Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  September 2017

Pos ma Roham jala Pungka ma Ulaon I

Pos ma Roham jala Pungka ma Ulaon I

”Sai margogo ma ho jala pos ma roham. Pungka ma ulaon i. . . . Debata Jahowa . . . ma mandongani ho.”​—1 KRONIKA 28:20. Bibel siganup ari.

ENDE: 23, 29

1, 2. (a) Tanggung jawab aha do na dilehon tu si Salomo? (b) Boasa ndang pos dope roha ni si Daud, na boi si Salomo pajongjongkon bagas joro i?

DIPILLIT Jahowa do si Salomo laho mangulahon sada tanggung jawab na mansai ringkot. I ma ulaon pajongjongkon bagas joro di Jerusalem. Rumingkot do ulaon on sian ulaon na asing! Alana ingkon ”balga situtu [do i] bahenon” jala ingkon tarbarita do i tu sude halak. Alai na rumingkot, ala gabe ”hajongjongan ni joro ni Debata Jahowa” do i.​—1 Kron. 22:1, 5, 9-11.

2 Pos do roha ni si Daud sai na urupan ni Debata do si Salomo. Alai, poso dope si Salomo jala ndang marpengalaman. Olo do si Salomo manjalo tanggung jawab pajongjongkon bagas joro? Manang haduk do rohana ala poso dope ibana jala ndang marpengalaman? Asa boi marhasil, ingkon barani do si Salomo jala olo mangulahon i.

3. Aha do na boi diparsiajari si Salomo sian amana?

3 Godang do na boi diparsiajari si Salomo taringot habaranion ni amana. Alana tingki poso, hea do si Daud mambunu binatang buas na manangko birubiru ni amana.  (1 Sam. 17:34, 35) Marhite pangurupion ni Jahowa dohot sada batu, barani do si Daud mangalo sahalak raksasa i ma si Goliat. Ujungna mate do si Goliat dibahen si Daud.​—1 Sam. 17:45, 49, 50.

4. Boasa ingkon barani si Salomo?

4 Si Daud do halak na pas laho manjujui si Salomo asa marpos ni roha pajongjongkon bagas joro i. (Jaha 1 Kronika 28:20, Bibel siganup ari.) * Alana, molo mabiar do si Salomo ndang pungkaonna be ulaon i. Tumagon do ndang sae ulaon i di bahen, sian apala ndang olo mangulahon i ala mabiar.

Porlu do di hita pangurupion ni Jahowa asa boi mangulahon tanggung jawab na nilehonNa

5. Boasa tahaporluhon pos ni roha dohot habaranion?

5 Songon si Salomo, tahaporluhon do pangurupion ni Jahowa. On boi mangurupi hita mangulahon tanggung jawab na dilehon tu hita. Saonari, taulas ma sitiruon sian naposo ni Jahowa najolo, na patuduhon pos ni roha dohot habaranion. Dung i, tarimangi ma songon dia hita patuduhon pos ni roha dohot habaranion laho pasaehon ulaonta.

NAPOSO NI JAHOWA NA PATUDUHON HABARANION

6. Aha do na boi tatiru sian si Josep?

6 Hea do tungganeboru ni si Potifar mangelaela si Josep laho mangulahon seks. Alai barani do si Josep manundalhon i. Tontu diboto ibana do boi do tarancam ngoluna, molo ndang dioloi ibana tungganeboru ni si Potifar. Alai ndang mabiar jala pintor lari do ibana manadingkon tungganeboru ni si Potifar.​—1 Mus. 39:10, 12.

7. Songon dia do si Rahab patuduhon habaranion? (Ida gombar di mula ni parsiajaran.)

7 Sitiruon na asing, i ma si Rahab na tading di kota Jeriko. Ndang mabiar ibana manabunihon dua matamata ni Israel di jabuna. Ala pos do rohana, Jahowa do Debata na sintong, jala laho lehononNa do tano i tu halak Israel. (Jos. 2:4, 5, 9, 12-16) Aut sugari mabiar si Rahab tu jolma manang tu raja ni halak Jeriko, ndang olo ibana mangurupi dua matamata i. Alai, ndang mabiar ibana. Dipatuduhon ibana do habaranion, gabe boi ma ibana dohot keluargana malua.​—Jos. 6:22, 23.

