Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  Oktober 2016

Marhaporseaon ma Hamu tu Janji ni Jahowa

Marhaporseaon ma Hamu tu Janji ni Jahowa

”Haporseaon i . . . pamotoan na tontu taringot tu na so niida.”—HEB. 11:1.

ENDE: 54, 43

1. Songon dia do pangkilalaanta taringot tu haporseaonta?

NDANG sude jolma marhaporseaon. (2 Tes. 3:2) Alai, dilehon Jahowa do haporseaon tu sude na manomba Ibana. (Rom 12:3; Gal. 5:22) Mandok mauliate do hita ala dilehon Jahowa haporseaon tu hita!

2, 3. (a) Aha do labana molo marhaporseaon hita? (b) Sungkunsungkun aha do na laho taulas?

2 Dilehon Jahowa do Jesus asa boi disalpuhon dosa ni sude halak na marhaporseaon. On mambahen hita boi maraleale tu Jahowa jala mangolu salelengna. (Joh. 6:44, 65; Rom 6:23) Mansai burju do Jahowa tu hita! Nang pe mardosa hita jala ingkon mate, diboto Jahowa do na boi hita mangulahon na denggan. (Ps. 103:10) Diurupi Ibana do hita mamboto taringot Jesus dohot tobusan. Molo marhaporseaon hita tu Jesus jala mangihuthon ibana, marpangkirimon ma hita tu ngolu salelengna!—Jaha 1 Johannes 4:9, 10.

3 Aha do muse na taparsiajari taringot haporseaon? Molo nunga taboto angka naung dibahen Debata tu hita  saonari dohot di ari na naeng ro, i do lapatan ni marhaporseaon? Taida ma muse na ingkon taulahon.

MARHAPORSEAON SIAN IAS NI ROHA

4. Molo marhaporseaon, aha do pangkorhonna tu hita?

4 Molo marhaporseaon tu Jahowa dohot Jesus, ndang sae holan mamboto na diulahon nasida tu hita saonari dohot di ari na naeng ro. Alai, ingkon hombar ma parngoluonta tu na diajarhon nasida. Marhiras ni roha ma hita mangurupi na asing asa mananda nasida. Didok apostel Paulus, ”Malua ma ho, molo diparhatopot pamanganmi Tuhan Jesus i, huhut dihaporseai roham, naung dipahehe Debata Ibana sian angka na mate. Roha i do porsea, asa tu hatigoran; pamangan i do mangkatindangkon, asa tu haluaon.”—Rom 10:9, 10; 2 Kor. 4:13.

5. Boasa ringkot haporseaon i, jala aha do na ingkon taulahon asa tongtong togu haporseaonta? Bahen ma tudosan.

5 Asa boi mangolu salelengna di tano na imbaru, ingkon tajaga do asa tongtong togu haporseaonta. Haporseaon i dos songon suansuanan. Asa denggan tubu, ingkon jotjot do tasiram. Molo ndang tasiram, boi do gabe malos jala mate. Suang songon i, ingkon taparrohahon do haporseaonta asa tongtong denggan jala lam togu.—Tit. 2:2; 2 Tes. 1:3; Luk. 22:32; Heb. 3:12.

DIPABOA DO DI BIBEL LAPATAN NI HAPORSEAON

6. Aha do na dipaboa di Heber 11:1 taringot haporseaon?

6 Di Heber 11:1, dipaboa Bibel do lapatan ni haporseaon. (Jaha.) (1) Haporseaon, i ma ”pos ni roha . . . di angka sihirimon”. Na didok ”sihirimon”, i ma janji ni Debata taringot ari na naeng ro. Umpamana, porsea do hita na laho pasohotonNa hajahaton jala adong tano na imbaru. (2) Haporseaon, i ma ”pamotoan na tontu” manang bukti ”taringot tu na so niida”. Taboto, adong do Debata Jahowa, Jesus Kristus, surusuruan, dohot Harajaon di banua ginjang, nang pe ndang boi taida. (Heb. 11:3) Songon dia do patuduhon na marhaporseaon hita tu janji ni Debata dohot tu na so boi taida? Tapatudu ma i marhite pangkataion dohot parniulaonta.

7. Songon dia do sitiruon sian si Noak mangurupi hita mangantusi lapatan ni marhaporseaon? (Ida gombar di mula ni parsiajaran.)

