Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  April 2016

 Kisah Hidup

Mantan Biarawati Gabe Mananda Hasintongan

Mantan Biarawati Gabe Mananda Hasintongan

PIGAPIGA taon naung salpu, mansai muruk do anggingku si Araceli tu ahu. Ibana mandok, ”Unang mangkatai be ho tu ahu. Ndang lomo rohangku manangihon agamami. Ndang lomo rohangku. Sogo hian rohangku tu ho!” Hansit hian rohangku alani hatana i. Nang pe naung marumur 91 taon ahu, tangkas dope huingot hatana i. Alai, songon na didok di Parjamita 7:8, Bibel siganup ari mandok, ”Dumenggan do ujung ni sada pangalaho sian parmulaanna.”—Si Felisa.

Si Felisa: Dipagodanggodang di Spanyol do ahu jala pogos do keluarganami. Agama Katolik do keluargangku jala ringgas tu gareja. Adong do 13 halak sian keluargangku na gabe pastor manang karejo di gareja. Tulangku sahalak pastor jala guru di sada singkola Katolik. Dung mate ibana, dilehon Paus Johannes Paulus II ma gelar kehormatan tu ibana. Bapakku sahalak tungkang bosi jala omakku karejo di ladang. Hami na marhahamaranggi adong ualu halak jala ahu ma siangkangan.

Tingki marumur 12 taon, masa ma porang sipil di Spanyol. Dung porang i, dipenjara ma bapakku ala maralo pandapotna tu pamarenta taringot politik. On mambahen omakku susa mangalului sipanganonnami. Alani i, dibahen ma tolu anggingku, si Araceli, si Lauri dohot si Ramoni, tading dohot biarawati di biara na adong di kota Bilbao, asa boi nasida mandapot sipanganon.

Si Araceli: Tingki i, sihol hian do rohanami tu keluarga, alana ahu marumur 14 taon, si Lauri 12 taon jala si Ramoni 10 taon dope. Jala, karejonami paiashon biara. Dua taon dung i, dibahen ma hami karejo di biara na umbalga di Zaragoza, na mangurus angka na matua. Loja hian do hami disi ala disuru karejo paiashon dapur.

Si Felisa: Tingki angka anggingku tading di biara, di Zaragoza, omak dohot tulangku na gabe pastor, manuru ahu asa dohot tu biara i. Lomo rohanasida asa dao ahu sian sahalak baoa na marlomo ni roha tu ahu. Las do rohangku karejo di biara, ala huhaholongi do Debata. Tu gareja do ahu ganup ari jala marsangkap do ahu gabe missionaris ni Katolik, songon anak ni tulangku di Afrika.

Spanyol (kiri) Bibel terjemahan Nácar-Colunga (kanan)

Di biara, godang do na so boi huulahon jala ndang diurupi biarawati na di biara i ahu asa boi gabe missionaris di luar negeri. Sataon dungkon i,  mulak ma ahu jala tading rap dohot tulangku. Karejo do ahu di jabuna jala rap do hami martangiang Rosario ganup borngin. Lomo do rohangku mangatur bunga di gareja, paiashon abit ni patung ni si Maria dohot angka ”santo”.

Si Araceli: Tingki ahu di Zaragoza, parsidohot do ahu mandok sumpah na parjolo (kaul sementara) asa gabe sahalak biarawati. Dung i, pulik ma ingananku dibahen sian angka anggingku. Dibahen ma ahu tu biara di Madrid, si Lauri tu Valencia jala si Ramoni tading di Zaragoza. Di Madrid, parsidohot do ahu mandok sumpah na paduahon (kaul kekal) asa gabe sahalak biarawati. Godang do halak na tading di biara i, songon angka parsingkola dohot halak na matua. Alani i, godang do karejo disi. Molo ahu karejo di rumah sakit biara.

Las do rohangku gabe sahalak biarawati. Ala ninna rohangku, gumodang nama tingkingku laho manjaha dohot marsiajar Bibel. Alai, marsak do ahu, ala ndang adong nanggo sahalak pe na mamangke Bibel manang mangkatai taringot Debata dohot Jesus disi. Nang pe huparsiajari pigapiga bahasa Latin, parngoluon ni angka ”santo” dohot ulaon ni si Maria, alai gumodang do tingkingku mangulahon na asing.

Holsoan jala marsak ma rohangku. Huhilala, tumagon ma ahu mangalului hepeng asa boi mangurupi keluargangku sian karejo di biara, na mambahen halak na asing mamora. Alani i, hupaboa ma tu suster kepala taringot on, jala hupangido asa diloas ahu manadingkon biara. Dihurung ma ahu di sel ni biara asa unang hutadingkon biara i. 

