Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  April 2016

Roha na Marsihohot Mambahen Hita Dihalomohon Debata

Roha na Marsihohot Mambahen Hita Dihalomohon Debata

”Tiru hamu ma angka sitean bagabaga i, marhitehite haporseaon dohot lambas ni roha!”—HEB. 6:12.

ENDE: 3, 54

1, 2. Aha do na masa na ingkon diadopi si Jepta dohot boruna?

SAHALAK borua marlojong mandapothon bapakna. Las situtu rohana ala naung mulak bapakna sian parporangan jala monang. Alani i, marende ma ibana huhut manortor marlas ni roha. Alai, marsak do si Jepta mangida boruna i. Diribak ibana ma abitna huhut tangis, didok ma, ”Oe, borungku! Diseat ho ma ateatengku.” Dipaboa si Jepta tu boruna nunga marjanji ibana tu Jahowa na mangkorhon tu ngolu ni boruna. Janji ni si Jepta on mambahen boruna ndang boi marhasohotan dohot marianakhon. Alai, dipatogu boruna i do roha ni si Jepta asa dipasaut janjina tu Jahowa. Alus ni boruna on, patuduhon na porsea situtu do ibana tu Jahowa, jala na pinangido ni Jahowa sian ibana mambahen denggan. (Pangh. 11:34-37, Bibel siganup ari) Tingki diida si Jepta haporseaon ni boruna, las situtu ma rohana ala rade do boruna pasonangkon roha ni Jahowa.

 2 Porsea situtu do si Jepta dohot boruna tu Jahowa. Marsihohot do nasida tu Jahowa nang pe ndang mura mangulahon na pinangidoNa. Diulahon do na pinangido ni Jahowa ala las rohanasida pasonangkon rohaNa.

3. Songon dia do sitiruon sian si Jepta dohot boruna marlaba tu hita?

3 Sipata, ndang sai mura marsihohot tu Jahowa. Alani i, porlu hita ”marungkil humongkop haporseaon”. (Jud. 3) Taparsiajari ma sitiruon sian si Jepta dohot boruna na boi mangadopi na masa di ngolu ni nasida. Songon dia do nasida boi tongtong marsihohot tu Jahowa?

TONGTONG MARHAPORSEAON DI PORTIBI NA JAHAT ON

4, 5. (a) Aha do parenta na dilehon Jahowa tu halak Israel tingki bongot nasida tu tano parjanjian? (b) Songon na dipaboa di Psalmen 106, aha do na masa tu halak Israel ala ndang dioloi nasida Jahowa?

4 Ganup ari, diida si Jepta dohot boruna do hasusaan na masa tu halak Israel ala ndang marsihohot tu Jahowa. Hirahira 300 taon andorang so masa i, nunga diparentahon Jahowa hian asa diripashon nasida sude halak na marsomba tu ganaganaan, alai ndang diulahon nasida songon i. (5 Mus. 7:1-4) Gariada, gabe godang do halak Israel mangihuthon halak Kanaan manomba debata na so sintong jala mangulahon parmainanon.—Jaha Psalmen 106:34-39.

5 Ala ndang dioloi parenta ni Jahowa, ndang diondingi be bangso Israel sian angka musu. (Pangh. 2:1-3, 11-15; Ps. 106:40-43) Jala, angka keluarga na mangkaholongi Jahowa di tingki i, maol do dihilala nasida asa tongtong marsihohot tu Jahowa. Alai, dipaboa di Bibel adong do na marsihohot tu Jahowa, songon si Jepta dohot boruna, si Elkana, si Hanna dohot si Samuel. Dibahen nasida do las roha ni Jahowa.—1 Sam. 1:20-28; 2:26.

6. Parange aha do na dipatuduhon portibi on saonari, jala aha do na ingkon taulahon?

6 Di tingkinta saonari, dos do parange dohot pangalaho ni jolma songon halak na di Kanaan. Parmainanon, hajahaton dohot hepeng do na dipingkiri nasida. Alai, dilehon Jahowa do tu hita sipasingot. Lomo rohaNa mangondingi hita dos songon tingki Ibana mangondingi bangso Israel sian angka hajahaton. Aha do parsiajaranna tu hita? (1 Kor. 10:6-11) Ingkon marsitutu do hita laho pasidingkon roha dohot parange ni portibi on. (Rom 12:2) Olo do hita marsitutu mangulahon i?

TONGTONG DO MARHAPORSEAON SI JEPTA NANG PE MARMETMET NI ROHA

7. (a) Songon dia do pambahenan ni angka hahaanggina tu si Jepta? (b) Songon dia do si Jepta mangadopi i?

7 Di tingki ni si Jepta, ditaluhon halak Palistim dohot halak Amon do halak Israel ala ndang mangoloi tu Jahowa. (Pangh. 10: 7, 8) Asing ni musu na lam martambatamba, susa do si Jepta dibahen angka hahaanggina dohot pemimpin ni Israel. Disuru nasida ma si Jepta laho sian huta i, asa unang dohot gabe sipanean di arta ni natuatuana.  (Pangh. 11:1-3) Ndang olo si Jepta mambaloshon hajahaton nang pe dibahen nasida na so denggan tu ibana. Sian dia i taboto? Tingki mangido pangurupion sintua ni bangso i tu si Jepta, diurupi ibana do nasida. (Pangh. 11:4-11) Aha do na mangonjar roha ni si Jepta mangulahon i?

