”Unang ma dirimpu rohamuna, na mamboan dame Ahu, umbahen na ro tu tano on; ndada na ro Ahu mamboan dame, tung podang do!”​—MAT. 10:34.

ENDE: 43, 24

1, 2. (a) Dame na songon dia do na tahilala saonari? (b) Aha do na boi mambahen hita holsoan saonari? (Ida gombar di mula ni parsiajaran.)

LOMO do rohanta asa dame ngolunta, jala tapasiding do angka na mambahen hita holsoan. Alani i, mandok mauliate do hita ala dilehon Jahowa do tu hita ”dame ni Debata”. On boi mangurupi hita asa unang holsoan manang marsak. (Plp. 4:6, 7) Ala nunga talehon ngolunta tu Jahowa, gabe ”mardame ma hita dohot Debata”. Lapatanna, boi maraleale tu Ibana.​—Rom 5:1.

2 Alai, ndang tingkina dope Debata parohon dame di tano on. Ala mangolu di tingki parpudi, godang do hasusaan na mambahen hita holsoan. Godang do parjahat di humaliangta. (2 Tim. 3:1-4) Ingkon marsitutu do hita muse mangalo Sibolis dohot ajaranna. (2 Kor. 10:4, 5) Alai adong dope na mambahen hita holsoan, i ma paraloan sian keluarganta na so manomba Jahowa. Olo do ra  direhei nasida hita alani haporseaonta, manang didok ma hita mamolamola keluarga. Asing ni i, olo do gabe ndang dietong be hita keluarga ni nasida. Songon dia do molo masa i tu hita? Jala songon dia do asa dame pingkiranta di tingki sisongon i?

SONGON DIA DO HITA MANGADOPI PARALOAN SIAN KELUARGANTA?

3, 4. (a) Aha do pangkorhonna molo mangihuthon Jesus? (b) Aha do na mambahen gabe maol mangihuthon Jesus?

3 Diboto Jesus do ndang sude halak olo manjangkon ajaranna. Diboto ibana do muse, na laho adong do paraloan tu angka siseanna. Alani i, ingkon barani do nasida. Alana, boi do on mambahen keluarga ni nasida gabe ndang dame. Jesus mandok, ”Unang ma dirimpu rohamuna, na mamboan dame Ahu, umbahen na ro tu tano on; ndada na ro Ahu mamboan dame, tung podang do! Ai na ro do Ahu pabadahon anak tu amana, boru tu inana, parumaen tu simatuana boru; jala tung donganna sajabu gabe musu ni jolma i.”​—Mat. 10:34-36.

4 Tingki didok Jesus, ”Unang ma dirimpu rohamuna, na mamboan dame Ahu”, aha do lapatanna? Lapatanna, sai na adong do paraloan tu angka siseanna. Tutu, laho mangajarhon hasintongan do Jesus, ndang na laho mamolamola keluarga. (Joh. 18:37) Alai porlu do botoon ni angka siseanna, ndang mura laho mangihuthon ibana. Tarlumobi molo ndang mananda hasintongan dope dongan manang keluarga ni nasida.

5. Aha do na masa tu halak na mangihuthon Jesus?

5 Songon na didok ni Jesus, sai na adong do paraloan sian keluarga jala ingkon sabar do hita mangadopi i. (Joh. 15:20) Asa boi mambahen las rohana, ingkon sabar do angka siseanna tingki direhei manang tingki dihasogohon keluarga. Alai, dapoton ni nasida do gumodang keluarga sian angka na manadingkon nasida.​—Jaha Markus 10:29, 30.

6. Aha do na ingkon taingot molo marsogo ni roha keluarganta tu hita?

6 Nang pe sogo roha ni keluarganta ala manomba Jahowa hita, tongtong ma tahaholongi nasida. Alai taingot ma, ingkon umbalga do holongta tu Debata dohot tu Jesus sian tu manang ise pe. (Mat. 10:37) Alai, ingkon manat do hita. Boi do dipangke Sibolis holongta tu keluarga gabe dalan laho mambahen hita ndang marsihohot be tu Jahowa. Taulas ma pigapiga situasi na maol taadopi jala songon dia mangadopi i. 