8. Songon dia do habaranion ni Jesus mangkorhon tu angka apostel?

8 Sitiruon na asing, i ma angka apostel ni Jesus na marsihohot. Diida nasida do songon dia Jesus patuduhon habaranion. On mangurupi nasida asa boi patuduhon habaranion. (Mat. 8:28-32; Joh. 2:13-17; 18:3-5) Tingki diorai halak Saduse nasida mangajarhon taringot Jesus, ndang mabiar nasida. Tongtong do nasida marbarita.​—Ul. 5:17, 18, 27-29.

9. Hombar tu 2 Timoteus 1:7, sian dia do boi tadapot habaranion?

9 Boi pe si Josep, si Rahab, Jesus dohot angka apostel patuduhon habaranion, ndang alani na mangasahon dirina sandiri. Alai, ala Jahowa do na dipangasahon nasida. Suang songon i ma nang  hita. Tingki tahaporluhon habaranion, Jahowa ma na tapangasahon, unang ma dirinta sandiri. (Jaha 2 Timoteus 1:7.) Saonari taulas ma di tingki sadihari do tahaporluhon habaranion di keluarga dohot di huria.

DI TINGKI SADIHARI DO HITA PATUDUHON HABARANION?

10. Boasa angka donganta na poso ingkon barani?

10 Porlu do angka donganta na poso patuduhon habaranion. Alana, godang do situasi na mambahen nasida ingkon barani. Boi do tiruon ni nasida habaranion ni si Salomo na mambahen haputusan na denggan laho pasaehon bagas joro. Tutu, porlu do natuatuana mangurupi nasida. Alai, adong do haputusan na ingkon bahenon ni nasida sandiri. (Poda 27:11) Umpamana, ingkon barani do nasida asa tongtong marparange na ias, mamillit dongan, mamillit hiburan, jala manontuhon andigan laho tardidi. Ingkon barani do nasida mangulahon i, alana ndang lomo roha ni Sibolis mangida nasida mambahen haputusan na denggan.

11, 12. (a) Songon dia do si Musa patuduhon habaranion? (b) Songon dia do angka na poso maniru si Musa?

11 Sada haputusan na ringkot na ingkon bahenon ni na poso, i ma mambahen cita-cita. Di pigapiga negara, dijujui do angka na poso asa marsingkola satimbotimbona, asa boi parohon godang hepeng. Di negara na pogos, dijujui do angka na poso mangalului godang hepeng laho mangurupi natuatuana. Molo masa sisongon i tu hamu, rimangi ma taringot tu si Musa. Boru ni si Firaun do na pagodanggodangkon ibana. Tontu boi do ibana marcita-cita asa gabe mamora jala sangap. Rimangi ma, songon dia keluarga ni si Musa na halak Misir, guruna, dohot pamodaina manjujui ibana asa mangalului hamoraon dohot hasangapon! Alai, dipillit si Musa do rap dohot naposo ni Jahowa. Dung ditadingkon ibana tano Misir dohot sude hamoraonna, Jahowa do na dipangasahon ibana. (Heb. 11:24-26) Ujungna, dilehon Jahowa ma godang pasupasu tu ibana, jala gumodang do lehononNa haduan.

12 Molo olo angka na poso marcita-cita laho marhobas tu Jahowa, jala manjumolohon HarajaonNa, pasupasuon ni Jahowa do nasida. Urupan ni Jahowa do nasida laho paradehon angka na porlu tu keluargana. Di abad na parjolo adong do na poso na songon i, i ma si Timoteus. Dijumolohon ibana do marhobas tu Debata di parngoluonna. Hamu pe boi do songon i. *Jaha Pilippi 2:19-22.

Olo do hamu patuduhon habaranion di saluhut parngoluonmuna? (Ida ma paragraf 13-17)

13. Songon dia do habaranion mangurupi donganta borua pasauton cita-citana?

13 Di Alabama di Amerika Serikat, adong ma donganta borua na marcita-cita laho marhobas tu Jahowa. Ingkon barani do ibana mangulahon i. Alana didok ibana, ”Sian mulai dakdanak parila do ahu. Borat do huhilala mangkatahatai tu halak di Bale Harajaon. Jala umborat do muse huhilala, tingki manuktuk jabu ni halak na so hutanda.” Alai, marhite pangurupion ni natuatuana dohot angka dongan di huria, boi ma  ibana gabe perintis biasa. Ibana mandok, ”Dijujui portibi ni Sibolis do angka halak asa marsingkola na timbo, mangalului hasangapon, hepeng dohot papunguhon arta.” Alai diboto donganta on do sasintongna, ndang adong halak na mandapot sudena i. Gariada gabe marsak jala stres do angka halak alani i. Didok ibana do muse, ”Ala marhobas tu Jahowa huhilala ma las ni roha na sasintongna.”