8, 9. (a) Prinsip na dia do sian patik ni si Musa na mangurupi si Jepta? (b) Aha do na rumingkot di si Jepta?

8 Sahalak panglima na barani do si Jepta, jala tangkas do diboto ibana taringot halak Israel dohot Patik ni si Musa. Alani i, diparsiajari si Jepta do aha na dihalomohon dohot na so dihalomohon Debata. (Pangh. 11:12-27) Dipangke si Jepta do parbinotoanna laho manontuhon na dumenggan. Diboto ibana do songon dia pangkilalaan ni Jahowa tu halak na tarrimas, jala na so olo manalpuhon hasalaan ni donganna. Diboto ibana do muse, lomo roha ni Jahowa angka naposoNa masihaholongan. Marhite Patik, diajari do si Jepta songon dia maradophon donganna, nang pe sogo roha ni nasida tu ibana.—Jaha 2 Musa 23:5; 3 Musa 19:17, 18.

9 Ditiru si Jepta do si Josep na marasi ni roha tu hahaanggina. (1 Mus. 37:4; 45:4, 5) Marhite sitiruon on, diurupi do si Jepta songon dia laho pasonangkon roha ni Jahowa. Sude na binahen ni hahaanggina tu si Jepta mambahen ibana marmetmet ni roha. Alai, rumingkot do di si Jepta pabadiahon goar ni Jahowa, jala pasonangkon roha ni naposoNa sian pasonangkon rohana sandiri. (Pangh. 11:9) Dipillit ibana do marsihohot tu Jahowa. Parniulaon ni si Jepta on, parohon pasupasu do tu ibana dohot tu bangso Israel.—Heb. 11:32, 33.

Unang ma taloas hansit ni roha mambahen hita ndang manomba Jahowa

10. Aha do na taparsiajari sian si Jepta molo adong na mambahen hansit rohanta?

10 Aha do na boi taparsiajari sian si Jepta? Aha do na taulahon molo adong dongan sahaporseaonta mambahen hansit manang metmet rohanta? Unang ma taloas hansit ni roha mambahen hita ndang manomba Jahowa. Tongtong ma ro tu parpunguan jala marsaor dohot dongan di huria. Tatiru ma si Jepta jala taoloi Jahowa. On boi mangurupi hita tingki adong situasi na borat di ngolunta, jala boi hita gabe sitiruon na denggan di dongan na asing.—Rom 12:20, 21; Kol. 3:13.

RADE MANGALEHON DIRI PATUDUHON HITA MARHAPORSEAON

11, 12. Aha do janji ni si Jepta tu Jahowa, jala aha do lapatan ni i?

11 Diboto si Jepta do porlu pangurupion ni Debata paluahon halak Israel sian halak Amon. Marjanji si Jepta tu Jahowa molo monang ibana, lehononna ma ise na parjolo ruar sian jabuna manomu ibana gabe ”pelean  situtungon”. (Pangh. 11:30, 31) Aha do lapatan ni on?

12 Ndang jolma na laho tutungon ni si Jepta gabe pelean. Diboto ibana do, ndang dihalomohon Jahowa jolma ditutung laho pelean. (5 Mus. 18:9, 10) Alai, songon na dipaboa di Patik ni si Musa, pelean situtungon, i ma silehonlehon na ummarga tu Jahowa. Alani i, pelean dison lapatanna, laho marhobas di tabernakel saleleng ni ngoluna. Ditangihon Jahowa do tangiang ni si Jepta, jala diurupi do ibana asa monang di parporangan. (Pangh. 11:32, 33) Alai, ise do laho lehonon ni si Jepta tu Jahowa?

13, 14. Aha do na diulahon si Jepta na patuduhon haporseaonna songon na disurat di Panguhum 11:35?

13 Taingot ma muse aha na dipaboa di mula ni artikel on. Dung mulak si Jepta sian parporangan, na parjolo ruar manomunomu ibana, i ma boru haholonganna jala holan i do ianakhonna. Marsihohot do si Jepta tu janjina i? Lehononna do boruna marhobas di tabernakel saleleng ni ngoluna?