DONGAN SARIPE NA SO SITINDANGI

7. Songon dia do molo ndang sisomba Jahowa dongan saripenta?

7 Nunga dipaboa Bibel hian, molo sasahalak na marhasohotan ingkon ”marniae di daging”, manang mangadopi hasusaan. (1 Kor. 7:28) Tamba do arsak ni roha molo marhasohotan tu na so manomba Jahowa. Alai, ringkot do hamu mangida situasina dos songon cara ni Jahowa. Diorai Jahowa do naposoNa marsirang manang padaodao holan ala ndang sahaporseaon.  (1 Kor. 7:12-16) Molo ndang sisomba Jahowa tungganedolimuna, ingkon tongtong do hamu unduk tu ibana, ala ibana do kepala keluarga. Manang, molo ndang sisomba Jahowa tungganeborumuna, sarihon ma jala haholongi ma ibana.​—Eps. 5:22, 23, 28, 29.

8. Molo ndang diloas dongan saripenta hita jotjot mangulahon ulaon partondion, sungkunsungkun aha do na boi tasungkun tu dirinta?

8 Aha do na boi ulahononmuna, molo ndang diloas dongan saripemuna hamu jotjot mangulahon ulaon partondion? Songon na masa tu sahalak donganta borua. Holan pigapiga ari di bagasan saminggu do ibana diloas tungganedolina marbarita. Molo songon i do na masa tu hamu, sungkun ma di rohamuna, ’Na diorai dongan saripengku do ahu manomba Jahowa? Molo ndang, boi do huoloi pangidoanna i?’ Molo marbisuk do hamu tingki mangadopi i, gabe lam otik ma parsoalan di parsaripeonmuna.​—Tit. 3:2.

9. Songon dia do hita boi mangajari ianakhonta asa mangargai natuatuana na so sisomba Jahowa?

9 Ndang mura mangajari ianakhon molo ndang sisomba Jahowa dongan saripenta. Umpamana, ingkon taajari do ianakhonta mangoloi hata ni Bibel na mandok, ”Parsangapi amangmu dohot inangmu!” (Eps. 6:1-3) Hape ndang mangihuthon prinsip ni Bibel dongan saripenta. Aha ma na boi taulahon? Gabe sitiruon na denggan ma hita tu ianakhonta. Patudu ma pangargaion tu dongan saripemuna. Dok ma mauliate tu ibana, jala puji ma parangena na denggan. Unang ma paboa angka hasalaanna tu ianakhonmuna. Alai paboa ma tu ianakhonmuna, ganup halak boi do mamillit laho manomba Jahowa manang ndang. Molo taulahon songon i, boi ma taronjar roha ni dongan saripenta laho marsiajar taringot Jahowa.

Ajari ma ianakhonmuna laho mananda hasintongan (Ida paragraf 10)

10. Songon dia do natuatua na manomba Jahowa mangajari ianakhonna asa mangkaholongi Jahowa?

 10 Olo do ra dongan saripenta na so sisomba Jahowa, manuru ianakhonta asa dohot marari raya manang mangulahon ajaran agama palsu. Pigapiga tungganedoli na so manomba Jahowa, mangorai tungganeboruna mangajarhon Bibel tu ianakhonna. Alai nang pe songon i, ingkon tongtong do diajarhon hamu hasintongan tu ianakhonmuna. (Ul. 16:1; 2 Tim. 3:14, 15) Umpamana, adong do tungganedoli na mangorai tungganeboruna mangajarhon Bibel tu ianakhonna manang mamboan nasida marpungu. Nang pe mangargai tungganedolina, ingkon marbisuk do tungganeboru i paboahon haporseaonna tu ianakhonna. Molo diulahon ibana i, boi ma botoon ni ianakhonna dia na sintong dohot dia na so sintong di Jahowa. (Ul. 4:19, 20) Ujungna, boi ma dipillit nasida laho manomba Jahowa manang ndang. *5 Mus. 30:19, 20.

