Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Linggoman ni Raja dohot Hureta do Hamu

Linggoman ni Raja dohot Hureta do Hamu

”I ma na masa sogot, molo tung tangkas ditangihon hamu suara ni Jahowa, Debatamuna i.”​—SAK. 6:15.

ENDE: 17, 136

1, 2. Songon dia do situasi ni halak Jahudi tingki dapotan parnidaan na papituhon si Sakaria?

TONTU dipatogu do roha ni si Sakaria dung mangida parnidaan na papituhon. Las do rohana mamboto na laho uhumon ni Jahowa do angka halak na mangulahon na jahat. Alai, ndang muba dope situasi tingki i. Tongtong dope godang na mangulahon na jahat. Jala ndang marnasae dope bagas joro dipauli di Jerusalem. Boasa pintor ndang olo be halak Jahudi mangulahon parenta ni Jahowa? Na laho mangkaringkothon dirina sandiri do nasida umbahen na mulak tu Jerusalem?

2 Diboto si Sakaria do, angka sisomba Jahowa do na mulak tu Jerusalem tingki i. Jala nasida ma angka ”na pinahehe ni Jahowa rohana” laho manadingkon jabu dohot bisnisna di Babel. (Esr. 1:2, 3, 5, Bibel siganup ari) Olo do nasida pinda sian inganan naung leleng diingani  nasida tu inganan na so hea dope diida nasida. Rade do nasida mardalan hirahira 1.600 kilometer. Gok do parjahat dohot mara disi. On patuduhon na ringkot do di nasida pajongjongkon bagas joro ni Jahowa.

3, 4. Angka aha do ambatambat na diadopi halak Jahudi na mulak tu Jerusalem?

3 Rimangi ma songon dia daona sian Babel tu Jerusalem. Saleleng di pardalanan, godang do na boi dipingkiri jala dihatai nasida taringot inganan nasida haduan. Dipaboa angka na matua ma songon dia uli ni Jerusalem dohot bagas joro najolo. (Esr. 3:12) Molo rap hamu dohot nasida tingki i, songon dia do pangkilalaanmuna mangida Jerusalem? Nunga tarulang huta i, gok ramba jala angka tembokna pe nunga marumpak. Malengleng do ateatemuna mangida i? Ra gabe dipatudos hamu ma i tu tembok ni Babel na togu. Alai nang pe songon i, ndang marmetmet ni roha halak Jahudi. Boasa? Ala diurupi jala dilinggomi Jahowa do nasida saleleng di pardalanan. Dung sahat di Jerusalem, pintor dibahen nasida do langgatan di bagas joro najolo. Jala ganup ari ma nasida mangalehon pelean tu Jahowa. (Esr. 3:1, 2) Las do roha ni nasida mangulahon i. Hira na so adong do na boi mangambati nasida.

4 Huhut paulihon bagas joro, ingkon paulion ni nasida do huta i dohot jabunasida. Ingkon mangula do nasida asa boi mangan. (Esr. 2:70) Tangkas ma, godang do ulaon ni nasida. Alai ndang sadia leleng, ro ma musu manggugai nasida. Masa ma i saleleng 15 taon. Lam leleng, lam marmetmet ni roha ma nasida. (Esr. 4:1-4) Asing ni i, diorai raja Persia ma muse nasida paulihon bagas joro di taon 522 SM. Molo taida godang ni ambatambat i, ndang na laho boi paulion nasida huta i.​—Esr. 4:21-24.

5. Songon dia do Jahowa mangurupi naposoNa?

5 Dihaporluhon nasida do gogo dohot habaranion. Alani i, dilehon Jahowa ma parnidaan na parpudi tu si Sakaria. On paposhon roha ni nasida, na holong do roha ni Jahowa tu nasida, jala diargai Jahowa do sude na dibahen nasida. Marjanji do Jahowa, linggomanNa do nasida molo olo muse nasida mangulahon parenta ni Jahowa i. Jala didok Jahowa do tu nasida, boi do jongjong bagas joro i molo ’ditangihon nasida suara ni Jahowa, Debatanasida’.​—Sak. 6:15.

