Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

 PARSIAJARAN 42

Songon dia Jahowa Mamangke Hamu Laho Mangulahon Sangkapna?

Songon dia Jahowa Mamangke Hamu Laho Mangulahon Sangkapna?

“Debata do na mangalehon gogo tu hamu. . . . Dibahen Ibana do hamu rade jala margogo mangulahon i.”​—PLP. 2:13.

ENDE 104 Tondi Parbadia, Silehonlehon sian Debata

NA LAHO DIULAS *

1. Aha do na boi diulahon Jahowa laho pasauthon sangkapna?

BOI DO Jahowa gabe aha pe laho pasauthon sangkapna. Umpamana, boi do Jahowa gabe Guru, Sipangapul, dohot Parbarita na uli. On holan piga-piga sian godang angka naung diulahon Ibana. (Jes. 48:17; 2 Kor. 7:6; Gal. 3:8) Alai jotjot do dipangke Ibana jolma laho pasauthon sangkapna. (Mat. 24:14; 28:19, 20; 2 Kor. 1:3, 4) Jala dilehon Jahowa do bisuk dohot gogo tu hita asa boi mangulahon lomo ni rohana. On ma lapatan ni goar ni Jahowa, songon na diantusi piga-piga pakar.

2. (a) Boasa sipata ganggu rohanta laho dipangke Jahowa? (b) Aha do na laho taulas di parsiajaran on?

2 Lomo do rohanta sude asa dipangke Jahowa hita laho mangulahon lomo ni rohana. Alai adong dope na ganggu rohana. Boasa? Ra dihilala, ndang sanggup nasida mangulahon i alani umur, situasi, manang ala ndang malo. Na asing mangkilala, nunga sae be na diulahon nasida saonari jala ndang porlu be mangulahon angka ulaon na asing. Alani i di parsiajaran on, taulas ma songon dia Jahowa mambahen hita rade laho mangulahon tugas na sian Ibana. Jala taulas ma muse angka sitiruon sian angka naposo ni Jahowa najolo. Baoa manang borua, boi do dibahen Jahowa rade nasida jala margogo mangulahon lomo ni rohana. Dung i, taulas ma songon dia hita boi paloashon Jahowa mamangke hita.

SONGON DIA JAHOWA PARADEHON HITA?

3. Hombar tu Pilippi 2:13, songon dia Jahowa mambahen hita rade mangulahon lomo ni rohana?

3 Jaha Pilippi 2:13. Boi do Jahowa mambahen hita rade  mangulahon lomo ni rohana. * Songon dia carana? Umpamana, adong taboto dongan di huria na porlu diurupi. Manang adong tugas na ingkon diulahon di huria. Manang adong surat sian kantor cabang na paboahon, dihaporluhon do angka dongan laho mangurupi di inganan na asing. Olo do didok rohanta, ‘Aha ma na boi huulahon?’ Manang, olo do dilehon tugas na hira maol tahilala jala ndang pos rohanta laho mangulahon i. Manang dung dijaha hamu piga-piga ayat di Bibel, gabe didok rohamu, ‘Songon dia do ahu mamangke ayat on laho mangurupi na asing?’ Ndang dipaksa Jahowa hita mangulahon lomo ni rohana. Alai tingki diida Ibana hita mamingkirhon aha na boi taulahon, diurupi Jahowa do hita asa lomo rohanta mangulahon i.

4. Songon dia Jahowa mambahen hita margogo laho mangulahon lomo ni rohana?

4 Boi do dibahen Jahowa hita margogo laho mangulahon lomo ni rohana. (Jes. 40:29) Marhite tondi parbadiana, boi do dibahen Ibana asa lam denggan bakat naung adong di hita. (2 Mus. 35:30-35) Asing ni i, dipangke Jahowa do organisasina laho mangajari hita carana mangulahon angka tugas na ringkot. Molo ndang pos rohamu tingki mangulahon sada tugas, pangido ma asa diurupi. Tingki sadihari pe, boi do dipangido hamu ‘hagogoon na sumurung’ sian Jahowa. (2 Kor. 4:7; Luk. 11:13) Di Bibel, dipaboa do angka contoh na patuduhon songon dia Jahowa mangurupi baoa dohot borua asa rade jala margogo mangulahon tugas na dilehon tu nasida. Tingki taulas angka contoh i, pingkirhon ma songon dia Jahowa boi mangulahon na sarupa tu hamu.

SONGON DIA JAHOWA MANGURUPI ANGKA BAOA?

