”Ai denggan do endehononhon Debatanta.”​—PS. 147:1.

ENDE: 10, 2 *

1. Boasa ringkot mangendehon pujian tu Jahowa?

SAHALAK pangarang lagu na tarbarita mandok, ”Hatahata mangkorhon tu pingkiranta. Musik, mangkorhon tu pangkilalaanta. Alai ende, mangkorhon tu pingkiran dohot tu pangkilalaanta.” Jadi, molo marende hita mamuji Jahowa, on patuduhon holongta jala mambahen hita lam jonok tu Ibana. I do alana, mansai ringkot do marende laho mamuji Jahowa, tingki sahalakta manang tingki rap dohot angka dongan.

2, 3. (a) Songon dia do pangkilalaan ni pigapiga halak tingki marende di parpunguan? (b) Sungkunsungkun aha do na laho taalusi di parsiajaran on?

2 Songon dia do pangkilalaanmuna tingki marende di parpunguan? Maila do hamu? Di pigapiga inganan, maila do angka baoa marende di jolo ni na torop. Boi do on mangkorhon na roa di huria. Tarlumobi, molo maila angka sintua, manang diulahon nasida ulaon na asing tingki marende di parpunguan.​—Ps. 30:13.

3 Mansai ringkot do marende mamuji Jahowa. Alani i,  unang be mardalani hita molo dung dipungka marende di parpunguan. Tasungkun ma di rohanta, ’Songon dia do pangkilalaanku tingki marende di parpunguan? Aha do na boi huulahon asa unang maila marende? Jala, songon dia do cara marende sian nasa roha?’

MANSAI RINGKOT DO MARENDE MAMUJI JAHOWA

4, 5. Songon dia do halak Israel najolo marmusik laho mamuji Debata?

4 Sian najolo, dipangke naposo ni Jahowa do musik laho mamuji Debata. Andorang so manimbil halak Israel, diharingkothon nasida do marende laho mamuji Jahowa. Umpamana, tingki laho pajongjongkon bagas joro, diatur si Daud do 4.000 halak Lepi laho marmusik mamuji Jahowa. Jala 288 halak sian nasida ”pande di parendeon tu Jahowa”.​—1 Kron. 23:5; 25:7.

5 Ringkot do musik dohot marende di peresmian bagas joro. Songon na dipaboa di Bibel, ’Jadi hira sisada soara begeon halak na marsarune dohot angka na marende laho mamuji dohot mandok mauliate tu Jahowa. Jadi dung dipangiar soara i binahen ni sarune, arbap, dohot angka na asing dohot binahen ni pamujimujion di Jahowa, . . . hamuliaon ni Jahowa manggohi joro ni Debata.’ Tontu dipatogu do haporseaon ni halak Israel di tingki i!​—2 Kron. 5:13, 14; 7:6.

6. Tingki si Nehemia gabe gubernur di Jerusalem, songon dia do ibana mangatur parende dohot parmusik?

6 Huhut mangaradoti ulaon paulihon tembok Jerusalem, diuluhon si Nehemia do halak Lepi laho marende dohot marmusik. Alani i, gabe tamba do las ni roha ni nasida tingki diresmihon tembok i. Dipillit si Nehemia do ”dua rongkanan” manang dua punguan parende. Marudurudur ma dua punguan i di atas ni tembok. Sada tu siamun, jala na sada nai tu hambirang sahat tu na pajumpang nasida di inganan na jumonok tu bagas joro. Mansai gogo do soara ni nasida marende, tarbege sian na dao. (Neh. 12:27, 28, 31, 38, 40, 43) Tontu las do roha ni Jahowa mangida naposoNa, na marlas ni roha marende mamuji Ibana.

7. Songon dia do Jesus patuduhon na ringkot do marende laho mamuji Jahowa?

7 Di jaman ni Jesus, tongtong do ringkot musik laho mamuji Jahowa. Rimangi ma taringot borngin andorang so mate Jesus. I ma borngin na mansai ringkot. Dung dibahen Jesus parpadanan dohot angka siseanna, marende do nasida. Diendehon nasida do ende pujipujian tu Jahowa.​—Jaha Mateus 26:30.

