Pintor tu konten

Pintor tu menu namangihut

Pintor tu daftar isi

Sitindangi Ni Jahowa

Batak (Toba)

Joujou Paboahon—Edisi Siparsiajaran  |  November 2017

Tiru ma Hatigoran dohot Asi ni Roha ni Jahowa

Tiru ma Hatigoran dohot Asi ni Roha ni Jahowa

”Uhum hasintongan ma paruhumhon hamu, jala denggan basa dohot asi ni roha ulahon hamu ganup tu donganna.”​—SAK. 7:9.

ENDE: 125, 88

1, 2. (a) Songon dia do pangkilalaan ni Jesus mangida Patik ni Debata? (b) Songon dia do siboto surat dohot halak Parise mandalanhon Patik ni Debata?

JAHOWA do na rumingkot di ngolu ni Jesus. Alani i, dihalomohon Jesus do Patik ni si Musa, ala sian Jahowa do i. Di Psalmen 40:9, dipaboa do sadia balga holong ni Jesus tu Patik ni Debata. Didok disi, ”Dipangido rohangku do patupahon lomo ni roham, ale Debatangku, jala di parsitongaan ni rohangku do patikmi.” Sian pangkataion dohot parniulaon ni Jesus, tangkas ma sun denggan do Patik i, sintong, jala parohon laba.​—Mat. 5:17-19.

2 Ndang lomo roha ni Jesus mangida siboto surat dohot halak Parise. Ai dibahen nasida do patik i gabe maol diulahon. Didok Jesus do tu nasida, ”Ai diparsampulu hamu do angka suansuanan na metmet, alai tading do angka patik na [rumingkot] dibahen hamu, songon hatigoran, parasinirohaon dohot haburjuon.” (Mat. 23:23) Lapatanna, diulahon nasida do angka Patik na so pola ringkot, gabe tading ma na rumingkot. Ndang diantusi siboto surat dohot  halak Parise lapatan ni Patik i. Didok rohanasida, dumenggan do nasida sian na asing. Alai molo Jesus, ndang songon i. Boi do diantusi Jesus boasa dilehon Jahowa Patik i.

3. Aha do na laho taulas di parsiajaran on?

3 Saonari, ndang ingkon ihuthonon ni halak Kristen be Patik ni si Musa. (Rom 7:6) Alai, boasa pola dibahen Patik i di Bibel? Ala lomo roha ni Debata taantusi, jala taulahon na rumingkot di Patik i. Di parsiajaran naung salpu, nunga taparsiajari taringot aha na ingkon ulahonon ni halak na so sangaja mambunu. Di parsiajaran on, taparsiajari ma aha do na boi tatiru sian Jahowa tingki dibahen huta parlinggoman. Di parsiajaran on, taalusi ma sungkunsungkun on: Songon dia do huta parlinggoman patuduhon asi ni roha ni Jahowa? Songon dia do i mangurupi hita pasidingkon angka na boi parohon jea tu hita? Jala songon dia do huta parlinggoman patuduhon hatigoran ni Jahowa na sun denggan? Di ganup alus ni sungkunsungkun i, taida ma songon dia hita boi maniru Debatanta.​—Jaha Epesus 5:1.

HUTA PARLINGGOMAN PATUDUHON ASI NI ROHA NI DEBATA

4, 5. (a) Didia do huta parlinggoman i dibahen, jala boasa? (b) Sian on, aha do na taparsiajari taringot Jahowa?

4 Disuru Jahowa do halak Israel asa papulikkon onom huta na laho gabe huta parlinggoman. Tolu di siamun ni sunge Jordan, jala tolu di hambirangna. Boasa ingkon songon i? Asa boi hatop jala mura halak na mambunu i lari tu huta parlinggoman i. (4 Mus. 35:11-14) Jala dalan tu huta i pe, dijaga do asa tongtong denggan. (5 Mus. 19:3) Hombar tu adat ni halak Jahudi, dibahen do tanda di angka dalan. On mangurupi halak mamboto didia do huta parlinggoman i. Ala nunga adong huta parlinggoman di Israel, ndang ingkon tu bangso na asing be halak na mambunu i mangalului parlinggoman. Alana, boi do annon ibana gabe tarelaela manomba debata na so sintong.

5 Jahowa mandok, ingkon diuhum mate do halak na mambunu. Alai molo ndang sangaja sasahalak mambunu, dipatudu Jahowa do asi ni rohaNa, jala dilinggomi do ibana. Sahalak panulingkit Bibel mandok, ”Sudena [uhum ni Debata] tangkas jala  mura antusan.” Ndang panguhum na kejam Jahowa. Ndang sai dilului Ibana hasalaan ni sasahalak. Gariada, ”parasiroha bolon” do Ibana.​—Eps. 2:4.

