Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  September 2016

“Unang ma Galegale Tanganmu”

“Unang ma Galegale Tanganmu”

“Unang ma galegale tanganmu!”SEPANIA 3:16, Bibel siganup ari.

ENDE: 54, 32

1, 2. (a) Angka aha do parungkilon na taadopi saonari, jala aha pangkorhonna tu hita? (b) Aha do pangkirimon na tadapot sian Jesaya 41:10, 13?

SAHALAK perintis biasa na marhasohotan tu sahalak sintua mandok, ”Nang pe denggan diulahon hami sude ulaon di partondion, alai jotjot dope ahu holsoan. On mambahen ahu maol modom, mura marsahit, maol marsaor tu dongan, jala mambahen ahu ndang marhiras ni roha.”

2 Boi do taantusi pangkilalaan ni donganta on? Ala mangolu di portibi na dirajai Sibolis, godang do sitaonon na taadopi. Songon jangkar na mambahen kapal ndang boi meret, holso ni roha pe boi mambahen lam borat sitaononta. (Poda 12:25) Aha do na mambahen hita gabe holsoan? Boi do ala marujung ngolu na tahaholongi, marsahit na posi, susa di parhepengon, manang alani penganiayaan. Ala marsak rohanta, boi do on mambahen hita ndang marhiras ni roha. Alai pos ma rohanta, rade do Debata mangurupi hita.Jaha Jesaya 41:10, 13.

3, 4. (a) Songon dia Bibel mamangke hata ”tangan” gabe tudosan? (b) Aha do na boi mambahen gale tanganta?

 3 Jotjot do Bibel mamangke tudosan taringot bagian ni pamatangta laho manggombarhon angka parange ni jolma. Umpamana, jotjot do tangan dibahen gabe tudosan. Tingki dipaboa di Bibel taringot jolma na gogo tanganna, on patuduhon molo ibana togu jala rade. (1 Sam. 23:16; Esr. 1:6) On muse patuduhon molo ibana marpos ni roha jala marpangkirimon.

4 Di tingki na asing, disurat do di Bibel taringot halak na gale tanganna. On patuduhon, ibana ndang togu jala ndang marpangkirimon. (2 Kron. 15:7; Heb. 12:12) Tingki marsak hita manang lam gale paralealeonta tu Jahowa, on boi mambahen hita ndang marhiras ni roha. Adong do na boi patoguhon hita? Songon dia do asa boi togu, martahan, jala mandapot las ni roha?

“NDADA NA HURANG GANJANG TANGAN NI JAHOWA LAHO MANGURUPI HAMU”

5. (a) Songon dia do pangkilalaanta tingki mangadopi parungkilon, alai aha do na boi taingot? (b) Aha do na laho taulas?

5 Jaha Sepania 3:16, 17. Unang mabiar manang gabe gale tanganta tingki adong parungkilon. Ala songon Ama parholong do Jahowa, na manogihon asa tapasahat sude holso ni rohanta tu Ibana. (1 Ptr. 5:7) Disarihon do hita dos songon tingki Ibana manarihon bangso Israel. Didok tu nasida, ”Ndada na hurang ganjang tangan ni Jahowa laho mangurupi hamu.” Rade do Ibana paluahon halak na marsihohot. (Jes. 59:1) Di artikel on, taulas ma tolu sitiruon na patuduhon, na olo jala boi do Jahowa patoguhon angka naposoNa mangulahon lomo ni rohaNa nang pe sipata maol. Taida ma songon dia sitiruon on boi patoguhon hita.

6, 7. Aha do na taparsiajari sian halak Israel na monang mangalo halak Amalek?

6 Dung ruar halak Israel sian Mesir, ro ma halak Amalek mamorangi nasida. Didok si Musa tu si Josua asa manguluhon halak Israel tu parporangan. Dung i, ditogihon si Musa ma muse si Aron dohot si Hur asa laho nasida tu dolok. Sian i, boi ma diida nasida parporangan i. Ala na mabiar do baoa na tolu on gabe manadingkon parporangan i? Tontu ndang!

7 Diihuthon si Musa do tudutudu na boi mangurupi halak Israel asa monang mangalo halak Amalek. Ditiop ibana ma tungkotna jala diangkat ma tu ginjang. Tingki diulahon si Musa i, dilehon Jahowa ma gogo tu halak Israel laho mangalo halak Amalek. Dung lam loja tangan ni si Musa, gabe naeng monang ma halak Amalek. Alai, pintor hatop ma ro si Aron dohot si Hur mangurupi si Musa. ”Dibuat nasida ma batu sada, dibahen ma tu toruna, asa hundul ibana tusi; ro ma si Aron dohot si Hur tumungkol tanganna sambariba be; gabe hot ma tanganna i, paima mate mata ni ari.” Alani hagogoon ni Debata, monang ma halak Israel.2 Mus. 17:8-13.

8. (a) Aha do na diulahon si Asa tingki halak Etiopia mangancam halak Juda? (b) Aha do na boi tatiru sian si Asa?