14 Angka prinsip na adong di Patik ni Debata mangurupi si Jepta mamillit na dumenggan. Diingot ibana do ra ayat na disurat di 2 Musa 23:19, disi dijujui do angka naposo ni Debata asa mangalehon na dumenggan tu Jahowa. Di Patik i didok, tingki sasahalak mambahen parjanjian tu Jahowa, ”na so tupa ubaonna hatana, ingkon hombar tu saluhut na ruar sian pamanganna bahenonna”. (4 Mus. 30:3) Songon na hea diulahon si Hanna, digohi si Jepta do janjina nang pe diboto pangkorhonna tu ibana. Ndang marhasohotan be boruna jala ndang marianakhon. Alani i, ndang pinomparna be na manean arta ni si Jepta.  (Pangh. 11:34) Alai, didok si Jepta, ”Ai nunga tangkas hubahen sada janji tu Jahowa, jala na so tarose ahu!” (Pangh. 11:35, Bibel siganup ari) Dijalo Jahowa do pelean ni si Jepta jala dipasupasu do ibana. Boi do hamu tongtong marsihohot songon si Jepta?

15. Aha do janji na tabahen tu Jahowa, jala songon dia do hita marsihohot tu janji i?

15 Tingki talehon dirinta tu Jahowa, marjanji do hita mangulahon sude na dihalomohon ni Ibana. Sipata, ndang sai mura manggohi janjinta. Songon dia do molo disuru hita mangulahon ulaon na so pola tahalomohon? Molo rade do hita mangoloi Debata, on patuduhon na marsihohot do hita tu janjinta. Sipata, maol do tahilala mangulahon sude lomo ni roha ni Jahowa, alai molo taulahon i, pasupasuon ni Jahowa do hita. (Mal. 3:10) Saonari, songon dia do taringot boru ni si Jepta? Songon dia do dibahen ibana tu janji ni bapakna?

Songon dia do hita boi maniru haporseaon ni si Jepta dohot boruna? (Ida paragraf 16, 17)

16. Songon dia do boru ni si Jepta mangulahon janji ni bapakna? (Ida gombar di mula ni parsiajaran.)

16 Ndang sarupa janji na binahen ni si Jepta dohot si Hanna. Si Hanna marjanji mangalehon anakna si Samuel asa marhobas di tabernakel gabe sahalak Nasir. (1 Sam. 1:11) Sahalak Nasir, boi do marhasohotan jala marianakhon. Alai, boru ni si Jepta dilehon gabe ”pelean situtungon”, alani i ndang boi ibana marhasohotan manang marianakhon. (Pangh. 11:37-40) Pingkirhon ma on! Boi do boru ni si Jepta marhasohotan tu sahalak baoa na burju, ala bapakna do pemimpin ni Israel di tingki i. Alai, ingkon gabe parhobas nama ibana di tabernakel. Olo do ibana mangulahon i? Didok ibana tu bapakna, ”Bahen ma tu ahu marguru tu hata na ruar sian pamanganmu.” (Pangh. 11:36) Rumingkotan do di boru ni si Jepta manomba Jahowa sian na marhasohotan dohot marianakhon. Songon dia do hita boi maniru haradeon ni boru ni si Jepta?

Rumingkotan do di boru ni si Jepta manomba Jahowa sian na marhasohotan dohot marianakhon

17. (a) Songon dia do hita boi maniru haporseaon ni si Jepta dohot boruna? (b) Songon dia do hata di Heber 6:10-12 mangonjar rohanta asa rade mangalehon godang tingki marhobas tu Jahowa?

 17 Saonari, marribu do angka na poso na rade ndang marhasohotan manang ndang marianakhon. Boasa? Alana, nasida naeng marsitutu manomba Jahowa. Asing ni i, godang do angka naung matua rade mangalehon tingki dohot gogona tu Jahowa sian na mangalehon tingki tu ianakhon manang pahompuna. Godang do sian nasida na gabe parsidohot tu ulaon konstruksi manang dohot tu Singkola tu Parbaritaon Harajaon. Manang pinda tu huria na mangkaporluhon godang penyiar. Na asing, mangalehon gumodang tingkina saleleng di bulan Parningotan hamamate ni Jesus. Ndang dihalupahon Jahowa holong ni sude halak na marsihohot tu Ibana. (Jaha Heber 6:10-12.) Songon dia do hamu? Olo do hamu mangalehon gumodang tingkimu marhobas tu Jahowa?

AHA DO NA BOI TAPARSIAJARI?

18, 19. Aha do na taparsiajari sian si Jepta dohot boruna, jala songon dia hita maniru nasida?

18 Aha do na boi mangurupi si Jepta tingki adong situasi na maol? Dipangke ibana do tudutudu sian Jahowa laho mamillit na denggan di ngoluna. Ndang tarelaela si Jepta tu halak na di humaliangna. Tongtong do ibana marsihohot nang pe adong na mambahen ibana marmetmet ni roha. Dipasupasu Jahowa do ibana dohot boruna ala rade mangalehon pelean tu Jahowa, dipatuduhon nasida cara na sintong laho manomba Jahowa. Nang pe halak na asing ndang mangulahon na sintong, alai si Jepta dohot boruna tongtong do marsihohot tu Jahowa.

19 Bibel mandok, ”Tiru hamu ma angka sitean bagabaga i, marhitehite haporseaon dohot lambas ni roha!” (Heb. 6:12) Tatiru ma si Jepta dohot boruna, taingot ma molo tongtong hita marsihohot tu Jahowa, pasupasuonNa do hita.