6. Songon dia do pangalaho ni halak Parise imbar sian asi ni roha ni Jahowa?

6 Alai ndang parasi roha halak Parise. Adat ni Jahudi paboahon, molo dung lobi sian tolu hali sasahalak mambahen sada hasalaan, ndang olo be halak Parise manalpuhon i. Dibahen Jesus do tudosan taringot nasida. Tingki i, martangiang ma halak Parise di jonok ni sijalo pajak. Didok halak Parise i ma, ”Mauliate ma dipasahat rohangku tu Ho ale Debata, ala ndang dos ahu dohot angka jolma na asing i, i ma angka jolma pangangkali, parjahat, angka na mangulahon parmainanon. Jala ndang dos ahu nang dohot [sijalo pajak] an.” Aha do lapatan ni i? ”Lea do roha” ni halak Parise mangida halak na asing, jala ndang olo nasida marasi roha.​—Luk. 18:9-14, Bibel siganup ari.

Gabe mabiar do halak mangangku sala tu hita? Marserep ni roha ma jala mura ma manalpuhon hasalaan ni dongan (Ida paragraf 4-8)

7, 8. (a) Tingki adong na mambahen hansit rohanta, songon dia do hita maniru Jahowa? (b) Boasa ingkon serep rohanta laho manalpuhon hasalaan ni na asing?

7 Alani i, unang ma tatiru halak Parise, alai tatiru ma Jahowa. Patudu ma asi ni roha. (Jaha Kolosse 3:13.) Mura ma manalpuhon hasalaan ni halak. (Luk. 17:3, 4) Boi do tasungkun di rohanta, ’Tingki jotjot dibahen sasahalak hansit rohangku, mura do ahu manalpuhon i? Naeng do rohangku mardame dohot halak na mambahen hansit rohangku?’

8 Ingkon serep do rohanta asa boi manalpuhon hasalaan ni dongan. Ala didok roha ni halak Parise, umsangap do nasida sian halak na asing, gabe ndang olo nasida manalpuhon hasalaan ni halak. Alai molo di hita, ”sumurung” do halak na asing sian hita. (Plp. 2:3) Tasungkun ma di rohanta, ’Hutiru do Jahowa jala serep do rohangku?’ Molo serep rohanta, ndang mabiar halak mangangku sala tu hita. Hita pe gabe mura ma manalpuhon hasalaan ni nasida. Unang ma muramura hita muruk, jala patudu ma asi ni roha.​—Pjm. 7:8, 9.

PASIDING MA ANGKA NA BOI PAROHON JEA

9. Songon dia do Jahowa mangurupi halak Israel mangantusi na badia do hangoluan i?

9 Boasa dibahen huta parlinggoman? Asa unang gabe mardosa halak Israel ala mate halak na so marsala. (5 Mus. 19:10) Arga do hangoluan di Jahowa, jala sogo do rohaNa tu pambunu. (Poda 6:16, 17) Alani i, ndang disoadahon Ibana hasalaan ni halak na mambunu, nang pe ndang sangaja. Tutu, boi do halak sisongon i dapotan asi ni roha. Alai parjolo, ingkon paboaonna do situasina tu angka sintua. Dung dipareso angka  sintua sude hatorangan, jala tutu na so sian sangkapna do ibana mambunu, ingkon tading di huta parlinggoman ma ibana. Disi ma ibana sahat tu na mate sintua ni malim di tingki i, manang ra, sahat tu ujung ni ngoluna. On mangurupi halak Israel mamboto, badia do hangoluan i. Ingkon marsitutu do nasida pasidingkon angka na boi parohon jea tu donganna. On patuduhon na dipasangap nasida do Silehon hangoluan.

10. Songon dia do siboto surat dohot halak Parise patuduhon, na so arga ngolu ni halak di nasida?

10 Halak Parise dohot siboto surat ndang maniru Jahowa. Ndang arga di nasida ngolu ni angka halak. Didok Jesus do tu nasida, ”Dirampas hamu do [kunci] parbinotoan; hamu sandiri ndang bongot, jala angka na naeng bongot, diambati hamu.” (Luk. 11:52) Aha do lapatan ni i? Sasintongna, ingkon nasida do na patorangkon Hata ni Debata. Ingkon urupan ni nasida do angka halak mandapot ngolu na salelengna. Alai, diambati nasida do halak laho mangihuthon Jesus, ”Partogi tu Hangoluan.” (Ul. 3:15) Dos do i songon na manogunogu halak tu hamatean. Ginjang do roha ni siboto surat dohot halak Parise, dirinasida sandiri do na diharingkothon nasida, jala ndang arga ngolu ni halak di nasida. Kejam do nasida!

