”Saluhutna silehonlehon na denggan, nasa ulibasa na mauliutus, i ma na ro sian ginjang, sian Ama ni na tiur, na so olo muba, na so umboto agia halinu ni hamimimbar.” (Jakobus 1:17) Ayat on patuduhon burju ni roha ni Debata Jahowa. Adong do sada silehonlehon na ummarga sian sasude naung dilehon Debata tu jolma. Aha ma i? Alusna disurat di Johannes 3:16, ”Ai songon on do holong ni roha ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na salelenglelengna di ibana.”

Silehonlehon na ummarga sian saluhut, i ma tobusan marhite Jesus Kristus. Ala adong tobusan, boi ma hita malua sian dosa, hagaleon ala lam matua, dohot hamatean. (Psalmen 51:7; Johannes 8:34) Sasintongna, ndang boi hita paluahon dirinta sandiri sian parhatobanon ni dosa. Alai marhite holong, diparade Debata do na tahaporluhon asa boi malua sian dosa. Marhite mangalehon Jesus Kristus gabe tobusan, dilehon Jahowa ma pangkirimon tu jolma na marsihohot asa boi mangolu salelengna. Alai, aha do tobusan i? Boasa i ringkot tu hita? Jala songon dia carana asa tadapot laba sian i?

Tobusan, i ma arga sigararon laho manggarar harugian manang paluahon sian parhatobanon. Dipatorang do di Bibel taringot tu jolma na parjolo, i ma si Adam dohot si Hawa. Mulana, ndang mardosa nasida. Sasintongna, boi do nasida mangolu salelenglelengna di tano on raphon pinomparna. (1 Musa 1:26-28) Alai mangalo do nasida tu Debata. Gabe mardosa ma nasida jala ndang boi mangolu salelengna. Aha do pangkorhonna? Didok di Bibel, ”Bongot dosa i tu portibi on marhite sian sada halak jala marhitehite dosa i ro hamatean, songon i sahat hamatean i tu saluhut jolma, ala sude nasida mardosa.” (Rom 5:12) Alani i, gabe mardosa ma sude pinompar ni si Adam jala boi mate.

Taringot tu tobusan on, ingkon dos do arga ni sigararon i tu hangoluan naung mago dibahen si Adam. Tingki si Adam mangalo tu Debata, mardosa ma ibana jala mago ma hangoluan na sempurna sian dirina. Hombar tu na didok Bibel, ulaon ni si Adam mambahen pinomparna mardosa. Asa boi malua sian dosa, ingkon adong do tobusan tu pinompar ni si Adam. Hangoluan ni Jesus Kristus na sempurna ma na boi manobus i. (Rom 5:19; Epesus 1:7) On boi saut ala Debata do na paradehon tobusan i. Gabe boi ma tadapot hangoluan na salelengna di paradeiso di tano on.​—Pangungkapon 21:3-5.

Tontu satolop do hita mandok molo tobusan i hadiah na ummarga na mambahen hita boi mangolu salelengna. Asa boi tapatudu pangargaion tu ”silehonlehon na denggan” on, taulas ma songon dia hadiah on hombar tu hatorangan na adong di halaman 4 dohot 5 di majalah on, asa taboto dia do hadiah na mambahen las roha.

Mambahen las rohanta. Nunga disuanhon Debata tu roha ni sude jolma naeng mangolu salelengna. (Parjamita 3:11) Molo mangasahon gogonta sandiri, ndang boi hita mangolu salelengna. Alai boi do i saut marhite tobusan. Didok di Bibel, ”Ai upa tinuhor ni dosa do hamatean; alai basabasa ni Debata do hangoluan salelenglelengna marhitehite Kristus Jesus Tuhanta i.”​—Rom 6:23.

Mangalehon na porlu di hita. Ndang boi jolma paradehon tobusan. Didok di Bibel, ”Maargahu do partobus ni tondina i, ingkon  pasohotonna do salelenglelengna.” (Psalmen 49:9) Alani i, holan marhite pangurupion ni Debata do hita boi malua sian dosa dohot hamatean. Jala, nunga diparade Debata na tahaporluhon marhite ”panobusion na di bagasan Kristus Jesus”.​—Rom 3:23, 24.

Di tingki na pas. Didok di Bibel, ”Uju pardosa dope hita, ai disi do mate Kristus humongkop hita.” (Rom 5:8) Ala tobusan i dilehon ”uju pardosa dope hita”, on patuduhon mansai holong roha ni Debata tu hita. Nang pe marsitaonon alani dosa, gabe adong do pangkirimonta marhite tobusan.

Patuduhon holong ni roha. Dipaboa do di Bibel boasa dilehon Debata AnakNa gabe tobusan. Didok, ”Sian on do gabe patar holong ni roha ni Debata na tu hita; sian naung sinuruna i Anakna na sasada i tu portibi on, asa mangolu hita marhitehite Ibana. Di bagasan on do holong ni roha i: Ndada hita mangkaholongi Debata; Ibana do mangkaholongi hita.”​—1 Johannes 4:9, 10.

Songon dia do caramuna mangargai hadiah na ummarga on? Didok di Johannes 3:16, dipalua ma ”na porsea” tu Jesus. Lapatan ni marhaporseaon, i ma ’pos ni roha di angka sihirimon’. (Heber 11:1) Asa pos rohanta tu pangkirimon i, ringkot do mandapot parbinotoan. Alani i, las rohanami manjujui hamu asa marsiajar taringot tu Jahowa na mangalehon ”silehonlehon na denggan”. Asing ni i, parsiajari ma aha na ingkon ulahononmu asa boi mandapot hangoluan salelengna na diparade marhite tobusan ni Jesus.

Boi do lam bagas pangantusionmuna taringot on molo dipareso hamu hatorangan sian Bibel. Ida ma situsnami di www.jw.org/bbc. Las do roha ni Sitindangi Ni Jahowa mangurupi hamu marsiajar Bibel. Pos do rohanami, molo diparsiajari hamu taringot on jala mandapot laba sian hadiah na ummarga, taronjar ma rohamu mandok mauliate ”tu Debata marhitehite Jesus Kristus Tuhanta i”.​—Rom 7:25.