KELUARGA NA MARSOGO NI ROHA TU HASINTONGAN

11. Aha do na boi mambahen sogo roha ni keluarganta na so manomba Jahowa?

11 Ra tingki baru marsiajar hita, ndang tapaboa tu keluarganta. Alai dung tamba haporseaonta, taboto ma ringkot do paboahon tu nasida na laho manomba Jahowa do hita. (Mrk. 8:38) Molo marsihohot hita tu Debata, boi do gabe tubu parsoalan di keluarganta. Taulas ma cara asa tongtong mardame dohot keluarga jala tongtong marsihohot tu Jahowa.

Molo tatangihon nasida, taboto ma cara na dumenggan laho mangurupi nasida mananda hasintongan

12. Boasa adong keluarga na so marlomo ni roha molo hita manomba Jahowa? Jala songon dia do caranta mangadopi i?

12 Antusi ma pangkilalaan ni keluarganta na so sisomba Jahowa. Las do rohanta mananda hasintongan. Alai olo do dirimpu keluarganta na diotootoi do hita. Manang olo do ra didok rohanasida na mangihuthon ajaran na so sintong do hita. Ala ndang dohot be hita marari raya, olo do didok rohanasida na so holong be rohanta tu nasida. Jala didok rohanasida, uhumon ni Debata do hita molo dung mate. Alani i, denggan ma tangihon nasida asa boi taantusi pangkilalaan ni nasida. (Poda 20:5) Songon apostel Paulus, marsitutu do ibana mangantusi pangkilalaan ni ”sasude” jolma. Gabe boi ma ibana marbarita na uli tu nasida. Molo taulahon songon i, boi ma taboto cara na dumenggan laho mangurupi nasida mananda hasintongan.​—1 Kor. 9:19-23.

13. Songon dia do caranta mangkatai tu keluarga na so manomba Jahowa?

 13 Lambok ma mangkatai. Songon na dipaboa di Bibel, ”Sai tong ma lambok hatamuna.” (Kol. 4:6) Tutu, ndang mura mangulahon on. Alai boi do tapangido tondi parbadia ni Jahowa, asa boi hita lambok jala burju tu keluarga na so manomba Jahowa. Unang ma gabe marsoal hita dohot nasida laho patorangkon angka na sala di haporseaon ni nasida. Tingki hansit rohanta alani hata dohot parniulaon ni nasida, tatiru ma angka apostel. Si Paulus mandok, ’[Tingki] diinsahi hami, mamasumasu hami; dilelei hami, sabar do hami; diparoaroa hami, mangelehelek do hami.’​—1 Kor. 4:12, 13.

14. Aha do labana patuduhon pangalaho na denggan?

14 Tongtong ma burju. Boasa ringkot? Boi do dame keluarganta molo lambok hita mangkatai. Alai umbalga do pangkorhonna molo burju hita. (Jaha 1 Petrus 3:1, 2, 16.) Patudu ma tu keluarganta, marlas ni roha do hita ala manomba Jahowa. Denggan ma ajari ianakhonmuna, jala ihuthon ma prinsip ni Bibel di parngoluonmuna. Nang pe ndang taronjar roha ni nasida laho mamboto hasintongan, alai boi do hita marlas ni roha. Alana, las do roha ni Jahowa mangida hita molo denggan pangalahonta.

15. Aha do na boi taulahon asa unang marsoal dohot keluarga?

15 Parade ma hatamuna. Pingkiri hian ma songon dia cara asa unang marsoal dohot keluarga. Dung i, ulahon ma. (Poda 12:16, 23) Parrohahon ma na diulahon donganta borua di Australia. Alani hasintongan, sogo do roha ni simatuana doli tu nasida. Olo do simatuana murukmuruk. Andorang so dijumpangi nasida simatuana, martangiang ma ibana dohot tungganedolina asa lambok mangalusi hata ni simatuana. Dipingkiri nasida hian do aha sidohonon ni nasida, i ma angka na pasonangkeon roha ni simatuana. Alai sogo do roha ni simatuana mangkatahatai taringot agama. Alani i, diatur nasida ma sadia leleng nasida mangkatahatai dohot simatuana.