ANGKA SURUSURUAN NA MARHURETA

6. (a) Songon dia do parnidaan ni si Sakaria na parpudi? (Ida gombar di mula ni parsiajaran.) (b) Boasa marasingasing warna ni hoda i?

6 On ma parnidaan ni si Sakaria na paualuhon jala na parpudi. Lam togu ma haporseaon ni nasida alani i. (Jaha Sakaria 6:1-3.) Rimangi ma parnidaan on. Marlojong ma angka hoda mamboan opat hureta ’sian holangholang ni dua dolok’ tombaga. Marasingasing do warna ni hoda i, ala ndang sarupa luat na laho sidalananna. Disungkun si Sakaria ma ”Dia do lapatan ni angka i?” (Sak. 6:4) Tontu hita pe lomo do rohanta mamboto alusna, alana mangkorhon do on tu hita.

7, 8. (a) Aha do na digombarhon dua dolok di parnidaan ni si Sakaria? (b) Boasa sian tombaga dibahen dolok i?

 7 Di Bibel, jotjot do hata dolok dipangke laho manggombarhon harajaon manang pamarentaon. Dos do dua dolok di parnidaan ni si Sakaria tu dolok na di buku Daniel. Sada sian dolok i manggombarhon pamarentaon ni Jahowa na manongtong. Na sada nai, manggombarhon Harajaon ni Messias, jala Jesus ma Rajana. (Dan. 2:35, 45) Di ujung ni taon 1914, marharajaon ma Jesus. Mulai sian i, nunga jongjong be harajaon na dua i. Boi ma harajaon na dua i manggohi sangkap ni Debata di tano on.

Dipangke Jahowa dope surusuruanNa laho mangalinggomi jala patoguhon naposoNa

8 Boasa sian tombaga dolok i dibahen? Ala marhillong jala arga do tombaga. Najolo, disuru Jahowa do halak Israel mamangke tombaga laho mambahen undungundung (tabernakel), dohot bagas joro. (2 Mus. 27:1-3; 1 Raj. 7:13-16) On patuduhon sun denggan do pamarentaon ni Jahowa dohot Harajaon ni Messias. Dame ma ngolunta, marlas ni roha jala gok ma pasupasu na tahilala.

9. Ise do na manghunduli hureta i? Jala aha do na laho ulahonon ni nasida?

9 Aha do na digombarhon hureta dohot na mangkunduli i? Angka surusuruan do na manghunduli hoda i. Ra pigapiga punguan sian surusuruan. (Jaha Sakaria 6:5-8.) Laho ma nasida sian ”lambung ni Tuhan sigomgom liat portibi on”. Disuru do nasida laho mangalinggomi naposo ni Debata, tarlumobi sian Babel na didok ”tano tungkan utara”. Marhite parnidaan on dipaboa Jahowa ma tu bangsoNa, ndang na laho mulak be nasida tu Babel laho gabe hatoban. Tontu dipatogu do roha ni halak Israel na laho paulihon bagas joro tingki i! Pos ma roha ni nasida ndang adong na boi mangambati nasida.

10. Aha do pangkorhon ni surirang ni si Sakaria tu hita saonari?

10 Saonari pe, dipangke Jahowa do surusuruanNa laho mangalinggomi jala patoguhon naposoNa. (Mal. 3:6; Heb. 1:7, 14) Di taon 1919, dipalua ma naposo ni Jahowa sian pangkorhon ni Babel na Balga. Marsitutu do angka musu laho mangambati organisasi ni Jahowa asa unang lam balga. (Pgk. 18:4) Alai ndang marhasil nasida. Dilinggomi surusuruan do organisasi ni Jahowa. Alani i, unang ma mabiar hita, ndang laho tabanon ni agama palsu be hita. (Ps. 34:8) Las ma rohanta jala ringgas ma hita mangulahon panombaonta tu Jahowa. Surirang ni si Sakaria paposhon rohanta na tarlinggom do hita binahen ni dua dolok i.

