hita boi marsiajar taringot halak na manaon hasusaan alani parsalisian. Songon nasida, hita ndang tipak jala olo do masa tu hita sisongon i. Alani i, taihuthon ma cara na denggan laho pasaehon parsalisian songon na dipaboa di Bibel. (Rom 15:4) On mangurupi hita tongtong manjaga hadameon tu na asing.

3. Aha do na laho taparsiajari di artikel on?

3 Taparsiajari ma di artikel on, boasa hita ingkon pasaehon parsalisian, jala songon dia do bahenonta laho pasaehon i. Dung i, taparsiajari ma prinsip ni Bibel na boi  mangurupi hita pasaehon parsalisian, asa tongtong hita mardame tu Jahowa dohot tu dongan na asing.

RINGKOT DI NAPOSO NI DEBATA PASAEHON PARSALISIAN

4. Parange na songon dia do na jotjot taida di portibi on, jala aha do pangkorhon ni i?

4 Sibolis do na mambahen tubu parbadaan jala na mambahen halak ndang marsada. Boasa tadok songon i? Didok Sibolis di Eden, boi do jolma manontuhon na denggan manang na so denggan tu dirina pulik sian Debata. (1 Mus. 3:1-5) Alai saonari, molo taida pangalaho ni godang jolma di portibi on, jotjot nasida mambahen hasusaan tu donganna. Dung i, godang mandok boi nasida mamillit na denggan dohot na so denggan tu dirina. Nasida marginjang ni roha, mangkaringkothon dirina, marsaing jala ndang dipingkiri pambahenanna i manusai donganna. Parange sisongon on, parohon parsalisian. Di Bibel dipaboa, molo sasahalak mura muruk on boi mambahen parbadaan dohot hasusaan.Poda 29:22.

5. Songon dia do diajarhon Jesus taringot pasaehon parsalisian?

5 Tingki marjamita Jesus di dolok, diajari do siseanna asa mardame jala pasidingkon parsalisian nang pe ndang mura mangulahon i. Umpamana, didok Jesus tu nasida asa burju, mardame dohot dongan na asing, unang mura tarrimas, hatop pasaehon parsalisian jala mangkaholongi musu.Mat. 5:5, 9, 22, 25, 44.

6, 7. (a) Boasa ringkot hatop pasaehon parsalisian? (b) Aha do sungkunsungkun na ringkot rimangan ni naposo ni Jahowa?

6 Tingki hita martangiang, marbarita na uli manang tingki marpungu, hita manomba Jahowa. Ndang lomo roha ni Jahowa molo ndang mardame hita dohot donganta. (Mrk. 11:25) Asa tongtong hita boi maraleale tu Jahowa, ingkon rade do hita manalpuhon hasalaan ni donganta.Jaha Lukas 11:4; Epesus 4:32.

Mura do hita manalpuhon sala ni donganta?

7 Dipangido Jahowa do sude naposoNa asa rade manalpuhon hasalaan ni dongan jala mardame tu sude jolma. Tasungkun ma dirinta, ’Boi do hatop husalpuhon sala ni donganku? Las do rohangku rap dohot nasida?’ Molo adong sipadengganonta taringot on, martangiang ma hita mangido pangurupion laho mangulahon i. Ditangihon Jahowa do tangiang ni naposoNa na serep roha jala alusanNa do tangiang ni nasida.1 Joh. 5:14, 15.

OLO DO HAMU MANALPUHON HASALAAN NI DONGAN?

8, 9. Aha do bahenonta tingki hansit rohanta dibahen sasahalak?

8 Ala sude hita mardosa, olo do ulaon manang pangkataion ni dongan mambahen hansit rohanta. (Pjm. 7:20; Mat. 18:7) Songon dia do molo masa i tu hita? Tadapot ma parsiajaran na ringkot sian pengalaman on: Adong ma sahalak donganta borua manjangkon dua halak donganta baoa di sada ulaon.  Sahalak sian donganta baoa i, hansit rohana tu cara ni donganta borua i manjangkon nasida. Dung ditadingkon nasida donganta borua i, dipaboa ibana ma na hansit rohana mangida donganta borua i. Alai, donganta baoa na sada nai mandok, molo donganta borua on, nunga 40 taon marsihohot manomba Jahowa nang pe manaon godang hasusaan. Didok ibana muse, ndang na adong di pingkiran ni donganta borua i laho mambahen hansit rohana. Songon dia do didok donganta baoa na marhansit ni roha i? Ibana mandok, ”Tutu do na didokmi.” Dung i, marsitutu ma ibana manalpuhon hansit ni rohana i.