8. Aha do na boi tatiru sian halak Kristen di abad na parjolo?

8 Sitiruon na denggan do halak Kristen di abad na parjolo. Di jabujabu do nasida marpungu laho manomba Jahowa. Nang pe ndang songon uli ni bagas joro jabu ni nasida, alai las do rohanasida marende. Didok apostel Paulus do tu angka dongan di tingki i, ’Masiajaran jala masipaingotan ma hamu marhitehite angka ende psalmen, endeende pujipujian dohot  ende partondion; endehon hamu ma Debata di bagasan rohamuna marroha hamauliateon!’ (Kol. 3:16) Ingkon ”marroha hamauliateon” do hita tingki marende sian buku endenta. Alana, on ma sada cara ni ”naposo haposan jala na marroha”, ”mangalehon [hita] mangan di tingkina”.​—Mat. 24:45.

SONGON DIA DO CARANA ASA UNANG MAILA MARENDE?

9. (a) Boasa adong na maila marende di parpunguan manang di kebaktian? (b) Songon dia do cara na denggan laho mangendehon pujian tu Jahowa, jala ise do na ingkon gabe sitiruon? (Ida gombar di mula ni parsiajaran.)

9 Boasa adong na maila marende? Ra, ala ndang somal di keluarga manang di luatna marende. Manang, ala soarana ndang songon soara ni parende na di TV dohot di radio. Alai, sude do hita ingkon mangendehon pujipujian tu Jahowa. Alani i, marlas ni roha ma hamu marende! Timbo ma tiop buku endemuna, jala padirgak ma ulumuna. (Esr. 3:11; jaha Psalmen 147:1.) Di angka Bale Harajaon saonari, nunga dibahen layar. Alani i, ndang pola ingkon sai unduk be hita laho manjaha buku endenta tingki marende. Asing ni i, marende do angka sintua di Singkola Pangkobasion tu Harajaon. On patuduhon ingkon gabe sitiruon do nasida tingki marende di parpunguan.

10. Molo maila hita marende, aha do na ingkon taingot?

10 Godang do halak na maila marende, ala ndang bagak soarana manang pagogohu. Alai taingot ma, nang pe ”saluhut hita jotjot marsala” tingki mangkatai, alai ndang gabe maila hita mangkatai. (Jak. 3:2) Alani i, unang ma gabe ndang olo hita  marende mamuji Jahowa ala ndang bagak soaranta.

11, 12. Songon dia do carana asa lam denggan hita marende?

11 Olo do maila hita marende ala ndang taboto carana. Taparrohahon ma pigapiga cara na boi mangurupi hita asa denggan marende. *

12 Boi do gabe denggan soaramuna tingki marende, molo diparsiajari hamu cara marhosa tingki marende. Songon arus listrik na mambahen lampu galak, songon i ma hosanta boi mambahen gogo soaranta tingki marende. Ingkon songon na mangkatai ma gogo ni soaranta tingki marende, manang boi do umgogo sian i. (Ida ma saran di Buku Memperoleh Manfaat dari Pendidikan Sekolah Pelayanan Teokratis, halaman 181-184, na marjudul ”Mengatur Persediaan Udara Saudara dengan Baik.”) Songon na didok di Bibel, ”marolopolop” manang gogo do soara ni naposo ni Jahowa tingki mangendehon pujipujian.​—Ps. 33:1-3.

13. Patorang ma songon dia carana asa unang maila marende.

13 Tingki panombaon na sasaripe, manang tingki marsiajar Bibel sahalakmuna, pillit ma ende na dihalomohon hamu sian buku endenta. Gogo ma jaha lirikna. Jaha ma muse sakalimat sahali marhosa. Dungkon i, gogo ma endehon. (Jes. 24:14) Gabe lam denggan jala lam gogo ma soaramuna marende. Denggan do i. Unang pola maila alani i!

14. (a) Songon dia do asa boi gogo soaranta tingki marende? (Ida kotak ” Cara Asa Lam Denggan Marende.”) (b) Aha do na boi taulahon molo panengethu manang pabalgahu soaranta?

14 Asa boi gogo soaranta tingki marende, ingkon bungka do pamanganta. Alani i, tingki marende, talak ma tabungka pamanganta lobi sian tingki hita mangkatai. Alai songon dia do molo panengethu manang pabalgahu soaranta? Ida ma tudutudu di buku Memperoleh Manfaat dari Pendidikan Sekolah Pelayanan Teokratis, di kotak halaman 184, na  marjudul Mengatasi Problem-Problem Spesifik.”

 

ENDEHON MA PUJIAN SIAN NASA ROHA

15. (a) Aha do na dipaboa di parpunguan siganup taon di taon 2016? (b) Boasa dipaimbaru buku endenta?

