Pintor tu konten

Pintor tu daftar isi

Sitindangi Ni Jahowa

Pillit Hata Batak (Toba)

Cara na Denggan Maradophon Hasalaan

Cara na Denggan Maradophon Hasalaan

Las do roha ni si Anton dohot si Margaret * ala ro boruna, helana, dohot dua pahompuna. Sahalak pangalompa na jago do si Margaret. Andorang so mulak boruna i, dilompa si Margaret ma makaroni dohot keju, ala lomo hian do roha ni pahompuna mangallang i.

Dung sae dilompa, diboan si Margaret ma i tu meja jala naeng mangan nama nasida. Tingki dibungka ibana tutup ni panci i, tarsonggot ma ibana. Lupa ibana pamasukkon makaroni tu lompalompana i. Gabe holan keju ma na adong di panci i. *

Hea do hita sude mangulahon na sala. Ra, tadok hatanta so jolo tapingkiri, taulahon ulaon na maralo tu roha ni sasahalak, manang muramura hita lupa. Boasa hita boi mangulahon na sala? Songon dia do hita maradophon i? Boi do i tapasiding? Asa boi taalusi sungkunsungkun i, ingkon taboto do cara na denggan maradophon hasalaan.

NA DIDOK DEBATA TARINGOT HASALAAN

Las do rohanta mandapot pujian tingki taulahon na denggan. Alai molo sala hita, olo do hita martanggungjawab? Ingkon serep do rohanta asa boi mangulahon i.

Molo holan dirinta do na tapingkiri, tontu gabe masidalian do hita jala ndang olo mangangku sala. Molo taulahon songon i, marjea do hita. Boi do gabe ndang marnasae parsoalan i, jala gabe halak na asing na disalahon. Nang pe boi hita malua sian pangkorhon ni hasalaanta saonari, taingot ma ”ganup hita on, alusanta do Debata taringot tu dirinta be”.​—Rom 14:12.

Sintong do cara ni Debata maradophon hasalaan. Di buku Psalmen, didok do Debata i ”parasi roha jala pardengganbasa”; jala ”ndang tongtong Ibana manorui, jala ndang gotos rohana saleleng ni lelengna”. Diboto Ibana mardosa dope hita, adong hagaleonta, jala ”diingot do orbuk hita”.​—Psalmen 103:8, 9, 14.

Asing ni i, dos songon ama parasi roha do Debata. Lomo rohaNa asa tatiru caraNa maradophon hasalaan. (Psalmen 130:3) Marhite Bibel, diurupi Debata do hita asa denggan maradophon hasalaanta dohot hasalaan ni na asing.

TINGKI MANGULAHON HASALAAN

Somalna, molo sasahalak mambahen hasalaan, marsitutu do ibana asa gabe halak na asing na disalahon. Manang, ndang olo ibana mangangkui hasalaanna. Molo dibahen hamu  hansit roha ni sasahalak, pintor mangangku sala ma jala tongtong mardongan tu ibana. Hea do hasalaan na dibahen hamu mambahen ndang tabo pangkilalaanmu dohot pangkilalaan ni na asing? Unang pintor jut rohanta mangida dirinta manang gabe tasalahon halak na asing. Molo marsidalian hita, on boi mambahen maol pasaehon parsoalan. Marsitutu ma padengganhon situasina jala manat ma hita asa unang mangulahon hasalaan na sarupa.

Molo adong sasahalak na mangulahon hasalaan, mura do hita patuduhon na so lomo rohanta mangida ibana. Taihuthon ma poda ni Jesus na mandok, ”Saluhut na pinangido ni rohamu, sibahenon ni halak tu hamu, i ma bahen hamu tu nasida.” (Mateus 7:12) Molo taulahon hasalaan, tontu hirim do rohanta asa disalpuhon hasalaanta i jala mandapot asi ni roha. Antong, olo do hita marasi ni roha tu halak na mangulahon hasalaan?​—Epesus 4:32.

ANGKA PODA NA RINGKOT TAINGOT

Sada kamus mandok, sasahalak gabe mangulahon hasalaan ala ”hurang pangantusionna, sala mangantusi, jala ndang diboto aha na masa na sasintongna”. Taangkui ma, sipata songon i do hita. Alai molo tarimangi angka poda na disurat di Bibel, diurupi ma hita asa unang mangulahon hasalaan.

Umpamana, didok di Poda 18:13, ”Manang ise na mangulak hata, so jolo sahat ditangihon, otona do i, jala parohon haurahon.” Molo denggan tatangihon hatorangan ni sasahalak jala denggan tapingkirhon alusta, boi ma tapasiding hata na pahansithon roha manang na mambahen jut roha. Molo denggan tatangihon, boi ma taantusi situasina, jala diurupi ma hita asa unang mangulahon hasalaan.

Adong muse poda na mandok, ”Molo tarbahen, intap na tarpatupa hamu, tiop hamu ma dame maradophon halak saluhutna!” (Rom 12:18) Marsitutu ma asa tongtong mardame jala marsada. Patudu ma pangargaion tu halak na asing. Puji ma nasida jala patogu ma roha ni nasida. Molo taulahon songon i, ndang sai tapaingotingot be hata manang ulaon ni sasahalak na pahansithon roha. Gabe mura ma sae parsoalan i.

Manat ma asa unang taulahon muse hasalaan na hea taulahon. Unang ma marsidalian, alai bahen ma situasi on mangurupi hamu patuduhon angka parange na denggan. Ra, gabe boi ma dipatudu hamu hasabaron, haburjuon, pangarajaion diri, halambohon, hadameon, dohot holong ni roha. (Galatia 5:22, 23) Marlawak ma asa tabo pangkilalaan. Asa diboto hamu aha na boi ulahononmu tu joloan ni ari, unang ma mangkaringkothon diri.

LABANA TU HITA

Molo sintong pangantusionta taringot tu hasalaan, boi ma denggan caranta maradophon i. Boi ma dame rohanta jala tongtong denggan paralealeonta tu na asing. Molo ndang taulahon hasalaan na sarupa, lam marbisuk ma hita jala las roha ni halak mangida hita. Ndang marmetmet ni roha be hita jala marsitutu asa boi muba. Molo sapangkilalaan hita tu na asing, boi ma hita tongtong jonok tu nasida. Nasida pe marsitutu do asa unang mangulahon hasalaan. Na rumingkot, tatiru ma holong ni Debata jala rade manalpuhon hasalaan.​—Kolosse 3:13.

Molo taingot nangkin, gabe muruk do keluarga ni si Margaret alani hasalaanna i? Ndang songon i. Gabe mengkel do nasida, tarlumobi si Margaret, jala tongtong do nasida mangan nang pe ndang adong makaroni i. On ma pengalaman ni nasida na so tarhalupahon. Dung martaontaon, marhasohotan ma pahompuna i jala dicaritahon ma taringot i tu ianakhon ni nasida.

^ par. 2 Pigapiga goar nunga diganti.

^ par. 3 Makaroni dohot keju na dilompa i dibahen sian pasta makaroni na disiram dohot saus keju.