Porsea do marjuta halak di portibi on molo Natal i ari hatutubu ni Jesus Kristus. Didok rohamu, marnatal do angka apostel dohot sisean ni Jesus di abad na parjolo? Diboto hamu do aha na dipaboa Bibel taringot ari hatutubu? Alus ni sungkunsungkun on mangurupi hita manontuhon, ingkon marnatal do halak Kristen manang na ndang.

Parjolo, ndang adong dipaboa di Bibel molo Jesus dohot angka naposo ni Debata marulang tahun. Alai, disurat do di Bibel taringot dua halak na marulang tahun. Ndang sisomba Jahowa nasida, jala mangkorhon na so denggan do acara ulang tahun ni nasida. (1 Musa 40:20; Markus 6:21) Hombar tu hatorangan ni Encyclopædia Britannica, ndang olo halak Kristen di abad na parjolo marulang tahun, ”ala hasomalan ni halak parbegu do i”.

Tanggal piga do Jesus tubu?

Asing ni i, ndang adong dipaboa di Bibel tanggal piga Jesus tubu. Didok di Cyclopedia McClintock dohot Strong, ”Molo tajaha Padan na Imbaru manang angka buku na asing, ndang adong dipaboa tanggal piga Jesus tubu.” Molo lomo roha ni Jesus asa dirayahon ari hatutubuna, tontu dipaboa do tanggalna tu angka siseanna.

Paduahon, ndang adong dipaboa di Bibel molo Jesus manang angka siseanna marnatal. New Catholic Encyclopedia paboahon, ari Natal parjolo sahali dipaboa ”di Chronograph ni si Philocalus, sahalak panurat sian Rom na manurat hatorangan i taon 336 M”. Tangkas ma, dung sae Bibel disurat jala nunga marratus taon dungkon di tano on Jesus, baru pe diboto taringot Natal. Alani i, didok si McClintock dohot si Strong do ”ndang disuru Debata hita marnatal, jala ndang disurat taringot on di Padan na Imbaru”. *

Ulaon aha do na disuru Jesus asa diulahon siseanna?

Dilehon Jesus do tudutudu na tangkas tu siseanna taringot aha na ingkon diulahon nasida, jala disurat do on di Bibel. Alai, ndang disuru Jesus angka siseanna marnatal. Somalna, ndang lomo roha ni guru singkola molo diulahon muridna ulaon na so diparentahon. Suang songon i ma Jesus. Didok do tu angka siseanna asa ”unang nilobian na tarsurat” di Bibel.​—1 Korint 4:6.

Sasintongna, adong do sada ulaon na disuru Jesus asa diulahon siseanna. Ulaon on didok Parningotan Ari Hamamate ni Jesus. Didok Jesus do tu angka siseanna andigan i ulahonon ni nasida jala dipatudu do cara mangulahon i. Disurat do on di Bibel jala dipaboa do tanggal piga ari hamamate ni Jesus.​—Lukas 22:19; 1 Korint 11:25.

Songon naung taulas, ari Natal i mangarayahon ari hatutubu. Taboto muse, halak Kristen di abad na parjolo pe ndang olo marnatal. Asing ni i, ndang adong dipaboa di Bibel molo Jesus manang angka siseanna marnatal. Hombar tu angka hatorangan on, marjuta halak Kristen di liat portibi on porsea molo Natal i ndang boi diulahon.

^ par. 6 Asa dapotmuna gumodang hatorangan taringot mula ni ari Natal, ida ma artikel ”PEMBACA BERTANYA . . . Apa Saja Fakta tentang Natal?” di Menara Pengawal 1 Desember 2014, jala adong do on di www.jw.org/id.

Ingkon Marnatal do Halak Kristen?halak-kristen-natal-bibelIngkon Marnatal do Halak Kristen? Adong do didok di Bibel taringot Natal?Godang do na mandok Natal i ari hatutubu ni Jesus. Molo tutu do i, aha do na didok Bibel taringot ari hatutubu?kristen, natal, bibel, ari hatutubu, mulana, ari raya, bangso parbegu, liburanIngkon Marnatal do Halak Kristen?Ingkon Marnatal do Halak Kristen?Marnatal do angka sisean ni Jesus?Ingkon Marnatal do Halak Kristen?Ingkon Marnatal do Halak Kristen?