11. Boasa ndang porlu hita mabiar tingki ro paraloan tu naposo ni Debata?

11 Satongkin nai, marsada ma angka  bangso di portibi ni Sibolis laho mangalo naposo ni Debata. (Hes. 38:2, 10-12; Dan. 11:40, 44, 45; Pgk. 19:19) Di surirang ni si Hesekiel taida, dos songon ombun na manutupi tano do haroro ni nasida. Marhoda do nasida jala marrimas laho mangalo naposo ni Debata. (Hes. 38:15, 16) * Pola do mabiar hita tu nasida? Ndang! Linggoman ni tentara ni Jahowa do hita. Di haporsuhon bolon, linggoman ni angka surusuruan ma naposo ni Jahowa jala ropuhanNa ma angka na mangalo tu pamarentaon ni Jahowa. (2 Tes. 1:7, 8) I ma ari na palongang roha! Alai ise do na manguluhon tentara ni Jahowa di tingki i?

DIPILLIT JAHOWA MA NA LAHO GABE RAJA JALA MALIM

12, 13. (a) Aha do na laho ulahonon ni si Sakaria? (b) Boasa boi tadok Jesus Kristus do Tunas i?

12 Holan si Sakaria do na mangida parnidaan na ualu i. Alai adong do na patoguhon roha ni angka halak na dohot paulihon bagas joro i. (Jaha Sakaria 6:9-12.) Disuru Jahowa ma si Sakaria asa mambuat perak dohot sere (mas) sian si Helda, si Tobia dohot si Jedaia, na ro sian Babel. Jala disuru ma ibana asa mambahen i gabe ”tumpal” manang mahkota. (Sak. 6:11) Ala Gubernur Serubabel do pinompar ni si  Daud, tu ibana do dilehon mahkota i? Daong. Disuru Jahowa do si Sakaria asa mangalehon tumpal i tu Sintua ni Malim, i ma si Josua. Tontu, songgot do roha ni angka halak mangida i.

13 Na laho gabe raja do si Josua, Sintua ni Malim i? Daong. Ndang pinompar ni si Daud ibana, jadi ndang marhak ibana gabe raja. Tingki dilehon tumpal i tu ibana, on manggombarhon na laho masa di ari na naeng ro. Adong sasahalak na digoari Tumbur manang Tunas na laho gabe raja jala malim. Bibel paboahon, Jesus Kristus do Tunas i.​—Jes. 11:1; Mat. 2:23.

14. Ala Jesus do Raja jala Sintua ni Malim, aha do siulahononna?

14 Jesus ma na didok Raja jala Sintua ni Malim. Ibana do na manguluhon tentara ni Jahowa, i ma angka surusuruan. Linggomanna ma angka naposo ni Debata asa mangkilala hadameon nang pe mangolu di portibi na jahat. (Jer. 23:5, 6) Satongkin nai, taluhononna ma sude angka bangso jala linggomanna ma naposo ni Jahowa. (Pgk. 17:12-14; 19:11, 14, 15) Alai saonari, adong do ulaon na ringkot na ingkon ulahonon ni Jesus manang Tunas i.

PAJONGJONGON NI JESUS MA JORO I

15, 16. (a) Songon dia do naposo ni Debata diurupi asa boi manomba Debata mamangke cara na sintong, jala marhite ise? (b) Songon dia do tano on di ujung ni Pamarentaon Saribu Taon?

15 Ala Jesus do na gabe Raja jala Sintua ni Malim, disuru ma ibana ’paulihon joro ni Jahowa’. (Jaha Sakaria 6:13.) Diulahon Jesus ma i taon 1919. Dipalua ma naposo ni Debata sian pangkorhon ni Babel na Balga, i ma agama palsu. Dipauli ma huria jala dipillit ma ”naposo haposan jala na marroha”. Punguan on ma na manguluhon ulaon na mansai ringkot di tano on, hombar tu panombaon na sintong, na digombarhon gabe joro di parnidaan ni si Sakaria. (Mat. 24:45) Diurupi Jesus do muse naposo ni Debata asa boi manomba Debata mamangke cara na sintong.​—Mal. 3:1-3.