15 Di parpunguan siganup taon, di taon 2016, donganta si Stephen Lett, sada sian Punguan na Mangaradoti Organisasi, paboahon nunga dipaimbaru buku endenta. Judulna, Marlas ni Roha Marende tu Jahowa. Mansai las do roha ni angka na ro mambege i. Dipaboa disi, dibahen pe buku ende on, ala dipaimbaru do Kitab Suci Terjemahan Dunia Baru. Alani i, ingkon muba ma lirik ni endenta. Ndang dipangke be angka hata manang pandohan najolo, na so dipangke be di Bibel Terjemahan Dunia Baru. Adong do muse dibahen ende na baru taringot ulaon marbarita dohot tobusan. Ala mansai ringkot do marende mamuji Jahowa, marsitutu do Punguan na Mangaradoti Organisasi asa lam denggan buku endenta. Dos do sampulna songon sampul ni Bibel Terjemahan Dunia Baru.

16, 17. Angka aha do na diganti di buku endenta na baru?

16 Asa mura tapangke, dibagi do buku ende on mangihuthon topikna.  Umpamana, nomor 1 sahat tu nomor 12 paboahon taringot Jahowa. Nomor 13 sahat tu 20 paboahon taringot Jesus dohot tobusan. Dibahen do i di halaman na parjolo. Gabe ummura ma angka donganta baoa mamillit ende na pas tu jamitana.

17 Diganti do pigapiga lirik ni ende i asa lam tangkas lapatanna. Alani i, gabe boi ma hita marende sian nasa roha. Diganti do angka hata na so pola jotjot dihatahon. Songon judul ni ende ”Lambas ni roha” diganti do gabe ”Tongtong ma Sabar”, suang songon i nang lirikna. Ende na marjudul ”Jaga ma Roham”, diganti gabe ”Tajaga ma Rohanta.” Boasa? Alana tingki diendehon di parpunguan, hira na manuru halak do angka hata di ende i. Tontu, gabe ndang tama begeon molo halak na baru, angka na poso, dohot angka donganta borua na mangendehon ende on. Alani i, diganti ma judul dohot lirikna.

Marlatik marende ma di panombaon na sasaripe (Ida paragraf 18)

18. Boasa ringkot taparsiajari angka endenta na baru? (Ida surat na di toru.)

18 Songon tangiang do godangan angka ende di buku Marlas ni Roha Marende tu Jahowa. On mangurupi hita paboahon pangkilalaanta tu Jahowa. Asing ni i, adong do ende na mangurupi hita asa ”masipajujuan tu haholongon dohot tu angka ulaon na denggan”. (Heb. 10:24) Alani i, lomo do rohanta mamboto nadana, ketukanna, dohot lirikna. Carana, tangihon ma rekaman ni angka donganta na mangendehon angka ende di jw.org. Molo dung marlatik hita di jabu, boi ma hita marende sian nasa roha jala ndang maila. *

19. Songon dia do caranta manomba Jahowa di huria?

19 Taingot ma, mansai ringkot do marende di panombaonta. On ma caranta patuduhon holong dohot hamauliateonta tu Jahowa di sude basabasaNa. (Jaha Jesaya 12:5.) Molo marlas ni roha hita marende, gabe dohot do donganta marlas ni roha. Sude hita na di huria, na poso, na matua, dohot na baru di hasintongan boi marlas ni roha marende. Alani i, sian nasa roha ma hita marende jala unang ma maila. Ulahon ma hata ni panurat psalmen na mandok, ’Endehon hamu ma ende di Jahowa!’ Alani i, marlas ni roha ma marende!​—Ps. 96:1.

^ par. 3 Mulai minggu on, buku Marlas ni Roha Marende tu Jahowa ma buku ende na tapangke.

^ par. 11 Laho mangida cara asa denggan marende, ida ma jamita di JW Broadcasting (Bahasa Indonesia) na marjudul David H. Splane: Persiapkan Diri untuk Menyanyi Lagu-Lagu Baru(ida di bagian DARI STUDIO KAMI > KHOTBAH).

^ par. 18 Ganup manogot dohot arian, andorang so dipungka kebaktian, diputar do musik saleleng sampulu minut. On mambahen hita marlas ni roha marende jala mangurupi hita paradehon diri manangihon acara. Alani i, unang be mardalani manang mangkatahatai hita tingki diputar musik, tatangihon ma musik i.