Ingkon umbalga do holongta tu Jahowa sian tu keluarga

16. Songon dia do asa unang sai manolsoli hita, ala ndang boi pasonangkon keluarga?

16 Ndang sai boi tapasiding parsoalan dohot keluarga na so Sitindangi. Olo do gabe manolsoli hita ala ndang boi pasonangkon roha ni nasida. Alai ingot ma, ingkon umbalga do holongta tu Jahowa sian tu keluarga. Tingki diida keluargamuna na marsihohot do hamu, diantusi nasida ma ringkot ni manomba Jahowa. Ndang boi tapaksa manang ise pe laho manjangkon hasintongan. Alai sian parniulaonta, diida nasida ma, mangoloi Jahowa parohon laba tu hita. Sasintongna, dilehon Jahowa dope tingki tu nasida asa mamillit manomba Ibana songon naung taulahon.​—Jes. 48:17, 18.

 TINGKI ADONG KELUARGANTA NA MANADINGKON JAHOWA

17, 18. Aha do na boi mangurupi hita tingki adong keluarganta na manadingkon Jahowa?

17 Hansit do tahilala molo adong keluarganta na dipecat manang papulikkon diri sian huria. Olo do hira na ditiham hansitna. Songon dia do hita asa boi sabar manaon i?

18 Tongtong ma marhobas tu Jahowa. Tingki masa sisongon i, ringkot do tapatogu haporseaonta. Jaha ma Bibel ganup ari, parade ma angka na hombar tu parpunguan, tongtong ma marbarita na uli, jala pangido ma gogo sian Jahowa. (Jud. 20, 21) Alai songon dia do molo nunga diulahon hamu sudena i, alai tong dope marsak hamu? Unang ma mandele! Tongtong ma marhobas tu Jahowa asa moru arsakmuna. Boi do annon salpu arsakmuna i. Ingot ma na masa tu panurat Psalmen 73. Hea do marsak ibana ala ndang boi mangarajai pingkiranna. Alai ala tongtong manomba Jahowa, boi ma salpu arsakna i. (Ps. 73:16, 17) Hita pe boi do songon i. 

19. Songon dia do hita mangihuthon cara ni Jahowa maminsang naposoNa?

19 Ihuthon ma sipasingot ni Jahowa. Diboto Debata do na marlaba sipasingotNa i tu halak na dipecat nang tu keluargana. Hansit do tahilala tingki adong halak na tahaholongi dipinsang. Alai pos ma rohanta, boi do on mangurupi ibana mulak tu Jahowa. (Jaha Heber 12:11.) Huhut paimahon ibana mulak, taihuthon ma poda ni Jahowa na mandok, ”na so jadi saor hamu” tu halak na dipecat. (1 Kor. 5:11-13) Ndang mura mangulahon i. Alai ingkon marsitutu do hita asa unang marsaor dohot nasida marhite telepon, sms, surat, manang internet.

Mangkirim ma hita asa mulak halak na tahaholongi i tu Debata Jahowa

20. Aha do na ingkon tahirim?

20 Tongtong ma mangkirim! Saluhutna do ”dihirimi” holong. Alani i, mangkirim ma hita asa mulak halak na tahaholongi i tu Debata Jahowa. (1 Kor. 13:7) Molo taida adong hamubaonna, tatangiangkon ma asa tongtong ibana togu jala manjangkon hata ni Jahowa na mandok, ”Sai mulak ma ho tu ahu.”​—Jes. 44:22.

21. Aha do na ingkon taulahon molo sogo roha ni keluarganta tu hita alani hasintongan?

21 Jesus paboahon, ingkon umholong do rohanta tu ibana sian tu sude halak. Pos do roha ni Jesus, boi do togu siseanna nang pe adong paraloan sian keluarga. Alani i, molo adong keluarganta na marsogo ni roha tu hita alani hasintongan, tapangasahon ma Jahowa. Pangido ma pangurupionNa asa boi tongtong martahan. (Jes. 41:10, 13) Las do roha ni Jahowa dohot Jesus molo marsihohot hamu. Jala lehonon ni nasida ma pasupasu tu hamu.

^ par. 10 Laho mandapot gumodang hatorangan taringot cara mangajari ianakhon, molo ndang Sitindangi dongan saripenta, ida ma ”Pertanyaan Pembaca” di Menara Pengawal 15 Agustus 2002.