Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  April 2016

Loas ma Habengeton i Lam Margogo Sampe So Boi Talu

Loas ma Habengeton i Lam Margogo Sampe So Boi Talu

”Alai ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang.”—JAK. 1:4.

ENDE: 24, 139

1, 2. (a) Aha do na taparsiajari sian habengeton ni si Gidion dohot 300 tentarana? (Ida gombar di mula ni parsiajaran.) (b) Songon na didok di Lukas 21:19, boasa ringkot habengeton i?

PINGKIRHON ma loja ni si Gidion dohot tentarana marporang mangalo halak Midian. Dialo jala dilele si Gidion do halak Midian dohot angka bangso na mandongani halak Midian saborngin manipat, daona hirahira 32 kilometer. Bibel muse paboahon, ”Dung sahat si Gidion tu Jordan, taripar ma ibana rap dohot na tolu ratus halak donganna i, angka na mandate, alai sai didatdati do mangeak.” Ala ndang sae dope parporangan i, ingkon taluhonon ni nasida dope 15.000 tentara ni Midian. Nunga martaontaon disusai halak Midian halak Israel, alani i ndang olo nasida talu. Alai, ditaluhon si Gidion dohot tentarana do halak Midian i!—Pangh. 7:22; 8:4, 10, 28.

2 Hita pe dohot do tu parporangan na mambahen hita loja. Hita marporang mangalo Sibolis, portibi na nirajaanna dohot hagaleonta. Adong do sian hita naung leleng mangalo musu on. Alai, pangurupion ni Jahowa mambahen hita  monang. Ndang sae dope parporanganta. Sipata, olo do ndang margogo tahilala. Manang, loja paimahon ujung ni portibi na jahat on. Nunga dipaboa Jesus hian, godang pangunjunan dohot hasusaan na ro tu hita saleleng ari parpudi. Alai, molo marhabengeton hita, boi do hita monang. (Jaha Lukas 21:19.) Aha do habengeton i? Aha do na boi mangurupi hita marhabengeton? Aha do na boi taparsiajari sian halak na marhabengeton? Jala, songon dia hita lam margogo sampe so boi talu?—Jak. 1:4.

AHA DO HABENGETON I?

3. Aha do habengeton i?

3 Di Bibel, lapatan ni habengeton ndang holan sabar manaon hasusaan. Alai, na hombar muse tusi, i ma songon dia pangkilalaanta mangadopi hasusaan i. Habengeton mangurupi hita asa barani, marhaporseaon jala sabar. Sada buku referensi mandok, habengeton, i ma parange na boi mangurupi hita asa marpangkirimon na togu, jala boi denggan mangadopi tingki masa hasusaan. Dung i, mangurupi hita asa tongtong togu, nang pe mansai borat sitaononta. Unang ma holan hasusaan i na sai tapingkirhon, alai taingot ma pangkirimonta di ari na naeng ro.

4. Songon dia do holong mambahen hita marhabengeton?

4 Asa boi marhabengeton, ingkon adong do di hita holong. (Jaha 1 Korint 13:4, 7.) Holongta tu Jahowa mambahen hita marhabengeton manaon hasusaan na masa tu hita. (Luk. 22:41, 42) Holongta tu dongan sahaporseaon, mambahen hita marhabengeton tu hagaleon ni nasida. (1 Ptr. 4:8) Holongta tu dongan saripe, mambahen hita marhabengeton manaon hasusaan na jotjot masa di parsaripeon.—1 Kor. 7:28.

SONGON DIA DO ASA MARHABENGETON HITA?

5. Boasa Jahowa na dumenggan mangurupi hita marhabengeton?

5 Pangido hagogoon tu Jahowa. Jahowa, i ma ”Debata nampuna habengeton dohot pangapulon”. (Rom 15:5) Holan Ibana do na mananda hita jala mangantusi pangkilalaanta. Alani i, tangkas do diboto Ibana aha na tahaporluhon asa boi marhabengeton. Bibel mandok, ”Ibana mambahen lomo ni roha ni angka na mangkabiari Ibana, jala dibege do angguknasida i, jala dipalua do nasida.” (Ps. 145:19) Alai, songon dia do Debata boi mangalusi tangiangta asa marhabengeton?