7 Aha do na taparsiajari sian si Noak taringot haporseaon? Didok apostel Paulus, ”Dijalo si Noak poda taringot tu na so dapot idaon dope, gabe mabiar ibana, jala dipauli parau i, bahen haluaan ni nasida na sajabu.” (Heb. 11:7) Ala porsea si Noak tu Hata ni Jahowa, dibahen ma parau na balga. Ra, disungkun angka donganna do boasa dibahen ibana parau i. Alai, pos do rohanta ndang sip si Noak, ala didok di Bibel, ”parjamita hatigoran” do ibana. (2 Ptr. 2:5) Dipaboa ibana do tu angka jolma na laho ripashonon ni Debata angka parjahat marhite aek na sumar. Ra, dipaboa do muse na didok Jahowa tu ibana, ”Nunga ro ajal ni nasa na mardaging maradophon Ahu, ai nunga gok hajahaton tano on dibahen  nasida.” Didok muse, ”Paroonku ma tu tano on aek na sumar laho mangaripashon nasa na mardaging, na marhosa hangoluan di bagasan, angka na di toru ni langit, asa tos hosa ni saluhut na di tano on.” Dipaboa si Noak ma tu nasida na porlu diulahon asa boi malua. Nunga didok Jahowa, ”Bongotanmu ma parau i.”—1 Mus. 6:13, 17, 18.

8. Aha do na didok si Jakobus taringot haporseaon?

8 Si Jakobus pe manurat taringot haporseaon. Ra, disurat ibana on dung ditongos si Paulus surat tu halak Kristen di Heber. Si Jakobus manurat, ”Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku.” (Jak. 2:18) Didok ibana, asa boi marhaporseaon, ndang sae holan porsea. Angka begu pe porsea do na adong Debata, alai ndang marhaporseaon nasida jala dialo do Jahowa. (Jak. 2:19, 20) Molo marhaporseaon sasahalak, diulahon do na denggan na mambahen las roha ni Jahowa. On ma na diulahon si Abraham. Si Jakobus manurat, ”Nda gabe tigor si Abraham, amanta i, marhite sian ulaon, di na binoanna i si Isak, anakna i, tu pamelean? Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i.” Dipaboa muse, marisuang do haporseaon i molo so adong parniulaon. Didok ibana, ”Songon daging i na mate, anggo so martondi; songon i do mate haporseaon na so marulaon.”—Jak. 2:21-23, 26.

9, 10. Aha do lapatan ni mangkaporseai Anak ni Debata?

9 Dung 30 taon, disurat si Johannes ma Injil dohot tolu surat. Songon panurat ni Bibel na asing, diantusi ibana do lapatan ni haporseaon. Tingki manurat, dipangke do hata Junani na diterjemahon gabe ”marhaporseaon” molo di bahasa Inggris.

Mangkaporseai Anak i, lapatanna mangoloi Jesus

10 Dipatorang si Johannes, ”Naung dapotan hangoluan na salelenglelengna do na mangkaporseai Anak i; alai na so mangoloi Anak i, ndang idaon ni i hangoluan; sai na mian do tahe rimas ni Debata di ibana.” (Joh. 3:36) Mangkaporseai Anak i, lapatanna mangoloi Jesus. Sasintongna sian na disurat si Johannes, jotjot dipaboa Jesus, ingkon marhaporseaon do hita tu Jesus dohot tu Jahowa asa boi mangolu salelengna.—Joh. 3:16; 6:29, 40; 11:25, 26; 14:1, 12.

11. Songon dia do patuduhon hamauliateon tu Jahowa ala nunga taboto hasintongan?

11 Marhite tondi parbadia do Jahowa mangurupi hita mangantusi hasintongan taringot Ibana dohot AnakNa, jala mangurupi hita marhaporseaon tu nasida. (Jaha Lukas 10:21.) Songon dia do patuduhon hamauliateon tu Jahowa ala sude naung nilehonNa? Sai tadok ma mauliate ala boi hita maraleale tu Ibana marhite Jesus,  ”induk ni haporseaon i jala na paujungkonsa”. (Heb. 12:2) Tongtong ma tapatogu haporseaonta marhite martangiang dohot marsiajar Bibel.—Eps. 6:18; 1 Ptr. 2:2.

Patudu ma haporseaon marhite pasahathon barita na uli di tingki sadihari pe (Ida paragraf 12)

12. Molo marhaporseaon hita, aha do na taulahon?

12 Ingkon marhite parniulaon do tapatudu na marhaporseaon na togu hita tu janji ni Jahowa. Umpamana, tapaboa do taringot Harajaon ni Debata jala taurupi do angka halak gabe sisean ni Jesus. Hita pe mangulahon ”na denggan di saluhut halak, alai gumodang ma tu donganta sahaporseaon”. (Gal. 6:10) Marsitutu do hita pasidingkon angka pangalaho ”na buruk i rap dohot angka parulaonna”. Alana, ndang olo hita adong na manegai paralealeonta tu Jahowa.—Kol. 3: 5, 8-10.

