Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  September 2016

Ingkon Marsitutu asa Mandapot Pasupasu ni Jahowa

Ingkon Marsitutu asa Mandapot Pasupasu ni Jahowa

”Dialo ho do Debata dohot jolma, jala monang ho do.”1 MUSA 32:28.

ENDE: 23, 38

1, 2. Aha do perjuangan ni naposo ni Jahowa?

MARJUANG do sude naposo ni Debata, mulai sian tingki ni si Abel sahat tu saonari. Didok apostel Paulus tu halak Kristen Jahudi, ”ditaon hamu do godang parungkilon, i ma haporsuhon”, alani i marjuang do nasida asa dihalomohon Debata jala dipasupasu. (Heb. 10:32-34) Dipatudos si Paulus do perjuangan ni halak Kristen tu pertandingan atlet na di Junani, songon lomba lari, margulat dohot martinju. (Heb. 12:1, 4) Nunga marlojong hita di dalan tu hangoluan, alai adong do musu na mangganggu hita, mambahen asa unang marlas ni roha hita jala ndang dapot pasupasu.

2 Perjuangan dohot pergulatanta na maol, i ma mangalo Sibolis dohot portibi on. (Eps. 6:12) Mansai ringkot do hita martahan asa unang taihuthon ajaran, pamingkirion, dohot angka ulaon na rorang di portibi on. Umpamana, parmainanon, marisap, mabuk manang marnarkoba. Ingkon marsitutu do hita mangalo hagaleonta jala asa unang  marmetmet ni roha.2 Kor. 10:3-6; Kol. 3:5-9.

3. Songon dia do Debata mangalatik hita mangalo musu?

3 Boi do hita monang mangalo musu na mansai gogo? Boi, alai maol do mangulahon i! Dipatudos si Paulus do dirina tu partinju tingki didok, ”Nda tung songon na manampul alogo paraloonku.” (1 Kor. 9:26) Songon partinju na mangalo partinju na asing, ingkon taalo do musunta. Diurupi jala dilatik Jahowa do hita laho mangulahon i marhite Bibel, publikasinta, parpunguan, dohot kebaktian. Diihuthon hamu do tudutudu na dilehon tu hamu? Molo ndang, ndang boi hamu manaluhon musumuna, dos songon partinju na mamungkul tu alogo.

4. Songon dia do asa unang talu hita dibahen hajahaton?

4 Ingkon sai jaga do hita. Boasa? Alana, olo do ro musu tingki gale hita manang sian na so panagaman ni rohanta. Dipasingot jala dijujui do hita marhite Bibel, ”Unang ma talu ho dibahen hajahaton; alai taluhon ma hajahaton i marhitehite na denggan!” (Rom 12:21) Molo tongtong taalo hajahaton, boi do hita monang! Alai, molo ndang jaga hita jala ndang mangalo, talu ma hita dibahen Sibolis, portibi on, dohot hagaleonta. Alani i, tongtong ma marhiras ni roha jala unang ma galegale tanganmuna!1 Ptr. 5:9.

5. (a) Aha do na ingkon taingot asa boi dihalomohon Debata jala mandapot pasupasu? (b) Sitiruon na dia do na laho taulas?

5 Asa boi monang, ingkon taingot do boasa hita marjuang. Hita marjuang, asa dihalomohon Debata jala mandapot pasupasu. Heber 11:6 mandok, ”Ai halak na mandapothon Debata, ingkon dihaporseai: Adong Debata; laos Ibana do silehon upa tu angka na manjalahi Ibana.” Manjalahi Jahowa, lapatanna ingkon marsitutu do hita asa dihalomohon Ibana. (Ul. 15:17) Di Bibel, godang do sitiruon sian baoa dohot borua na mangulahon i. Si Jakkob, si Rahel, si Josep, dohot si Paulus, diadopi nasida do angka situasi na maol. Alai, marhasil do nasida. Sitiruon sian nasida patuduhon, molo marsitutu hita boi ma tadapot pasupasu sian Jahowa. Taida ma carana.

DIPASUPASU MOLO TONGTONG MARSIHOHOT

6. Aha do na mangurupi si Jakkob marsitutu, jala aha do na dilehon tu ibana? (Ida gombar di mula ni parsiajaran.)

6 Si Jakkob, marjuang jala martahan ala dihaholongi jala arga di ibana paralealeonna tu Jahowa. Marhaporseaon situtu do ibana tu janji ni Jahowa taringot pinomparna. (1 Mus. 28:3, 4) Tingki laho marumur 100 taon si Jakkob, marsiranggut do ibana dohot sada surusuruan asa mandapot pasupasu sian Debata. (Jaha 1 Musa 32:24-28.) Ala mansai gogo do si Jakkob umbahen na boi ibana marsiranggut dohot surusuruan i? Tontu ndang! Alai, dipatudu do molo ibana marsitutu laho mandapot pasupasu! Dipasupasu Jahowa ma si Jakkob ala marsitutu ibana jala digoari ma ibana Israel, na lapatanna ”Halak na Marsihohot tu Debata”. Dijalo si Jakkob do hadiah na  tongtong talului saonari, i ma dihalomohon Jahowa jala dipasupasu.