Jahowa, i ma Debata na mangantusi hita, diboto do na ringkot di hita asa boi marhabengeton

6. Songon na didok di Bibel, songon dia do Jahowa ”mangalehon gogo” tu hita tingki masa hasusaan?

6 Tingki tapangido Jahowa mangurupi hita asa marhabengeton, marjanji do Ibana ”mangalehon gogo”. (Jaha Jesaya 40:29.) Songon dia Ibana mangulahon i? Sipata, boi do pintor disalpuhon Ibana hasusaan i. Alai, jotjotan gogo do na dilehon Ibana tu hita asa ”mangkorhon nasa habengeton dohot  lambas ni roha, mardongan las ni roha”. (Kol. 1:11) Diboto Ibana do taringot hita, pingkiran, pangkilalaan dohot gogonta, alani i ndang dipasombu Jahowa hita mangkilala hasusaan sian na so tolap ni gogonta.

7. Boasa tahaporluhon sipanganon partondion asa boi marhabengeton? Bahen ma tudosan.

7 Bahen ma sipanganon partondion patoguhon haporseaonta. Boasa ringkot sipanganon partondion? Umpamana, molo sasahalak laho manganangkoki Dolok Everest, dihaporluhon do 6.000 kalori. On nunga lobi sian na dihaporluhon sasahalak di bagasan sadari. Asa boi martahan jala sahat tu na tinujuna, halak na laho nangkok tu dolok i, ingkon godang do mangallang sipanganon na markalori. Hita pe, tahaporluhon sipanganon partondion asa boi marhabengeton jala boi sahat tu na tatuju di ari na naeng ro. Ingkon marsitutu do hita marsiajar Bibel jala ro tu parpunguan. Molo taulahon on, boi mangurupi hita asa tongtong togu di partondion.—Joh. 6:27.

8, 9. (a) Songon na disurat di Job 2:4, 5, aha dope na ingkon taingot tingki masa pangunjunan? (b) Molo hita marsitaonon, aha do na porlu taingot di pingkiranta?

8 Ingkon marsihohot tu Debata. Tingki masa pangunjunan, on ndang holan mambahen hita marsitaonon. Alai, haporseaonta tu Debata pe, tongtong do diuji. Alani i, songon dia na tabahen tingki mangadopi hasusaan, on patuduhon na taargai do manang na ndang Jahowa na gabe Parhuaso di hita. Songon dia i masa? Sibolis, i ma musu na mangalo pamarentaon ni Debata. Dileai ibana do Jahowa, didok ibana, ndang adong jolma na olo manomba Jahowa sian ias ni rohana. Sibolis mandok, ”Nasa na di ibana dilehon jolma i do i singkat ni hosana.” Didok Sibolis muse taringot si Job, ”Alai tung sura disurdukkon Ho tanganmu manjama holiholina dohot sibukna, manang so buraanna ma Ho di hapataron.” (Job 2:4, 5) Nunga muba sangkap ni Sibolis? Ndang! Martaontaon dung didabu sian surgo, diunjuni ibana dope naposo ni Debata. (Pgk. 12:10) Sahat tu saonari, didok Sibolis dope jolma mangoloi Debata ala mangkaringkothon dirina sandiri. Ndang lomo rohana hita manomba Debata.

9 Molo hita marsitaonon alani pangunjunan, taingot ma on di pingkiranta. Di sada inganan, Sibolis dohot angka surusuruanna mangida aha na laho taulahon tingki hita marsitaonon jala las rohana hita mandele. Di inganan na asing, adong Jahowa, dung i Jesus Kristus Raja na miniahan dohot marribu surusuruan. Diida nasida hita marungkil, alai diurupi nasida hita patoguhon rohanta! Las rohanasida mangida hita marhabengeton jala marsihohot tu Jahowa. Dung i, tabege muse Jahowa mandok tu hita, ”Marbisuk ma ho ale anaha, jala sai palas ma rohangku, asa huboto mangalusi hata ni halak pangarehe.”—Poda 27:11.