5. Aha do na boi taparsiajari sian cara ni Jahowa jala nandigan Ibana mamangke si Musa laho paluahon naposona?

5 Dipangke Jahowa do si Musa laho paluahon halak Israel. Alai nandigan do dipangke Jahowa ibana? Ndang tingki dihilala si Musa naung rade ala nunga diajarhon “sude habisuhon ni Mesir” tu ibana. (Ul. 7:22-25) Alai dipangke Jahowa do ibana dung diurupi asa gabe halak na serep roha jala na lambok roha. (Ul. 7:30, 34-36) Dibahen Jahowa do si Musa barani laho manjumpangi raja Mesir. (2 Mus. 9:13-19) Aha do na boi taparsiajari sian cara ni Jahowa jala nandigan Ibana mamangke si Musa? Holan halak na patuduhon angka parange na denggan jala na sai marhaposan tu Ibana do na dipangke Jahowa.​—Plp. 4:13.

6. Aha do na boi taparsiajari sian cara ni Jahowa mamangke si Barsilai laho mangurupi Raja Daud?

6 Marratus taon dungkon i, dipangke Jahowa do si Barsilai laho mangurupi Raja Daud. Tingki i, nunga “male . . .  galegale jala mauas” si Daud dohot angka tentarana ala lari nasida sian anak ni si Daud, i ma si Absalom. Tingki i, nunga matua si Barsilai, jala boi do ibana dipamate ala paradehon na porlu di si Daud dohot tentarana. Alai nang pe matua, ndang didok roha ni si Barsilai ndang boi be ibana dipangke Jahowa. Gariada, dilehon ibana do angka na adong di ibana laho mangurupi naposo ni Debata. (2 Sam. 17:27-29) Aha do parsiajaranna tu hita? Nang pe naung matua hita, boi do dipangke Jahowa hita laho paradehon na dihaporluhon dongan na adong di ingananta manang na di inganan na asing na hahurangan. (Poda 3:27, 28; 19:17) Nang pe ndang boi pintor diurupi hamu nasida,  boi do dilehon hamu sumbangan tu ulaon ni organisasi di liat portibi on laho mangurupi angka donganta tingki dihaporluhon.​—2 Kor. 8:14, 15; 9:11.

7. Songon dia do Jahowa mamangke si Simeon, jala boasa i patoguhon rohanta?

7 Marjanji do Jahowa tu si Simeon, sahalak naposona naung matua di Jerusalem. Laho idaonna do Messias andorang so mate ibana. Tontu janji on patoguhon roha ni si Simeon, alana nunga martaon-taon ibana paimahon Messias. Ala tongtong ibana martahan jala porsea tu Debata, dapotna ma pasu-pasu. Sada tingki, “marhite panogu-noguon ni tondi parbadia” laho ma ibana tu bagas joro. Disi, diida ibana ma Jesus tingki poso-poso dope. Jala dipangke Jahowa do ibana laho paboahon surirang, na laho gabe Kristus do poso-poso i. (Luk. 2:25-35) Nang pe nunga mate si Simeon andorang so mulai dope Jesus marbarita, mandok mauliate do ibana ala nunga dipangke Jahowa. Jala godang do pasu-pasu na dapotna di ari na naeng ro! Di tano na imbaru, idaonna ma songon dia pamarentaon ni Jesus parohon pasu-pasu tu sude jolma di tano on. (1 Mus. 22:18) Hita pe, mandok mauliate do tu Jahowa alani hak istimewa na dilehon tu hita.

8. Songon dia do Jahowa mamangke hita songon si Barnabas?

8 Di abad na parjolo, adong sahalak baoa na burju na margoar si Josep. Rade do ibana dipangke Jahowa. (Ul. 4:36, 37) Lomo do roha ni si Josep mangapuli angka dongan. Ido alana digoari angka apostel ma ibana si Barnabas, lapatanna “Anak ni Pangapulion.” Umpamana, dung gabe halak Kristen si Saul, godang do angka dongan na mabiar manjonoki ibana. Ala najolo, jotjot do dianiaya si Saul angka sisean ni Jesus. Alai, olo do si Barnabas mangapuli jala mangurupi si Saul. Tontu diargai si Saul do haburjuon ni si Barnabas i. (Ul. 9:21, 26-28) Dungkon i, diida angka sintua di Jerusalem do, porlu do dipatogu angka dongan na dao tading di Antiokia Siria. Ise do na disuru nasida? Si Barnabas! Keputusan na denggan do i. Alana, marhite si Barnabas, “dipatogu ma roha ni nasida sude, asa marsihohot nasida tu Tuan i sian nasa roha”. (Ul. 11:22-24) Saonari pe, boi do diurupi Jahowa hita laho mangapuli angka donganta. Umpamana, dipangke Jahowa do hita laho mangapuli dongan na marhabot ni roha. Manang dipangke Ibana do hita laho manjumpangi manang manelepon donganta na marsahit manang na marsak. Jala patoguhon nasida marhite hata na denggan. Olo do hamu dipangke Jahowa songon si Barnabas?​—1 Tes. 5:14.