7. (a) Situasi aha do na diadopi si Rahel? (b) Aha do na diulahon si Rahel, jala songon dia do ibana mandapot pasupasu?

7 Maimaima do si Rahel, tungganeboru ni si Jakkob, taringot janji ni Jahowa na didok tu tungganedolina. Alai, adong do masalah. Ndang boi si Rahel marianakhon, jala sada hailaan do di tingki i molo sahalak borua ndang boi marianakhon. Songon dia do si Rahel mangadopi na masa on? Ndang gabe marmetmet ni roha ibana. Alai, martangiang do ibana ganup ari tu Jahowa. Ujungna, ditangihon Jahowa do tangiangna, dibahen ma ibana boi marianakhon. Alani i, didok ibana ma, ”Angka parsirangguton ni Debata huparsirangguthon dohot dahahang i, gabe monang ahu!”1 Mus. 30:8, 20-24.

8. Hasusaan aha do na diadopi si Josep, jala songon dia do ibana gabe sitiruon na denggan di hita?

8 Mangkorhon do haporseaon ni si Jakkob dohot si Rahel tu si Josep, jala on mangurupi si Josep tingki marsitaonon. Tingki marumur 17 taon si Josep, muba ma na masa di ngoluna. Ala mangiburu angka hahana, digadis ma ibana gabe hatoban. Dipenjara ma ibana di Mesir, nang pe ndang adong hasalaanna. (1 Mus. 37:23-28; 39:7-9, 20, 21) Alai, ndang marmetmet ni roha manang gabe lungun roha ni si Josep, jala ndang sogo rohana. Boasa? Diargai ibana do paralealeonna tu Jahowa, jala dipartahanhon do i. (3 Mus. 19:18; Rom 12:17-21) Sitiruon sian si Josep mangurupi hita. Molo susa do hita tingki metmet manang songon na so marpangkirimon, porlu hita tongtong marjuang. Molo taulahon i, pos  ma rohanta pasupasuon ni Jahowa do hita.Jaha 1 Musa 39:21-23.

9. Songon dia do hita boi maniru si Jakkob, si Rahel, dohot si Josep?

9 Saonari, hita pe ingkon martahan do mangadopi hasusaan. Ra, susa do hamu alani ketidakadilan, ndang dihaporseai, manang adong na so marlomo ni roha tu hamu. Unang ma mabiar, ingot ma aha na mangurupi si Jakkob, si Rahel, dohot si Josep tongtong marlas ni roha manomba Jahowa. Dipatogu jala dipasupasu Debata do nasida ala diargai nasida do paralealeonna tu Ibana. Tongtong do nasida marjuang jala parniulaonna pe hombar tu tangiangna. Ala mangolu di ari parpudi, ringkot asa tapatogu pangkirimonta! Asa tongtong dihalomohon Jahowa, olo do hamu marjuang nang pe maol?

MARSITUTU LAHO MANDAPOT PASUPASU

10, 11. (a) Boasa ingkon marjuang hita asa mandapot pasupasu ni Debata? (b) Aha do na mangurupi hita laho mamillit na denggan?

10 Boasa ingkon marjuang hita asa mandapot pasupasu ni Debata? Alana, mardosa dope hita. Ingkon marjuang do hita mangalo giotgiot na sala. Na asing, ingkon marjuang asa tongtong marhiras ni roha di ulaon partondion. Na asing marjuang ala marsahit manang ala lungunlungunan. Adong do na maol manalpuhon hasalaan ni sasahalak na mambahen hansit rohanta. Ndang soal nunga sadia leleng hita manomba Jahowa, unang ma tapaloas manang aha pe mangambati hita manomba Jahowa.

Marjuang do hamu asa mandapot pasupasu sian Debata?(Ida paragraf 10, 11)

11 Tutu ma, ndang mura laho marjuang dohot mamillit na denggan, tarlumobi tingki adong giotgiot ni roha na sala. (Jer. 17:9) Molo songon i na dihilala hamu, martangiang ma tu Jahowa jala pangido ma tondi parbadiaNa. Tangiang dohot tondi parbadia boi mangurupi hamu asa margogo laho mangulahon na sintong, jala dapotmuna ma pasupasu ni Debata. Marsitutu ma patuduhon parniulaon hombar tu tangiangmuna. Jaha ma Bibel ganup ari, marsiajar Bibel, dohot panombaon na sasaripe.Jaha Psalmen 119:32.