Pasupasu alani habengeton, i do na diingot Jesus

10. Songon dia do hita mangihuthon Jesus na mangingot pasupasu ala marhabengeton?

10 Taingot ma pasupasu ni Jahowa. Pingkirhon ma laho hita mardalani.  Di tonga dalan, ingkon bolusonta do terowongan. Golap do taida tingki di terowongan i. Alai taboto, molo tongtong tadalani, sahat ma hita tu ujung ni terowongan i, dung i idaonta ma na tiur. Songon on ma na boi masa di parngoluonta. Olo do hita marsitaonon jala olo do hita gabe mandele alani sitaonon. Songon i ma na hea dihilala Jesus. Tingki ibana diuhum jala dilinsingi, hansit do dihilala. On ma sitaonon na umborat di parngoluonna. Aha do na mangurupi ibana marhabengeton? Bibel mandok, ditujuhon do pamerengna tu las ni roha na diparade tu ibana na ”hundul di siamun ni habangsa ni Debata”! (Heb. 12:2, 3) Pasupasu alani habengeton na laho sijaloonna, i do na sai diingot Jesus. Pabadiahon goar ni Debata dohot harajaonNa do na rumingkot di ibana. Diboto Jesus, holan satongkin do pangunjunan i, alai pasupasu ni Debata boi do hilalaonna salelengna. Saonari, boi do hita mandele jala marsitaonon alani pangunjunan. Alai, taingot ma holan parsatongkinan do i. 

NASIDA NA MARHABENGETON

11. Boasa ringkot tarimangi pengalaman ni nasida na marhabengeton?

11 Ndang holan hita na ingkon marhabengeton. Asa marhabengeton halak Kristen di abad na parjolo manaon pangunjunan sian Sibolis, apostel Petrus mandok, ”Gomos ma hamu mangalo ibana marhitehite haporseaon; ingot hamu ma: Ndang tarbahen so songgop angka haporsuhon sisongon i, nang tu angka hahaanggimuna na di portibi on.” (1 Ptr. 5:9) Pengalaman ni nasida na marhabengeton mangonjar rohanta asa tongtong marsihohot, paposhon rohanta na boi hita monang jala manjalo pasupasu. (Jak. 5:11) Taida ma pigapiga tudosan. [1]—Ida catatan.

12. Aha do na boi taparsiajari sian surusuruan kerubim na disuru manjaga porlak Eden?

12 Kerubim, surusuruan na manjalo huaso na balga. Dung mardosa si Adam dohot si Hawa, dilehon Jahowa do ulaon na baru jala disuru kerubim tu tano on. Asing do ulaonna on sian na somal diulahon di surgo. Sitiruon sian nasida mangajar hita asa marhabengeton tingki manjalo ulaon na maol. Bibel paboahon, disuru Jahowa ma ”angka kerubim tungkan habinsaran ni porlak Eden i marpodang sidua baba marjimburjimbur, asa dijaga dalan tu hau hangoluan”. [2] (Ida catatan.) (1 Mus. 3:24) Ndang adong dipaboa Bibel marungutungut surusuruan i manang hurang sangap dihilala ulaonnasida i. Ndang gabe ngolngolan manang mandele nasida, alai tongtong  do nasida marhabengeton. Diulahon nasida do ulaonna i sahat tu na sae. Ra, saleleng 1.600 taon sahat tu aek na sumar!

13. Songon dia do si Job boi marhabengeton tingki manaon pangunjunan?

13 Si Job baoa na marsihohot. Sipata, olo do ra aleale manang keluarga mandok hata na mambahen hansit rohanta. Ala posi sahitta manang marsitaonon ala marujung ngolu halak na tahaholongi. Molo masa tu hita songon on, boi do tarapul rohanta mamboto sitiruon sian si Job. (Job 1:18, 19; 2:7, 9; 19:1-3) Ndang diboto si Job boasa ibana marsitaonon, alai ndang mandele ibana alani i. Aha do na mangurupi ibana marhabengeton? Na parjolo, dihabiari ibana Jahowa jala dihaholongi. (Job 1:1) Lomo rohana pasonangkon roha ni Debata, aha pe na masa tu ibana. Dung i, diurupi Jahowa si Job mamboto huasoNa marhite na tinompaNa. On paposhon roha ni si Job, paluaon ni Jahowa do ibana sian pangunjunan i. (Job 42:1, 2) Songon i ma tutu na masa. Muba ma ”dibahen Jahowa parsorion ni si Job . . . jala nasa arta na di si Job na jolo silompit dua ditambai Jahowa”. ”Dung i mate sarimatua ma si Job i jala mahap rohana di hangoluan on.”—Job 42:10, 17.