14. Di tingki sadihari do ringkot natuatua patuduhon habaranion?

14 Natuatua pe porlu do barani. Umpamana, di parkarejoan olo do ra bosmuna manuru hamu asa lembur karejo. Hape laho marbarita, marpungu manang mangulahon panombaon na sasaripe do hamu di tingki i. Asa boi hamu gabe sitiruan na denggan di ianakhonmuna, ingkon barani do hamu paboahon i tu bosmuna. Asing ni i, di huria pe porlu do natuatua patuduhon habaranion. Umpamana, diorai hamu ma ianakhonmuna laho mangulahon sada ulaon. Alai molo natuatua na asing, diloas do ianakhonna mangulahon ulaon i. Tingki disungkun nasida boasa asing haputusanmuna sian nasida, olo do hamu lambok patorangkon i tu nasida?

15. Songon dia do Psalmen 37:25 dohot Heber 13:5 mangurupi angka natuatua?

15 Dihaporluhon natuatua do pos ni roha dohot habaranion laho manjujui ianakhonna asa marhobas tu Debata. Umpamana, adong do natuatua na mabiar  manjujui ianakhonna asa gabe perintis, marbarita di luat na mangkaporluhon gumodang parbarita, marhobas di Betel, manang mangurupi ulaon pajongjongkon Bale Harajaon dohot Gedung Kebaktian. Ra, didok rohanasida molo dilehon ianakhonna sude tingkina tu Jahowa, gabe ndang boi be annon ianakhonna mangurupi nasida molo dung matua. Alai natuatua na marbisuk barani jala marhaposan tu Jahowa. Digohi Jahowa do sude janjiNa. (Jaha Psalmen 37:25; Heber 13:5.) Molo diulahon angka natuatua songon i, boi ma ianakhonna maniru nasida barani jala mangasahon Jahowa.​—1 Sam. 1:27, 28; 2 Tim. 3:14, 15.

16. Paboa ma pengalaman ni angka natuatua na mangurupi ianakhonna asa marcita-cita marhobas tu Debata. Aha do labana tu ianakhon ni nasida?

16 Di Amerika Serikat adong do natuatua na mangurupi ianakhonna asa marhobas tu Jahowa. Tungganedolina mandok, ”Andorang so boi dope ianakhonnami mardalan dohot mangkatai, nunga hupaboa hami tu nasida taringot las ni roha ala merintis dohot marhobas di huria. Alani i, gabe i ma cita-cita ni nasida.” Dipaboa ibana do muse, boi ma ianakhon ni nasida manundalhon elaela sian portibi ni Sibolis, jala tongtong mangkaringkothon Jahowa. Sahalak donganta baoa na asing, na dua ianakhonna mandok, ”Godang do natuatua na marsitutu mangurupi ianakhonna asa boi marhasil di bidang olahraga, di singkola, manang di ulaon na dihalomohon ianakhonna. Tontu, tumagon do molo hita natuatua marsitutu mangurupi ianakhonta mambahen cita-cita, na patoguhon paralealeonna tu Jahowa. Parohon las ni roha do mangida ianakhonta pasauthon cita-cita ni nasida, tarlumobi ala dohot mangurupi nasida.” Pos ma rohamuna, las do roha ni Jahowa mangida angka natuatua na mangurupi ianakhonna marhobas tu Debata.

PATUDUHON HABARANION DI HURIA

17. Songon dia do habaranion dihaporluhon di huria?

17 Porlu do tapatudu habaranion di huria. Umpamana ingkon barani do angka sintua tingki adong na mangulahon dosa na balga di huria. Manang tingki adong na marsahit na posi di rumah sakit. Adong do muse sintua na manguluhon parsiajaran Bibel manang parpunguan di penjara. Songon dia do angka dongan na so marhamulian patuduhon pos ni roha dohot habaranion? Boi do nasida patuduhon pos ni roha dohot habaranion marhite marhobas tu Jahowa. Umpamana boi do nasida merintis, dohot tu ulaon Rancang Bangun Setempat, manang mangisi formulir Singkola tu Parbarita Harajaon. Jala pigapiga donganta borua di gokkon do tu Singkola Gilead.