12, 13. Songon dia do dua donganta manundalhon giotgiot na sala?

12 Godang do pengalaman na patuduhon songon dia Bibel, tondi parbadia, dohot publikasi Kristen mangurupi angka donganta manundalhon giotgiot na sala. Sahalak remaja manjaha artikel ”Bagaimana Anda Dapat Melawan Hasrat yang Salah?” di Sedarlah! 8 Desember 2003. Songon dia do pandapotna? ”Marjuang do ahu mangalo pingkiran na sala. Tingki hujaha artikel on, huboto ma godang do ’angka dongan na marsitutu marjuang laho mangalo giotgiot na sala’. Boi ma huhilala, na dohot do ahu gabe bagian ni punguan dongan sahaporseaon. Huboto ma, ndang holan ahu na mangkilala songon i.” Dapotna do muse laba sian artikel ”Gaya Hidup Alternatif—Apakah Diperkenan Allah?” di Sedarlah! 8 Oktober 2003. Di artikel on, diboto ibana ma perjuangan i tongtong adong songon suga. (2 Kor. 12:7) Alai, molo marsitutu hita manjaga asa tongtong  ias parangenta, pos ma rohanta tu pangkirimon di ari na naeng ro. Didok ibana muse, ”Alani i, boi ma ahu tongtong marsihohot ganup ari. Mandok mauliate do ahu tu Jahowa ala dilehon organisasiNa mangurupi hita asa tongtong martahan di portibi na jahat on.”

13 Parrohahon ma pengalaman ni donganta borua di Amerika Serikat. Disurat ibana, ”Mandok mauliate do ahu tu hamu ala tongtong hamu mangalehon sipanganon partondion di tingki na pas. Jotjot do huhilala artikel on disurat laho tu ahu. Saleleng martaontaon, marjuang do ahu asa unang mangulahon na so dihalomohon Jahowa. Sipata, maol do huhilala pasidingkon i. Huboto, burju do Jahowa jala disalpuhon do hasalaanki. Alai, ala sai huulahon dope na sala jala ndang hutundalhon, ninna rohangku ndang tarjalo ahu pangurupionNa i. Huhilala, ndang mararga be ngolungku. . . . Dung hujaha artikel ’Apakah Saudara Memiliki ”Hati untuk Mengenal” Yehuwa?’ di Menara Pengawal 15 Maret 2013, huboto ma olo do Jahowa mangurupi ahu.”

14. (a) Songon dia do pangkilalaan ni si Paulus taringot perjuanganna? (b) Songon dia hita boi monang mangalo hagaleonta?

14 Jaha Rom 7:21-25. Diboto si Paulus do, mansai maol mangalo giotgiot na sala dohot hagaleon. Alai, pos do rohana na boi ibana monang molo martangiang tu Jahowa, marpangunsandean tu Jahowa, jala porsea tu tobusan ni Jesus. Songon dia do molo hita? Boi do hita monang mangalo hagaleonta? Tontu boi, molo tatiru si Paulus, marpangunsandean tu Jahowa ndang tu gogonta sandiri, jala porsea tu tobusan ni Jesus.

15. Songon dia do Jahowa mangurupi hita asa tongtong marhaporseaon jala martahan mangadopi hasusaan?

15 Sipata, dipasombu Debata do hita patuduhon caranta mangadopi hasusaan. Umpamana, molo adong keluarganta na marsahit na posi manang manaon ketidakadilan, songon dia do hita mangadopi i? Molo marhaporseaon na togu hita tu Jahowa, pos ma rohanta lehononNa do gogo asa boi hita tongtong marsihohot, mangkilala las ni roha, jala paralealeonta pe tongtong togu tu Ibana. (Plp. 4:13) Angka pengalaman ni donganta najolo dohot saonari patuduhon, tangiang mambahen hita margogo, barani, jala boi tongtong martahan.

MARSITUTU ASA MANDAPOT PASUPASU NI JAHOWA

16, 17. Aha do na ingkon tongtong taulahon?

16 Lomo do roha ni Sibolis asa mabiar hita, marmetmet ni roha jala asa gale tanganta. Alani i, marsitutu ma hita maniop na denggan. (1 Tes. 5:21) Boi do hita monang mangalo Sibolis, portibi on, dohot giotgiot na sala! Boi do hita monang molo porsea hita na olo Debata patoguhon jala mangurupi hita.2 Kor. 4:7-9; Gal. 6:9.

17 Alani i, tongtong ma martahan. Tongtong marjuang. Tongtong marsihohot. Pos ma rohanta tu Jahowa, na mangalehon ”mansai godang pasupasu” tu hita.Mal. 3:10, Bibel siganup ari.