Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Si Burnett, si Simone, si Eston, dohot si Caleb

Rade do Nasida Marbarita​—di Oseania

Rade do Nasida Marbarita​—di Oseania

SI RENEÉ naung marumur hirahira 30 taon, magodang di sada keluarga ni Sitindangi di Australia. Ibana mandok, ”Jotjot do hami pinda tu inganan na mangkaporluhon godang penyiar. Dibahen natuatuangku do las rohangku! Saonari, dung adong anakhonku, naeng do hubahen tu nasida songon na huhilala.”

 Dos do na tinuju si Reneé dohot si Shane di partondion. Didok si Shane ma, ”Dung tubu borungku, dijaha hami ma di Menara Pengawal taringot sada keluarga ni Sitindangi na pinda tu Pasifik, marparau do nasida marbarita na uli tu Pulo Tonga. * Artikel i mangonjar rohanami asa mambahen surat tu kantor cabang ni Sitindangi Ni Jahowa di Australia dohot Selandia Baru. * Disungkun hami ma didia inganan na mangkaporluhon godang penyiar. Dipaboa ma tu hami asa pinda tu Tonga​—inganan na dijaha hami di artikel i!”

Si Jacob, si Reneé, si Skye, dohot si Shane

Dung hirahira sataon si Shane, si Reneé, dohot anaknasida si Jacob, si Skye tinggal di Tonga, masa ma hagunturon. Mulak ma nasida tu Australia. Alai, sai naeng laho do nasida marbarita tu inganan na asing. Di taon 2011, pinda ma nasida tu Pulo Norfolk, sada pulo na gelleng di Pasifik hirahira 1.500 km sian bagian timur ni Australia. Adong do labana pinda nasida tusi? Si Jacob mandok, ”Ndang holan na ringkot di hami na diparrohahon Jahowa, alai dipasupasu do ulaonnami marbarita!”

MARBARITA RAP DOHOT KELUARGA

Songon si Shane, si Reneé dohot anaknasida, godang keluarga ni Sitindangi rade marbarita tu inganan na ”mangkaporluhon godang penyiar”. Aha do mangonjar roha ni nasida asa pinda?

”Torop do halak disi lomo rohana manjangkon barita na uli. Las rohanami asa boi nasida marsiajar Bibel.”​—Burnett

Si Burnett, si Simone, dohot anaknasida si Eston, si Caleb, na marumur 12 dohot 9 taon pinda tu Burketown. Sada kota na dao sian Queensland, Australia. Didok si Burnett ma, ”Holan sahali di bagasan tolu manang opat taon do Sitindangi laho marbarita tusi. Torop halak disi manjangkon barita na uli. Las rohanami nasida marsiajar Bibel.”

Si Jim, si Jack, si Mark, dohot si Karen

Si Mark dohot si Karen, marumur 50 taon, mangurupi angka huria na jonok tu Sydney Australia, andorang so pinda nasida dohot tolu ianakhonna si Jessica, si Jim, dohot si Jack, tu Nhulunbuy daerah tambang na dao di Australia Utara. Si Mark mandok, ”Las rohangku mangulahon ulaon di huria dohot marbarita na uli.” Marduadua do roha ni si Karen laho pinda. Didok ibana, ”Dung pe dipapos si Mark dohot angka na asing ahu, asa olo pinda. Saonari tamba ma las ni rohangku!”

Si Benjamin, si Jade, si Bria, dohot si Carolyn

Di taon 2011, Si Benjamin, si Carolyn anaknasida si Jade dohot si Bria, pinda sian Queensland, Australia, tu Timor-Leste, negara na gelleng di Kepulauan Timor na jonok tu Indonesia. Si Ben mandok, ”Nunga hea ahu dohot si Carolyn gabe perintis istimewa di Timor-Leste. Las roha tu Sitindangi disi, burju nasida mangurupi hami. Lungun do rohanami tingki maninggalhon Timor-Leste. Dung tubu ianakhonnami, sundat ma hami pinda tingki i. Alai, marsangkap dope hami muse mulak tusi.” Si Carolyn mandok, ”Lomo rohanami anakhonnami marsaor tu angka missionari, parkarejo Betel, dohot perintis istimewa asa togu partondion ni nasida.”

MANGARADE LAHO PINDA

Didok Jesus tu siseanna, ”Ai ise hamu na giot pajongjong palaspalas, na so jumolo hundul mangetongi sipalahoonna tusi, manang na tuk laho patulushon?” (Luk. 14:28) Alani i, molo adong keluarga marsangkap pinda tu inganan na asing, denggan ma dipingkiri hian. Aha do siingoton ni nasida andorang so pinda?