9 Aha do na taparsiajari sian on? Hita do na manontuhon songon dia bahenonta tingki hansit rohanta dibahen sasahalak. Alai sahalak parholong, rade do manalpuhon hasalaan. (Jaha Poda 10:12; 1 Petrus 4:8.) Molo tahalupahon hasalaan ni dongan, uli do i di jolo ni Jahowa. (Poda 19:11; Pjm. 7:9) Alani i, molo adong sasahalak mandok manang mangulahon na mambahen hansit rohanta, tasungkun ma dirinta, ’Salpuhononku do hasalaanna i? Simpanonku do i di rohangku?’

10. (a) Songon dia do pangkilalaan ni donganta borua ala adong mandok na humurang taringot ibana? (b) Aha do na mangurupi ibana asa tongtong dame pangkilalaanna?

10 Olo do maol manalpuhon hata ni sasahalak na mandok na humurang taringot hita. Pingkirhon ma na masa tu sahalak perintis na margoar si Lucy. Di huria, adong na sungkunsungkun tu pangkobasion ni si Lucy dohot cara ni ibana mamangke tingkina. Hansit ma roha ni si Lucy alani i. Dipangido ibana ma pangurupion sian dongan naung matoras di partondion. Aha do labana? Didok si Lucy ma, marhite Bibel do donganta i mangurupi ibana asa unang sai dipingkiri hata na humurang i, jala didok tu ibana rumingkot do mamingkirhon Jahowa. Dipatogu do rohana tingki manjaha Mateus 6:1-4. (Jaha.) Ayat on, mangurupi ibana mangingot na rumingkot, i ma mambahen las roha ni Jahowa. Alani i, ndang dipaingotingot be hata na humurang i. Dung i, nang pe adong na mangkatahon na humurang taringot ibana, ndang hansit be rohana. Ala diboto, nunga na dumenggan dibahen ibana tu Jahowa.

TINGKI NDANG BOI TASALPUHON HASALAAN NI DONGANTA

11, 12. (a) Songon dia do bahenon ni halak Kristen molo adong dongan na mambahen hansit rohana? (b) Aha do na taparsiajari sian si Abraham tingki pasaehon parsalisian? (Ida gombar di mula ni parsiajaran.)

11 ”Ai saluhut hita jotjot marsala.” (Jak. 3:2) Molo adong hata manang ulaonta na mambahen hansit roha ni donganta, aha do na ingkon taulahon? Jesus mandok, ”Molo diboan ho sipelehononmu tu langgatan, dung i tarsingot roham disi di sogo ni roha ni donganmu dompak ho, tadingkon ma  sipelehononmi di jolo ni langgatan i; laho ma ho jolo mardenggan dohot donganmi; dung pe i, asa ro ho pasahathon sipelehononmi!” (Mat. 5:23, 24) Togihon hamu ma donganta i mangkatai laho mardame dohot ibana. Dung ditogihon hamu, paboa ma salamuna jala unang lului sala ni ibana. Mardame dohot donganta, i do na rumingkot di hita.

Togihon hamu ma donganta i mangkatai laho mardame dohot ibana

12 Dipatuduhon do di Bibel, na boi do tongtong naposo ni Debata mardame nang pe sipata ndang sapandapot dohot dongannasida. Umpamana, tubu ma parbadaan di tongatonga ni parmahan ni si Abraham dohot si Lot ala ndang sae be inganan parmahanan tu pinahan ni nasida. Ala lomo roha ni si Abraham nasida mardame, parjolo do disuru ibana si Lot mamillit ingananna. (1 Mus. 13:1, 2, 5-9) Gabe pogos do si Abraham? Ndang. Gariada, marjanji do Jahowa laho mangalehon godang pasupasuNa tu si Abraham. (1 Mus. 13:14-17) Aha do na boi taparsiajari? Nang pe rugi hita, alai lehonon ni Jahowa do pasupasuNa molo rade hita pasaehon parsalisian marhite holong. [1]—Ida catatan.

13. Songon dia do pangkilalaan ni sahalak ketua kebaktian mambege hata na posi sian donganta, jala aha do na taparsiajari sian pengalaman i?