9. Aha do na boi taparsiajari sian cara ni Jahowa mangurupi si Vasily asa gabe sintua na denggan?

9 Diurupi Jahowa do sahalak donganta na margoar si Vasily asa gabe sintua na denggan. Tingki marumur 26 taon, dilantik ma si Vasily gabe sintua. Alai mabiar do ibana ala ndang godang dope pengalamanna laho mangurupi angka dongan, tarlumobi na marsitaonon. Alai, dapotna do pelatihan sian sintua na marpengalaman dohot sian Singkola Pangkobasion tu Harajaon. Marsitutu do si Vasily asa lam denggan mangulahon tugasna. Umpamana, dibahen ibana ma daftar ni angka tujuan na laho diulahon. Tingki marhasil ibana mangulahon i, lam leleng gabe ndang mabiar be ibana. Didok ibana, “Aha na mambahen ahu mabiar najolo, saonari gabe mambahen ahu marlas ni roha. Tingki diurupi Jahowa ahu mangalului ayat na boi mangapuli angka dongan di huria, parohon las ni roha do i tu ahu.” Hamu  angka donganta baoa, molo ditiru hamu si Vasily jala rade dipangke Jahowa, boi ma dipangke Ibana hamu laho mangulahon lam godang tanggung jawab di huria.

SONGON DIA JAHOWA MANGURUPI ANGKA BORUA?

10. Aha do na diulahon si Abigail, jala aha do parsiajaran na boi dapotmuna sian i?

10 Dilele Raja Saul do si Daud dohot angka tentarana. Alani i, porlu do nasida diurupi. Dipangido angka tentara ni si Daud ma saotik sipanganon tu sahalak Israel na mora na margoar si Nabal. Didok roha ni nasida, ndang sala nasida manjalo sipanganon sian si Nabal. Alana dijaga nasida do angka binatang ni si Nabal di adaran. Alai ndang olo si Nabal mangalehon manang aha pe. Gabe muruk situtu ma si Daud jala naeng dibunu ma si Nabal dohot angka baoa na adong di keluargana. (1 Sam. 25:3-13, 22) Alai marbisuk do istri ni si Nabal, i ma si Abigail na uli rupana. Barani do ibana manjumpangi si Daud. Marsinggang ma ibana di jolo ni si Daud, jala didok marutang mudar do si Daud molo dibunu ibana si Nabal dohot keluargana. Lambok do didok si Abigail asa marhaposan si Daud tu Jahowa. Hata ni si Abigail dohot bisukna hona do i tu roha ni si Daud. Gabe diboto si Daud ma, na disuru Jahowa do si Abigail laho paingothon ibana. (1 Sam. 25:23-28, 32-34) Ala dipatudu si Abigail do parange na denggan umbahen na dipangke Jahowa ibana. Saonari pe, boi do dipangke Jahowa angka donganta borua na marbisuk laho patoguhon keluarga ni nasida dohot angka dongan di huria.​—Poda 24:3; Tit. 2:3-5.

11. Aha do na diulahon angka boru ni si Sallum, jala ise do na maniru nasida saonari?

11 Marratus taon dungkon i, dipangke Jahowa do angka boru ni si Sallum laho padengganhon tembok ni Jerusalem. (Neh. 2:20; 3:12) Nang pe boru ni raja nasida, rade do angka boru ni si Sallum mangulahon karejo na borat jala na berbahaya. (Neh. 4:9-12) Imbar do nasida dohot angka baoa na sangap na sian Tekoa na so olo mangurupi ulaon i. (Neh. 3:5) Bayangkon ma las ni roha ni boru ni si Sallum dung sae ulaon i holan di bagasan 52 ari! (Neh. 6:15) Saonari pe, las do roha ni angka donganta borua mangurupi angka ulaon di organisasi. Umpamana, pajongjongkon dohot mangarawat angka bangunan na dipangke laho manomba Jahowa. Ala tarlatik, semangat jala setia nasida, boi ma marhasil ulaon i.