HAPORSEAON TU DEBATA DO NA GABE OJAHANTA

13. Sadia ringkot do ”mangkaporseai Debata”? Songon dia do Bibel patorangkon i, jala boasa?

13 Bibel paboahon, ”Anggo so marhaporseaon, ndang tarbahen halomoan; ai halak na mandapothon Debata, ingkon dihaporseai: Adong Debata; laos Ibana do silehon upa tu angka na manjalahi Ibana.” (Heb. 11:6) Dipaboa do di Bibel, ”mangkaporseai Debata” do na ingkon parjolo diulahon halak Kristen na sintong. On ma na gabe ”ojahan” di hita. (Heb 6:1) Alai asing ni i, porlu do angka parange na asing asa tongtong maraleale tu Jahowa.—Jaha 2 Petrus 1:5-7; Jud. 20, 21.

14, 15. Molo dipatudos tu holong, sadia ringkot do haporseaon?

14 Jotjot do panurat ni Bibel paboahon taringot haporseaon sian angka parange na asing. Alai, haporseaon do na rumingkot tapatudu?

15 Dipatudos si Paulus do haporseaon dohot holong. Ibana manurat, ”Tung sura parhaporseaon situtu ahu, pola tarpaunsat ahu dolok, doshon na soada ma ahu, anggo so parholong ni roha ahu.” (1 Kor. 13:2) Jesus mandok, holong tu Debata do ”patik na umbalga”. (Mat. 22:35-40, Bibel siganup ari) Holong do na mambahen hita patuduhon parange na dihalomohon Debata. Bibel paboahon, ”saluhut do dihaporseai”  holong. Holong do na mambahen hita porsea tu sude na dipaboa Debata di Bibel.—1 Kor. 13:4, 7.

16, 17. Aha do na didok di Bibel taringot haporseaon dohot holong? Dia do na rumingkot sian angka parange on, jala boasa?

16 Mansai ringkot do haporseaon dohot holong, jala jotjot do panurat ni Bibel rap manurathon dua parange i. Dijujui si Paulus do angka donganna asa mamangke ”haporseaon dohot haholongon songon baju partahanan”. (1 Tes. 5:8) Disurat si Petrus do taringot Jesus, ”Atik pe so dung diida hamu Ibana, dihaholongi hamu do Ibana, na hinaporseaanmuna, nang so diida hamu Ibana nuaeng.” (1 Ptr. 1:8) Disungkun si Jakobus do angka donganna na miniahan, ”Nda dipillit Debata angka na pogos di portibi on, asa mamora nasida marhitehite haporseaon jala panean di harajaon, na pinarbagabagana tu angka na holong roha di Ibana?” (Jak. 2:5) Disurat si Johannes taringot parenta ni Debata, ”Naeng porsea hita di Goar ni Anakna Jesus Kristus, huhut masihaholongan.”1 Joh. 3:23.

17 Alai si Paulus manurat, ”Tolu do na hot: I ma haporseaon, pangkirimon dohot haholongon; alai haholongon do na umbalga.” (1 Kor. 13:13) Di ari na naeng ro, ndang porlu be hita marhaporseaon tu janji ni Jahowa, ala nunga saut be janjiNa. Marlas ni roha ma hita di ngolunta, songon na dipaboa di Bibel. Alai, ingkon sai tahaholongi do Debata dohot donganta. Sasintongna, lam togu ma holongta tu nasida salelengna.

JAHOWA MAMASUMASU HAPORSEAONTA

18, 19. Aha do hasilna ala marhaporseaon naposo ni Debata saonari, jala ise do na tama mandapot pujian?

18 Saonari, marhaporseaon jala masihaholongan do naposo ni Debata. Dipaboa nasida do taringot HarajaonNa. Nasida boi mangulahon on, ala olo nasida ditogutogu tondi parbadia. (Gal. 5:22, 23) Aha do hasilna? Lobi sian ualu juta Sitindangi marsada jala mardame di liat portibi on. Tangkas ma, mangkorhon do haporseaon dohot holong.

19 Hita boi marsada holan alani pangurupion sian Debata. Alani i, tama do Jahowa dipuji. (Jes. 55:13) Mandok mauliate do hita ala dipalua hita marhite haporseaon. (Eps. 2:8) Tongtong do Jahowa mangurupi godang jolma marhaporseaon tu Ibana. Ujungna, sude jolma di tano on gabe sempurna, tigor, jala marlas ni roha mamuji Jahowa salelengna!