Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Angka halak porlu dipasingot andorang so ro “habahaba” na sian Debata!

Panguhuman ni Debata—Adong do Tingki Dilehon Laho Pasingothon?

Panguhuman ni Debata—Adong do Tingki Dilehon Laho Pasingothon?

ADONG sahalak na paboahon barita taringot ramalan cuaca. Disi, diida ibana adong badai na laho ro tu sada luat na godang pendudukna. Ala lomo rohana asa malua angka penduduk i, marsitutu do ibana pasingothon angka halak di luat i andorang so ro badai i.

Suang songon i ma, dipasingot Jahowa do sude halak di portibi on taringot “habahaba” na umbalga sian na hea dibege di laporan cuaca. Songon dia carana? Jala boasa pos rohanta na dilehon Debata dope tingki tu angka halak asa boi malua? Laho mangalusi sungkun-sungkun i, taulas ma piga-piga contoh taringot songon dia Jahowa pasingothon angka halak di tingki najolo.

TINGKI DILEHON DEBATA SIPASINGOT

Di tingki ni Bibel, dilehon Jahowa do sipasingot taringot marragam “habahaba” manang panguhuman tu angka halak na so mangoloi parentana. (Poda 10:25; Jer. 30:23) Jala leleng andorang so ro panguhuman i, jotjot do dipasingot Jahowa nasida asa unduk tu Ibana. (2 Raj. 17:12-15; Neh. 9:29, 30) Laho mangurupi nasida, dipangke Jahowa do angka naposona na setia laho paboahon panguhuman i dohot aha na ingkon diulahon asa boi malua.​—Am. 3:7.

Si Noak sahalak naposo ni Jahowa na setia. Saleleng martaon-taon, barani do ibana pasingothon angka halak na mangulahon na jahat na laho ro Aek na Sumar. (1 Mus. 6:9-13, 17) Jala dipaboa ibana do aha na ingkon diulahon nasida asa boi malua. I do alana, didok do ibana “sahalak parbarita hatigoran”.​—2 Ptr. 2:5.

Nang pe naung marsitutu si Noak pasahathon sipasingot na sian Debata, alai ndang olo angka halak manangihon i. On patuduhon ndang adong haporseaon ni nasida. Ujungna, mate ma nasida tingki ro Aek na Sumar i “mangaup nasida saluhutna”. (Mat. 24:39; Heb. 11:7) Tingki ro panguhuman i, ndang boi didok na so dipasingot Debata nasida.

Di tingki na asing, dilehon Jahowa do sipasingot ndang leleng andorang so ro “habahaba” manang panguhuman. Alai, dilehon Ibana do tingki na pas asa boi angka halak malua. Umpamana, andorang so diparo Jahowa Sampulu Tulah, dipasingot Ibana do halak Mesir. Disuru do si Musa dohot si Aron pasingothon si Firaun dohot angka pejabatna taringot tulah na papituhon, i ma udan es. Andorang so ro dope udan marsogot nai, dilehon Debata do tingki asa boi nasida malua? Bibel mandok, “Manang ise sian angka naposo ni si Firaun na mabiar mida hata ni Jahowa diluahon ma angka naposona dohot pinahanna tu jabu. Alai manang ise na so marateatehon hata ni Jahowa, dipasombu ma angka naposona dohot pinahanna di ladang.” (2 Mus. 9:18-21) Tangkas ma, jotjot do Jahowa mangalehon sipasingot. Alani i, angka halak na pintor mangoloi Ibana, malua do sian tulah i.

Songon i muse, nunga dipasingot Jahowa si Firaun dohot angka pejabatna andorang so masa tulah na pasampuluhon. Alai ndang olo nasida manangihon. (2 Mus. 4:22, 23) Ujungna, mate ma anak siangkangan ni nasida. Ngeri hian do na masa i! (2 Mus. 11:4-10; 12:29) Adong dope tingki di nasida asa boi malua? Adong! Alana nunga dipaboa si Musa hian tu halak Israel taringot tulah na pasampuluhon. Jala dipaboa ibana do carana asa boi malua keluarga ni nasida. (2 Mus. 12:21-28) Piga halak do na olo manangihon sipasingot i? Adong hira-hira  tolu juta halak, tarmasuk ma i halak Israel dohot “halak sileban” na so halak Israel dohot halak Mesir. Malua do nasida sian panguhuman ni Debata jala kaluar sian Mesir.​—2 Mus. 12:38.

Sian angka contoh on, taboto ma sai dilehon Jahowa do tingki na pas asa boi malua angka halak na mangoloi Ibana. (5 Mus. 32:4) Aha do na mangonjar rohana mangulahon i? Apostel Petrus paboahon, “ai ndang lomo rohana [Jahowa] mago manang ise pe, alai naeng ma sude jolma marhamubaon”. (2 Ptr. 3:9) Taboto ma, parduli do Debata tu sude jolma. Lomo do rohana asa sude halak marhamubaon jala mangoloi parentana andorang so ro ari panguhumanna.​—Jes. 48:17, 18; Rom 2:4.

MANANGIHON SIPASINGOT DI TINGKINTA SAONARI

Saonari pe, sude halak ingkon mangoloi sipasingot na dibaritahon di liat portibi on. Tingki di tano on Jesus, nunga dipaboa ibana molo angka na di portibi on laho dihancurhon do saleleng “hasusaan bolon”. (Mat. 24:21) Dipaboa ibana do tu angka siseanna angka surirang taringot ari na naeng ro. Dipatorang ibana do aha na laho diida jala diadopi nasida tingki lam jonok ari i. Jala dipaboa Jesus do muse angka na laho masa di liat portibi on songon na taida saonari.​—Mat. 24:3-12; Luk. 21:10-13.

Huhut masa angka surirang i, dijujui Jahowa do asa sude halak manomba jala unduk tu pamarentaonna. Lomo do rohana asa angka halak na unduk mandapot ngolu na dumenggan saonari. Jala di ari na naeng ro, dapot ni nasida ma godang pasu-pasu di tano na imbaru. (2 Ptr. 3:13) Lomo do roha ni Jahowa asa pos roha ni angka halak tu angka janjina. Alani i, dilehon Ibana ma barita na boi paluahon nasida, i ma “barita na uli taringot tu Harajaon” na didok Jesus laho dibaritahon di “saluhut bangso”. (Mat. 24:14) Diparade Debata do angka naposona asa paboahon barita on hira-hira di 240 negara. Lomo roha ni Jahowa asa godang halak manangihon sipasingotna jala malua sian “habahaba” panguhumanna na tigor.​—Sep. 1:14, 15; 2:2, 3.

Sude contoh on patuduhon, sai dilehon Jahowa do tingki tu angka halak asa boi nasida manangihon sipasingotna. Alai, tubu ma sungkun-sungkun: Olo do angka halak manangihon sipasingot sian Debata saleleng adong dope tingki? Alani i, tongtong ma pasahat barita na sian Debata jala urupi ma godang halak asa boi malua sian ajal ni hasiangan on.