 8 Rade do Jahowa mamangke huasoNa mangurupi naposoNa di tingki ngolu ni Raja Asa. Godang do tentara na dipaboa di Bibel, alai tentara ni si Jara sian Etiopia ma na umbalga, godangna 1.000.000 halak na jago. Tentara ni halak Etiopia dua hali lompit godangna sian tentara ni si Asa. Gabe mabiar manang marmetmet ni roha do si Asa? Gabe gale do tanganna? Ndang! Hatop do si Asa mangido pangurupion sian Jahowa. Molo diida sian bilangan ni nasida, ra ndang boi halak Israel manaluhon halak Etiopia. ”Alai anggo Debata, saluhut do tarpatupasa.” (Mat. 19:26) Marhite hagogoonNa, ”ditaluhon Jahowa ma halak Etiopia maradophon si Asa”, jala tongtong do ”marsihohot roha ni si Asa tu Jahowa saleleng mangolu ibana”.2 Kron. 14:7-12; 1 Raj. 15:14.

9. (a) Boasa tongtong diuduti si Nehemia padengganhon tembok Jerusalem? (b) Songon dia do Debata mangalusi tangiang ni si Nehemia?

9 Tingki laho si Nehemia tu Jerusalem, aha do na diida ibana? Diida ma angka musu sian inganan na asing mangancam halak Jahudi. Gabe ndang diuduti nasida be padengganhon tembok Jerusalem. Ndang boi be dijaga kota i, gabe mabiar ma halak Jahudi. Songon dia do pangkilalaan ni si Nehemia? Gabe mabiar do ibana jala gabe gale do tanganna? Ndang! Songon si Musa, si Asa dohot naposo ni Jahowa na asing na marsihohot, tongtong do si Nehemia marhaposan tu Jahowa. Martangiang do si Nehemia tu Jahowa mangido pangurupion jala ditangihon do tangiangna. Dipangke Jahowa do huasoNa na mansai balga laho patoguhon halak Jahudi. (Jaha Nehemia 1:10; 2:17-20; 6:9.) Porsea do hamu na dipangke Jahowa gogoNa laho patoguhon naposoNa saonari?

PATOGUON NI JAHOWA DO TANGANMUNA

10, 11. (a) Songon dia cara ni Sibolis pagalehon tanganta? (b) Songon dia do Jahowa patoguhon jala mangalehon gogo tu hita? (c) Aha do laba na tadapot sian tudutudu ni Jahowa?

10 Taboto do, ndang olo Sibolis gabe gale tanganna. Marsitutu do ibana mambahen asa unang taulahon be ulaon partondion. Dibahen ibana do gabus dohot ancaman sian pamarenta, pemimpin agama, dohot halak na manimbil sian hasintongan. Aha do na tinujuna? Lomo rohana asa unang marbarita na uli hita. Alai, boi jala olo do Jahowa mangurupi hita, jala dilehon do tondi parbadiaNa patoguhon hita. (1 Kron. 29:12) Mansai ringkot do  mangido tondi parbadia asa boi tatundalhon elaela ni Sibolis dohot portibi na nirajaanna. (Ps. 18:39; 1 Kor. 10:13) Mandok mauliate do hita ala tadapot pangurupion sian Bibel. Rimangi ma angka na taparsiajari sian publikasinta ganup bulan. Dipasahat do hata di Sakaria 8:9, 13 (jaha) tingki dipadenggan bagas joro di Jerusalem. On paposhon rohanta.

Mansai ringkot do mangido tondi parbadia asa boi tatundalhon elaela ni Sibolis dohot portibi na nirajaanna

11 Dipatogu Jahowa do hita marhite tudutudu na dilehon di parpunguan, di kebaktian, dohot di singkola teokratis. Tudutudu on mangurupi hita manomba Jahowa sian ias ni roha, asa marpangkirimon, jala mangurupi hita laho mangulahon tanggung jawab Kristen. (Ps. 119:32) Olo do hamu dipatogu marhite tudutudu sian Jahowa?

12. Aha do na ingkon taulahon asa tongtong togu?

12 Diurupi Jahowa do naposoNa manaluhon halak Amalek dohot halak Etiopia, jala dilehon do gogo tu si Nehemia dohot halak Jahudi laho padengganhon tembok Jerusalem. Saonari, dilehon Jahowa do gogo tu hita tingki marbarita na uli, nang pe godang sitaononta jala godang na so olo manjangkon. (1 Ptr. 5:10) Ndang pintor dipamago Jahowa sitaononta. Alani i, ingkon martahan do hita. Songon dia carana? Ingkon tajaha do Bibel ganup ari, paradehon na ringkot tu parpunguan. Marsiajar Bibel sahalakta, mambahen panombaon na sasaripe, jala tongtong martangiang tu Jahowa. Unang ma tapaloas manang aha pe na mangambati angka na diparade Jahowa laho patoguhon hita. Molo dihilala hamu songon na gale partondionmuna, pangido ma pangurupion sian Debata. Hilala ma panogunoguon sian tondi parbadia na patoguhon hamu jala mambahen hamu mangoloi lomo ni roha ni Debata. (Plp. 2:13) Olo do hamu patoguhon tangan ni na asing?