18. Songon dia do angka donganta borua naung matua patuduhon habaranion?

18 Holong do rohanta mangida angka donganta borua naung matua di huria. Nang pe ndang songon najolo i be gogo ni nasida, alai tongtong do dipatudu nasida habaranion, jala diulahon nasida do nasa na boi ulahonon ni nasida. (Jaha Titus 2:3-5.) Umpamana, diurupi nasida do angka sintua laho pasingothon donganta borua na poso taringot marpangkean. Lambok jala burju do nasida pasingothon angka na poso i. Diurupi do na poso asa mamingkiri pangkorhon ni pangkeanna tu angka dongan na  asing. (1 Tim. 2:9, 10) Molo dipatuduhon nasida holong sisongon i, gabe lam togu ma huria.

19. (a) Songon dia do angka donganta baoa naung tardidi asa boi barani? (b) Songon dia do Pilippi 2:13 dohot 4:13 boi mangurupi nasida asa barani?

19 Angka donganta baoa naung tardidi, porlu do patuduhon habaranion laho mangurupi di huria. Godang do labana di huria molo rade nasida gabe parhobas manang sintua. (1 Tim. 3:1) Alai pigapiga donganta mardua roha laho gabe parhobas manang sintua. Ra, ala hea do nasida mangulahon na sala. Donganta baoa na asing mandok di rohana, ndang malo ibana laho mangurupi di huria. Molo songon i do pangkilalaanmuna, boi do Jahowa mangurupi hamu asa barani. (Jaha Pilippi 2:13; 4:13.) Ingot ma si Musa. Mulana didok rohana do ndang tolap ibana mangulahon parenta ni Jahowa. (2 Mus. 3:11) Alai diurupi Jahowa do ibana asa barani jala mangulahon na ringkot. Songon dia do angka donganta baoa naung tardidi asa boi barani? Pangido ma pangurupion sian Jahowa jala jaha ma Bibel ganup ari. Rimangi ma taringot angka halak na patuduhon habaranion na di surat di Bibel. Pangido ma angka sintua asa mangalatik hamu laho mangurupi angka na porlu di huria. Hujujui hami do hamu angka donganta baoa asa barani jala marsitutu mangurupi di huria!

”DEBATA JAHOWA . . . MA MANDONGANI HO”

20, 21. (a) Aha do na didok si Daud tu si Salomo? (b) Boasa boi pos rohanta?

20 Didok Raja Daud do tu si Salomo ”Debata Jahowa . . . ma mandongani ho” sahat tu na jongjong bagas joro i. (1 Kron. 28:20 Bibel Siganup ari) Tontu, dirimangi si Salomo do hata on. Gabe barani ma ibana pajongjongkon bagas joro i nang pe poso dope jala ndang marpengalaman. Marhite pangurupion ni Jahowa, sae ma bagas joro na balga i di bagasan pitu satonga taon.

21 Diurupi Jahowa do si Salomo, jala boi do ibana mangurupi hita asa barani mangulahon ulaonta di keluarga nang di huria. (Jes. 41:10, 13) Molo tapatudu habaranion di na marhobas tu Jahowa, pos ma rohanta lehononNa do pasupasu tu hita. Alani i, ’margogo ma hamu jala pos ma rohamuna. Pungka ma ulaon i’.

^ par. 4 ”Ninna Raja Daud ma tu anakna si Salomo: ”Sai margogo ma ho jala pos ma roham. Pungka ma ulaon i. Ingkon pasautonmu i. Debata Jahowa na huoloi i ma mandongani ho. Ndang tadingkononNa ho, sai na dongananNa do ho sampe sidung dibangun ho Bagas JoroNa.””

^ par. 12 Ida ma pigapiga saran taringot songon dia mambahen cita-cita laho marhobas tu Jahowa di Menara Pengawal, 15 Juli 2004 di artikel ”Gunakanlah Cita-Cita Rohani untuk Memuliakan Pencipta Saudara”.