12. Songon dia Jahowa mamangke hita songon si Tabita?

12 Dijujui Jahowa do si Tabita laho mangulahon ‘godang angka na denggan jala mangurupi angka na pogos’, tarlumobi tu angka na mabalu. (Ul. 9:36) Ala burju jala parasi roha, godang do na tangis tingki mate ibana. Alai, mansai las do roha ni nasida tingki dipahehe apostel Petrus ibana. (Ul. 9:39-41) Aha do na boi taparsiajari sian si Tabita? Na poso manang na matua, baoa manang borua, sude hita boi do mangulahon angka na denggan laho mangurupi angka donganta.​—Heb. 13:16.

13. Songon dia Jahowa mamangke si Ruth nang pe parila ibana, jala aha didok ibana taringot Jahowa?

13 Sahalak donganta borua na parila na margoar si Ruth marcita-cita gabe misionaris. Tingki poso, ringgas do ibana mambagihon risalah sian jabu tu jabu. Didok ibana, “Lomo do rohangku tu ulaon on.” Alai dihilala ibana maol do mangkatai di jolo ni pintu jala paboahon tu angka halak taringot Harajaon ni Debata. Alai nang  pe parila, gabe perintis biasa do si Ruth tingki marumur 18 taon. Taon 1946, dohot ma ibana tu Singkola Alkitab Gilead Menara Pengawal jala hea do ibana ditugashon tu Hawai dohot tu Jepang. Dipangke Jahowa do ibana marbarita di angka negara i. Dung 80 taon di ulaon marbarita, didok si Ruth ma, “Sai dipatogu Jahowa do ahu. Diurupi do ahu asa unang gabe parila. Pos do rohangku, boi do dipangke Jahowa manang ise pe na marhaposan tu Ibana.”

RADE MA HAMU DIPANGKE JAHOWA

14. Hombar tu Kolosse 1:29, aha do na ingkon taulahon asa boi dipangke Jahowa?

14 Sian najolo, sai diurupi Jahowa do angka naposona laho mangulahon marragam tugas. Boi do dipangke Jahowa hamu laho mangulahon sada tugas molo rade hamu dipangke Ibana. (Jaha Kolosse 1:29.) Molo rade hamu, boi ma dipangke Jahowa hamu gabe parbarita na ringgas, guru na denggan, pangapuli di angka dongan, parkarejo na tarlatik, dongan na burju. Manang boi do hamu mangulahon tugas aha pe na dihaporluhon laho pasauthon lomo ni rohana.

15. Hombar tu 1 Timoteus 4:12, 15, aha do na ingkon dipangido angka baoa na poso tu Jahowa?

15 Tu hamu angka baoa na poso, dihaporluhon do godang baoa na rade mangulahon tanggung jawab gabe parhobas di huria. Di piga-piga huria, gumodang do sintua sian parhobas. Adong do sian hamu angka baoa na poso na rade mangulahon tanggung jawab di huria? Ra, adong piga-piga donganta baoa mandok, “Las do rohangku holan gabe penyiar.” Molo songon i do na dihilala hamu, pangido ma tu Jahowa asa rade hamu gabe parhobas jala asa margogo laho mangulahon aha pe lomo ni rohana. (Pjm. 12:1) Dihaporluhon do hamu!​—Jaha 1 Timoteus 4:12, 15.

16. Aha do na ingkon tapangido tu Jahowa jala boasa?

16 Boi do dibahen Jahowa hamu gabe manang aha pe laho pasauthon sangkapna. Alani i, pangido ma tu Ibana asa rade hamu mangulahon tugas sian Ibana, dung i pangido ma gogo na dihaporluhon hamu laho mangulahon i. Na poso manang naung matua, pangke ma tingki, gogo, bakat, dohot artamuna laho pasangaphon Jahowa saonari. (Pjm. 9:10) Unang ma pintor dijua hamu sada tugas na dilehon Jahowa tu hamu ala didok rohamu ndang tolap hamu mangulahon i. Hak istimewa na mansai arga do boi mangulahon manang aha pe laho pasangaphon Jahowa!

ENDE 127 Ingkon Songon dia Parangengku

^ par. 5 Hirim do rohamu mangulahon godang tugas sian Jahowa? Hea do didok rohamu na so dipangke Jahowa be hamu? Manang hea do didok rohamu nunga sae be na diulahon hamu tu Jahowa? Di parsiajaran on, taulas ma songon dia Jahowa marhite marragam cara mambahen hita rade jala mampargogoi hita laho mangulahon tugas na sian Ibana.

^ par. 3 Nang pe tu halak Kristen di abad na parjolo dibahen si Paulus surat on, alai marlangku do i tu sude naposo ni Jahowa sahat tu saonari.