Angka biarawati na asing paloashon ahu kaluar sian sel i. Alai, dihurung ma ahu muse tingki diboto nasida na so olo tading ahu di biara. Dung tolu hali dibahen nasida songon i, diloas ma ahu manadingkon biara, alai ingkon manurathon hata on, ”Ahu manadingkon biara, ala ahu naeng manomba Sibolis, ndang Debata.” Songgot ma rohangku. Nang pe naeng kaluar ahu sian biara, alai ndang lomo rohangku manurathon hata i. Ujungna, hupaboa ma aha na masa tu sahalak pastor. Dapot ni ibana ma ijin sian uskup jala dibahen ma ahu tu biara di Zaragoza muse. Dung pigapiga bulan, diloas ma ahu manadingkon biara i. Ndang leleng dungkon i, si Lauri dohot si Ramoni, dohot do manadingkon biara i.

BUKU NA MAMBAHEN HAMI NDANG SAROHA

Si Felisa

Si Felisa: Pigapiga taon dungkon i, marhamulian ma ahu jala tading di kota Cantabria, di Spanyol. Ringgas do ahu tu gareja. Di sada tingki di ari Minggu, muruk situtu ma pastor. Didok ibana, ”Ida hamu buku on!” Dipatudu ibana ma buku  Kebenaran yang Membimbing kepada Kehidupan yang Kekal. Ibana mandok, ”Molo adong na mangalehon buku on tu hamu, lehon tu ahu manang bolongkon!”

Ndang adong buku on di ahu, alai lomo rohangku asa adong di ahu. Pigapiga ari dungkon i, dua halak borua ro tu jabungku. Nasida, i ma Sitindangi Ni Jahowa. Dilehon nasida ma buku i tu ahu jala hujaha bornginna i. Tingki ro nasida manjumpangi ahu muse, disungkun ma olo do ahu marsiajar Bibel jala hualusi ma na olo do ahu.

Buku Kebenaran

Sai naeng huulahon do lomo ni roha ni Debata. Dung huparsiajari hasintongan taringot Jahowa, lam huhaholongi ma Ibana. Naeng hupaboa do tu sude halak taringot Debata. Taon 1973, tardidi ma ahu. Ganup adong tingki, sai marsitutu do ahu pasahathon hasintongan tu keluargangku. Alai, ndang lomo roha ni nasida, tarlumobi si Araceli mandok, sala do haporseaonki.

Si Araceli: Marsak jala jut situtu do rohangku tu agamaku, ala lomolomona do dibahen tu ahu di biara. Nang pe songon i, sai ringgas do ahu tu gareja ganup minggu jala martangiang Rosario ganup ari. Lomo do rohangku naeng mangantusi isi ni Bibel jala sai hupangido pangurupion sian Debata. Dung i, dipaboa si Felisa ma aha na diparsiajari ibana. Las hian do huida rohana taringot haporseaonna i. Alai, huhilala na rintik do ibana. Ndang sapandapot ahu tu aha na didok ibana.

Si Araceli

Dung i, mulak ma ahu tu Madrid. Karejo jala marhamulian ma ahu disi. Dung pigapiga taon, huida ma molo halak na ringgas laho tu gareja i sasintongna ndang mangulahon ajaran ni Jesus. Gabe ndang laho be ahu tu gareja. Ndang porsea be ahu tu ajaran ni angka santo manang api na roko. Jala, huhilala ndang boi sahalak pastor manesa dosa. Hubolongkon ma sude patung manang gombar taringot agamaku. Alai, ndang huboto molo na huulahon on sintong manang ndang. Marsak do ahu jala sai tongtong do hudok di tangiangku, ”Lomo do rohangku mananda Ho. Urupi ma ahu!” Huingot do nunga pigapiga hali Sitindangi Ni Jahowa manuktuk jabungku, alai ndang hea hubungka. Ndang porsea be ahu tu angka agama.

 Anggingku si Lauri tading di Prancis, jala si Ramoni tading di Spanyol. Hirahira taon 1980, marsiajar Bibel ma nasida dohot Sitindangi Ni Jahowa. Huhilala, nasida dos do songon si Felisa, ndang mangantusi molo na diparsiajarina i ajaran na sesat. Dung i, jumpang ma ahu dohot si Angelines, hombar ni jabungku. Ibana ma na gabe alealengku. Ibana sahalak Sitindangi Ni Jahowa. Jotjot do ditogihon si Angelines dohot tungganedolina ahu asa marsiajar Bibel dohot nasida. Diboto nasida do, nang pe hudok ndang lomo rohangku tu agama, alai sasintongna lomo do rohangku mamboto isi ni Bibel. Ujungna, hudok ma tu nasida, ”Olo do ahu marsiajar Bibel dohot hamu, alai ingkon Bibelhu sandiri do na hupangke.” Adong do Bibelhu terjemahan Nácar-Colunga.