11. (a) Songon dia do si Paulus maniru Jahowa? (b) Aha do na boi mangonjar rohanta asa ringgas marbarita songon si Paulus?

11 Songon dia do asa unang songon siboto surat dohot halak Parise hita? Tiru ma Jahowa, jala haholongi ma angka halak. I do na diulahon si Paulus. Marbarita na uli do ibana tu godang halak. Alani i, boi ma ibana mandok, ’Naung ias do ahu sian sapata ni mudar ni saluhut’ halak. (Jaha Ulaon ni Apostel 20:26, 27.) Boasa olo si Paulus marbarita na uli? Ala holong rohana tu angka halak. Ndang holan asa unang mardosa ibana, manang holan laho mangoloi Jahowa sambing. Alai, ala arga do ngolu ni angka halak di si Paulus. Lomo do rohana, asa mangolu salelengna nasida. (1 Kor. 9:19-23) Hita pe tatiru ma Jahowa. Lomo do roha ni Jahowa asa marhamubaon angka halak jala mangolu saleleng ni lelengna. (2 Ptr. 3:9) Hita pe songon i ma, tahaholongi ma angka halak. Molo asi rohanta tu nasida, ringgas ma hita marbarita. Dapotan las ni roha do hita molo taulahon i.

12. Boasa ingkon tapasiding angka na boi parohon jea tu ngolunta?

12 Arga do hangoluan di Jahowa. Asa boi tatiru Ibana, tapasiding ma angka na boi parohon hamatean. Manatmanat ma hita tingki manupir, karejo, martungkang, manang tingki laho tu inganan parpunguan. Olo do halak mangulahon ulaon na boi parohon jea tu dirina, ala naeng hatop manang ala ndang olo rugi. Alai molo hita, tatiru ma Jahowa, na sai mangulahon na denggan. Tarlumobi angka sintua, ingkon dipasiding nasida do angka na boi parohon jea tu nasida manang tu angka dongan. (Poda 22:3) Molo dipasingot angka sintua hamu, tangihon ma. (Gal. 6:1) Tiru ma Jahowa, asa unang gabe mardosa hamu ala mangulahon ulaon na parohon hamatean.

MANGUHUMI MA ’HOMBAR TU PANGUHUMAN’ NI JAHOWA

13, 14. Songon dia do angka sintua ni halak Israel maniru hatigoran ni Jahowa?

13 Ingkon ditiru sintua ni halak Israel do hatigoran ni Jahowa. Parjolo, ingkon  dipareso nasida do sude hatorangan. Ingkon disulingkiti nasida do aha na mambahen sasahalak mambunu, jala songon dia pangalahona najolo. Jala ingkon botoon ni nasida do, alani sogo ni rohana do umbahen na marsangkap ibana laho mambunu manang ndang. Dung i, dibahen nasida ma haputusan. (Jaha 4 Musa 35:20-24.) Molo adong dua saksi manang lobi na mangida na masa i, boi do diuhum na mambunu i.​—4 Mus. 35:30.

14 Dung tangkas diboto nasida sude hatorangan, ingkon diingot nasida do pangalaho ni na mambunu i. Ndang holan hasalaanna i na dipingkiri nasida. Porlu do panimbangion tingki mangida bukti. Alai na rumingkot, dihaporluhon nasida do tondi parbadia ni Jahowa, asa boi ditiru nasida bisuk ni Jahowa, asi ni rohaNa, dohot hatigoranNa.​—2 Mus. 34:6, 7.

15. Aha do imbar ni Jesus dohot halak Parise?

15 Ndang marasi ni roha halak Parise tingki manguhumi. Holan hasalaan ni sasahalak do na diida nasida. Ndang dipartimbangkon nasida pangalaho ni sasahalak tingki manguhumi. Umpamana, tingki ro Jesus tu jabu ni si Mateus, disungkun halak Parise ma siseanna, ’Boasa rap mangan Gurumuna i dohot angka sijalo pajak dohot angka halak pardosa?’ Dialusi Jesus ma, ”Ndang halak na [sehat] mangalului dokter, alai halak na marsahit do. Mulak ma hamu, parsiajari hamu ma hata ni buku na badia i, na mandok: ’Asi ni roha do na Huhalomohon, ndang pelean. Ai ndang na laho manjou halak partigor ahu umbahen na ro, alai na laho manjou halak pardosa do.’” (Mat. 9:9-13, Bibel siganup ari) Na gabe diparsoada Jesus do hasalaan ni angka pardosa i? Ndang. Dipangido roha ni Jesus do asa marhamubaon nasida. Jala i do na sai dibaritahon ibana. (Mat. 4:17) Didok roha ni Jesus, adong do ’sijalo pajak dohot angka halak pardosa’ na olo muba. Ndang holan na laho mangan sambing nasida ro tu jabu ni si Mateus, alai ala mangihuthon Jesus do. (Mrk. 2:15) Imbar do halak Parise sian Jesus. Didok roha ni nasida, ndang marpangkirimon, jala ndang na laho muba be angka pardosa dohot sijalo pajak i. Imbar do nasida sian Jahowa na Parasiroha!