13 Pingkirhon ma tudosan na masa saonari. Ditelepon ketua kebaktian ma sahalak donganta. Ditogihon laho mangurupi ibana tu ulaon di kebaktian. Alai, ala jut dope roha ni donganta on mangida ketua kebaktian na parjolo, ndang denggan dialusi ibana jala pintor dipamate ma teleponna. Ndang pola hansit roha ni ketua kebaktian i, alai ndang dipasombu ibana parsoalan i. Dung sajom, ditelepon ma muse asa boi pajumpang dohot donganta i. Saminggu nai, jumpang ma nasida di Bale Harajaon. Dung martangiang, dipatorang donganta i ma boasa hansit rohana. Ditangihon ketua kebaktian on ma donganta i mangkatai, jala diurupi ibana marhite ayat. Ujungna, dame ma dihilala nasida jala rap karejo nasida di kebaktian i. Las roha ni donganta i, ala burju ketua kebaktian i mangkatai tu ibana.

TOGIHONONMUNA DO SINTUA?

14, 15. (a) Tingki andigan do boi tapangke poda na disurat di Mateus 18:15-17? (b) Aha do tolu cara na dipaboa Jesus laho mardame, jala aha do na tatuju mamangke angka cara i?

14 Adong do parsalisian na boi dipasae holan dua halak. Alai sipata, olo do ingkon tapangido pangurupion sian na asing. Songon na dipaboa di Mateus 18:15-17. (Jaha.) Hata ”dosa” na nidok ni Jesus dison, ndang parsoalan na gelleng. Sian dia taboto? Didok Jesus, molo ndang muba ibana dung tapaboa salana jala nunga adong na mangkatindangkon dohot nunga dipasahat tu sintua, ”etong ma ibana songon parbegu jala sijalobeo”. Lapatanna, dos ma ibana songon halak na dipabali sian huria. Hata dosa dison, i ma manipu manang paroaroahon. Alai, ndang dos on tu dosa songon parmainanon, homoseksual, pargapgap manang manomba ganaganaan. Dosa songon i, angka sintua do na ingkon pasaehon.

Olo do ra porlu hita mangkatai pigapiga hali dohot donganta i laho mardame (Ida paragraf 15)

15 Poda na nidok ni Jesus dison, mangajari hita laho mangurupi donganta  marhite holong. (Mat. 18:12-14) Songon dia do mangihuthon poda on? (1) Mardame ma hita tu donganta ndang pola ingkon mangido pangurupion sian dongan na asing. Olo do ra porlu hita mangkatai pigapiga hali dohot ibana. Alai, songon dia do bahenonta molo tongtong dope ndang boi mardame? (2) Tatogihon ma donganta na asing na mangida manang na mamboto parsoalan i. Molo boi do sae parsoalan i, dapot hita ma ibana gabe donganta muse. Alai, molo nunga mangkatai manang na pigapiga hali dohot ibana, ndang boi dope mardame, (3) tatogihon ma sintua.

16. Boasa denggan molo taihuthon poda ni Jesus laho pasaehon parsoalan?

16 Jotjot do ndang pola ingkon tapangke sude cara na dipaboa di Mateus 18:15-17. Boasa songon i? Alana, jotjot do na mangulahon dosa i manopoti salana jala olo ibana muba. Alani i, ndang pola ingkon dipabali ibana. Rade ma na marhansit ni roha i manalpuhon hasalaan ni donganna asa mardame nasida. Alani i, songon poda ni Jesus, ndang ingkon tatogihon sintua laho pasaehon parsoalan i. Alai, molo ndang boi dope mardame nang pe nunga tapangke cara na parjolo dohot cara na paduahon, tapasahat ma parsoalan i tu sintua.

17. Aha do pasupasu na tadapot molo marsitutu mambahen hadameon?

17 Ala mardosa dope hita, olo do ulaon manang pangkataionta mambahen hansit roha ni donganta. Si Jakobus mandok, ”Molo adong na so sala di hata, i ma halak na rimpas, na tarbahen mangarantei saluhut dagingna.” (Jak. 3:2) Laho pasaehon parsoalan, talului ma pardamean jala marsitutu ma hita mangulahon i. (Ps. 34:15) Molo tongtong hita marsitutu asa dame dohot angka donganta, denggan ma paralealeonta tu nasida jala on mangurupi hita asa marsada. (Ps. 133:1-3) Na rumingkot, denggan ma muse paralealeonta tu Jahowa ”Debata Pardame i”. (Rom 15:33) Boi ma tahilala hadameon molo tapasae do parsalisian marhite holong.

^ [1] (paragraf 12) Halak na asing muse na pasaehon parsalisian, i ma si Jakkob tu si Esau (1 Mus. 27:41-45; 33:1-11); si Josep dohot hahaanggina (1 Mus. 45:1-15); si Gidion tu halak Epraim (Pangh. 8:1-3). Ra, boi do tapingkirhon tudosan na sarupa di Bibel.