16 Mamarenta ma Kristus dohot 144.000 donganna raja jala malim saleleng saribu taon. Di tingki i, urupan ni nasida ma halak na marsihohot asa boi malua sian dosa saratus porsen. Dung marujung harajaon saribu taon, holan  angka na manomba Jahowa ma na mangolu di tano on. Ujungna, holan panombaon na sintong ma na adong di tano on!

PARSIDOHOT PAULIHON BAGAS JORO

17. Aha do na didok Jahowa tu halak Jahudi? Jala aha do pangkorhonna tu nasida?

17 Aha do pangkorhon ni hata ni si Sakaria tu halak Jahudi di tingki i? Gabe togu do roha ni nasida. Nunga marjanji Jahowa, sai na linggomanNa jala urupanNa do nasida pasaehon joro i. Alai ra sungkunsungkun do roha ni nasida, songon dia do bahenon ni nasida pasaehon ulaon na balga i, hape holan saotik do nasida. Didok Jahowa ma, ”Ro do huhut halak sian tano na dao naeng parsidohot pauli bagas joro ni Jahowa sogot” dos songon si Helda, si Tobia dohot si Jedaia. Gabe pos ma roha ni halak Jahudi. (Jaha Sakaria 6:15.) Olo do nasida pajongjongkon bagas joro i muse nang pe diorai raja Persia. Dos do on songon dolok na mangambati nasida, alai dipasiding Jahowa do dolok i. Ujungna, taon 515 SM sae ma bagas joro i. (Esr. 6:22; Sak. 4:6, 7) Alai, adong do pangkorhon ni hata i tu hita saonari.

Ndang lupahonon ni Jahowa holong na tapatudu tu Ibana! (Ida paragraf 18, 19)

18. Songon dia do Sakaria 6:15 digonopi di tingkinta saonari?

18 Saonari, marjuta halak manomba Jahowa. Las do roha ni nasida mangalehon ”hamoraon” ni nasida, songon tingki, gogo, dohot arta tu Jahowa. On patuduhon na parsidohot do nasida pajongjongkon joro na digombarhon di parnidaan ni si Sakaria. (Poda 3:9) Las do roha ni Jahowa mangida i. Ingot ma, perak dohot mas na binuat ni si Sakaria sian si Helda, si Tobia dohot si Jedaia dibahen gabe tumpal. Tumpal i bahen ”parningotan” di silehonlehon ni nasida tu panombaon na sintong. (Sak. 6:14) On patuduhon ndang lupahonon ni Jahowa sude na tabahen dohot holongta tu Ibana.​—Heb. 6:10.

Las do rohanta ala dohot di organisasi na dame jala manongtong

19. Aha do pangkorhon ni parnidaan ni si Sakaria tu hita?

19 Di tingki parpudi on, godang do na diulahon naposo ni Jahowa. Ndang boi nasida mangulahon i molo ndang alani pasupasu ni Jahowa dohot panogunoguon ni Kristus. Las do rohanta parsidohot tu organisasi na dame jala na manongtong. Jala taboto do sai na saut do sangkap ni Jahowa. Alani i, manang aha pe tanggung jawabta di organisasi ni Jahowa, ringgas ma hita mangulahon i. ’Tangihon hamu ma suara ni Jahowa Debatamuna’. Molo taulahon on, tadapot ma parlinggoman sian Rajanta na gabe Sintua ni Malim, dohot sian angka surusuruan. Taulahon ma nasa na boi taulahon di panombaon na sintong. Sai na linggoman ni Jahowa do hita sahat tu na ro ajal ni hasiangan on, ro di saleleng ni lelengna!

^ par. 11 Laho mangida gumodang hatorangan ida Pertanyaan Pembacadi Menara Pengawal, 15 Mei 2015 halaman 29-30.