PARTONDION: Didok si Ben ma, ”Las rohanami manarihon na asing, ndang olo hami mambahen nasida susa. Andorang so pinda, parjolo ma dipatogu hami partondionnami. Las rohanami marbarita dohot mangulahon ulaon di huria.”

Si Jacob mandok, ”Andorang so pinda hami tu Pulo Norfolk, nunga dijaha hami kisah hidup di Menara Pengawal dohot Sedarlah! (saonari didok Sadarlah!) taringot angka keluarga na pinda tu inganan na mangkaporluhon godang penyiar. Diulas hami ma taringot tu hasusaan na dihilala nasida jala songon dia Jahowa mangurupi nasida.” Ito ni si Jacob, si Skye marumur 11 taon mandok, ”Jotjot do hutangiangkon on—alai sipata rap dohot natuatuangku do hami manangiangkon on!”

 PANGKILALAAN: Si Reneé mandok, ”Las rohangku jonok dohot keluarga, aleale di inganan na dihalomohon roha. Ndang marmetmet ni roha hami alani hasusaan, labana do dipingkirhon hami.”

HASOMALAN: Godang keluarga na mamingkirhon jala mangarade andorang so pinda. Si Mark mandok, ”Dilului hami godang informasi taringot Nhulunbuy. Dikirim donganta na tading disi ma koran tu hami, asa diboto hami hasomalan ni halak na tading disi.”

Si Shane na pinda tu Pulo Norfolk mandok, ”Marsitutu do ahu patuduhon parange na denggan songon halak Kristen. Huboto ma molo lambok ahu, jujur jala ringgas karejo boi do ahu tinggal didia pe di portibi on.”

MANAON ANGKA HASUSAAN

Asa marhasil di ”inganan na mangkaporluhon godang penyiar” ingkon torang do pingkiranta tingki manaon hasusaan. Taida ma pigapiga pengalaman:

Si Reneé mandok, ”Marsiajar do ahu mamangke godang cara mangulahon ulaonku. Umpamana, molo tingki balga galumbang di Pulo Norfolk, ndang adong kapal, arga jala maol ma luluan sipanganon. Ingkon malo ma ahu Iaho paradehon sipanganon na adong.” Tunggani dolina mandok, ”Ingkon denggan ma diatur hami parhepengon na porlu pangkeon ganup minggu.”

Anak ni nasida si Jacob mandok, ”Holan pitu halak do penyiar di huria na baru on jala sude angka na magodang. Ndang adong donganku satorbang! Alai, tingki rap marbarita ahu dohot nasida, gabe maraleale ma hami.”

Dos do na masa na dihilala ni si Jim na marumur 21 taon. Ibana mandok, ”Huria na jumonok tu hurianami Nhulunbuy, daona hirahira 725 km. Alani i, holan di parpunguan bolon do hami boi marsaor dohot angka dongan naposo. Tibu ma hami sahat asa boi pajumpang dohot angka dongan. Diulahon hami ma on ganup taon!”

 ”LAS ROHANAMI RO TUSON!”

Bibel mandok, ”Pasupasu ni Jahowa do mambahen mamora.” (Poda 10:22) Di liat portibi on, torop halak na laho tu ”inganan na mangkaporluhon godang penyiar” mangkilala hasintongan ni ayat on.

Si Mark mandok, ”Marlaba do tu ianakhonnami ala olo hami pinda jala sada pasupasu do on di hami. Tamba do pos ni roha ni anakhu, sarihonon ni Jahowa do hami molo manjumolohon Harajaon. Ndang tartuhor pos ni roha sisongon on.”

Si Shane mandok, ”Lam solhot ma keluarganami. Molo hubege nasida mangkatai taringot pasupasu ni Jahowa, las rohangku.” Anakna, si Jacob pe mandok songon i, ”Godang do na mambahen las rohangku. Alani i, las rohanami ro tuson!”

^ par. 3 Ida ma artikel ”Sahabat-Sahabat Allah di ’Kepulauan yang ramah’” di Menara Pengawal 15 Desember 2004 alaman 8-11.

^ par. 3 Di taon 2012, dipasada ma kantor cabang ni Sitindangi Ni Jahowa di Australia dohot Selandia Baru, goarna gabe kantor cabang Australasia.