BIBEL DO NA PASADAHON HAMI

Si Felisa: Tingki tardidi ahu taon 1973, nunga adong hirahira 70 Sitindangi di kota Santander, ibukota ni Cantabria. Marbarita hami tu luat na dao laho manjumpangi jolma di marratus huta na adong di provinsi i. Laho do hami sian huta tu huta mamangke bus dohot mobil.

Dung pigapiga taon, nunga marsiajar Bibel ahu dohot godang halak. Jala, 11 halak sian nasida nunga tardidi. Godang sian na marsiajar Bibel i halak Katolik. Porlu do ahu sabar tu nasida. Songon ahu najolo, porlu do tingki asa diboto nasida na so sintong haporseaonna i. Holan Bibel dohot tondi parbadia do na boi mangurupi pingkiran ni sasahalak muba jala mangantusi hasintongan. (Heb. 4:12) Sahalak polisi do tungganedolingku si Bienvenido, alai ibana nunga tardidi taon 1979. Jala omakku pe, nunga leleng marsiajar Bibel andorang so marujung ngolu ibana.

Si Araceli: Mulana, tingki ahu marsiajar Bibel dohot Sitindangi Ni Jahowa, ndang pintor porsea ahu tu nasida. Alai lam leleng, muba do pingkiranku tu nasida. Sitindangi Ni Jahowa ndang holan mangajarhon isi ni Bibel, alai diulahon nasida do. Las ma rohangku ala lam togu haporseaonku tu Jahowa dohot tu HataNa. Pigapiga hombar jabungku mangida hamubaonku jala nasida mandok, ”Araceli, sai marsihohot ma ho tu naung diulahonmu nuaeng!”

Hudok do tingki martangiang ahu, ”Mauliate ma Jahowa, ndang marnaloja Ho tu ahu jala dilehon Ho do godang tingki asa boi hutanda hasintongan taringot Ho sian Bibel.” Hudok do tu si Felisa asa disalpuhon ibana sian rohana hatangki. Sian i, las do rohanami mangkatai taringot Bibel. Taon 1989, tingki ahu marumur 61 taon, tardidi ma ahu.

Si Felisa: Saonari, ahu marumur 91 taon. Tungganedolingku nunga mate jala ndang godang be na boi huulahon. Alai, hujaha do Bibel ganup ari. Jala molo tolap, laho do ahu tu parpunguan dohot marbarita na uli.

Si Araceli: Ra, ala sahalak biarawati hian ahu, lomo do rohangku mangkatai taringot Jahowa tu sude pastor dohot biarawati na hujumpangi. Godang do buku dohot majalah na dijalo nasida jala adong do huingot pangkataion na denggan rap dohot nasida. Songon sahalak pastor, dung pigapiga hali hami mangkatai, tarjalo rohana ma na huhatai hami i. Ibana mandok, ”Nunga matua ahu, aha ma dohonon ni ruas dohot keluargangku annon?” Dung i, hualusi ma, ”Antong, aha ma dohonon ni Debata?” Diboto ibana do, sintong do na hudok i jala huida marsak do ibana. Alai huida, ndang adong habaranionna laho mambahen hamubaon.

Ndang tarlupahon ahu hata ni tungganedolingku tingki didok ibana na lomo rohana ro tu parpunguan rap dohot ahu. Tingki parjolo sahali ro tu parpunguan, nunga marumur lobi 80 taon ibana. Dungkon i, ringgas ma ibana ro tu parpunguan. Marsiajar Bibel ma ibana jala marbarita na uli. Godang do pengalaman na boi huingot tingki rap marbarita na uli dohot ibana. Alai, andorang so tardidi, nunga marujung ngolu ibana.

Si Felisa: Tingki mulai marsiajar Bibel, tolu anggingku mangambati ahu. Alai ujungna, mananda hasintongan do nasida. On ma sada silehonlehon na dumenggan na hea masa di ngolungku. Dungkon i, marlas ni roha jala godang ma tingkinami laho mangkatai taringot Debata Jahowa dohot HataNa! Ujungna, hami sude manomba Jahowa. *

^ par. 29 Si Araceli marumur 87 taon, si Felisa marumur 91 taon jala si Ramoni marumur 83 taon. Marsihohot dope nasida nuaeng manomba Jahowa. Si Lauri nunga marujung ngolu taon 1990 jala marsihohot do ibana manomba Jahowa.