PATOGU MA TANGAN NA GALE

13, 14. (a) Songon dia do sahalak donganta dipatogu dungkon marujung ngolu tungganeboruna? (b) Songon dia do hita patoguhon na asing?

13 Dilehon Jahowa do tu hita dongan sahaporseaon na boi patoguhon hita. Didok apostel Paulus, ”Patogar hamu ma tangan na so marnangon dohot ulu ni tot na telluktelluk, patigor hamu ma sidalanan ni patmuna.” (Heb. 12:12, 13) Godang do halak Kristen di abad na parjolo mandapot pangurupion sian dongan sahaporseaon. Songon i ma nang saonari. Parrohahon ma on. Dung marujung ngolu tungganeboru ni donganta, jala diadopi ibana angka sitaonon na asing, didok ibana, ”Huboto ma, ndang boi tapillit andigan manang sadia godang sitaonon na taadopi. Tangiang dohot parsiajaran Bibel, dos songon pelampung na mangurupi ahu asa unang lonong. Pangurupion sian dongan sahaporseaon mambahen lumbang pangkilalaanku. Gabe huboto ma, ringkot do patoguhon paralealeonta tu Jahowa andorang so ro sitaonon.”

Ganup halak di huria boi patoguhon dongan na asing (Ida paragraf 14)

 14 Tingki marporang dohot halak Amalek, ditungkol si Aron dohot si Hur do tangan ni si Musa asa tongtong togu. Saonari, hita pe boi songon i marhite mangurupi angka donganta. Adong do angka donganta na gale ala lam matua, ala marsahit, adong tantangan sian keluarga, lungunlungunan, manang ala mate na hinaholonganna. Hita pe boi do patoguhon angka na poso, na jotjot dielaela mangulahon na sala manang asa sangap di portibi on. (1 Tes. 3:1-3; 5:11, 14) Alani i, lehon ma tingki laho mamparrohahon angka dongan di Bale Harajaon, tingki marbarita, tingki rap mangan, manang tingki martelepon tu nasida.

15. Aha do pangkorhon ni hata na patoguhon tu dongan sahaporseaonta?

15 Dung monang si Asa mangalo tentara ni Etiopia, dijujui si Azaria do ibana dohot bangsona mandok, ”Alai anggo hamu, pir ma tondimuna, jala unang daukdauk boti tanganmuna i, ai sai na marupa do sogot ulaonmuna i.” (2 Kron. 15:7) On manjujui si Asa mambahen asa adong muse panombaon na sintong. Dos songon i ma, hata na patoguhon boi mambahen halak na asing tongtong manomba Jahowa. (Poda 15:23) Unang ma lupa hita, na patoguhon donganta do hita tingki talehon komentar na denggan di parpunguan.

Si Nehemia ndang holan mangidaida ulaon i, alai dohot do ibana padengganhon tembok Jerusalem

16. Songon dia do angka sintua maniru si Nehemia? Paboa ma pengalaman songon dia angka dongan sahaporseaonta mangurupi hamu.

 16 Marhite pangurupion ni Jahowa, dipatogu do tangan ni si Nehemia dohot halak Jahudi. Dipadenggan nasida ma tembok Jerusalem holan di bagasan 52 ari! (Neh. 2:18; 6:15, 16) Si Nehemia ndang holan mangidaida ulaon i, alai dohot do ibana padengganhon tembok Jerusalem. (Neh. 5:16) Ditiru angka sintua do si Nehemia. Dohot do nasida mangurupi ulaon konstruksi dohot paiashon Bale Harajaon. Dipatogu nasida do dongan sahaporseaon na marsitaonon marhite manjumpangi nasida jala manogihon nasida rap marbarita na uli.Jaha Jesaya 35:3, 4.

“UNANG MA GALEGALE TANGANMU”

17, 18. Tingki marsitaonon jala marsak, aha do na paposhon rohanta?

17 Tingki rap saulaon hita dohot dongan sahaporseaon, lam marsada ni roha ma hita. On pasolhothon paralealeonta jala lam paposhon rohanta tu pasupasu na laho tajalo di Harajaon ni Debata. Tingki tapatogu tangan ni na asing, na mangurupi nasida do hita asa martahan mangadopi sitaonon jala tongtong marpangkirimon tu ari na naeng ro. Asing ni i, tingki taulahon on, hita sandiri pe dipatogu jala tongtong marpangkirimon.

18 Molo tarimangi cara ni Jahowa mangurupi jala mangalinggomi angka naposoNa najolo, lam togu ma haporseaonta. Alani i, tingki marsitaonon hamu jala marsak, ”unang ma galegale tanganmu”! Pos ma rohamu, tingki martangiang hamu tu Jahowa, dipargogoi jala pasupasuonNa do hamu marhite HarajaonNa di ari na naeng ro.Ps. 73:23, 24.