16. Aha do na ingkon sulingkitan ni panitia pengadilan?

16 Saonari, angka sintua pe porlu do maniru Jahowa, Debata ’na mangkaholongi’ hatigoran. (Ps. 37:28) Parjolo, ingkon ’tangkas do sulingkitan’ ni nasida, tutu do sasahalak mangulahon dosa manang ndang. Andorang so mambahen haputusan, ingkon diihuthon nasida do tudutudu sian Bibel. (5 Mus. 13:13-15) Tingki gabe anggota panitia pengadilan, ingkon manat do nasida manulingkiti, tutu do naung marhamubaon halak na marsala i manang ndang. Ndang sai mura mangulahon on. Sasahalak didok marhamubaon molo disolsoli ibana hasalaanna i. (Pgk. 3:3) Ingkon marhamubaon do sasahalak asa boi dapotan asi ni roha. *

17, 18. Songon dia do angka sintua mamboto, naung marhamubaon halak na mangulahon dosa? (Ida gombar di mula ni parsiajaran.)

17 Diboto Jahowa dohot Jesus do pingkiran dohot pangkilalaan ni sasahalak. Ala siboto roha do nasida. Alai, ndang siboto roha angka sintua. Alani i, songon  dia do angka sintua mamboto, na tutu do sasahalak naung marhamubaon? Parjolo, pangido ma bisuk dohot pangantusion sian Jahowa. (1 Raj. 3:9) Na paduahon, pangke ma Bibel dohot publikasinta laho mangurupi hamu mangida imbar ni ”arsak ni roha ni portibi” dohot ”arsak ni roha, na sian Debata” manang hamubaon na sasintongna. (2 Kor. 7:10, 11) Ida ma songon dia Bibel patorangkon taringot halak na marhamubaon dohot na so marhamubaon. Parrohahon ma songon dia pangkilalaanna, pingkiranna, dohot parniulaonna.

18 Na patoluhon, pingkirhon ma pangalaho ni na marsala i. Unang ma holan hasalaanna i na diida hamu. Pingkiri ma, boasa gabe songon i ibana? Aha do bonsirna? Aha do ambatambat na diadopi ibana, jala aha do na so boi diulahon ibana? Di Bibel, didok do molo na manguluhon huria, i ma Jesus, ’ndang manguhum marguru tu parnida ni matana, jala ndang manguhum marguru tu na binege ni pinggolna. Marhitehite hatigoran tahe uhumonna angka na pogos, jala marhitehite hasintongan patingkosonna uhum tu angka na dangol di tano on.’ (Jes. 11:3, 4) Nunga dipillit Jesus hamu, angka sintua laho manarihon huriana. Alani i, urupanna do hamu asa boi marasi roha jala tigor tingki manguhumi. (Mat. 18:18-20) Mauliate ma ala adong do angka sintua manarihon hita! Diurupi nasida do hita asa marasi ni roha jala patuduhon hatigoran tu angka dongan.

19. Dung taparsiajari taringot huta parlinggoman, aha do na laho ulahononmuna?

19 Marisi ”parbinotoan dohot hasintongan” do Patik ni si Musa. On mangurupi hita mananda Jahowa dohot parangeNa. (Rom 2:20) Umpamana, huta parlinggoman na didok di Patik i, mangurupi angka sintua mangantusi ”uhum hasintongan”. On mangurupi hita asa ’mardenggan basa dohot marasi roha’ tu angka dongan. (Sak. 7:9) Tutu, ndang ingkon taihuthon be Patik ni si Musa i. Alai tongtong do dihalomohon Jahowa hatigoran dohot asi ni roha. Tontu sada hasangapon do di hita ala boi dohot manomba Ibana. Alani i, tatiru ma parangeNa jala tongtong ma hita marlinggom tu Ibana!

^ par. 16 Ida ”Pertanyaan Pembaca” di Menara Pengawal 15 September 2006, halaman 30.