14. Songon na disurat di 2 Korint 1:6, songon dia do habengeton ni si Paulus patoguhon dongan na asing?

14 Apostel Paulus. Hea do hamu marsitaonon alani haporseaon? Manang godang do tanggung jawabmu di huria ala hamu sahalak sintua manang sintua kaliling? Molo songon i do, sitiruon sian si Paulus boi mangurupi hamu. Godang do sitaonon na masa tu si Paulus alani haporseaonna jala alani na mangaradoti huria. (2 Kor. 11:23-29) Alai, ndang mandele ibana jala sitiruon sian si Paulus, patoguhon dongan sahaporseaonna. (Jaha 2 Korint 1:6.)  Habengetonta pe boi do patoguhon donganta na asing asa marhabengeton.

BOI DO HABENGETONMUNA LAM MARGOGO SAMPE SO BOI TALU?

15, 16. (a) Songon dia do habengeton mambahen hita lam denggan? (b) Bahen ma tudosan, songon dia habengeton i ndang boi talu?

15 Songon na disurat ni si Jakobus, ”Ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang.” (Jak. 1:4) Songon dia do ulaon na denggan dihorhon habengeton? Tingki marsitaonon hita, jotjot ingkon tapatuduhon hasabaron, holong dohot pangargaion. Alani i, molo marhabengeton do hita mangadopi sitaonon, boi do on gabe tingki di hita laho patuduhon parange angka na denggan sisongon i.

Tingki masa pangunjunan tu hita, boi do on mambahen lam togu haporseaonta (Ida paragraf 15, 16)

16 Ala habengeton boi mambahen hita lam denggan, unang ma tatadingkon patik ni Jahowa holan asa malua sian pangunjunan. Umpamana, nang pe marungkil hita mangalo pingkiran na rorang, unang olo hita talu! Tapangido ma pangurupion sian Jahowa mambolongkon pingkiran sisongon i. Adong do keluargamu na so marlomo ni roha tu haporseaonmu? Unang talu hamu alani i! Pillit ma tongtong manomba Jahowa. Alani i, boi do tamba togu pos ni rohanta tu Jahowa. Ingot ma, asa dihalomohon Debata, ingkon marhabengeton do hita.—Rom 5:3-5; Jak. 1:12.

17, 18. (a) Bahen ma tudosan songon dia ringkot ni marhabengeton sahat ro di ujung. (b) Lam jonok hita tu ujung ni portibi on, aha do na mambahen pos rohanta?

17 Ingkon marhabengeton do hita sahat ro di ujung, ndang holan di tingkinta saonari. Pingkirhon ma kapal na naeng lonong. Asa boi mangolu sude halak na di kapal i, ingkon marlange do sahat tu darat. Alai, gabe lonong do ise na so marlange ala loja. Songon i ma sasahalak na so sahat ro di ujung, ndang mandapot haluaon. Molo naeng mangolu hita di tano na imbaru, ingkon tongtong do hita marhabengeton. Tatiru ma apostel Paulus na mandok, ”Ndang marnaloja hami.” —2 Kor. 4:1, 16.

18 Songon si Paulus, ingkon pos do rohanta tu Jahowa, urupanNa hita sahat ro di ujung. Si Paulus manurat, ”Alai andul do hamonanganta di saluhutna i, hinorhon ni na mangkaholongi hita. Ai gomos do ditiop rohangku: Ndang tarbahen sirang hita sian holong ni roha ni Debata, na di bagasan Kristus Jesus Tuhanta i: Manang bahenon ni hamatean manang hangoluan, nang bahenon ni angka surusuruan nang angka harajaon, nang na masa nuaeng, nang na masa sogot, nang angka hagogoon pe, manang bahenon ni na di ginjang nang na di toru, ro di nasa na tinompa pe.” (Rom 8:37-39) Tutu do, olo do sipata hita loja. Alai, taingot ma si Gidion dohot tentarana. Nang pe loja nasida, ”sai didatdati do mangeak”!—Pangh. 8:4.

^ [1] (paragraf 11) Boi do tongtong togu rohanta molo tajaha habengeton ni naposo ni Debata di tingkinta on. Umpamana, Buku Tahunan 1992, 1999, dohot 2008 boi patoguhon rohanta sian pengalaman ni angka donganta di Etiopia, Malawi, dohot Rusia.

^ [2] (paragraf 12) Ndang dipaboa di Bibel sadia godang kerubim na disuru ro tu tano on.